བོད་རང་གི་སྲོལ་རྒྱུན་རིག་གནས་ཀྱི་ཁྲོད་དུ་དགེ་རྒན་ནི་བདེ་ལེགས་ཐམས་ཅད་ཀྱི་རྩ་བར་ངོས་བཟུང་སྟེ་ཆ་རྐྱེན་དང་རེ་བ་མཐོན་པོ་བཏོན་འདུག དེ་ཡང་ཚན་ལྡན་གྱི་དགེ་རྒན་ཞིག་ཡིན་ན།མཁས་པ་ཞིག་ཡིན་པ་གཞིར་བཞག་གི་སྟེང་ནས་ཆ་རྐྱེན་དུ་མ་ཚང་དགོས་པ་ནི་མདོ་སྡེ་རྒྱན་ལས་དེ་ཉིད་རབ་ཏུ་རྟོགས་པ་སྨྲ་མཁས་ལྡན་ཞེས་གསུངས་ནས་གསལ་བོར་བསྟན་འདུག་ལ།ས་པཎ་མཁས་འཇུག་ལས་ཀྱང་གཙང་མཁས་གཞན་ལ་ཕན་པར་འདོད་པ་ཞེས་དགེ་རྒན་ལ་མཚན་ཉིད་བཞག་ཡོད།བདག་གིས་འདི་དག་དཔེར་བལྟས་ཏེ་དེང་སང་གི་རང་དང་བློ་ཁ་མཉམ་པའི་དགེ་རྒན་རྣམས་དང་དགེ་འོས་སློབ་མ་རྣམས་ལ།སྔོན་གྱི་གཞུང་ལས་གསུངས་པ་ནང་བཞིན་ཐོན་དཀའ་ཡང་།ཤེས་ཡོན་དང་ནི་བསམ་པ་དང་།ནུས་པ་སྤྱོད་ལམ་ཁྱད་པར་བཅས།ཡོངས་སུ་ཚང་ན་ཚད་ལྡན་གྱི།།སློབ་མ་སྐྱོང་ཐུབ་དགེ་རྒན་དག།ཅེས་སློབ་མ་ལས་ཡོན་ཏན་ལྷག་པ་དང་།གཞན་ལ་ཕན་པའི་བསམ་པ་ཡོད་པ།སློབ་གསོ་སློབ་ཁྲིད་ཀྱི་ནུས་པ་ཡོད་པ།སློབ་མའི་མིག་དཔེར་འོས་པའི་སྤྱོད་ལམ་ལྡན་པ།གཞན་དང་ཐུན་མོང་མིན་པའི་རང་གི་ཁྱད་པར་ཅན་གྱི་འཁྲིད་སྲོལ་ཡོད་པ་བཅས་ཕྱོགས་ལྔ་ནས་རེ་བ་འདོན་བཞིན་ཡོད།དགེ་རྒན་གྱི་ལས་གཉེར་བའི་མི་བུ་དག་གིས་ལས་རིགས་འདིའི་ངོ་བོར་ངོས་འཛིན་ཡང་དག་ཅིག་བྱས་རྗེས།རང་ཉིད་ཚད་ལྡན་གྱི་ཕྱོགས་སུ་བགྲོད་པར་རྟག་ཏུ་འབད་འབུངས་བྱ་བ་ནི་འཕེལ་རྒྱས་ཀྱི་ལམ་གཅིག་པུར་ངེས། རང་གི་ལས་རིགས་ཀྱི་ངོ་བོ་ངོས་ཟིན་རྗེས།ངེས་པར་ཤེས་དགོས་པ་རྣམས་ཁོང་དུ་ཆུད་པར་བྱ་བ་དང་།བསྒྲུབ་དགོས་པ་རྣམས་ལེགས་འགྲུབ་ཡོང་བར་བྱ་དགོས།
