ཤར་གྱི་རྒྱལ་མོ་རྔུལ་ཆུ། ཉམས་བརྗིད་དང་ལྡན་པ།དམར་ནག་ཁམ་པའི་མདོག་དང་ལྡན་པ།དྲག་ཤུགས་ཀྱི་རྩལ་དང་ལྡན་པའི་འབབ་ཚུལ་དེ་སྣང་བས།ལྟད་མོར་གཡེང་བཞིན་ངའི་སེམས་ཀྱི་རྟོག་སྣང་གི་རྦ་རླབས་ཀྱང་འཕྱུར་བྱུང་།དེ་ཡང་།གུང་ཐང་ཚང་གིས། བརྩོན་པ་ཆུ་བོའི་རྒྱུན་བཞིན་བསྟེན་ཅིག་ཨང་ཞེས་རྒྱུན་ཆད་མེད་པའི་བརྩོན་འགྲུས་བྱ་དགོས་ཚུལ་དང་། ཇོ་བོ་རྗེས། འབབ་ཆུ་ལ་བརྟེན་ནས་མི་རྟག་པ་རྟོགས་སླ་བ་འདུག་ཅེས། སྐད་ཅིག་སྐད་ཅིག་གིས་བཞུར་བའི་མི་བརྟན་ཞིང་མི་རྟག་དྲན་ཚུལ།མར་ཁེ་སིས།འབབ་ཆུ་གཅིག་གི་ཐོག་ཏུ་རྐང་པ་ལན་གཉིས་འཇོག་མི་ཐུབ་པ།འགྱུར་བའི་རང་བཞིན་གྱི་མཚན་ཉིད་རིག་པའི་ལྟ་གྲུབ་དང་།བརྩེ་མགུར་ཞིག་ལས།ཆུ་བོ་མར་འགྲོ་ཞིག་ལ།།བྲིས་པའི་ཡིག་ཆུང་བསྐུར་ཡོད།།ཉ་མོ་ཡར་འོང་ཞིག་ལ།། ཡིག་ལན་རེ་སྒུག་བྱས་ཡོད།། ཅེས་བརྩེ་དུང་མཚོན་པའི་སྙན་རྩོམ་དང་། ཡང་། ཀོ་བ་འཕྲེད་ལ་བཏང་པས།། ཆུ་མོ་གཞུང་ལ་འཁྱེར་སོང་།། ཀོ་བ་ཁོང་རང་ལས་འཕྲོ།། ཆུ་མོ་གཞུང་ལ་ཡོད་འགྲོ།། ཞེས་ལས་འཕྲོའི་ཤུགས་ཀྱིས་འདེད་པའི་དཔེ་དང་། ཆུ་ཁ་ཐོན་དུས་གྲུ་བ་བཙན་ཞེས་པ་དང་། ཆུ་ཁ་ཐོན་དུས་རྟ་ཁ་མ་འཐེན། ཞེས་ཆུ་དང་འབྲེལ་བའི་གཏམ་དཔེ་སོགས་མང་པོ་མང་པོ་ཞིག་དྲན་བྱུང་། དེ་དང་མཉམ་དུ་སྙན་ངག་གི་འཇིག་རྟེན་དུ་ཁྲིད་པའི་ཉམས་སྣང་།

