ཤིང་བཟོའི་ལག་རྩལ་གྱི་སྐོར།
དུང་དཀར་ཚིག་མཛོད་ལས་དྲངས། 2011-01-04
ཤིང་བཟོའི་ལག་རྩལ་ནི་བོད་གནའ་རབས་བསྐལ་པ་ཡ་ཐོག་གི་དུས་སྐབས་ནས་བཟུང་རིམ་བཞིན་འཕེལ་རྒྱས་བྱུང་ཞིང་།སྤྱི་ལོའི་གོང་གི་ལོ་ཉིས་བརྒྱའི་སྔོན་ལ་རྒྱལ་པོ་གཉའ་ཁྲི་བཙན་པོས་ཕོ་བྲང་ཡུམ་བུ་བླ་མཁར་བཞེངས་པ་དང་དེ་ནས་རྒྱལ་རབས་དགུ་པ་རྒྱལ་པོ་པུ་དེ་གུང་རྒྱལ་གྱི་དུས་སུ་ཤིང་ལ་བུག་པ་ཕུག་ཏེ་གཉའ་ཤིང་དང་།གཤོལ་མདའ།གཤོལ་ཕུར་བཟོ་བ།ཆུ་ཆེན་ལ་ཤིང་གི་ཟམ་པ་འཛུགས་པ་བཅས་བྱས་ཡོད།རྒྱལ་པོ་སྲོང་བཙན་སྒམ་པོའི་དུས་ལྷ་ས་གཙུག་ལག་ཁང་བཞེངས་སྐབས་ཀ་བ་བཟོ་དབྱིབས་མི་འདྲ་བ་དང་།ལྕམ་སྣེ་ལ་སེང་གེའི་གཟུགས།གདུང་མ་དང་གཞུའི་ལྡེབས་ལ་རོ་སྒྲུང་དང་།དམངས་ཁྲོད་ཀྱི་སྒྲུང་གཏམ་ནང་བཤད་པའི་གཏམ་རྒྱུད་རི་མོ་སྣ་ཚོགས་ཤིང་ལ་བརྐོས་པ་དེང་སང་ཡང་མཐོང་རྒྱུ་ཡོད།
བོད་ལྗོངས་རིག་དངོས་བདག་གཉེར་ཁང་ནས་བཏོན་པའི་ཟུར་ལྟའི་བརྙན་དཔར་ཆུང་བའི་དཔར་རིས་ཁག་ལ་ལྟ་ན་སྐབས་དེ་དུས་ནས་བོད་མིའི་ཤིང་བཟོའི་ལག་རྩལ་ཆུ་ཚད་མཐོན་པོར་སླེབས་ཡོད་པ་ཤེས་ཐུབ།དེ་རྗེས་རིམ་པར་ཡོན་རྒྱལ་རབས་ཀྱི་སྐབས་བཞེངས་པའི་ས་སྐྱའི་ལྷ་ཁང་ཆེན་མོ་དང་།ཞྭ་ལུའི་གསེར་ཁང་ཆེན་མོ།མིང་རྒྱལ་རབས་ཀྱི་སྐབས་བཞེངས་པའི་རྒྱལ་རྩེ་དཔལ་འཁོར་ཆོས་སྡེའི་གཙུག་ལག་ཁང་བཅས་ལ་ལྟ་ན་རྟོགས་ཐུབ་པ་རེད།ཤིང་གི་ཐོག་ཡི་གེ་བརྐོ་བའི་དཔར་སྐྲུན་ལག་རྩལ་ནི་སྤྱི་ལོའི་དུས་རབས་བཅོ་ལྔ་པའི་འགོར་མིང་རྒྱལ་རབས་ཀྱི་གོང་མ་ཡུང་ལོས་ཀརྨ་པ་སྐུ་ཕྲེང་ལྔ་པ་དེ་བཞིན་གཤེགས་པ་དང་།རྗེ་ཙོང་ཁ་པར་བོད་ཡིག་གི་བཀའ་འགྱུར་ཆ་ཚང་འབུལ་རྒྱུ་བསྐུར་བ་ནས་བཟུང་བོད་ལ་ཤིང་དཔར་བརྐོ་བའི་ལག་རྩལ་དར།