དེ་ཡང་གླུ་བླངས་ནས་མཇུག་རྫོགས་ལ་ཉེ་བའི་དུས་སུ་གླུ་པ་གླུ་མ་དག་གིས་ཚིག་གང་ཡག་དང་དོན་གང་བཟང་གི་གླུ་གདམ་སྟེ་བཀྲ་ཤིས་འཇོག་པའི་གླུ་ལེན་པའི་སྲོལ་ཡོད།ལྟོས་འཇོག་གིས་བཤད་ན་བརྗོད་དོན་གཙོ་བོའི་ཆ་ནས་ཆེན་པོ་མེས་རྒྱལ་གྱི་གནས་ཚུལ་དང་ཆུང་ངུ་ཁྱིམ་ཚང་གི་བྱ་བཞག་སོགས་མདོར་ན་ཆོས་ནོར་འདོད་ཐར་གྱི་ལས་དོན་སྣ་ཚོགས་ཡར་རྒྱས་གོང་འཕེལ་ཡོང་བར་བཀྲ་ཤིས་འཇོག་པ་ཡིན།དཔེར་ན།ཁྲ་སྒོ་རྒོད་སྒྲོ་གླག་སྒྲོ་གསུམ།མདའ་ལི་མའི་ཁ་ནས་སྤུན་གསུམ་སྒྲིག །སྤུན་ཡང་ཡང་སྒྲིག་པའི་བཀྲ་ཤིས་འཇོག།བོད་རིགས་རྒྱ་རིགས་སོག་རིགས་གསུམ།།ཆང་བདུད་རྩིའི་ཁ་ནས་སྤུན་གསུམ་སྒྲིག །སྤུན་ཡང་ཡང་སྒྲིག་པའི་བཀྲ་ཤིས་འཇོག། ལྟ་བུའོ།། དེ་བས་ཀྱང་གཙོ་ཆེ་བ་ཞིག་ནི་ཨ་མདོའི་ཡུལ་དུ་དར་ཁྱབ་ཆེ་བའི་དམངས་གླུའི་གླུ་ཚིག་ལ་རྣམ་པ་ཧ་ཅང་མང་སྟེ།སྤྱིར་བཏང་དམངས་གླུའི་ཚིག་རྐང་རིང་ཐུང་དང་ཚེག་བར་མང་ཉུང་གི་ཆ་ནས་ཚིག་རྐང་དྲུག་ཅན་དང་།བརྒྱད་ཅན།དགུ་ཅན།བཅུ་གཉིས་ཅན།བཅོ་ལྔ་ཅན་སོགས་ཡོད་ལ་འདིར་ཡིག་ཚོགས་སྐྱུང་ཕྱིར་རེ་རེ་བཞིན་མ་བཀོད།སྤྱིར་བཏང་ཚིག་འབྲུའི་ཆ་ནས་ཚིག་རྐང་རེ་ལ་ཚིག་འབྲུ་བརྒྱད་རེ་ཡོད་མོད།གླུ་ཚིག་འགའ་རུ་ཚིག་རྐང་བརྒྱད་རེ་དང་བདུན་རེ་འདྲེས་ནས་ཡང་ཡོད་པ་དཔེར་ན།ལ་གི་སྨུག་དང་ལུང་གི་སྨུག།སྨུག་བསྡུ་འདུ་བྱེད་ནོ་དྲུག་པ་རེད།ཟླ་དྲུག་པའི་ངོ་སོ་ཡར་ལ་བསྟོད།ལ་གི་ཆུ་དང་ལུང་གི་ཆུ།ཆུ་བསྡུ་འདུ་བྱེད་ནོ་རྨ་ཆུ་རེད།ཆུ་རྨ་ཆུའི་ངོ་སོ་ཡར་ལ་བསྟོད།།ལ་གི་མི་དང་ལུང་གི་མི།།མུ་བསྡུ་འདུ་བྱེད་ནོ་བདུད་རྩི་རེད།།ཆང་བདུ་རྩིའི་ངོ་སོ་ཡར་ལ་བསྟོད།།ལྟ་བུ།གལ་ཏེ་ཚིག་འབྲུ་ཆད་ལྷག་ཤོར་ཚེ་འ་དང་ཡ་སོགས་ཀྱིས་སྐོང་ཆོག ཨ་མདོའི་དམངས་གླུའི་དབྱངས་རྟའི་རྣམ་པ་ཤིན་ཏུ་མང་བས་གླུ་པ་གླུ་མ་དག་གིས་རང་རང་གི་འདོད་མོས་ལྟར་དབྱངས་རྟར་བཀུག་ཆོག དབྱངས་རྟལ་དཔེར་ན།བྱང་ཡ་རེས་ཡང་གི་ལོ།འགྲོ་བ་ཡ་རེས།སྤུན་ཁོ་ཡ་རེས།ཨ་ལོང་ལ་མོ།ཨ་ཡང་གཅིག་གི་བླངས་ཡ་སོགས་ཧ་ཅང་མང་ངོ་།།
