ལ་རྒྱབ་ཚ་ཆུའི་ངོ་སྤྲོད་མདོར་བསྡུས།

མགར་ཐར་པད་མ་མཚོ་མོ། 2016-07-08

མགར་ཐར་དགོན་པའི་ཤར་ཕྱོགས་ནས་སྒ་ཆག་ལ་བརྒལ་ཏེ་རོང་བྲག་ཕྱོགས་སུ་འགྲོ་བར། སྒ་ཆག་ལ་རྒྱབ་སྟེ་སྐྱེས་ལྷ་རྫོང་རྒོད་དགྲ་ལྷའི་རྒྱལ་པོའི་གནས་པའི་རྫ་རིའི་འདབས་རོལ། གནས་གང་སར་ཡན་ལག་བརྒྱད་ལྡན་གྱི་ཆུ་མིག་བརྡོལ་ཞིང་ཉོག་རྡུལ་གྱིས་དབེན་པའི་རྫིང་བུ་འཁྱིལ་ཡོད། ཆུ་མིག་དང་རྫིང་བུ་རེ་རེ་ནས་རླངས་པ་ཐུ་ལུ་ལུ་དང་ལྦུ་བ་ཕུ་རུ་རུ་འཕྱུར་བཞིན་ཡོད། དེ་ནི་ལ་རྒྱབ་ཚ་ཆུ་ཞེས་པའི་རང་བྱུང་གི་ཆུ་ཚན་གྲགས་ཅན་དེ་རེད། མ་གཞི་ས་དེ་གའི་ཕྱོགས་བཞིའི་རི་བོ་རྣམས་མཐོ་ཞིང་གཡང་གཟར་ལ། རི་རྩེ་ལ་དཀར་བོ་གངས་ཀྱི་ཅོད་པན་གྱིས་བརྒྱན་པ་དང་། རི་རྐེད་ལ་སྨུག་པོ་རྫ་ཡི་གོ་ཆ་སྤྲས་པ། རི་འདབས་ལ་རྩི་ཤིང་ནགས་ཀྱི་རྒྱན་ཆ་བཏགས་པ་ལ། གནའ་བ་དང་རྒོ་བ། དྲེད་མོ་། ཕག་རྒོད། རི་བོང་སོགས་རི་དྭགས་ཇི་སྙེད་བག་ཡངས་སུ་རྒྱུ་ཞིང་རང་དགར་རྩེད་འཇོ་ལ་རོལ་བ་དང་། གཞན་ཡང་གོང་མོ་དང་སྲེག་པ། འཇོལ་མོ། བྱ་དཀར་དང་འུ་ཙི་སོགས་བྱེའུ་དང་བྱ་ཕྲན་གྱི་རིགས་སྣ་ཚོགས་དང་། རྒོད་ཐང་དཀར་དང་ཐང་ནག་གོ་བོ། གླག་རོག་པོ་སོགས་བྱ་ཆེན་གྱི་རིགས་རྣམས་ཀྱིས་གཤོག་རྩལ་ངོམ་པ་དང་། འགྱུར་ཁུགས་དབྱངས་སྙན་གྱི་རྫ་རྔ་ཅི་དགར་རྡུང་བ། ཤུག་པ་དང་། ཐང་ཤིང་། སྟག་མ། ད་ལི། སྤེན་མ། གླང་མ་སོགས་རྩི་ཤིང་དང་། མེ་ཏོག་གངས་ལྷ་དང་སྲོ་ལོ་དཀར་དམར། དབྱར་རྩྭ་དགུན་འབུ་སོགས་སྨན་རྩྭ་རྩ་ཆེན་སོགས་སྐྱེ་དངོས་སྣ་ཚོགས་གིས་བརྒྱན་པ། ལུང་བ་ཕུ་ནས་དྭངས་གཙང་གི་གངས་ཆུ་དང་རྫ་ཆུ། རྦབ་ཆུ། ཆུ་མིག་དང་ཆུ་ཕྲན་དག་རིམ་གྱིས་བསྡོངས་ཤིང་ཤང་ཤང་སྒྲོག་ཅིང་། ལྦུ་བ་དཀར་པོ་དགུང་དུ་འཕྱོ་བཞིན་རྒྱལ་མོ་རྔུལ་ཆུའི་ཕྱོགས་སུ་གྱ་གྱུ་རུ་བཞུར་བཞིན་ཡོད་པ་བཅས་རང་བྱུང་གི་མཛེས་སྡུག་དག་ནི། སྐྱེ་བོ་སུ་ཞིག་ཡུལ་འདིར་ཐོན་ན་རྟག་ཏུ་ཉམས་སུ་མྱོང་བའི་གནས་ཁྱད་པར་བ་ཞིག་ཡིན་པས། ལྗོངས་རྒྱུ་ཡུལ་སྐོར་བ་ཚང་མས་མཐེ་བོང་སྒྲེང་བཞིན་ཡོད། ཁྱད་པར་དུ་རང་བྱུང་གི་ཆུ་ཚན་དེ་དག་གི་མིང་གྲགས་ལ་བརྟེན་ནས་གནའ་ནས་ད་བར་དུ་འགྲུལ་བའི་རྒྱུན་ཆད་མ་མྱོང་ངོ་། །

