དགེ་རྒན་སུ་ཞིག་ཡིན་ཡང་རང་ཉིད་ཀྱི་སློབ་ཁྲིད་སྒྱུ་རྩལ་དེས་སློབ་མར་སྤོབས་པ་དང་སྤྲོ་སྣང་འདྲེན་མ་ཐུབ་ན།ཤེས་བྱ་བརྒྱུད་སྤྲོད་བྱས་པ་ཙམ་གྱིས་མིའི་རིགས་བླ་སྲོག་གི་བཟོ་སྐྲུན་པ་ཆ་ཚང་བ་ཞིག་ཏུ་བརྩི་མི་རུང་།
དགེ་རྒན་ནི་མིའི་རིགས་བླ་སྲོག་གི་བཟོ་སྐྲུན་པ་ཡིན་པས། སློབ་མའི་མྱུ་གུ་མཐོང་ཚེ་མྱུ་གུ་རྐང་རེ་རེ་བཞིན་སྐྱེད་སྲིང་བྱེད་དགོས་པ་མ་གཏོགས།མྱུ་གུ་འདེམ་གསེས་པ་གཏན་ནས་བྱེད་མི་རུང་།
དགེ་རྒན་བཟང་པོས་སློབ་མར་ཆུང་དུས་ནས་ཤེས་བྱའི་སྒོ་ཆེན་སྣ་ཚོགས་འབྱེད་པའི་ལྡེ་མིག་སྤྲོད་ངེས་རེད།
མི་རེ་རེ་གསར་གཏོད་བྱེད་མཁན་དང་།གནས་རེ་རེ་གསར་བཏོད་བྱ་ཡུལ།དུས་རེ་རེ་གསར་བཏོད་གོ་སྐབས།ལས་རེ་རེ་གསར་བཏོད་བྱ་གཞག་ཁོ་ན་རེད།།
དུས་རབས་ཀྱིས་སློབ་གསོ་ལ་རེ་བ་གསར་བ་འདོན་བཞིན་ཡོད་ལ།སློབ་གསོས་དགེ་སློབ་གཉིས་ཀྱི་སྤུས་ཚད་ལ་རེ་བ་གསར་བ་འདོན་བཞིན་ཡོད།
བརྡ་འཕྲིན་སློབ་གསོ་ནི་རང་ཉིད་དང་འདྲིས་ཤིང་མཉེས་ཚེ་རྒྱལ་མཚམས་མེད་པའི་ཞིང་ཁམས་ཤིག་རེད་ལ། གྱེས་ཤིང་ཁྲོས་ན་དེ་ནི་ལྕགས་མཁར་མེད་པའི་དམྱལ་ཁམས་ཆེན་པོ་ཞིག་ཀྱང་རེད།
ཁ་སང་གི་སློབ་གསོ་ནི་དེ་རིང་གི་རྩལ་ནུས་དང་དེ་རིང་གི་རྩལ་ནུས་ནི་སང་ཉིན་གྱི་དཔལ་འབྱོར་ཡིན་སྟབས།དེ་རིང་གིས་སློབ་གསོ་མེད་ན་སང་ཉིན་གྱི་དཔལ་འབྱོར་ཡོད་མི་སྲིད།
ཕ་མ་ནི་འཇིག་རྟེན་གྱི་བློ་སྒོ་འབྱེད་པའི་དགེ་རྒན་ཨང་དང་པོ་དང་ཁྱིམ་ཚང་ནི་བློ་སྒོ་འབྱེད་ཡུལ་གྱི་སློབ་གྲྭ་ཨང་དང་པོ་ཡིན་པས།ཁྱིམ་གྱི་སློབ་གསོ་ལེགས་ཉེས་ཀྱིས་མི་ཚེ་ལ་རྒྱལ་ཕམ་གྱི་ཁ་ལོ་ཐོག་མར་སྒྱུར་བཞིན་ཡོད།