 བཞི་བ།   ཨ་མདོའི་དམངས་གླུའི་ནང་དོན།
དེ་ཡང་ཨ་མདོའི་དམངས་གླུའི་ནང་དོན་དེ་ཨ་མདོའི་བོད་མིའི་སྤྱི་ཚོགས་འཚོ་བ་དང་ཕྱི་རོལ་གྱི་ཁོར་ཡུག་མཛེས་དཔྱོད་ཀྱི་ལྟ་བ།ཡུལ་སྲོལ་གོམས་གཤིས་སོགས་དང་འབྲེལ་བ་དམ་པོ་ཡོད་དེ།ནང་དོན་རྒྱ་ཆེ་ལ་བསམ་བློ་ཕུན་སུམ་ཚོགས་པས་འདིར་དཔེ་མཚོན་ཙམ་བཀོད་ན།
ཀ མེས་རྒྱལ་དང་ཏང་ཀྲུང་དབྱང་ལ་བསྟོད་པ།དཔེར་ན།སྟོད་གངས་རི་རི་ཡི་རི་མགོ་ན།།སེང་གེ་དཀར་མོ་ཁྲི་ལ་བཞུགས།ནང་རི་དྭགས་མང་པོའི་ཕ་མ་རེད།ལྷོ་གཡུ་འབྲུག་སྔོན་མོའི་ཁ་གནོན་རེད།།སྟོད་རྫ་རི་རི་ཡི་རི་མགོ་ན།བྱ་རྒྱལ་ཁྱུང་ཆེན་ཁྲི་ལ་བབས།ནང་བྱ་རིགས་མང་པོའི་ཕ་མ་རེད།ཀླུ་གདོལ་བ་ནག་པོའི་ཁ་གནོན་རེད།།འོད་འཕྲོ་བའི་རྒྱལ་ས་པེ་ཅིན་ན།།ཏང་གི་གཙོ་འཛིན་ཁྲི་ལ་བཞུགས།།རིགས་སོ་སོའི་དམངས་ཀྱི་ཕ་མ་རེད།།དགྲ་མི་བཞི་གཏོར་བའི་ཁ་གནོན་རེད།།ལྟ་བུའོ།།
ཁ།བླ་སྤྲུལ་དང་དཔོན་པོ།ཕ་མ་གཙོ་བྱས་པའི་རང་ལས་རྒན་རབས་རྣམས་ལ་བསྟོད་པ།དཔེར་ན།རྗེ་བླ་མ་ཕན་བདེའི་འབྱུང་གནས་ཡིན།།ཚེ་འདི་ཡི་བདེ་ལེགས་ཁོང་གིས་བསྩལ།།ཚེ་ཕྱི་མའི་ལམ་སྣ་ཁོང་གིས་འདྲེན།།རྗེ་བླ་མའི་ཡན་ན་དྲིན་ཆེན་མེད།།མཚོ་ཆེན་པོ་བདེ་སྐྱིད་འབྱུང་གནས་ཡིན།ཚེ་འདི་ལ་དགོས་འདོད་ནོར་བུ་སྟེར།།ལོ་འབྲུ་དྲུག་སྦྲང་ཆར་བཅུད་ཀྱིས་གསོ།།མཚོ་ཆེན་པོའི་ཡན་ན་དྲིན་ཆེན་མེད།།དྲིན་ཕ་མ་བདེ་སྐྱིད་འབྱུང་གནས་ཡིན།།ཟླ་ཞག་དགུ་བུ་ཆུང་ཁོག་ལ་ཁུར།།ཟས་དཀར་གསུམ་འོ་མའི་བཅུད་ཀྱིས་བསྐྱངས།།ཡུལ་ཕ་མའི་ཡན་ན་དྲིན་ཆེན་མེད།།ལྟ་བུའོ།།