དེའུ་དམར་དགེ་བཤེས་བསྟན་འཛིན་ཕུན་ཚོགས་ནི་བོད་རབ་བྱུང་བཅུ་གཉིས་པའི་སྤྱི་ལོ1725ལོར་ཆབ་མདོ་གོ་འཇོ་རྫོང་དུ་སྐུ་འཁྲུངས་ཤིང། བོད་སྨན་མཁས་པ་མི་དགུའི་ཡ་གྱལ་བི་བྱིའི་གདུང་རྒྱུད་ཡིན་པར་བཤད།  མཁས་མཆོག་འདིས་སྨན་དཔྱད་ཡར་རྒྱས་ཀྱི་ཆེད་དུ་སྐུ་ངལ་བརྒྱ་ཕྲག་ཁྱད་དུ་བསད་ནས་སྔ་རྟིང་དུ་རྒྱ་གར་དང། རྒྱ་ནག   བོད་ཡོངས་ཀྱི་ཡུལ་ཁམས་ཕལ་མོ་ཆེ་བཅས་ཕྱོགས་མཐའ་མང་པོ་བསྐོར་ནས་ཡུལ་དངོས་རྟོག་དཔྱད་ཀྱིས་སྨན་རྫས་ཀྱི་རིགས་ལ་དོགས་གཅོད་ཞིབ་འཇུག་དང། དབྱེ་ཞིབ།  ཕྱོགས་བསྡོམས་བཅས་བྱས་ཏེ་སྔར་ཡོད་བོད་ཀྱི་སྨན་རྫས་རིག་པའི་གཞུང་ལུགས་རྣམས་རྨང་གཞི་བྱས་ཐོག  སྡེ་ཚན་གསར་པར་ཁ་སྐོང་དང་ཁ་སྣོན་བྱས་ནས་སྨན་སོ་སོའི་སྐྱེ་གནས་དང་འཁྲུངས་དཔེ། རོ་ནུས་ཞུ་རྗེས་སོགས་གསལ་ལ་མ་འདྲེས་པར་བཀོད་དེ་རབ་བྱུང་བཅུ་གསུམ་པའི་མེ་ལུག་ལོ་སྟེ་སྤྱི་ལོ1787ལོར《བདུན་རྩི་སྨན་གྱི་ནུས་པ་རྐྱང་བཤད་གསལ་སྟོན་དྲི་མེད་ཤེལ་གོང》དང་། 《བདུད་རྩི་སྨན་གྱི་རྣམ་དབྱེ་ངོ་བོ་ནུས་མིང་རྒྱས་པར་བཤད་པ་དྲི་མེད་ཤེལ་ཕྲེང》ཞེས་པའི་སྨན་རྫས་རིག་པའི་བསྟན་བཅོས་མ་བུའམ་རྩ་འགྲེལ་གཉིས་བརྩམས་ཏེ།  བོད་ཀྱི་སྨན་རྫས་རིག་པ་སྔར་བས་གྱ་ནོམ་ཞིང་ཕུན་སུམ་ཚོགས་པར་བཏང་ཡོད་པས་མཛད་རྗེས་དང་གྲུབ་འབྲས་ནི་དུས་ཕྱིས་སུས་ཀྱང་འགྲན་དུ་མེད་པ་ལྟ་བུ་ཞིག་ཡིན། སྨན་གཞུང་འདི་ནི་བོད་ཀྱི་སྔོ་འབུམ་བསྟན་བཅོས་ཡོངས་ལས་ནང་དོན་ཆེས་རྒྱས་ཤོས་དང་རིག་གཞུང་གི་ཆུ་ཚད་ཆེས་མཐོ་ཤོས་ཡིན་པས།   ཕྱིས་འབྱུང་སྨན་པ་ཀུན་གྱིས་གཞུང་འདི་སྤྱི་བོའི་གཙུག་ཏུ་བཀུར་ནས་ཡིད་ཆེས་གདེང་འཁེལ་དང་ཤིན་ཏུ་གཙིགས་ཆེ་བར་བྱས་དང་བྱེད་བཞིན་ཡོད་པ་ཚང་མས་ཤེས་གསལ་ལྟར་དང། དེའུ་དམར་པོས་ད་དུང《སྨན་གྱི་ལག་ལེན་གཅེས་བསྡུས་ཀུན་གསལ་སྣང་མཛོད》དང་། 《དཔྱད་མཆོག་གཏར་གའི་གདམས་པ་ཉེས་འཁྲུགས་རྙོག་མ་དྲུངས་འབྱིན》 《མེ་བཙའི་གདམས་པ་རྒྱས་སྤྲོས་གསལ་སྟོན་ཤེལ་དཀར་མེ་ལོང》 《རོ་བསྡེབས་སྦྱོར་བ་དོན་ཚང་ཚིག་བསྡུས》 《གསོ་བ་རིག་པའི་ཆོས་འབྱུང་རྣམ་ཐར་རྒྱ་མཚོའི་རྦ་རླབས་དྲང་སྲོང་དགྱེས་པའི་འཛུམ་ཕྲེང》སོགས་ལྗགས་རྩོམ་དྲུག་ཅུ་ལྷག་མཛད་ཡོད། །