དེ་ཡང་ངེས་པར་ཤེས་དགོས་པ་དང་བསྒྲུབ་དགོས་པ་ལ་འདི་དག་ཡོད་དེ།སློབ་སྦྱོང་བྱ་དགོས་པའི་རྒྱུ་མཚན་ནི།ཐོས་པས་ཆོས་རྣམས་ཤེས་པར་འགྱུར།།ཐོས་པས་སྡིག་ལས་ལྡོག་པར་བྱེད།།ཐོས་པས་དོན་མ་ཡིན་པ་སྤོང་།།ཐོས་པས་མྱ་ངན་འདས་པ་འཐོབ།།ཅེས་ཐོས་པའི་ཚོམས་ལས་བྱུང་བའི་གསུང་ཚིག་དང་།ཐོས་པ་གཏི་མུག་མུན་སེལ་སྒྲོན་མེ་ཡིན།།རྐུན་པོ་ལ་སོགས་མི་འཁྱེར་ནོར་གྱི་མཆོག།ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན།།ཐབས་ཚུལ་མན་ངག་སྟོན་པའི་གྲོགས་ཀྱི་མཆོག།ཅེས་དང་།དཔལ་དང་གྲགས་དང་གཏེར་གྱི་མཆོག་ཀྱང་ཡིན།ཡ་རབས་རྣམས་དང་ཕྲད་ན་སྐྱེས་ཀྱི་མཆོག ཚོགས་ཀྱི་ནང་ན་མཁས་པ་དགའ་བར་འགྱུར།ཕས་ཀྱི་རྒོལ་ལ་ཉི་མའི་འོད་དང་འདྲ།ཞེས་སྐྱེས་རབས་ལས་བྱུང་བའི་གསུང་ཚིག་དག་ལས་ཁོང་དུ་ཆུད་པར་བྱ་དགོས།སློབ་སྦྱོང་གི་དམིགས་ཡུལ་ནི།བོད་རང་གི་སྲོལ་རྒྱུན་གྱི་རིག་གནས་ལས་སྐྱོན་ཀུན་ཟད་དང་།ཡོན་ཏན་ཀུན་ལྡན་ཞེས་བསྟན་འདུག་ལ།ང་ཚོས་རང་གིས་བདེ་སྐྱིད་ཀྱི་འཚོ་བ་རོལ་ཐུབ་པར་མ་ཟད།གཞན་དག་ལ་གྲོགས་བྱས་ཏེ་བདེ་སྐྱིད་ཀྱི་འཚོ་བ་རོལ་ཏུ་འཇུག་ཐུབ་པ་ཞིག་དམིགས་ཡུལ་ལ་བཞག་ན་ཆོག་སྙམ།སློབ་སྦྱོང་གི་ལྟ་བ་ནི།མཁས་པས་རིག་པ་རྣམ་ཀུན་ཏུ།།ན་ཚོད་ཡོལ་ཡང་བསླབ་པར་བྱ།།ཞེས་སློབ་དཔོན་ཀླུ་སྒྲུབ་ཀྱི་ཤེས་རབ་སྡོང་བུ་ལས་བྱུང་བའི་ལེགས་བཤད་དང་།རིག་པ་སློབ་པའི་དུས་ན་སྡུག བདེ་བར་སྡོད་ལ་མཁས་མི་སྲིད།ཅེས་པ་དང་།རིག་པ་ནངས་པར་འཆི་ཡང་བསླབ།ཅེས་པའི་ས་པཎ་གྱི་ལེགས་བཤད་དག་ལས་ཤེས་པར་བྱ་དགོས།སློབ་སྦྱོང་གི་རྣམ་འགྱུར་ནི།ལེགས་བཤད་བྱིས་པ་དག་ལས་ཀྱང་།མཁས་པ་རྣམས་ནི་ཡོངས་སུ་ལེན།།ཞེས་པའི་ས་པཎ་གྱི་ལེགས་བཤད་སོགས་ལས་ཤེས་པར་བྱ་དགོས།སློབ་སྦྱོང་གི་ནང་དོན་ནམ་སྦྱང་བྱ་ནི།ཚེ་འདི་ཡུན་ཐུང་ཤེས་བྱའི་རྣམ་