དཀོན་མཆོག་བཀྲ་ཤིས་ནི་སྤྱི་ལོ་༡༩༦༤ལོར་ཁམས་སྡེ་དགེའི་ཆ་གཏོགས་འཁོར་ལོ་མདོ་རྡོ་མང་སྟེང་དུ་ཧོར་པ་ཚང་ཞེས་པའི་དུད་ཚང་དཀྱུང་མ་ཞིག་གི་ཁྱིམ་དུ་སྐྱེས། ཆུང་ངུའི་དུས་སྐབས་ནས་རྡོ་ལ་རི་མོ་འབྲི་བ་དང་འདམ་གྱིས་འདྲ་གཟུགས་བཟོ་བ་སོགས་ལ་དགའ་སྣང་སྐྱེས། དེ་ནས་ཁོང་ལོ་བཅུ་བདུན་ཙམ་སོན་སྐབས་ཞང་པོ་ཐུབ་བསྟན་ཕུན་ཚོགས་ལགས་ཀྱིས་དཔལ་སྤུངས་དགོན་དུ་ཁྲིད་དེ་ལྷ་བཟོ་བ་ཆེན་མོ་ཐང་བླ་ཚེ་དབང་མདུན་དུ་བཟོ་རིག་པ་དང་། ལྷ་རྗེ་ཡོན་ཏན་ཕུན་ཚོགས་སུ་བོད་ཡིག་འབྲི་ཀློག་བཅས་སྦྱོང་བཅུག །ལོ་གསུམ་རིང་འབད་འབུངས་ལྷོད་མེད་བྱས་མཐར་རི་མོ་དང་ཚོན་མདངས་ཕྱེ་བ་སོགས་རྨང་གཞི་བརྟན་པོ་ཚུགས། བོད་ཡིག་འབྲི་ཀློག་ཀྱང་ཡག་ཙམ་ཤེས། དེ་ནས་སྡེ་དགེ་པར་ཁང་གིས་ལྷ་བཟོ་བ་ཉེར་ལྔ་བསྡུས་ཏེ་རྒྱུགས་ལེན་སྐབས་ཁོང་གིས་རི་མོའི་རྒྱུགས་ཨང་དང་པོ་འཕྲོད་ནས་སྡེ་དགེ་པར་ཁང་གི་ལྷ་བཟོ་བའི་ཟུར་ཁྲིད་པ་བྱས། སྔོན་རྗེས་སུ་དཔལ་སྤུངས་དགོན་པའི་འདུ་ཁང་ཆེན་མོ་དང་དགོན་ཆེན་གཡུ་འབྲུག་ལྷ་ཁང་། ཨ་ཕྱུག་ཚབ་ཚ་དགོན་པ་སོགས་དགོན་སྡེ་དང་ལས་ཁུངས། གྲོང་ཁྱིམ་མང་པོའི་ཁང་པའི་ལྡེབས་རིས་དང་ཞལ་ཐང་འབྲི་བའི་ལས་སྒོ་མང་པོའི་ནང་དངོས་སུ་ཞུགས་པ་དང་།  མཆོག་སྤྲུལ་ཐུབ་བསྟན་ཚེ་རིང་མཆོག་ལ་བསྟེན་ནས་དགོན་ཆེན་དགོན་པའི་གཙང་ཁང་སྦུག་གི་ཉེ་སྲས་བརྒྱད་དང་།གུ་རུ་མཚན་བརྒྱད་སོགས་འདམ་སྐུ་བཞེངས་པའི་བྱ་བར་ཞུགས། དཀོན་མཆོག་བཀྲ་ཤིས་ནི་རིག་གནས་ལ་དགའ་ཞེན་དང་ཚོང་ལས་གཉེར་མཁས་པ་ཡིན། སྔོན་དུས་སུ་བོད་ཀྱི་བཟོ་རྩལ་ཐོན་རྫས་མང་ཆེ་བ་བལ་ཡུལ་ནས་ཡོང་བ་ལས་བོད་རང་གིས་བཟོས་པའི་ཐོ་རྫས་ཧ་ཅང་ཉུང་བའི