སྤྱིར་ཆུ་ཚན་ནི་རང་བྱུང་ས་ཁམས་འགྱུར་ལྡོག་ལ་བརྟེན་ནས་བྱུང་བ་ཞིག་ཡིན་པ་དེ་ཆུ་ཚན་ཀུན་དང་འདྲ་མོད། ཡིན་ནའང་ཆུ་ཚན་རྫིང་བུ་དེ་ཚོ་ལ་ངག་རྒྱུན་དང་བཤད་སྲོལ་མང་པོ་ཡོད་ལ། རེ་རེར་མིང་ཡང་ཡོད་དེ། བེ་རོ་ཚ་ཆུ་ནི་སྔོན་ཆད་བོད་ཀྱི་སད་མི་བདུན་གྱི་ཡ་གྱལ་ལོ་ཙཱ་བ་ཆེན་མོ་བཻ་རོ་ཙཱ་ནས་གཏེར་ནས་བཞེས་པ་ཡིན་ཞེས་བཤད་སྲོལ་ཡོད། བློ་ཞིབ་མོས་དཔྱད་ན། དེ་ཡང་ཚན་རིག་དང་འགལ་བ་མེད་དེ། ལོ་ཙཱ་བ་བཻ་རོ་ཙཱ་ནས་གཏེར་ནས་བཞེས་པ་ནི་ཆུ་ཚན་གཏན་ནས་མེད་ས་ཞིག་ནས་ཆུ་ཚན་ཞིག་བཏོན་ཟེར་བའི་དོན་མ་ཡིན་པར། ཆུ་ཚན་ཡོད་ས་ཞིག་ནས་རྫིང་བུ་ཞིག་གསར་དུ་བཟོས་པ་ལ་གོ་ཆོག་རྒྱུ་རེད་སྙམ། གཞན་ད་རུང་མཁན་པོ་ཚ་ཆུ་དང་། བླ་རུང་ཚ་ཆུ། བེ་ཕུང་ཚ་ཆུ། མིག་རྡོག་ཚ་ཆུ། པུས་མོ་ཚ་ཆུ། ཚ་ཆུ་བར་མ། ཕག་ཚ་ཆུ་ཞེས་པ་སོགས་དབྱིབས་དང་ཆེ་ཆུང་། ཟབ་ཚད་མི་གཅིག་པའི་ཆུ་ཚན་རྫིང་བུ་མང་བོ་ཐང་མར་བརྡལ་ཡོད་པར་མ་ཟད། རྒྱལ་རོང་ཕྱོགས་སུ་སྐྱོད་པའི་སྣུམ་ལམ་དེ་མ་བཟོས་སྔོན་དུ་དེ་བས་ཀྱང་ཆུ་ཚན་མང་པོ་ཡོད་ནའང་། ལམ་ལས་རྗེས་ཆུ་ཚན་མང་དག་ཅིག་ལམ་འོག་ཏུ་ཤོར་བའམ་ས་འབུར་སོགས་ཀྱིས་ཁ་རུབས་ཡོད་འདུག མཁན་པོ་ཚ་ཆུ་ཞེས་པ་དེ་ཐོག་མར་སྡེ་བ་གཞུང་ནས་བཏང་བའི་མགར་ཐར་དགོན་པའི་མཁན་པོ་ཞིག་གིས་རྫིང་བུ་གསར་དུ་བཟོས་པའམ་ཁོང་གིས་དུས་རྒྱུན་དུ་ཆུ་ཚན་དེར་སྐུ་ཁྲུས་གསོལ་གྱི་ཡོད་པ་ལ་བརྟེན་ནས་མིང་ཐོགས་པ་དང་། མགར་ཐར་དགོན་པའི་བླ་སྤྲུལ་གྲགས་ཆེན་མང་པོས་སྐུ་ཁྲུས་གསོལ་མྱོང་བའི་རྫིང་བུ་ཞིག་ཡོད་པ་ལ་བླ་རུང་ཚ་ཆུ་ཟེར། བེ་ཕུང་ཚ་ཆུ་ཞེས་པ་ནི་ཤིང་བེ་ལོ་མང་པོ་ཡོད་པའི་གད་ཁུག་ཅིག་ཏུ་ཡོད་པས་མིང་དེ་ལྟར་གསོལ། མིག་རྡོ་ཚ་ཆུ་དང་པུས་མོ་ཚ་ཆུ་ཞེས་མིང་ཐོག་དོན་ནི་མིག་ནད་ལ་ཕན་པ་དང་པུས་མོ་སོགས་ཚིགས་ནད་ལ་ཕན་པས་མིང་དེ་ལྟར་གསོལ། ཚ་ཆུ་བར་མ་ནི་ཆུ་ཚན་གོང་འོག་གཉིས་ཀའི་བར་དུ་ཡོད་པས་དེ་ལྟར་མིང་དུ་ཆགས། ཕག་ཚ་ཆུ་ཞེས་པ་དེ་གཞུང་ལམ་འགྲམ་དུ་ཡོད་པས་ཕག་ཉལ་ས་ལྟ་བུའི་རྫིང་བུ་ཆུང་ངུ་ཞིག་ཡིན་པས་མིང་དེ་ལྟར་ཐོགས་པ་སོགས་མི་རྒན་རྣམས་ཀྱི་ཞལ་ནས་ཐོས།

