བུ་ཁེ་ནི་སྤྱི་ལོ་༡༩༦༥ལོར་ཨ་ལོ་ཁབ་སྟེང་དུ་སྐུ་འཁྲུངས། དགུང་ལོ་ལྔའི་ཐོག་དཔལ་སྤུངས་མཁན་དིལ་ཆུང་བློ་ཆོས་ཀྱི་མདུན་ནས་བོད་ཡིག་འབྲི་ཀློག་གི་མགོ་བརྩམས།   སྤྱི་ལོ་༡༩༧༦ནས་༡༩༨༡བར་ཁབ་སྟེང་དམངས་གཉེར་སློབ་ཆུང་དུ་ཞུགས་ནས་བོད་ཡིག་འབྲི་ཀློག་མཐར་ཕྱིན་པར་སྦྱངས།  དེ་ནས་སྤྱི་ལོ་༡༩༨༢ལོར་དཔལ་སྤུངས་དགོན་པའི་མཁས་དབང་ངམ་སྒར་ལུགས་ཀྱི་གཙུག་རྒྱན་ཐང་བླ་ཚེ་དབང་གཙོ་བོ་བྱས་པའི་ཁང་གསར་འཇམ་དཔལ་དང་དར་རྒྱས་སོགས་ཀྱི་སྐུ་མདུན་ནས་ཀརྨ་སྒར་བྲིས་ཀྱི་ལྷ་རིས་རི་མོ་ཆ་ཚང་བྱང་ཆུབ་པར་བསླབས། དེ་ནས་སྔ་ཕྱིར་ལོ་མང་པོའི་རིང་ལ་དཔལ་སྤུངས་དགོན་དང་། སྡེ་དགེ་ལྕགས་ར་དགོན། ལི་ཐང་སྤང་ཕུག་དགོན། ནང་ཆེན་སྐྱོ་བྲག་དགོན།  མི་ཉག་ལྷ་སྒང་བཤད་གྲྭ།  ཁྲོམ་ཐར་དགོན། གླིང་ཆུ་ངོགས་དགོན།སྐུ་ཚེ་གསེར་ལྗང་དགོན། སྡེ་དགེ་དགོན་ཆེན་དགོན་སོགས་ལྷ་ཁང་ཕྱི་ནང་གི་ཚོན་རིས་དང་གྱང་ལྷ་སོགས་བྲིས།  མ་ཚད་ཞོར་དུ་སྲོལ་རྒྱུན་གྱི་ཐང་ག་རྒྱས་འབྲིང་བསྡུས་གསུམ་བརྒྱ་ཕྲག་ལས་འདས་པ་བྲིས་པ་དང་།   གེ་སར་སྟོང་ཐང་ཆེན་མོའི་ལས་གྲལ་དུ་ཞུགས་ཤིང་གཙོ་འཛིན་སོགས་ཀྱི་འགན་བཞེས།  ཁོང་གིས་སྐྱོང་བའི་སློབ་མ་རྣམས་མདོ་དབུས་ཁམས་གསུམ་དུ་ཁྱབ་ཡོད་ལ།  དེ་བཞིན་སྒར་ལུགས་རྣལ་མ་འདི་ལ་རྒྱལ་ཕྱི་ནང་ཀུན་གྱིས་གདེང་འཇོག་ཚད་མཐོན་པོ་ཐོབ་ཀྱིན་ཡོད་པས་བདག་གིས་ཀྱང་རང་ནུས་ཅི་ལྕོགས་ཀྱིས་རྒྱུད་འཛིན་དང་དར་སྤེལ་གཏོང་བཞིན་ཡོད་ཅེས་གསུངས།