དར་མདོ་རྫོང་གི་ས་བདེ་ཤང་རྨིའུ་རོང་ཝ་ཡོད་གྲོང་པར་ལོ་ངོ་སྟོང་ཕྲག་བརྒལ་བའི་ཁང་རྙིང་ཞིག་ཡོད།ཁང་རྙིང་དེ་ཁང་པ་གཞན་དག་ལས་རྒྱ་ཆེ་ལ་བརྩེགས་མཐོ།ཁང་པ་དེའི་ནང་དུ་ད་ལྟ་ད་དུང་མི་ཚང་བསྡད་ཡོད་ལ་བཤད་སྲོལ་དུ་འཇང་ས་དམ་རྒྱལ་པོའི་དུས་ཀྱི་ཁང་རྙིང་ཡིན་པར་གྲགས།དེ་སྔོན་ཕྱི་རྒྱལ་གྱི་གནའ་རྫས་རྟོག་དཔྱོད་པ་ཞིག་ཡོང་ནས་ཁང་རྙིང་དེ་ལས་ཤིང་དུམ་བུ་ཞིག་ཁྱེར་ནས་ཚན་རིག་གིས་གསལ་འབྱེད་བྱས་ཏེ་རྗེས་སུ་སླར་ཡང་དེ་གར་ཡོང་དུས་ཁང་པ་དེ་ནི་ལོ་ངོ་1000ནས་1700བར་དུ་བཞེངས་པ་ཞིག་ཡིན་ཚོད་འདུག་ཅེས་བཤད།ཁང་རྙིང་དེའི་ཁྱད་ཆོས་ནི་གྱང་ངོས་ཀྱི་སྒེའུ་ཆུང་ཆུང་རྣམས་ནི་བོའུ་རྒྱག་སའི་ཁུང་བུ་དང་འདྲ་ལ་ཕྱོགས་བཞིའི་རྩིག་ཞེང་ནི་རྨི་གཅིག་ལས་ལྷག་ཙམ་ཡོད།ནང་དུ་འཛུལ་སའི་སྒོ་ནི་ཧ་ཅང་རྒྱ་ཆེ་ལ་འགྲམ་གྱི་རྩིག་ངོས་སུ་རྟ་འདོགས་སའི་ཁུང་བུ་ཡོད།ཡ་མཚར་བ་ནི་སྒོ་ཆེན་གྱི་ཐོག་ལ་བར་སྟོང་ཞིག་བཞག་ཡོད་ལ་དེ་ནི་དགྲ་བོ་ཡོང་དུས་ཐོག་ནས་མར་རྡོ་འཕེན་པ་དང་མདུང་བཙུགས་ཆོག་པའི་ཆེད་དུ་རེད་ཟེར།ཁང་པའི་བརྩེགས་དང་པོའི་ནང་དུ་ཀ་རྡོ་བཞི་ནས་བདུན་ཙམ་རྩིག་བརྩེགས་བྱས་ནས་དེའི་ཐོག་ལ་ད་གཟོད་ཀ་བ་བཙུགས་ཡོད།བཤད་སྲོལ་དུ་ཀ་རྡོ་ཇི་ཙམ་མང་ན་ཁྱིམ་ཚང་དེའི་སྟོབས་ཤུགས་དེ་ཙམ་ཆེ་ལ་གཉེན་ཉེ་བ་དེ་ཙམ་མང་བའི་རྟགས་མཚན་ཡིན་པར་གྲགས།ཁང་པའི་ཀ་བ་དང་ཀ་མགོ།གདུང་རྟ་དང་གདུང་མ།བཀྲམ་ཤིང་བཅས་ལའང་གཞན་དང་མ་འདྲ་བར་སྐབས་དེ་དུས་ཀྱི་ཤིང་བཟོ་དང་ཁང་ལས་ཀྱི་ཁྱད་ཆོས་འབུར་དུ་ཐོན་འདུག ཁང་རྙིང་དེའི་བརྩེགས་དང་པོར་ད་དུང་རྒྱུ་ནོར་གསང་སྦས་བྱེད་ས་ཡོད་ལ་བརྩེགས་གསུམ་པར་ནང་པ་སངས་རྒྱས་ཀྱི་དགོངས་དོན་མཚོན་པའི་ལྡེབས་རིས་རྙིང་པ་རྣམས་ད་དུང་གསལ་པོར་མཐོང་ཐུབ་བོ།།