པ་མང་།ཚེ་ཡི་ཚད་ཀྱང་ཅི་ཙམ་མི་ཤེས་པས།ངང་པས་ཆུ་ལས་འོ་མ་ལེན་པ་ལྟར།རང་གི་འདོད་པ་དང་དུ་བླང་བར་བྱ།།ཞེས་ཇོ་བོ་རྗེས་གསུངས་པ་དང་།སྲིད་པའི་ཕུན་ཚོགས་གཡོ་བ་གློག་གི་གར།།ལང་ཚོ་མི་སྡོད་རྒྱུགས་པ་རི་གཟར་ཆུ།དེ་ལྟར་རྟོགས་ནས་བློ་གྲོས་ཆེན་པོ་འགས།།བདག་གིས་རིག་གནས་གང་ལ་སྦྱང་སྙམ་ན།རིགས་ལམ་རྣམ་པར་ཕྱེད་པའི་རྣམ་དཔྱོད་དང་།གཞུང་ལུགས་གདམས་པར་ཤར་བའི་ཉམས་ལེན་དང་།།ཚིག་སྦྱོར་ཚུལ་ལ་མཁས་པའི་ངག་གི་དཔལ།།ས་སྟེང་འདི་ན་རིན་ཆེན་རྣམ་གསུམ་སྣང་།།འདི་ནི་ཤིན་ཏུ་དཀོན་ཞིང་འདོད་པ་འཇོ།།རྨད་དུ་བྱུང་བའི་དགའ་བ་རྒྱས་བྱེད་པའི།།རིན་པོ་ཆེ་ཞེས་མཁས་པ་རྣམས་ལ་གྲགས།།མཁས་པའི་ཡིད་འཕྲོག་རིན་ཆེན་གཞན་ཡོད་མིན།།ཞེས་རྗེ་ཙོང་ཁ་པས་གསུངས་པ་སོགས་ལ་གཞི་བཅོལ་ཏེ་ཤེས་པར་བྱ་དགོས།སྦྱང་བྱ་ལ་སྤྱིར་བཏང་གི་སྦྱང་བྱ་དང་བྱེ་བྲག་གི་སྦྱང་བྱ་གཉིས་ཡོད་པ་ལས་ཕྱི་མ་ནི་མི་རང་ཉིད་ཀྱི་དགའ་ཕྱོགས་དང་ཁྱད་ཆོས་ལ་བསྟུན་ཅི་ཐུབ་བྱས་ན་བཟང་སྙམ།སློབ་སྦྱོང་གི་སྙིང་སྟོབས་ནི།མི་འོ་ཅོག་གི་ལུས་འདི་ནི།།བཀོལ་བར་བྱ་བ་ཉིད་དུ་ཟད།།ཅེས་པ་དང་།འདི་ལ་གླ་རྔན་བྱིན་ནས་ནི།།ད་ནི་རང་གི་དོན་བྱེད་ཆུག། ཕན་པ་མེད་པར་འདི་ལ་ནི།།ཐམས་ཅད་སྦྱིན་པར་མི་བྱ་འོ།།ཞེས་རྒྱལ་སྲས་ཞི་བ་ལྷས་གསུངས་པ་དང་།རིག་པ་འདོད་ན་བདེ་བ་དོར།།བདེ་བ་འདོད་ན་རིག་པ་དོར།།བདེ་ལྡན་རིག་པ་ག་ལ་འགྲུབ།།རིག་པ་དོན་གཉེར་ག་ལ་སྐྱིད།།ཅེས་པའི་སློབ་དཔོན་ཀླུ་སྒྲུབ་ཀྱི་ལེགས་བཤད་སོགས་ལ་བསླབས་ཏེ་ཤེས་པར་བྱ་དགོས་ལ།རང་ཉིད་ཀྱི་རྒྱུད་ལ་རྨད་དུ་བྱུང་བའི་སློབ་སྦྱོང་གི་སྙིང་སྟོབས་ཤིག་འཁྲུངས་པར་བྱ་དགོས།སློབ་སྦྱོང་གི་གོམས་སྲོལ་ནི།