གལ་ཏེ་མཚལ་ཐང་དང་ཐང་ནག་ཏུ་བསྒྱུར་བར་འདོད་ན་སྣག་དང་མཚལ་བཟང་པོའི་ཁ་ཆུ་བླངས་ཏེ་དམ་ཆུ་འདྲེས་ཙམ་དང་བཅས་བཟོས་ཟིན་པའི་རས་གཞི་དཀར་པོའི་སྟེང་དུ་ལན་གསུམ་ནས་བཞིའི་བར་དུ་ཆ་སྙོམ་པར་བྱུགས་ནས་གྲུབ་བོ།།དེ་ལ་འགའ་ཞིག་གིས།རས་གཞི་སྐམ་དབུར་མ་བྱས་སྔོན།རློན་དབུར་མཇུག་གཅོད་པར་བཤད་ཀྱང་།དེ་ལ་སྐྱོན་ཞིང་སྣང་བ་ནི།སྐམ་དབུར་བྱས་པའི་རས་གཞི་ལ་འོད་འབྱུང་མོད།ཐང་ནག་དང་མཚལ་ཐང་གཉིས་སྐྱ་ཐང་དང་མི་འདྲ་བས།རི་མོ་དང་མདངས་ཙམ་ལས་ཚོན་ཆེར་མེད་པས།མདངས་དང་བཅད་རིས་ཙམ་གྱིས་འོད་མི་ནོན་པ་ལྟར་སྣང་བས་བརྟག་པར་འཚལ་ལོ།།