བོད་ཀྱི་རང་ཆེན་བཞིའི་ནང་ཚན་ཤར་རྒྱལ་མོ་ཚ་བ་རོང་ལ་རྒྱལ་ཁག་བཅོ་བརྒྱད་ཡོད་པ་གྲགས་ལ།ལྕགས་ལ་ནི་རྒྱལ་རོང་རྒྱལ་ཁག་བཅོ་བརྒྱད་ནང་གི་ཡ་གྱལ་ཞིག་རེད།ད་ལྟའི་རོང་བྲག་རྫོང་ཁོངས་སྔོན་མར་རྒྱལ་རོང་རྒྱལ་ཁག་བཅོ་བརྒྱད་ཀྱི་ནང་ཚན་དཔའ་བོ་དང་།བྲག་སྟེང་།མདའ་མདོ།དགེ་ཆུ།བཙན་ལྷ།ལྕགས་ལའི་ཉུང་ཤས་ཙམ་འདུས་ཡོད།རོང་བྲག་ལྕགས་ལའི་ས་ཁུལ་ཕལ་ཆེར་དར་རྩེ་མདོའི་ཉེ་མཁོར་གནས་ཡོད་པ་དང་སྐད་ཆའི་ཆ་ནས་ཀྱང་སྒྲ་གདངས་དྲག་ཞན་གྱི་ཁྱད་པ་ཙམ་མ་གཏོགས་ཁམས་སྐད་དང་མཐུན་པ།གནའ་སྔ་མོར་ས་དེ་གར་དཔོན་ཁག་ཡང་ཉེར་བཞི་ཙམ་ཡོད་པའི་ཕྱིར།ལྕགས་ལ་སྡེ་བ་ཉེར་བཞི་ལ་ཡང་ཟེར།སྐབས་འདིར་ངས་ལྕགས་ལ་སྡེ་བ་ཉེར་བཞི་པའི་ལོ་གསར་བཏང་ཚུལ་སྐོར་མདོར་ཙམ་འཆད་པ་ཡིན། བཅིངས་འགྲོལ་མ་བཏང་གོང་དུ།ལྕགས་ལ་སྡེ་བ་ཉེར་བཞི་པར་བོད་ཀྱི་ལོ་གསར་རོལ་སྲོལ་ཡོད་པ་མ་གཏོགས་དཔྱིད་གསར་དུས་ཆེན་གཏོང་བའི་སྲོལ་མེད།ད་ལྟར།ཚང་མས་དཔྱིད་གསར་དུས་ཆེན་གཏོང་གི་ཡོད་མོད།ཡིན་ན་ཡང་།རྒན་པ་ཚོས་བཤད་པ་ལྟར་ན།དུས་ཀྱི་ཁྱད་པ་ཙམ་མ་གཏོགས།ལུགས་སྲོལ་ཚང་མ་གཅིག་པ་གཅིག་རྐྱང་རེད་ཞེས་བྱ། སྤྱིར་ན།ས་གནས་དེ་གའི་མི་དམངས་ཚོས་རང་གི་མཁོས་སྦྱོར་ལ་གཞིགས་ཏེ་ཟླ་བ༡༢པ་ནས་བཟུང་ལོ་གསར་གྱི་ཉེར་མཁོའི་གྲ་སྒྲིག་རིམ་བཞིན་བྱེད་འགོ་ཚུགས་ཏེ་ཤ་མར་འབྲུ་སྣུམ་སོགས་ལོ་གསར་གྱི་ཉེར་མཁོ་དང་།གཟབ་སྤྲོས་གྱོན་ཆས་སྣ་ཚོགས།ཁང་པའི་དར་ལྕོགས།དར་ཤིང་།ཤམ་བུ།རི་མོ་སྣ་ཚོགས་ཉོ་སྒྲུབ་བྱེད་པ།ཆང་བཙོ་བ།ཕག་རྒན་བཤའ་བ།ཡིན་ན་ཡང་ཕག་རྒན་ནི་ཟླ་བ་དེའི་མར་ངོ་ལ་མ་གཏོགས་ཡར་ངོ་ལ་བཤའ་སྲོལ་གཏན་ནས་མེད་པ།ཁྱིམ་ཚང་སོ་སོའི་ཐབ་ཚང་གིས་གཙོ་བོ་བྱེད་པའི་ཁང་པའི་ཕྱི་ནང་གི་དུ་བ་དང་ཐལ་བ་རྣམས་གཙང་མ་འཕྱག་པ།ཁང་མིག་ཡོད་ཚད་ཀྱི་རྩིག་ལྡེབས་ངོས་ཞལ་ལ་གསར་རྒྱས་བྱས་ནས་ལོ་གསར་གྱི་སྟ་གོན་བྱེད། ཟླ་བ༡༢པའི་གནམ་གོང་ཉིན།ཁྱིམ་མི་ཚང་མ་ཞོགས་པ་སྔ་མོ་ནས་ལངས་ཤིང་ཁྱིམ་ཚང་ནང་གི་དགུང་ལོ་ཆེས་ཆེ་བའི་ཨ་མེས་སམ་ཨ་ཕས་བཀོད་བསྒྲིགས་བྱེད་པ་ལྟར་ན།ནང་མི་སོ་སོར་ལས་ཀ་ཁག་བགོ་བྱེད།རྒན་པ་ཚོས་ལོ་གསར་ཚེས་བཅོ་ལྔའི་རིང་ལ་ཆོག་པའི་ཡུངས་མའི་མཆོད་མེ་ལས་པ་དང་།ཕ་བུ་ཚོས་རང་རེ་ཁྱིམ་རྒྱུད་ཀྱི་ཤིན་པོ་ཡོད་ཚད་ཀྱི་དུར་སར་ཕྱིན་ནས་མཆོད་མེ་སྦར་བ་དང་སྦྱིན་སྲེག་བསྲེགས་པ།དེ་མ་ཟད་ཀ་བ་དང་ཁང་མིག་ཡོད་ཚད་རྣམ་པར་རྒྱན་པ།མ་བུ་མོ་ཚོ་ཞལ་ཟས་གཡོ་སྦྱོར་བྱེད་ཞིང་སྡེར་མའི་ནང་བཟའ་བཅའ་སྣ་ཚོགས་བླུགས་ནས་མཆོད་གཤོམ་མདུན་སྒྲིག་གཤོམ་གཟབ་རྒྱས་བྱེད་པ་དང་།མཆོད་གཤོམ་དང་སྐུ་ཐང་ལ་སྙན་ཤལ་སྒྲོན་པ།ཐབ་ཚང་གི་རྩིག་ལྡེབས་ངོས་སུ་གྲོ་ཕྱིའི་དཀར་ཐིག་གི་བཀྲ་ཤིས་རྟགས་བརྒྱད་ཀྱི་རི་མོས་རྣམ་པ་བརྒྱན་པ། སྒོ་རའི་ཕྱི་ནང་དང་ཁང་པའི་སྟེང་འོག་གང་སར་གད་འཕྱིས་ལེགས་པར་བྱས་པ་དང་ཕྱི་དྲོར་གད་སྙིགས་ཐམས་ཅད་ནི་ཁྱིམ་ཚང་ཉེ་འཁོར་གྱི་ལམ་མདོ་ཞིག་ཏུ་བསྐྱལ་ནས་དེ་འཕྲོས་མེ་མདའ་ཤོག་སྦག་བརྒྱབ་ནས་གདོན་བགེགས་སྐྲོད་པའི་ཚུལ་བྱེད་སྲོལ་ཡོད།ས་སྲིབ་ཙམ་ལ་ཐོན་དུས།བདག་མོས་ཚལ་རིགས་སྣ་ཚོགས་དང་ནང་མི་རེར་ཐལ་བསྲེགས་གོ་རེ་རེ་དང་ཕག་ཤ་རྡོག་རྡོག་སྡེར་མ་གང་རེ་གྲ་བསྒྲིགས་བྱས་ཟིན།གོ་རེ་དང་ཕག་ཤའི་སྐལ་བ་ནི་རྒན་གཞོན་སུ་ཡིན་ཡང་ཟ་ཚར་དགོས་པའི་སྲོལ་ཡོད།རྒན་པ་ཚོས་བཤད་སྲོལ་ལྟར་ན།གནམ་གང་དགུང་མོ་ནི་ལྷ་འདྲེ་གཉིས་ཀྱིས་མི་གསོན་པོ་འཕྲོག་རེས་བྱེད་པའི་དུས་ཡིན་ཞེས་བྱ་བ་དང་།སུས་