གནས་ཚུལ་ལ་གཞིགས་ཏེ་ལོ་མང་རིང་མདོ་དབུས་ཁམས་གསུམ་དང་། རྒྱ་དཀར་ནག།བལ་ཡུལ་སོགས་སུ་ཚོང་པ་དཀྱུས་མ་ཞིག་གི་ཚུལ་དུ་བསྐྱོད་དེ། མི་རིགས་ཁག་གི་བཟོ་རྩལ་རིགས་སྣ་ཚོགས་དང་།བོད་ཀྱི་གནའ་བོའི་ཐུན་མིན་བཟོ་རྩལ་ལ། རྒྱལ་ཁབ་ཕྱི་ནང་གི་ཆེད་ལས་མཁས་ཅན་མང་པོ་དང་མཉམ་དུ་ཞིབ་འཇུག་ནན་ཏན་བྱས་ཏེ། བཟོ་གྲྭ་ཞིག་འཛུགས་རྒྱུའི་འདུན་པ་ཡུན་རིང་དུ་བཅངས་ཏེ། སྤྱི་ལོ་༡༩༩༥ལོར་པེ་ཅིན་གྱི་ཚོང་ཁང་ཞིག་ཏུ་རྡོ་ཚོན་མང་པོ་ཡོད་པ་མཐོང་བས་ཁོས་གལ་ཏེ་རང་རེ་ཚོས་དེང་སྐབས་རྡོ་ཚོན་འདི་དག་སྤྱད་ནས་ཞལ་ཐང་གསར་པ་འབྲི་ཐུབ་པ་བྱུང་ན་ཅི་མ་རུང་སྙམ་པའི་འདོད་བློ་སྐྱེས་ཏེ་སྤྱི་ལོ་༡༩༩༧ལོར་མི་ཉག་བ་རྡོ་རྗེ་དོན་འགྲུབ་དང་མཉམ་དུ་མདོ་ཁམས་ལྷ་སྐུ་གླིང་ཞེས་པ་བཙུགས་ཏེ་འཕགས་པའི་གནས་བརྟན་འཅུ་དྲུག་དང་།  ཐུབ་པའི་མཛད་པ་བཅུ་གཉིས། གུ་རུ་མཚན་བརྒྱད་སོགས་ཀྱི་ཞལ་ཐང་ལ་རྡོ་ཚོན་དང་རིན་ཆེན་སྣ་ལྔ་སྤྱད་ནས་ཀརྨ་སྒར་ལུགས་བྲིས་རྒྱུན་ལྟར་བྲིས་པས།  མཛེས་རྩལ་མཁས་ཅན་མང་པོ་དང་། བོད། རྒྱ། ཕྱི་གླིང་པ་སོགས་ཀྱིས་བསྔགས་བརྗོད་ཡང་ཡང་གནང་། ༡༩༩༩ལོར་སི་ཁྲོན་ཁྲེང་ཏུའུ་གྲོང་ཁྱེར་ལ་ཁོང་གིས་ཀརྨ་བི་ཤྭ་གངས་ལྗོངས་སྒྱུ་རྩལ་རིག་གནས་དར་སྤེས་མཐུན་གཉེར་ཁང་ཞེས་པ་བཙུགས་ཏེ་བརྐོས་བླུག་བཅའ་གསུམ་གྱི་ལག་རྩལ་སྤྱན་ནས་བོད་ཀྱི་བཟོ་རྩལ་ཐོན་རྫས་སྣ་ཁ་བརྒྱ་ལྷག་གསར་སྐྲུན་བྱེད་ཐུབ་པར་གྱུར། ལྷག་པར་དུ་མཆོག་སྤྲུལ་ཐུབ་བསྟན་ཚེ་རིང་ལགས་ཀྱིས་འཇིམ་གྱིས་བཟོས་པའི་གླིང་གེ་རས་རྒྱལ་པོའི་འདྲ་སྐུ་བླུག་དཔེར་བྱས་ཏེ་ལི་ཐང་རྫོང་དང་སྡེ་དགེ་རྫོང་སོགས་ལ་ལི་སྐུ་མང་པོ་གསར་བཞེངས་བྱས།  