ཤོག་བུ་བཟོ་བའི་རྒྱུ་ལ་རབ་འབྲིང་ཐ་གསུམ་ཡོད་པ་ལས་རབ་ནི།ཤོག་ལྡུམ་དུང་ལོ་མ་དེ་ཡིན་ཞིང་།དེ་ཡང་ས་ནག་དང་ཤུག་ཁྲོད་སོགས་རྫ་དང་བྲག་མེད་པའི་སར་སྐྱེས་པ་དེ་བཟང་སྟེ།བྱེ་མ་དང་ས་དམར་གཡམ་པའི་ནང་དུ་སྐྱེས་པ་ནི་རྒྱུ་སྲ་ཞིང་ཚོས་དཀའ་བ་ཁ་དོག་སེར་བ་ཡིན་པས་འབྲིང་པོ་དང་།ཤུན་པ་མཐུག་ཅིང་འབུ་ཡོད་པ་ནི་དམན་པར་བཤད་དོ།
རྒྱུ་འབྲིང་པོ་ནི་ཨ་རག་རུའི་ཤུན་པ་སྟེ་སྔོ་བཤུས་བྱས་པའི་ཤུན་པའི་ནང་གི་བར་ཤུན་ཐོག་མར་ཡུད་ཙམ་བཙོས་ནས་ཁུ་བ་ཕོ།གཞན་གྱི་བཙོ་བརྡུང་དཀྲུགས་བླུག་ཐམས་ཅད་གོང་ལྟར་བྱ་ལ།འདིའི་ཁྱད་ཆོས་ནི་མཐུག་པོར་ལེགས་པས་གླེགས་བམ་འབྲི་གཞིར་མཆོག་ཏུ་བཤད་དོ།།
 ཐ་མ་ནི་རེའུ་ལྕག་གི་རྩ་བ་སྟེ།འདི་ལས་བཟང་བ་བྱེ་མ་ས་འབོལ་དང་ས་ནག་སོགས་སྙི་སར་སྐྱེས་པའི་རེའུ་ལྕག་གི་རྩ་བ་བརྐོས་ནས་སྐོགས་དང་ནང་སྙིང་གཉིས་དོར་བའི་བར་ཤུན་རྒྱུས་པ་ལྟ་བུ་དེ་ཐལ་ཁུའི་ནང་དུ་བཙོས་པས་བལ་ལྟར་ལྷོད་པར་འོང་།དེ་ལ་དུག་ཡོད་པས་དུག་འདོན་ཨ་རུ་ར་ཐུམ་གཅིག་འདེབས།བརྡུང་དཀྲུགས་བླུགས་ཐམས་ཅད་གོང་ལྟར་ལ་འདི་གོང་གཉིས་ལྟར་རྒྱུ་བཟང་པོ་མི་འོང་ཡང་།དུག་ཡོད་པས་འབུ་སྲིན་གྱིས་གནོད་པ་མི་ཚུགས་པས་ཡུན་དུ་གནས་པར་མཆོག་ཏུ་བཤད་དོ།
ཤོག་བུ་ལེགས་པའི་ཚད་ནི།སྲབ་མཐུག་དང་བུག་རྡོལ་མེད་པ།ནག་དྲེགས་དང་འཛར་འཛོར་མེད་པ།དབུར་རྡོས་བརྡར་ན་ས་རྡོ་བའི་ར་རི་མེད་པ།འབོལ་ཞིང་དཀར་ཞད་ཆེ་ལ་ཁམས་འཛིན་པ་དེའོ།།
ཤོག་བུ་སྤུ་གཅོད་དང་སྦག་འདོན་ཕྱེད་ཐམས་ཅད་ནི།ཤོག་བུ་བཟོས་ཟིན་ནས་ཐོག་མར་སྤུ་གཅོད་མ་བྱས་ན་དབུར་བ་ཙམ་གྱིས་ངོས་འཇམ་པོ་འོང་དཀའ་བས་སྦག་འདོན་མ་བྱས་སྔོན་དུ།རྡོ་དཀར་དཀར་སོབ་ཀྱིས་བྲད་རྡོལ་མི་ཤོར་བར་དྲུད་བརྡར་ཅུང་ཟད་བྱ།དེ་ནས་གྲོ་ཕྱེ་བཙགས་མ་ཆུ་ནང་འོ་མ་ལྟར་དཀྲུག་སྦུ་བ་བྱུང་བ་རྣམས་བཅུས་ནས་དོར་དེ་ཅུང་ཟད་གྲུངས་སུ་བཅུག་པའི་དྭངས་མ་ཆ་གཉིས་སུ་བགོས་པའི་ཆ་གཅིག་མེ་ལ་ཚོས་པར་བསྐོལ་ནས་ཕོག་ལ།མ་བསྐོལ་བའི་ཆ་གཅིག་པོ་དེ་བསྲེས།རླུང་དང་རྡུལ་མི་འབྱུང་ཞིང་ཉི་མ་ལ་ཚ་ཞིང་རླན་ཅུང་ཡོད་པའི་སར་ཤོག་བུ་གོང་གི་བག་ཆུར་དྲངས་ནས་སྐམ་དུ་གཞུག་གོ།གྲོ་ཕྱེ་ཞག་ཉི་ཤུ་ཡན་སོང་བའི་རྙིང་པ་དམ་རྩི་ལྷོད་པས་མི་རུང་ཞིང་།གྲོ་ཕྱེ་ཆུར་འོ་མ་ལྟར་གྱུར་པ་དེ་གྲུངས་ཡུན་རིང་ན་སླ་ཉེན་ཡོད་པས་གཟབ་བོ།
 ཤོག་བུ་སྦག་འདོན།དབུར་རྒྱག་དྲས་རྒྱག་སོགས་ལེགས་གྲུབ་ཟིན་པ་དང་།ཙན་དན་ལ་སོགས་ཀྱི་ཐིག་ཤིང་དྲང་ལ་སྙོམས་པ་བརྒྱུད་སྐྱེར་ཤུན་གྱི་ཁུ་བར་ཡུང་བ་དང་དྲི་བཟང་སྦྱོར་མས་གླེགས་བམ་ཆེ་ཆུང་།ཡིག་ཕྲེང་མང་ཉུང་སོགས་དང་ལེགས་པར་བསྟུན་པའི་བྱང་ཆུབ་རྒྱུན་ལམ་སོགས་ཀྱི་ཐིག་གདབ།མཐའ་སྐོར་དུ་མཚལ་གྱིས་རིམ་པར་གདབ།དབུ་ལྡེབ་ལ་ཐིག་རྒྱས་སྡུས་མང་བས་མཁས་པའི་ལག་རྒྱུན་བཞིན་བྱ།ཟུབ་པ་དང་ཡང་ན་ཐིག་ཁོག་དང་སྦོམ་ཕྲ་མི་སྙོམས་པ་དང་།འཁྱོགས་པ་སོགས་ནི་ཐིག་གི་སྐྱོན་ཏེ་སྤང་བར་བྱའོ།