རྣམ་པར་སྣང་མཛད་དགོན་ནི་སྨར་ཁམས་རྫོང་སྤང་མདའ་ཤང་དུ་ཡོད་ལ་རྫོང་མཁར་ནས་སྤྱི་ལེ་བདུན་ཅུ་ལྷག་ཡོད།  རྣམ་སྣང་དགོན་དུ་ཡོད་པའི་བྲག་བརྐོས་སྐུ་བརྙན་དེ་ནི་པུར་རྒྱལ་དུས་ཀྱི་བྱང་སེམས་ཀྱི་བྲག་བརྐོས་སྐུ་བརྙན་ཡིན་པས་ལོ་རྒྱུས་དང་རིག་གནས་བཅས་ཀྱི་ཞིབ་འཇུག་གི་རིན་ཐང་ཆེན་པོ་ལྡན་པ་རེད།   བྱང་སེམས་ཀྱི་ལྷ་སྐུའི་བྲག་བརྐོས་རི་མོ་དེ་རི་ཟུར་ཞིག་གི་མཐོ་ཚད་སྨི9དང་ཞེང་ཚད་སྨི7.5ཡི་བྲག་ལྡེབས་ཤིག་ཏུ་བརྐོས་པའི་ནང་གཙོ་ལྷ་རྣམ་སྣང་གི་སྐུ་དེ་མཐོ་ཚད་སྨི4.95ཟིན་ཞིང་།  ཕྱག་གཉིས་མཉམ་བཞག་གི་ཕྱག་རྒྱ་བཞེས་པ། པད་འདབ་སེང་ཁྲིར་བཞུགས་ཤིང་བརྩེ་ཉམས་ཆེ།  གཡས་གཡོན་དུ་བྱང་སེམས་བརྒྱད་ཡོད་པའི་སྟེང་འོག་ལ་རིམ་བཞིན་བཞུགས་པ་ལས་གཡས་ཀྱི་གོང་དུ་ཀུན་ཏུ་བཟང་པོ་དང་ཕྱག་རྡོར། འོག་ཏུ་སའི་སྙིང་པོ་དང་སྤྱན་རས་གཟིགས།  གཡོན་གྱི་གོང་དུ་བྱམས་པ་དང་ནམ་མཁའི་སྙིང་པོ། འོག་ཏུ་འཇམ་དཔལ་དབྱངས་དང་སྒྲིབ་པ་རྣམ་སེལ་བཅས་ཚུལ་བཞིན་བཞུགས་ཡོད།