ཁྱུང་གཤོག 2018-07-20
ནམ་ཟླ་དབྱར་ལ་སླེབས་པའི་གཏམ་རྒྱུད་དེས།
ང་ལ་དབྱར་ཁ་ལྟ་བུའི་གཏམ་རྒྱུད་ཅིག་དྲན་དུ་བཅུག
དགུན་ལྗོངས་ཧྲིལ་བོ་ཞིག་གི་ཉམ་ངའི་ཁྲོད།
ངས་ཁེར་རྐྱང་གི་དྲན་པ་བྲང་ལ་སྦྱར་ན།
སྣང་བརྙན་མེད་པའི་གཏམ་རྒྱུད་ནི་དགུན་ལྗོངས་འདིའི་
ཕམ་ཁ་ཡིན་ནམ།
གྲང་འདར་གྱི་འཕར་རྩ་མ་འགག་བར་དུ།
ངས་དབྱར་ཁ་འདིར་བསྒུགས་ནས་ཡོང་།
དབྱར་ལྗོངས་དང་གཏམ་རྒྱུད།
གཏམ་རྒྱུད་དང་དབྱར་ལྗོངས།
འབར་བཞིན་པའི་མདའ་མོ་ཞིག་དང་འདྲ་བར།
ངའི་སྙིང་ཆུང་གི་མཚན་མོའི་མུན་པ་ཚལ་བར་གཤགས་སོང་།
ཁྲག་དྲོན་ལས་གཏམ་རྒྱུད་ཀྱི་དབྱངས་འགྲོས་བཞུར་སོང་།
ཁྱོད་ཀྱིས་གཏམ་རྒྱུད་དེ་དྲན་བྱུང་ངམ།
ངས་གཏན་དུ་བརྗེད་རྒྱུ་མེད་པ་དེ།
ལྷག་པར་དབྱར་གཞུང་ལ་བརྗེད་རྒྱུ་མེད་པ་དེ།
དེ་རིང་གི་ལྷ་སའི་ཉི་མ་སྔར་བཞིན་དྲོ།
དབྱར་ལ་སླེབས་ཟིན་ནམ།
གཏམ་རྒྱུད་ཅིག་འདི་ནས་བཞུར་ཏེ་ཁྱེད་ཀྱི་དྲན་
ཤིང་ལ་འཐིམས།
ཞེན་ཆགས་ཀྱི་མིག་ཟུང་ལས་འགགས།
རྩོམ་གསར། 10