སློབ་སྦྱོང་ལས་བྱུང་བའི་གོམས་སྲོལ་ཡག་ཤོས་རྣམས་ལ་གོ་དགོས།སློབ་སྦྱོང་གི་གྲུབ་འབྲས་ལེགས་མིན་ནི་སློབ་སྦྱོང་གི་གོམས་སྲོལ་ལེགས་མིན་རྗེས་སུ་འགྲོ་ལྡོག་བྱེད་པ་རེད།དེ་ཡང་གོམས་སྲོལ་ལ་དུས་ཚོད་གཅེས་འཛིན་བྱེད་པའི་གོམས་སྲོལ་དང་།རང་སྟོབས་བསམ་གཞིག་གཏོང་བའི་གོམས་སྲོལ།སློབ་དང་འདྲི་བར་དགའ་བའི་གོམས་སྲོལ།རང་འགུལ་སྔོན་སྦྱོང་བྱེད་པའི་གོམས་སྲོལ།གྱེར་འདོན་དང་བློར་འཛིན་པའི་གོམས་སྲོལ་སོགས་ཡོད།སློབ་སྦྱོང་གི་བྱེད་ཐབས་ནི།གཡུར་དུ་ཟ་བའི་སློབ་སྦྱོང་གི་འབྲས་བུ་སྐྱེད་བྱེད་ཀྱི་གྲོགས་གཅིག་པུར་ངེས།འདི་ལ་སྤྱི་དོན་བཟུང་ནས་ཚིག་དོན་ལ།།འཇུག་པར་བྱེད་པ་ཐབས་ཀྱི་མཆོག ཅེས་པ་དང་།བློ་ངོར་ཤེས་བྱའི་སྒྲོམ་གཞི་ནི།བཟོས་ཏེ་ཤེས་བྱ་གསོག་པར་བྱེད།།ཅེས་དང་།ད་དུང་།རང་གི་རྒྱུད་ལ་རྟོག་ཞོར་དུ།།སློབ་སྦྱོང་དང་ནི་ལག་ལེན་བྱེད།།ཅེས་པ་དང་།ཐོས་དང་བསམ་དང་སྒོམ་པ་གསུམ།ཡོངས་ལ་གྲགས་པའི་བྱེད་ཐབས་ཡིན།།ཞེས་པ་སོགས་ཡོངས་ལ་གྲགས་ཤིང་རྒྱུགས་ཆེ་བ་མང་དུ་འདུག  དགེ་རྒན་ནི་སློབ་གསོ་སློབ་ཁྲིད་ཀྱི་ལས་དོན་གཉེར་མཁན་ཡིན་ཕྱིར།སློབ་ཁྲིད་རྩ་དོན་ཤེས་དགོས་པར་མ་ཟད།མཐའ་གཅིག་ཏུ་རྒྱུན་འཁྱོངས་བྱ་དགོས།སློབ་ཁྲིད་རྩ་དོན་ནི་སློབ་ཁྲིད་ཀྱི་ཆོས་ཉིད་གཞིར་བཟུང་ནས་གཏན་ལ་ཕབ་པའི་སློབ་ཁྲིད་བྱ་བར་མཛུབ་སྟོན་བྱེད་པའི་རྩ་བའི་རིག་པ་ཞིག་རེད།སློབ་ཁྲིད་ལ་གྲུབ་འབྲས་ལེགས་པོ་ཞིག་ལོན་མིན་ནི་སློབ་ཁྲིད་རྩ་དོན་རྒྱུན་འཁྱོངས་ཡག་པོ་ཞིག་བྱས་མིན་གྱི་རྗེས་སུ་འགྲོ་ལྡོག་བྱེད་པ་རེད།དེའི་ཕྱིར།བརྡ་འཕྲིན་ཆ་ཚང་བའི་རྩ་དོན་དང་།མཛེས་འཛིན་གྱི་རྩ་དོན།ལག་ལེན་རང་བཞིན་གྱི་རྩ་དོན།གསར་གཏོད་རང་བཞིན་གྱི་རྩ་དོན་སོགས་བདག་ཏུ་འཛིན་པ་ཤིན་ཏུ་གལ་ཆེའོ།།
