ནང་སེམས་ཀུན་རྟོག་གི་རྦ་རླབས།།

འགོག་མེད་ཡར་ཡར་དུ་འཕྱུར་དུས།།

སྙན་དབྱངས་ངག་རིག་གི་མེ་ཏོག།

མི་ཡུལ་སྤང་ལྗོངས་ནས་འཐུ་འགྲོ།།

ལས་བཟང་སྤྲིན་དཀར་གྱི་འོག་ནས།།

རྟེན་མཆོག་མི་ལུས་འདི་ལོན་དུས།།

དགའ་བའི་དགོད་སྒྲ་དང་ལྷན་དུ།།

སྨྲ་བའི་ལྗགས་རྩལ་ཞིག་ངོམ་འགྲོ།།

བཅོས་མིན་ཚོར་ཤེས་ཀྱི་རླུང་བུ།།

གཡུ་མདོག་འཇིག་རྟེན་དུ་ལྡང་དུས།།

སྙན་འཇེབས་དབྱངས་རྟ་ཡི་ང་རོ།།

ཡིད་འོང་ནགས་མཐའ་ནས་སྒྲོག་འགྲོ།།

ནང་སེམས་འཇའ་གུར་གྱི་དབུས་ན།།

སྒྲ་དབྱངས་ལྷ་མོ་དེ་བཞུགས་དུས།།

དཔྱོད་ཤེས་རལ་གྲི་ཞིག་ཐོགས་ནས།།

ཚིག་གི་གཡུལ་ས་རུ་ཞུགས་འགྲོ།།

མི་ཚེའི་འགྲུལ་བཞུད་ཀྱི་ཁྲོད་ནས།།

གཞོན་ཆུང་སྣང་བ་འདི་དྭངས་དུས།།

རང་བྱུང་རི་ཐང་གི་བཀོད་པ།།

སྙན་མོའི་གཞས་ཆུང་ལ་འཐེན་འགྲོ།།

ཞུམ་མེད་བརྩོན་སེམས་ཀྱི་ཀློང་ནས།།

རྣམ་དཔྱོད་འདབ་ལག་དེ་རྒྱས་དུས།།

འཁོར་བའི་ཡུལ་ལུང་གི་གསང་བ།།

སྒྱུ་འཕྲུལ་ངག་སྒོ་ནས་འཆད་འགྲོ།།