ཆུ་ཚན་རྫིང་བུ་དེ་དག་བར་ཐག་དེ་ཙམ་མི་རིང་ནའང་། སོ་སོ་ཡོད་སའི་ས་རྡོ་དང་རྩི་ཤིང་མི་འདྲ་བ་དང་། སོ་སོའི་ནང་གི་འབུ་སྲིན་མི་འདྲ་བའི་དབང་གིས་སོ་སོའི་ཕན་ནུས་མི་འདྲ་སྟེ། ལ་ལས་པགས་ནད་ལ་ཕན་པ་དང་ལ་ལས་མཁལ་སྐེད་གྲང་ནད་ལ་ཕན་པ། ལ་ལས་རུས་ཚིགས་ཀྱི་ནད་ལ་ཕན་པ། ལ་ལས་ཁྲག་དང་ཆུ་སེར་ལ་ཕན་པ། ལ་ལས་མིག་ནད་ལ་ཕན་པ་སོགས་ཡོད་དོ། ། དཔེར་ན་མཁན་པོ་ཚ་ཆུའི་ནང་དུ་འབུ་ཕྲ་བུ་དམར་པོ་མང་པོ་ཞིག་ཡོད་པ་དང་འབུ་ཕྲ་བུ་དེ་ཚོ་མི་ཡི་ལུས་ལ་འབྱར་ཡོང་ཞིང་། ལུས་ལ་ལྡག་ན་ནད་འཇོམས་པའི་ཕན་ནུས་ཡོད་པ་དང་། དེ་མིན་མིག་རྡོ་ཚ་ཆུ་ཞེས་པ་དེས་མིག་ན་བ་དང་ཚ་བ། མིག་ཆུ་བཞུར་བ་དང་ལོ་ན་རྒས་པའི་མིའི་མིག་དྭངས་མོར་བྱེད་ཐུབ་པའི་ནུས་པ་ཡོད། པུས་མོ་ཚ་ཆུའི་ནང་དུ་ཞུགས་ན་པུས་མོ་ན་བ་དྲག་པར་འགྱུར་བའི་ནུས་པ་ཡོད་པ་སོགས་བཤད་སྲོལ་ཡོད་པ་ཙམ་གྱིས་མ་ཚད་པར། དངོས་སུ་མྱོང་གྲུབ་ཀྱིས་བདེན་པ་ར་འཕྲོད་དོ། །

ལ་རྒྱབ་ཚ་ཆུའི་ངོ་སྤྲོད་མདོར་བསྡུས།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10