དྭངས་གསལ་ཨ་སྔོན་དབྱིངས་ནས་ཉི་གཞོན་གྱི་འཛུམ་མདངས་ཟླ་བའི་མ་མར་འཕྲོས་མ་ཐག་འཇིག་རྟེན་གསར་པ་ཞིག་བསྐྲུན་པ་དང་གཉིས་སུ་མ་མཆིས།མགྲིན་ནག་ཁྲུང་ཁྲུང་དཀར་མོས་གྲེ་འགྱུར་སྙན་པའི་གླུ་དབྱངས་གྱེར།དྭངས་གཙང་ཆུ་བོའི་བཞུར་སྒྲ་ནི་འཇམ་ཐིང་ཐིང་དང་འདམ་སྐྱེས་ཀྱི་པདྨ་ལྟ་བུའི་དྲི་བསུང་དང་སྒེག་ཉམས་མེད་ལ།ཁྲི་ཤོར་རྒྱལ་མོ་ལྟ་བུའི་མཚན་སྙན་ཡང་དབེན།འོན་ཀྱང་།དེའི་གཏིང་ཚད་ནི་ཧ་ལམ་སྨི་2700ཙམ་ཟིན་པས་རྒྱ་ཁྱོན་ལ་སྨི37420ཙམ་ཟིན།འཇམ་ཐིང་ཐིང་གི་མཚོ་ངོགས་སུ་བྱ་རིགས་སྣ་ཚོགས་ཀྱིས་གླེང་རེས་བྱེད་བཞིན་གདའ།མཐའ་འཁོར་གྱི་སྐྱེས་དགུ་སྣ་ཚོགས་ཀྱིས་མགོ་ལྕོག་ལྡེམ་བཞིན་དགའ་སྤྲོའི་འཛུམ་མདངས་སྟོན།དེ་ནི་ཚོན་མདོག་རྣམ་པར་བཀྲ་བའི་འཇའ་ཚོན་ཇི་བཞིན་ལྟ་ན་སྡུག ཁྲི་གདུགས་ཉི་མས་བརྩེ་དུང་གཏིང་ཟབ་ཏུ་བཏང་བའི་ཉམས་དང་སྒེག་པའི་ཉམས་བཅས་ཀྱི་གར་སྟབས་བསྒྱུར་ལ་ཟླ་བའི་མ་མའི་ལྟད་མོར་ཡང་གྱུར་ཏོ།  གསེར་མིག་ཅན་གྱིས་བསྟོད་པའི་གླུ་དབྱངས་ལེན་བཞིན་མཚོ་དེ་ལ་ཡིད་སྨོན་དང་རེ་བ་བཅངས་ཤིང་དཔལ་ཡོན་གྱི་ལང་ཚོ་གསར་བ་བསྐྲུན།ཉི་གཞོན་གྱིས་འཛུམ་ཞལ་ངོམས་ནས་ཞལ་རས་ཀུ་ཤུའི་མདངས་སུ་འཁུ་བཞིན་དེ་ལ་གུས་བཀུར་དང་བྱམས་སྐྱོང་བྱེད།ནམ་མཁའི་ལྷ་དང་ལྷ་མོས་མེ་ཏོག་གཏོར།（རྩོམ་སྒྲིག་པ་བདེ་ཆེན་དབང་མོ།）