དགེ་རྒན་རྣམས་སློབ་ཁྲིད་རྩ་དོན་གྱི་མཛུབ་སྟོན་ལ་བརྟེན་ནས་སློབ་ཁྲིད་ཀྱི་སྦྱོར་དངོས་རྗེས་གསུམ་ལ་ཞུགས་དགོས་ཤིང་རང་ཉིད་ལ་རང་ཉིད་ཀྱི་ཐུན་མོང་མ་ཡིན་པའི་ཁྲིད་སྲོལ་ཞིག་ཀྱང་ཆགས་པར་བྱ་དགོས།སྦྱོར་བའི་སྐབས་སུ་དགེ་རྒན་གྱིས་འཁྲིད་གཞི་བཟོ་བ་སོགས་སློབ་ཁྲིད་གྲ་སྒྲིག་བྱ་དགོས་ལ།སློབ་མ་རྣམས་ཀྱིས་དགེ་རྒན་གྱིས་སློབ་མའི་ཆུ་ཚད་དང་དུས་ཚོད་ལ་དམིགས་ཏེ་བཀོད་སྒྲིག་བྱས་པའི་སྔོན་སྦྱོང་གི་ལས་བྱ་བསྒྲུབ་དགོས།དངོས་གཞིའི་སྐབས་སུ་སློབ་ཁྲིད་རྩ་དོན་རྒྱུན་འཁྱོངས་དང་།སློབ་ཁྲིད་འཆར་གཞི་ལག་བསྟར།སློབ་ཁྲིད་བྱེད་ཐབས་བེད་སྤྱོད་བྱས་ཏེ་སློབ་ཁྲིད་འགན་འཁུར་ལེགས་འགྲུབ་ཡོང་བར་བྱ་དགོས།རྗེས་སམ་མཇུག་གི་སྐབས་སུ་ཉན་བཤད་འབྲི་ཀློག་དང་བློར་འཛིན་པ་དང་ལྟ་བ་སོགས་ཀྱི་ཐད་ནས་སློབ་མར་ཕན་ངེས་ཀྱི་ལས་བྱ་བཀོད་སྒྲིག་བྱེད་པ་དང་དུས་ལྟར་ཞིབ་བཤེར་གང་འཚམ་བྱ་དགོས།
 སློབ་ཁྲིད་ཀྱི་དངོས་གཞིའི་སྐབས་སུ་དགེ་རྒན་རྣམ་པས་འཆད་ཐབས་ཏེ་སློབ་ཁྲིད་བྱེད་ཐབས་སྣ་མང་གང་འཚམ་གྱིས་བེད་སྤྱོད་གཏོང་དགོས།ང་ཚོ་བོད་ལ་གཞན་ལ་མེད་པའི་འཆད་ཐབས་སྣ་མང་མཆིས་ཏེ།ཚིག་དོན་ངེས་པའི་ཡན་ལག་ཏུ་ངག་དོན་འགོད་པ།གནད་དོན་ངེས་པའི་ཡན་ལག་ཏུ་སྤྱི་དོན་བཤད་པ།རྩོད་པ་འཕེལ་བའི་ཡན་ལག་ཏུ་མཐའ་དཔྱོད་སྤྲོ་བ་སྟེ་འཆད་ཐབས་ཡན་ལག་གསུམ་ལྡན་དང་།སྤྱི་དོན་ཚངས་ཐིག་གི་སྒོ་ནས་ཁོག་ཕུབ།རྩ་འགྲེལ་ཞིབ་སྦྲགས་ཀྱི་འཁྲིད་ཀྱིས་གཞུང་བཟུང་།མཐའ་དཔྱོད་བརྒལ་ལན་གྱི་སྒོ་ནས་མཐའ་བཅད་པ་སྟེ་ཉི་ཟླ་སྐར་གསུམ་གྱི་འཆད་ཐབས།ཞུམ་ལ་གཟེངས་བསྟོད་རྒོད་པ་ལ།འཁོར་བའི་ཉེས་དམིགས་ལེགས་པར་བཤད།།རྨུགས་པ་རྣམས་ལ་ངོ་མཚར་གྱི།།གཏམ་བཤད་ནས་ནི་ཉན་དུ་གཞུག།ཅེས་པའི་ཞུམ་རྒོད་རྨུགས་གསུམ་སེལ་བའི་འཆད་ཐབས་དང་།བློ་ཅན་རྣམས་ལ་ཟབ་རྒྱ་ཆེ།།བློ་ཆུང་གཟུང་བདེ་གོ་སླ་བ།།ཕྱིས་ནས་ཚིག་དོན་འབྲེལ་ཆགས་ནས།དོན་ཕྲ་འགལ་འབྲེལ་དཔྱད་ཅིང་བཤད།།ཅེས་པའི་གང་འཚམ་གྱི་འཆད་ཐབས་དང་།གཞན་ད་དུང་བཀྲ་ཤིས་རྟགས་བརྒྱད་ཀྱི་འཆད་ཐབས་དང་།གཞན་ད་དུང་བཀྲ་ཤིས་རྟགས་བརྒྱད་ཀྱི་འཆད་ཐབས་དང་།ཡན་ལག་ལྔའི་འཆད་ཐབས།འཆད་ཐབས་ལུགས་གཉིས་མ།རྩིས་མགོ་རྣམ་པ་ལྔའི་འཆད་ཐབས།སེང་གེ་མཇིང་བསྣོལ་གྱི་འཆད་ཐབས།སེང་སྦལ་སྟག་སོགས་ཀྱི་འཆད་ཐབས།དགོས་སོགས་ཆོས་བཞིའི་འཆད་ཐབས།འཆད་ཐབས་རྣམ་བཞི།དག་པ་གསུམ་ལྡན་གྱི་འཆད་ཐབས།ཆེ་བ་བཞི་ལྡན་གྱི་འཆད་ཐབས།ཐོས་བསམ་སྒོམ་གསུམ་གྱི་འཆད་ཐབས།སྙན་པར་སྨྲ་བའི་འཆད་ཐབས་སོགས་ཧ་ཅང་མང་པོ་ཞིག་ཡོད།ང་ཚོ་དགེ་རྒན་རྣམ་པས་བོད་རང་གི་ཐུན་མོང་མ་ཡིན་པའི་འཆད་ཐབས་དག་ལག་ལེན་དངོས་ཀྱི་ཁྲོད་ནས་བསླབས་ཏེ་བདག་གིར་འཛིན་དགོས་པར་མ་ཟད།དེང་དུས་སུ་དར་བའི་མཉམ་ཞུགས་ཀྱི་འཆད་ཐབས་དང་སྙིང་ཁྲིད།དྲི་བའི་འཆད་ཐབས།ཀློག་དཔྱད་སྦྱོང་ཁྲིད་དེ་འཆད་ཐབས་ཡིག་བཞི་མ།འཁྱོག་བཤད་ཀྱི་འཆད་ཐབས།ལྐོག་བརྡའི་འཆད་ཐབས་སོགས་ལས་ཀྱང་ལེགས་པའི་ཆ་ཡོད་ན་ལག་ཆར་ལེན་རྒྱུ་ནི་ཤིན་ཏུ་གལ་འགངས་ཆེ་བ་ཞིག་རེད།
གོང་དུ་སྨྲས་པ་ནང་བཞིན་ང་ཚོས་འབད་པ་ཆེན་པོས་རང་ཉིད་དང་རང་ཉིད་ཀྱི་བྱ་བ་ཚད་ལྡན་གྱི་ཕྱོགས་སུ་བགྲོད་པར་བྱས་ན་ང་ཚོའི་སློབ་གསོ་འདི་འཕེལ་རྒྱས་སུ་མི་འགྲོ་བ་མི་སྲིད་ལ།ང་ཚོའི་རིག་གནས་དང་འཚོ་བ་འདི་ཉིན་རེ་ལས་ཉིན་རེ་བཞིན་གོང་འཕེལ་དུ་མི་འགྲོ་བ་ཡང་མི་སྲིད།།