ལས་རིགས་ལག་རྩལ་སློབ་གསོ་ནི་ནང་འདྲེན་དང་ཕྱི་འདྲེན་ ལས་འཁྱུར་ངལ་གསོ་སོགས་ཀྱི་འགལ་བ་སྙོམ་སྒྲིག་བྱེད་པའི་ནུས་ལྡན་གྱི་མཚོན་ཆ་ཞིག་རེད།
དུས་རབས་དང་འཚམ་པའི་འཇོན་ཐང་མི་སྣར་ལས་འབྱོར་ཐོབ་སླ་ལ་ལས་ཤོར་གྱི་གོ་སྐབས་འབྱུང་བ་ཤིན་ཏུ་དཀོན་ཞིང་ཡོང་འབབ་མཐོན་པོ་ཐོབ་སྲིད་ངེས་རེད།
ཡིག་རྨོངས་པ་གཅིག་བྱུང་ན་ཁྱིམ་ཚང་དབུལ་བོ་གཅིག་རེད་ལ།སློབ་ཤོར་བ་གཅིག་བྱུང་ན་ཁྱིམ་ཚང་དཀའ་ཁག་ཅན་གཅིག་རེད།
རྗེས་ལུས་ཀྱི་འདྲ་མཉམ་ལྟ་ཚུལ་ནི་ཕུལ་བྱུང་མགོ་མནོན་བྱེད་པ་དེ་ཡིན་ལ།སྔོན་ཐོན་གྱི་དྲང་འཇོག་བསམ་བློ་ནི་ཕུལ་བྱུང་ལ་ཡར་སྐུལ་བྱེད་པ་དེ་རེད།
སློབ་གསོར་གཙིགས་ཆེན་མི་བྱེད་པའི་མི་རིགས་ནི་རྗེས་ལུས་ཀྱི་མི་རིགས་ཤིག་དང་།སློབ་གསོར་གཙིགས་ཆེན་བྱེད་མི་ཤེས་པའི་མི་རིགས་ནི་དབུལ་ཕོངས་ཀྱི་མི་རིགས་ཤིན་ཏུ་འགྱུར་ངེས་རེད།
ལྷན་སྐྱེས་ཀྱི་ཤེས་རབ་ཅན་མང་ནའང་ལྷན་སྐྱེས་ཀྱི་འཇོན་མི་ཤིན་ཏུ་དཀོན་ལ།ང་ཚོས་རྒྱུན་དུ་བཤད་པའི་ལྷན་སྐྱེས་ཀྱི་འཇོན་མི་ཞེས་པ་དེ་དོན་དངོས་སུ་བཤད་ན།ལྷན་སྐྱེས་ཀྱི་ཤེས་རབ་ཅན་+ཕྱིས་བྱུང་གི་ཕུལ་བྱུང་སློབ་གསོ་=ད་གཟོད་ལྷན་སྐྱེས་ཀྱི་འཇོན་མི་ཞེས་པ་དེ་བྱུང་བ་རེད།
གལ་ཏེ་ལྷན་སྐྱེས་ཀྱི་ཤེས་རབ་མེ་ལྟར་འབར་བའི་བྱིས་པ་ཞིག་ལ་ཕྱིས་བྱུང་གི་སློབ་གསོ་ཆེས་སྤྱིར་བཏང་བ་ཙམ་ཞིག་ལས་ཐོབ་མ་ཐུབ་ན།མི་སྤྱིར་བཏང་བ་ཙམ་ལས་འབྱུང་མི་སྲིད་ཅིང་།ད་དུང་མི་མ་རབས་ཤིན་ཏུ་འགྱུར་བའི་ཉེན་ཁ་ཤིན་ཏུ་ཆེ།
ཁ་སང་གི་འཐུས་ཚང་དང་འཕེལ་རྒྱས་ཀྱིས་དེ་རིང་གི་འཐུས་ཚང་དང་འཕེལ་རྒྱས་ཀྱི་ཚབ་བྱེད་མི་ཐུབ་པས།དེ་རིང་ཡང་མུ་འཐུད་དུ་འཐུས་ཚང་དང་འཕེལ་རྒྱས་སུ་གཏོང་དགོས།
