ཞོན་ལ་བཟོ་རྒྱུན་རི་མོའི་རིགས་ཀྱི་དགོས་མཁོ་དང་མཐུན་པའི་རྣམ་གྲངས་ཤིན་ཏུ་མང་སྟེ།དཔེར་ན་ཆུ་ཚོན་གྱི་རི་མོ་ལ་སྤྱོད་པའི་ཆུ་ཚོན་དང་།སྣུམ་རིས་སུ་སྤྱོད་པའི་སྣུམ་ལྡན་གྱི་ཚོན་དང་།དེ་བཞིན་ལྰ་ཚོན་དང་།རྡུལ་ཚོན་དང་།ཕྱེ་ལྡན་གྱི་ཚོན་དང་།བལ་ཚོས་དང་རས་ཚོས་སོགས་རྩ་ལྡུམ་དང་ལྗོན་ཤིང་ལས་བླངས་པའམ་ཡང་ན་ས་འོག་གི་གཏེར་ལས་བླངས་པའི་རྣམ་གྲངས་དུ་མ་དང་།གཞན་ཡང་རྒྱུ་རྩི་ཤིང་ལས་བྱུང་བའི་གཡེའུ་སོགས་ཤིང་ཚོན་གྱི་རིགས་དང་།དེང་དུས་སུ་ཕྱི་གླིང་ནས་ཐོན་པའི་པིན་ཤིང་ལ་སོགས་རྫས་འགྱུར་ལས་བྱུང་བའི་ཚོན་གྱི་རིགས་དང་།ཀྲུང་གོའི་སྲོལ་རྒྱུན་རི་མོར་ཆེད་དུ་སྤྱོད་པའི་ཀྲུང་གོའི་རི་མོའི་ཚོན་སོགས་མང་པོ་ཡོད་པ་ལས།སྤྱིར་བོད་རིས་སུ་སྤྱོད་པའི་ཚོན་ལ་ཚོན་ཆེན་ཞེས་བརྗོད་དེ།ས་འོག་གི་གཏེར་རྡོ་སྣ་ཚོགས་ལས་བླངས་པ་ཤ་སྟག་ཡིན་པས།རི་མོ་བྲིས་ནས་ལོ་ངོ་སྟོང་ཕྲག་དུ་མ་འདས་ཀྱང་མདོག་མི་ཡལ་ཞིང་།ཚོན་གཞན་དག་ལས་སྣུམ་བརྗིད་ཆེ་བའི་ཁྱད་ཆོས་ཡོད།དེ་ཙམ་དུ་མ་ཟད་བོད་ཀྱི་རི་མོ་རྩ་ཆེན་རྣམས་ལ་གོང་གི་ཚོན་ཙམ་གྱིས་ཆོག་པ་ཡིན་ཏེ།གསེར་དང་།དངུལ་དང་།མཚལ་དང་།གཙང་སྤང་།གཙང་མཐིང་སོགས་རིན་ཐང་གསེར་དང་མཉམ་པའམ་ཡང་ན་གསེར་ལས་ལྷག་པའི་ཚོན་གྱི་རིགས་མང་དུ་སྤྱོད་པས།ཚོན་གྱི་ལག་ལེན་དང་སྡེབ་སྦྱོར་སོགས་ལའང་བཟོ་རྒྱུན་གཞན་དང་མི་འདྲ་བའི་ཤེས་བྱ་མང་པོ་ཡོད་པ་མ་ཟད།ལག་ལེན་མི་ཉུང་བ་ཞིག་བཟོའི་སློབ་དཔོན་གྱི་ལག་ལེན་དམར་ཁྲིད་ལ་མ་བརྟེན་ན་དཔེ་ལྟས་ཙམ་གྱིས་ཇི་བཞིན་པ་ཤེས་དཀའ་སྟེ།དཔེར་ན་བོད་རིས་སུ་ཁྱད་པར་སྤྱོད་ཅིང་།བོད་ཀྱི་མལ་གྲོ་གུང་དཀར་དང་སྙེ་མོ།ཡངས་པ་ཅན་ལས་ཡུལ་གཞན་ན་མེད་པའི་གཙང་སྤང་གཙང་མཐིང་ཞེས་རིན་ཐང་གསེར་ལས་ཆེ་ཞིང་ལག་ལེན་དཀའ་བའི་ཚོན་དེ་སྤྱོད་པར་འདོད་ན།ཐོག་མར་ཚོན་གྱི་འདུལ་སྦྱོར་དཔྱིས་ཕྱིན་པ་ཞིག་མ་ཤེས་ན་རང་མདོག་ཇི་བཞིན་མི་ཐོན་པ་ལྟ་བུ་སྟེ།འདིར་ཚོན་དང་ཚོན་གྱི་ལག་ལེན་སྤྱི་ཙམ་བཤད་པའོ།།