སི་ཁྲོན་ཞིང་ཆེན་དཀར་མཛེས་ཁུལ་ཉག་རོང་ཨ་བསེ་དལ་བབས་རིང་མོ་ལྷུང་ལྷུང་དུ་འབབ་པའི་གཡོན་ཕྱོགས།འཛམ་གླིང་གེ་སར་རྒྱལ་པོས་ཕྱོགས་བཞིའི་དགྲ་བཞི་ཆམ་ལ་ཕབ་སའི་ཡ་གྱལ།ཨ་བསེ་གཡུ་རལ་རྒྱལ་པོའི་ཕོ་བྲང་གི་གཡོན་རོལ།སྔ་འགྱུར་འོད་གསལ་རྫོགས་པ་ཆེན་པའི་བསྟན་པའི་མངའ་བདག་ཨ་བསེ་ཀླུ་མོ་དགོན་པའི་གཙུག་ལག་ཁང་གི་གཡས་ཟུར།དེའི་ཕྱོགས་དང་ཕྱོགས་མཚམས་ཐམས་ཅད་དུ་ནགས་ཚལ་ལྗོན་ཤིང་གི་རྐང་འཐུང་དུ་མ་ཚར་དུ་དངར་བའི་དབུས་སུ།རང་བྱུང་རྡོའི་ཁམས་ལས་གྲུབ་པའི་མོའི་གསང་མཚན་ཞིག་དང་རྣམ་པ་ཀུན་ནས་མཚུངས་པའི་རྡོ་ཡི་ཕོ་མཚན་ཞིག་ཡོད།
　དེའི་ལོ་རྒྱུས་ནི་འདི་ལྟར་སྟེ།དཔལ་འཁོར་ལོ་སྡོམ་པ་བདེ་མཆོག་གི་རྒྱུད་ལས།དེ་ཡང་འདི་ལྟར་གྲགས་ཏེ།འཛམ་བུ་གླིང་ཡོན་ཏན་གྱི་རྒྱལ་མཚན་ཅན་འདི་ཆགས་ནས་མི་རིང་བ་ན།ནམ་མཁའ་ནས་ལྷ་བཞི་དང་དྲི་ཟ་བཞི་བྱུང་སྟེ་དེ་དག་གིས་མཁའ་སྤྱོད་ཀྱི་གནས་བརྒྱད་བཟུང་།ས་སྟེང་ནས་གནོད་སྦྱིན་བཞི་དང་སྲིན་པོ་བཞི་བྱུང་སྟེ་དེ་དག་གིས་ས་སྤྱོད་ཀྱི་གནས་བརྒྱད་བཟུང་།ས་འོག་ནས་ཀླུ་བཞི་དང་ལྷ་མ་ཡིན་བཞི་འོངས་ཏེ་ས་འོག་གི་གནས་བརྒྱད་བཟུང་ཞེས་གསུངས་པ་ལས།ས་སྟེང་ནས་གནོད་སྦྱིན་བཞི་དང་སྲིན་པོ་བཞི་བྱུང་སྟེ་དེ་དག་གིས་ས་སྤྱོད་གནས་བརྒྱད་བཟུང་བའི་ནང་ཚན་ཧི་མ་ལ་ཡ་སྟེ་གངས་ཅན་དུ་གྲགས་པ་རེད།མ་ཧཱ་དེ་བ་ཡབ་ཡུམ་གངས་རི་ཆེན་པོ་ཏི་སེ་འདི་ཉིད་ཕོ་བྲང་དང་བཅས་ཏེ་བཞུགས་པ་སྤྱན་དྲངས་ཏེ་མཆོད་པ་ལས།དེ་གཉིས་དགའ་མགུར་སྤྱོད་པས་བྲེལ་ནས་འགྲོ་བར་མ་ཁོམ་པའི་ཚེ།དེའི་སྤྲུལ་པ་རྡོའི་ལིངྒ་མགོ་བོ་ལྟ་བུ་སུམ་ཅུ་རྩ་གཉིས་སྤྲུལ་ཏེ་ཡུལ་དེ་དག་གི་མཆོད་པའི་རྟེན་དུ་བཞག་གོ།།དེ་རྣམས་ཀྱིས་ཀྱང་མཆོད་པར་བྱེད་ཅིང་།དེ་དག་ལས་འདོད་ཆགས་ཤས་ཆེ་བས་དུས་བཞིར་ཆུང་མ་དང་གཉིས་སྦྱོར་རོ།།ཞེས་གསུངས་པ་ལྟར་རྡོའི་ཕོ་མཚན་འདི་ཡང་ལིངྒ་མགོ་བོ་ལྟ་བུ་སུམ་ཅུ་རྩ་གཉིས་སྤྲུལ་པའི་ནང་ཚན་གཅིག་ཡིན་པར་མ་ཟད།དགོན་པའི་འོག་རོལ་གླང་མའི་རྐང་འཐུང་གི་ལྕུག་ཕྲན་དུ་མ་འཁྲིགས་པའི་དབུས་སུ་ཡང་།རང་བྱུང་རྡོ་ཡི་ཁམས་ལས་གྲུབ་པའི་མོའི་གསང་མཚན་ཞིག་ཡོད་པ་དེ་ལས་དུས་རྒྱུན་ཟླ་བ་དཀར་ཕྱོགས་ཀྱི་ཆ་ཤས་ཡོངས་སུ་རྫོགས་པ་དང་མཉམ་དུ་ཟླ་བའི་མཚན་མ་དང་མཚུངས་པའི་མཚལ་དམར་འབྱུང་བ་སོགས་ཀུན་གྱི་མཐུན་སྣང་དུ་གྲུབ།
　དེ་དག་ལ་དུས་རྒྱུན་གཞོན་ནུ་མ་རིགས་རྒྱུད་ཀྱིས་དབུལ་བ་རྣམས་དང་།སྐྱེས་པ་གཞོན་ནུ་རིགས་རྒྱུད་སྤེལ་བའི་ནུས་པས་དམན་པའི་ལང་ཚོས་རབ་ཏུ་དུད་པ་རྣམས་ཀྱིས་ཞོན་སྦྱོར་སོགས་བྱས་ན་རིགས་ཀྱི་མྱུ་གུའི་འདོད་པ་འཇོ་བ་སོགས་ངོ་མཚར་གཏམ་གྱི་སྦྱོར་བ་དུ་མ་ཞིག་ཡོད་པ་དང་།ད་ལྟ་དམངས་ཁྲོད་དུ་རྡོའི་གསང་མཚན་ཟུང་ལ་མཐོང་ཐོས་དྲན་རེག་གྱུར་ན་རིགས་ཀྱི་དངོས་གྲུབ་སྟེར་བའི་དད་འདུན་ལྷག་པར་ཡོད།
　དེ་སོགས་ལ་བརྟགས་ན།བོད་གངས་ཅན་གྱི་གདོད་མའི་ཆོས་ལུགས་དེ་དབང་ཕྱུག་གི་ཆོས་ལུགས་ཡིན་པ་དང་།དེ་དུས་ནམ་དར་དང་།ཆོས་ལུགས་རིག་གནས་ཀྱི་འཕེལ་རིམ་ཇི་ལྟར་ཡིན་པ་དང་།གནའ་བོའི་སྲོལ་རྒྱུན་དེ་དག་མ་ཉམས་པར་ད་ལྟ་ཡང་མིག་གི་དཔལ་ལ་ལོངས་སྤྱོད་དུ་ཡོད་པ་དང་།གཞན་ཡང་མཁས་དབང་དགེ་འདུན་ཆོས་འཕེལ་གྱི་རྣམ་ཐར་དུ།རྒྱ་གར་དང་བལ་པོ་ཚོས་དབང་ཕྱུག་གི་ལིང་ག་དང་།ཨུ་མའི་བྷ་ག་ལ་ཕྱག་དང་མཆོད་པ་བྱེད་པ་དེ།ཡིན་རྒྱུ་ནི་ཐབས་ཤེས་ཟུང་དུ་འཇུག་པ་ཞིག་ལ་ཕྱག་མཆོད་བྱས་པའི་ཁུལ་རེད་ཅེས་གསུངས་པ་སོགས་ལ་དེ་ལུགས་རྣམ་དཔྱོད་ཀྱི་ཁོ་ལག་རབ་ཏུ་ཡངས་པ་དང་།ཕྱོགས་རིས་ཀྱི་དྲི་མས་མ་བསླད་པ་རྣམས་ལ་ནི་འདི་དག་ཞིབ་འཇུག་གི་དངོས་པོ་རིན་ཐང་དང་བྲལ་བ་ཞིག་ཡིན་པར་གདོན་མི་ཟའོ།།
༼ དོན་གྲུབ་བློ་བཟང་གིས་པར་བླངས། ༽
༼ ཨོ་རྒྱན་གྱིས་རྩོམ་སྒྲིག་བྱས། ༽