དུས་རབས་དང་འཚམ་ཚད་མཐོ་དམའ་དེས་རིག་གནས་ཤིག་གི་ཚེ་སྲོག་ནུས་པ་ཐག་གཅོད་བྱེད་བཞིན་ཡོད།
སློབ་གསོ་ནི་མིའི་གཤིས་རྒྱུད་ལེགས་སྒྱུར་གྱི་གོ་རིམ་ཞིག་རེད།
སློབ་མ་ལ་ཤིན་ཏུ་སྟབས་བདེ་བའི་སྒོ་ནས་ཆེས་གལ་ཆེ་བའི་གནས་ལུགས་ཤེས་སུ་འཇུག་ཐུབ་པ་མ་ཟད།གནས་ལུགས་དེ་སློབ་མ་རང་གི་དངོས་པོ་ཞིག་དང་རང་གི་གོམས་སྲོལ་ཞིག རང་གི་སྙིང་སྟོབས་ཤིག་ཏུ་སུས་འགྱུར་བར་བྱེད་ཐུབ་ཚེ།ཁོ་ནི་དེང་རབས་སློབ་གསོ་སྟེང་གི་ས་སྐྱ་པཎ་ཆེན་རེད་སྙམ།
སློབ་གསོ་ནི་བརྩེ་སེམས་ཀྱི་སྒྱུ་རྩལ་ཞིག་ཡིན་པས།བྱིས་པ་ལ་བརྩེ་སེམས་ཡོད་པའི་ཕ་མ་ཡོད་ཚད་སློབ་གསོ་སྒྱུ་རྩལ་པར་འགྱུར་བའི་ཆ་རྐྱེན་ཚང་ཡོད་པ་རེད།
འདས་པའི་མི་རྒྱུད་དང་ཁྱིམ་རྒྱུད་བཟང་ངན་ནི་འདས་པའི་ཁྱིམ་ཚང་སློབ་གསོའི་མཇུག་འབྲས་ཁོ་ན་རེད།
མདོ་དབུས་ཁམས་གསུམ་གྱི་སྐད་ཆ་གང་ཡིན་ཡང་རང་རང་གི་ཡུལ་ལུང་གི་སྐད་ཆ་དེ་དག་ཐེར་བྱས་ཚེ་ད་གཟོད་སྤྱི་སྐད་རང་བཞིན་གྱིས་ཆགས་ངེས་ཡིན་ཏེ།རྒྱུན་དུ་བཤད་པའི་སྐད་ཆ-ཡུལ་སྐད-ལུང་སྐད-འདྲེས་མའི་སྐད་ཆ=སྤྱི་སྐད་ཡིན་པ་ལྟ་བུ་རེད།
འཛིན་གྲྭ་ཅི་ཙམ་དམའ་ན་འཛིན་གྲྭ་དེའི་དགེ་རྒན་གྱི་རེ་བ་དེ་ལས་ལྡོག་སྟེ་ཧ་ཅང་མཐོ་དགོས་པ་རེད།
སྤྱིར་སློབ་གསོ་བྱེད་ཐབས་སྔོན་ཐོན་དང་རྗེས་ལུས་ཀྱི་ཁྱད་པར་ནི་སློབ་གསོ་བྱ་ཡུལ་གྱི་སློབ་མའི་འཕེལ་རྒྱས་ཀྱི་ཆོས་ཉིད་དང་འཚམ་མིན་གྱིས་ཐག་གཅོད་བྱེད་དགོས།
བྱིས་པའི་སློབ་གསོ་ནི་བྱིས་པ་དངོས་པོ་གང་ལ་དགའ་སྣང་དང་འབྲེལ་འདྲིས་ཡོད་ན་ཐོག་མར་དེ་ནས་མགོ་རྩོམ་དགོས།