སྤྱིར་ཁ་བ་གངས་ཅན་པའི་སྐད་དུ་བྲོ་ཞེས་བྱ་བ་ནི་གདོད་མའི་མེ་ལྷའམ་ནམ་མཁའི་ཉི་མ་ལ་མཆོད་པ་འབུལ་བའི་ཆོ་ག་ཞིག་སྟེ།ཆེས་ཐོག་མའི་བྲོ་ནི་ཨ་མྱེ་ནས་སྦར་བའི་མེ་ཕུང་ཆེན་པོའི་མཐའ་སྐོར་རུ་ལྷ་པ་དག་གནས་གཅིག་ཏུ་འཛོམས་ཏེ་ཕན་ཚུན་ཞུགས་ཏེ་ལག་འཇུས་ཀྱིས་སྒོར་བྲོ་འཁྲབ་པ་དེ་ཡིན། དེ་དུས་བྲོ་པ་རྣམས་ལ་མེ་ལྷ་ཡི་ནུས་པ་ཞུགས་ཏེ་མི་རྣམས་ཆང་གིས་བཟི་བ་ལྟར་ཉིན་མཚན་བསྟུད་མར་བྲོ་ཁོ་ན་ལ་རོལ། རྒྱུ་མཚན་དེ་འདྲའི་དབང་གིས་བྲོ་འཁྲབ་ན་ལྷ་ཕབ་ཐུབ་པ་དང་། གཟི་བརྗིད་ལྡན་པར་གྱུར་བ་དང་། བསོད་ནམས་ཆེན་པོར་འཕེལ་བ་དང་།བགེགས་དང་བར་ཆད་སེལ་བ་དང་། སེམས་ཁམས་ལ་བདེ་བ་བསྐྱེད་པ།ལོ་ལེགས་ཤིང་འབྲུ་རྣམས་འཕེལ་བ། ཁྱད་པར་དུ་ཉི་མ་གཙོས་པའི་སྐར་མའི་གསང་བ་རྣམས་སྐད་ཅིག་ཏུ་བརྟོལ་ཏེ་འོད་ཀྱི་གླིང་ཆེན་མོ་རུ་འཐིམ་པ་བཅས་སོ།།

   ཉི་མའི་འོད་ཟེར་ཆེན་པོ་བརྒྱད་ཕྱོགས་ཕྱོགས་སུ་འཕྲོས་པ་བཞིན། བྲོ་ཡི་ཆོ་ག་ལ་འཇུག་མཁན་དེའང་ཐོག་མའི་མི་གྲངས་བརྒྱད་དགོས་ཏེ། དེ་ནས་ཕོ་བརྒྱད་མོ་བརྒྱད་བཅུ་དྲུག། དེ་ནས་སུམ་ཅུ་སོ་གཉིས། དེ་ནས་དྲུག་ཅུ་རེ་བཞི་ལྟར་རིམ་པ་བཞིན་དུ་ཕྱོགས་སུ་བྲོ་ར་རྒྱས་པ། བརྗོད་བྱ་ནི་བྲོ་ཆུང་ནས་བྲོ་ཆེན་དུ་འཕོས་པའི་ཚུལ་ལོ།། ཐོག་མའི་མི་གྲངས་བརྒྱད་བརྒྱད་དགོས་པ་དཔེར་ན་ཨ་སྔོན་བྲོ་གཞུང་སྐབས་སུ།

བྲོ་པ་ལྔ་གསུམ་བཅོ་ལྔ་ཡོད།།

ང་རང་ཐེ་པའི་བཅུ་དྲུག་ཡོད།།

དཔའ་བོ་བརྒྱད་དང་དཔའ་མོ་བརྒྱད།།

བརྒྱད་གཉིས་བཅུ་དྲུག་བྲོ་ལ་བྱོན།།

བྲོ་ཡི་བསྟན་པ་དེ་ནས་དར།།

  ཞེས་ཚིག་རྐང་འདི་ཡི་སྟེང་ནས་ཨོ་ཐོག་གནའ་བྲོ་ཟེར་བ་དེ་མིང་དོན་མཚུངས་པ་ཞིག་དང་། ཡང་ན་ལོ་རྒྱུས་དང་མཐུན་པའི་བྲོ་གར་རིག་གཞུང་ཞིག་ཡིན་པ་ཤེས་ཐུབ། མ་གཞི་གནའ་བྲོ་རིག་གནས་ལ་རྒྱུས་ལོན་ཡོད་མཁན་ཞིག་ཡིན་ཕྱིན་བྱུང་སྔ་ཤོས་ཀྱི་བྲོ་ནི་ཨ་སྔོན་བྲོ་ཡིན་པ་རྟགས་མཚན་གསལ་པོ་ཡོད། ལོ་ངོ་ཁྲི་སྟོང་གི་ཡར་སྔོན་ནས་བྱུང་བའི་ཨ་མྱེས་ཀྱི་བྲོ་མཆོད་རིག་གཞུང་དང་མཐུན་པའི་བྲོ་གར་རིག་གནས་དེ་ཉིད་དུས་ཀྱི་འཕོ་འགྱུར་དང་ལོ་རྒྱུས་ཀྱི་སྐྱོགས་མཚམས་རེ་རེ་བརྒལ་ནས་ད་བར་དུ་གནའ་བྲོ་རིག་གནས་གོ་རིམ་ཆ་ཚང་བ་ཞིག་གནས་ཐུབ་པ་དེ་ཡུལ་ལུང་འདི་ཡི་ཡབ་མེས་ཚོའི་བློ་སྟོབས་ཀྱི་སྤོབས་པ་དང་ཤེར་རབ་ཀྱི་རྩལ་ལས་མི་རབས་མང་པོ་ཞིག་ལ་རྒྱུན་འཛིན་དང་དར་སྤེལ་གནང་ཡོད་པ་མངོན་སུམ་ཚད་མར་གྲུབ་འདུག།