དེ་བཞིན་པེ་ཅིང་དང་བོད་ལྗོངས་། མཚོ་སྔོན།ཀན་སུའུ། ཡུན་ནན་སི་ཁྲོན་བཅས་ཀྱི་དགོན་སྡེ་མང་པོ་ལ་སྐུ་འདྲ་མང་པོ་བཅའ་བླུག་བྱས་པ་དང་། ད་དུང་བོད་ཀྱི་བཟོ་རྩལ་ཐོན་རྫས་དེ་དག་ཨ་རི་དང་དབྱིན་ཇི། ལྗར་པན། ཐེ་གོ།རྒྱ་གར། བལ་ཡུལ། ཕྱི་སོག་བཅས་ཕྱིའི་རྒྱལ་ཁབ་མང་པོ་ལ་ཚོང་ལམ་ཧ་ཅང་བྲིན་པ་བྱུང་ཡོད། ༡༩༩༧ལོར་ཁོ་རང་གིས་ལོ་མང་རིང་ལྷ་བྲིས་པའི་ཉམས་མྱོང་ལ་བརྟེན་ནས་གླིང་གེ་སར་གྱི་རྟོགས་བརྗོད་ཡོངས་སུ་མཚོན་ཐུབ་པའི་ཞལ་ཐང་ཆེན་མོ་ཞིག་འབྲི་རྒྱུའི་འཆར་གཞི་བཀོད་ནས་མདོ་དབུས་ཁམས་ནས་ལྷ་པ་གྲགས་ཅན་མང་པོ་གདན་དྲངས་ནས་འཛམ་གླིང་ཐོག་ཆེས་རིང་བའི་གེ་སར་ཞལ་ཐང་འབྲི་རྒྱུའི་འགོ་བརྩམས་ཏེ། གེ་སར་སྟོང་ཐང་ཆེན་མོའི་གྲས་ཐང་༡༢༨༨ཅན་དང་།  ༢༠༡༥ལོར་ཤམ་བྷ་ལའི་གཏམ་རྒྱུད་གྲས་ཐང་༡༤༠༨ཅན་བཅས་ལེགས་སུ་གྲུབ་ཡོད་པ་དང་། སྔོན་རྗེས་སུ་ལི་ཐང་དགོན་པ་ལ་རྗེ་ཙོང་ཁ་པ་སྨི་༢༦ཅན་དང་། དར་མདོ་ལྷ་མོ་རྩེ་དགོན་དང་།  མུ་ལི་རྫོང་།པེ་ཅིན་དགའ་ལྡན་བྱིན་ཆགས་གླིང་བཅས་ལ་ལི་ལས་གྲུབ་པའི་རྒྱལ་བ་བྱམས་པ་མཐོ་ཚད་སྨི་༢༧ཅན་དང་། སྨི་༢༨ཅན། སྨི་༢༠ཅན་དང་། ཧྲང་ཧེ་ཇི་ནི་སིས་གངོས་ལེན་གནང་པའི་རྒྱལ་ཡོངས་སུ་ཆེས་ཆེའི་དུས་འཁོར་དང་དུས་འཁོར་གྱི་བློས་བསླངས་བཅས་ཇུས་བཀོད་དང་གསར་བཞེངས་བྱས་ཡོད་པ་རེད། དེ་ལྟ་བུའི་གྲངས་མང་བའི་གྲས་ཐང་བྲིས་པ་དང་། ཆེས་མཐོ་བའི་ལྷ་སྐུ་མང་པོ་བཅའ་བླུག་བྱས་པ་ནི་བོད་ཙམ་དུ་མ་ཡིན་པ་འཛམ་གླིང་ཐོག་ཆེས་དཀོན་པར་གྱུར་ལ། དེའི་ཤུལ་དུ་འགྲོ་བ་མིའི་དངོས་མིན་ཤུལ་བཞག་རིག་གནས་རྒྱུན་འཛིན་དང་སྲུང་སྐྱོང་ལའང་མཛད་རྗེས་བླ་ན་མེད་པ་བཞག་ཡོད་པ་རེད།