རང་སྐལ་ཟ་མ་ཚར་ན་རྒྱ་མའི་ཚད་འཇལ་སྐབས་ཚད་ཀྱིས་མ་མདང་ན་འདྲེ་ཡིས་འཁྲིད་འགྲོ་རེད་ཟེར།དེའི་རྗེས་སུ།མི་ཆེ་བ་གཉིས་སྒོ་ཐེམ་གྱི་གཡས་གཡོན་གཉིས་སུ་ལངས་ནས་རེ་རེ་བཞིན་དུ་ལོ་ཆུང་ཚོའི་རྐང་པ་དང་ལག་པར་འཇུས་ནས་སྒོ་ཐེམ་སྟེང་ནས་འཕྲེད་འཐེན་བྱེད་པ།
དེ་ལྟར་ན་གཟུགས་མགྱོགས་པར་མཐོ་པོར་འགྱུར་འགྲོ་རེད་ཟེར། ཚེས༡གི་ཞོགས་པ་མི་རྣམས་སྔ་ལངས་ཀྱིས་གྱོན་ཆས་གཟབ་མཆོར་གང་ཡོད་མནབས་ཏེ་དུད་ཚང་སོ་སོ་ནས་ཆུ་མིག་གི་མདུན་དུ་ཆུ་བསང་གཏོང་བ་དང་ཆུ་ཕུད་ལེན་པའི་སྲོལ་ཡོད་པ་དང་རྟེན་འབྲེལ་གྱི་ཆེད་དུ་ཆུ་རགས་དང་ཆང་རྫ་སོགས་བཅུད་ཀྱིས་གཏམས་པའི་སྣོད་ཆས་ཐམས་ཅད་ལ་ཁ་དར་དཀར་པོ་བཏགས་པ།དེ་ཉིན་ཚང་མ་རང་ཁྱིམ་སོ་སོར་སྤྲོ་སྐྱིད་བྱེད་པ་ལས་ཕན་ཚུན་མགྲོན་བསྐྱོད་སོགས་མི་བྱེད་པ་དང་།ཚང་མས་རྒྱན་ཆས་གཟབ་སྤྲོས་བྱས་ནས་བཀྲ་མི་ཤིས་པའི་སྐད་ཆ་གཏན་ནས་མི་ལབ་པ་དང་ཕྱག་བདར་བྱས་པ་ནི་ཡང་བཀྲ་མི་ཤིས་པར་བརྩིས་ནས་དེ་ཉིན་པར་ཁྱིམ་ལ་ཕྱག་བདར་ཡང་མི་བྱེད། ཚེས་པ༢ནས་བཟུང་།མི་རྣམས་ཕན་ཚུན་མགྲོན་བསྐྱོད་བྱེད་པ་དང་།གྲོང་པ་མཉམ་འཛོམས་ཀྱིས་དུད་ཚང་སོ་སོའི་ཁ་ཟས་དང་ཆང་བཅས་མཉམ་དུ་སྤྱད་པ་དང་སྐོར་བྲོ་རྒྱག་པ།བརྙན་འཕྲིན་བལྟ་བ།སྤོ་ལོ་རྩེད་པ་སོགས་སྤྲོ་བའི་རྣམ་པ་ཅི་རིགས་ཀྱི་ངང་ནས་གྲོལ།གནམ་ལོ་གསར་ཚེས་ཉིན་བཅོ་ལྔའི་རིང་ལ་དུད་ཚང་སོ་སོས་ཉིན་རྟག་པའི་སྔ་མོ་ཉིན་མ་ཤར་བ་དང་འགྲོགས་ནས་ལྷ་བསངས་དཀར་པོ་བཏབ་བ་དང་།སྒོ་ཁར་ཁམས་མཐུན་གྱི་དར་ལྕོག་བཙུགས་པ། བླ་མ་དང་སྒམ་པ་གདན་འདྲེན་བྱས་ནས་ལོ་གསར་ཚེ་སྒྲུབ་བྱེད་པ་བཅས་བོད་རིགས་ས་ཁུལ་གཞན་དག་དང་འདྲ་བ་དང་མི་འདྲ་བའི་ལུགས་སྲོལ་རབ་དང་རིམ་པ་ཡོད་དོ།