བོད་ཀྱི་ལོ་ཐོའི་རྩིས་སྟངས་ལྟར།ཧོར་ཟླ་དང་པོའི་ཚེས་གཅིག་ཉིན་ནི་བོད་སྤྱིའི་ལོ་གཅིག་གི་ལོ་གསར་པར་རྟེན་འབྲེལ་ཞུ་བ་དང་ལོ་གསར་པའི་ནང་བྱ་བ་ཐམས་ཅད་ལས་ལམ་དུ་འགྲོའི་རྟེན་འབྲེལ་ཞུ་བ་ཞིག་ཡིན་པས།དེ་བས་ན་ཧོར་ཟླ་བཅུ་གཉིས་པའི་ཚེས་ཉེ་དགུའི་སྔར་མོ་ནམ་ཡར་ལངས་ཏེ་དགུ་ལྡེ་དང་དགུའི་ཁྲུས་ཞིག་ཁྱིམ་ཚང་གི་ཉལ་སྟེན་དང་ཉལ་གོས་སོགས་ཕྱིར་ལ་ཕུད་དེ་སྡེབ་པའམ་འཁྲུས་བྱེད་པ་རང་གི་ལུས་དང་མགོ་ལ་སོགས་པ་ཁྲུས་པ་དང་སྐྲ་བཞར་བ་མདོ་ན་གཙང་སྦྲ་ཡང་དག་པ་བྱེད་སྲོལ་མཆིས།དགོང་མོར་དགུ་ཐུག་ཟེར་བ་ཐུག་པར་བསྐོལ་ནས་ཐུག་པའི་ནང་དོན་ལ་འབྲས་ཐུག་བའམ་གྲོ་ཐུག་ཞིག་གི་ནང་ལ་ཟས་སྣ་དགུ་འཛོམས་པ་བྱེད་དེ་ཁྱིམ་ཚང་ཡོངས་རྫོགས་འདུས་འཛམས་ཐུག་པ་འཐུང་།དེ་ནི་བར་ལོ་གསར་པའི་ནང་ཟས་རིགས་ཕུན་སུམ་ཚོགས་པའི་རྟེན་འབྲེལ་གྱི་མཚོན་བྱེད་ཡིན།གནམ་གང་ཉིན་ལ་བག་ལེ་བཅའ་བའམ་ཡང་ན་ལོ་མགོ་བཙོས་ཞེས་ཟོག་མགོ་དང་ཕག་མགོ་ལ་སོགས་པ་བཙོས་ནས་ལས་དང་བྱ་བ་གཉིས་དེ་མགོ་ནས་འཛིན་པའི་རྟེན་འབྲེལ་བྱའོ། དེའི་ནུབ་མོ་སྔར་ཙམ་ཉལ་དེ་ཕྱིན་ཉིན་ཚེས་གཅིག་གིས་སྔར་མོ་སྐྱ་རེངས་དང་པོ་ཤར་ཚེ་སྐར་ཆུ་ལེན་པར་བརྩོན་ལན་བྱེད་པར་སྔ་ཕྱིར་སུས་མགྱོགས་ལྟ་བ་དང་སྐར་ཆུ་ཁྱིམ་ལ་ཁུར་ཚར་རྗེས་ཆུ་དེའི་ཡབ་ཆབ་གཙང་མ་མ་བཤམས་པ་དང་ཆུ་དེས་ཁ་ལག་གཙང་མ་འཁྲུས་ཏེ་ནམ་ལོང་བ་དང་གཟབ་མི་ཡོངས་རྫོགས་ཡར་ལངས་ནས་དང་པོ་བྱིན་རྟེན་དམ་རྫས་བཏུང་བ་དང་བླ་མས་བྱིན་རླབས་བྱས་པའི་རྟེན་དང་རྫས་རྣམས་ལ་དར་དཀར་འབུལ་བར་རང་གིས་ཐལ་མོ་སྦྱར་དེ་ལོ་གསར་པའི་ནང་བྱ་བ་ཐམས་ཅད་ལས་ལམ་དུ་འགྲོ་བ་སྨོན་འདུན་ཕུལ་ཚར་རྗེས་ཞོགས་ཇའི་ནང་འོ་མ་དཀར་པོས་ཁ་ཕྱེར་ཞེས་པར་དེ་དང་པོ་ལྷ་ལ་མཆོད་དེ་རྗེས་སུ་རང་གི་ཕོར་པ་གང་རེ་བཏུང་བར་ལྷ་ག་བསམ་རྣམ་པ་དཀར་བའི་དོན་ནོ། ཉིན་མ་རི་སྐེད་དུ་སར་རྗེས་རང་གི་ཁང་སྟེང་དང་ཁང་ལྟག་གང་ལེགས་ལ་ལྷ་བསང་དཀར་པོ་དགུང་དང་མཉམ་པ་ཞིག་བཏང་དེ་བསང་དུས་འཁོར་སྟོངས་ལ་རྟེན་འབྲེལ་ཆེན་པོའི་རྟགས་ཚན་ཡོད་པ་དང་ཡུལ་དེ་གའི་ལྷ་སྲིན་སྡེ་བརྒྱད་འགྲོན་དུ་བོས་དེ་ཕྱུགས་ལ་གོད་ཁ་མེད་པ་དང་ཞིང་ལ་སད་སེར་གྱི་གནོད་པ་མེད་པའི་དོན་ནོ།དེ་རྗེས་ཚེས་གཅིག་ཉིན་མོར་རང་རང་གིས་ཁྱིམ་མི་རྣམས་ཉིན་མོ་ཁྱིམ་ལ་སྡད་དེ་ཕྱིར་མི་ནང་ལ་མི་འོངས་པ་དང་ནང་མི་ཕྱིར་ལ་མི་འགྲོ་ཞེས་པའི་གཏམ་ལྟར་ཇ་འཐུང་ལོངས་སྤྱོད་ཕུན་སུམ་ཚོགས་པ་བྱེད་དེ་བསྡད།
 ཕྱིན་ཉིན་ཚེས་གཉིས་ཀྱི་ཉིན་ཤར་ཙམ་ལོ་ན་གཞོན་པའི་ཕོ་མོ་མིག་སྲིང་ཐམས་ཅད་གཟབ་སྤྲོད་སྤྲད་ནས་འཕྲུག་དང་ཚ་རུ་ལ་ཆུ་སྲམ་དཀར་པོའི་མཐའ་རྒྱན་བྱས་པའི་སྟག་གཟིག་པགས་པའི་ཤན་པའི་གོས་གྱོན་པ་དང་།རིན་པོ་ཆེན་སྣ་ཚོགས་ཀྱི་རྒྱན་ཕུན་སུམ་ཚོགས་པ་ཞིག་བྱས་ནས་གཉེན་ཉེ་འབྲེལ་དང་མིང་སྲིང་བར་ཕན་ཚུན་མགྲོན་ལ་འགྲོ་རེས་བྱེད་སྲོལ་ཡོད་པ་རེད།ལོ་སར་ཚེས་གཉིས་ནས་ཚེས་བཅོ་ལྔའི་བར་རང་རང་གི་ཡུལ་གནས་དང་བསྟུན་ཏེ་བྲོ་འཁྲབ་གླུ་ལེན་གྱི་དགའ་སྐྱིད་ཕུན་སུམ་ཚོགས་པའི་དུས་ཆེན་བོད་ས་གནས་གཞན་དང་ཕལ་ཆེ་མཚུངས་པ་རེད།