ཁམས་ཞེས་གྲགས་པའི་གསེར་ལྡན་ན། 

ལྕགས་ཐག་རིན་ཆེན་གསེར་གྱིས་ཀྱང་།། 

འགྲན་བྲལ་གནའ་ཤུལ་ལོ་རྒྱུས་ཅན།། 

ལྕགས་ཟམ་རྫོང་གི་ཉེ་འགྲམ་གྱི།། 

ཆུ་བོ་རྒྱལ་མོ་རྔུལ་ཆུ་ལ།། 

ཚིག་གསུམ་ཞུ་འདོད་ཡོད་ན་ཡང་།། 

གྲེ་བར་བསྐྱིལ་བའི་ཚུལ་བྱས་ཏེ།། 

རེ་ཞིག་སྣང་མེད་བཞག་པ་ལ།། 

སྤྲིན་དཀར་ལྷ་མོའི་མཆོད་ཆང་གིས།། 

སྙིང་གི་ལྗོན་པ་རློན་གྱིས་བརླན།། 

ཉམས་དང་སྣང་བས་མྱོས་པ་ལས།། 

མ་བཤད་གཏམ་ཞིག་འདི་ལྟར་བརྡོལ།། 

རྔམ་བརྗིད་ལྡན་པའི་ཆུ་བོ་འདིའི།། 

རལ་པ་རྦ་རླབས་དགུང་ལ་འཕྱུར།། 

ཁྲོ་གཉེར་དམར་ནག་མདངས་དང་ལྡན།། 

དཔའ་བོ་གཡུལ་ལ་ཆས་པ་འདྲ།། 

འཕྲུལ་གྱི་བཟོ་གྲྭ་ཚུགས་བྱེད་ཡིན།། 

འདོད་དོན་ཀུན་འགྲུབ་གློག་གི་གཞི།། 

རིན་ཆེན་སྒྲོན་མེ་འདི་ཡིས་སྦར།། 

ཆུ་འདི་རིན་ཆེན་དང་པོ་ཡིན།། 

ཆུ་བོ་འདི་ནི་ནོར་བདག་ཡིན།། 

དངུལ་ལོ་རིན་ཆེན་འདི་ཡིས་སྦྱིན།། 

འདོད་དགུ་འབྱུང་ལ་ཡིད་བཞིན་ནོར།།

རེ་འདོད་བསྐང་བའི་དཔག་བསམ་ཤིང་།། 

ཁྱེད་རང་ཡོད་སའི་གནས་དེ་ན།། 

རྩྭ་དང་རྩི་ཤིང་ཚང་ཚིང་འཁྲིགས།། 

མེ་ཏོག་སྣ་བརྒྱ་མིག་གི་དཔྱིད།། 

འབྲུ་རིགས་སྣ་ལྔས་དྲོད་ཁོལ་རྒྱས།། 

རིག་པའི་འབྱུང་གནས་ཁྱེད་ཡིན་པས།། 

དཔལ་ཡོན་གཞི་མའང་ཡིན་པར་གྲགས།། 

ཁྱོད་རང་ཡོད་སའི་གནས་དེ་ན།། 

ཁྲི་སྡེ་སྟོང་སྡེ་དར་བར་གྱུར།། 

རླབས་སྒྲས་རི་ལུང་ལྗོན་པ་རྣམས།། 

གཉིད་དུ་མ་འཇུག་ལྡེམ་ལྡེམ་གཡོ།། 

གནམ་སར་བརྟེན་པའི་ཡོད་དགུ་རྣམས།། 

ཁྱེད་ལ་བརྟེན་ནས་འཚོ་ཞིང་གནས།། 

དེ་འདྲའི་རྒྱལ་མོ་རྔུལ་ཆུ་ཁྱོད།། 

ཅི་འདྲའི་རླབས་ཆེན་ཡིན་ན་ཡང་།། 

ས་ལ་གཞོལ་ནས་འབབ་པ་འདི།། 

ཡ་རབས་དམ་པའི་གཤིས་སྤྱོད་བཞིན།། 

འགྲན་ཟླ་བྲལ་བའི་སྟོབས་ཤུགས་དང་།། 

ཐོགས་མེད་རྒྱུ་བའི་ནུས་རྩལ་བཅས།། 

ཁྱོད་ལ་ལྡན་ཡང་གཉོམ་ཆུང་གིས།། 

གཤིས་འཇམ་མཐུན་པའི་ལམ་ལ་འཇུག། 

དུས་ཡུན་སྐད་ཅིག་ཙམ་ལ་ཡང་།། 

གདོད་ནས་ངལ་གསོ་མེད་པ་ལ།། 

ཉིན་མཚན་མེད་པའི་ལས་ཞུགས་པ།། 

ཕུལ་བྱུང་ངལ་རྩོལ་པ་ཉིད་ཡིན།། 

ཡ་མཚན་ཆེ་བའི་འབབ་ཆུ་འདི།། 

བ་གམ་གཅིག་ཏུ་བརྩེགས་གྱུར་ན།། 

ཟམ་འོག་འདུས་པའི་ཐབས་བཀོད་མེད།། 

བར་སྣང་འཕྱུར་བའི་སྟོབས་ལྡན་ཡིན།། 

མ་དྲོས་ཀླུ་དབང་མྱོས་པའི་གར།། 

དར་གྱི་ཤམ་བུ་གཡོ་བའི་ཚུལ།། 

ཉམས་དང་འགྱུར་བའི་རོལ་རྩེད་ཀྱིས། 

ཡ་མཚན་ལྟད་མོ་མིག་གི་དཔྱིད།། 

གངས་དཀར་ཏི་སེ་མཐོ་ན་ཡང་།། 

ཇོ་མོ་གླང་རི་བརྗིད་ཀྱང་ཆོག།། 

ཆུ་བོའི་སྟོབས་ཤུགས་བསྒྲིལ་གྱུར་ན།། 

ཆ་ཙམ་ཕོད་ཚད་མེད་ངེས་སྙམ།། 

གནམ་ས་བརྗེ་བའི་ཚན་རིག་པ།། 

ཤེད་ཆེན་རྨེ་རུ་ཡིན་ཡང་ཆོག། 

སྒྱུ་མའི་མིག་འཕྲུལ་ལྡན་པ་སོགས།། 

སུས་ཀྱང་རབ་ཆོད་འོང་དཀའ་ཡང་།། 

ཤུགས་ཆེན་ཡ་མེད་ཆུ་བོའི་ནང་།། 

ཉ་མོ་རྣམས་ཀྱིས་འཁྱུག་འགྲོས་སུ།། 

བག་ཡངས་རྒྱུ་བའི་ངང་ཚུལ་འདིས།། 

རྟེན་འབྲེལ་བསླུ་མེད་མཚོན་པ་ཡིན།། 

སྣ་བདུན་རིན་ཆེན་ཚང་ཚུལ་ནི།། 

དགོས་འདོད་འབྱུང་བའི་ནོར་བུ་ཡིན།། 

རེག་ན་བདེ་སྟེར་བཙུན་མོ་ཡིན།། 

ཀུན་ལ་དབང་བསྒྱུར་བློན་པོ་ཡིན།། 

ཡ་མེད་སྟོབས་ལྡན་གླང་ཆེན་ཡིན།། 

ཐོགས་མེད་རྒྱུ་བའི་རྟ་མཆོག་ཡིན།། 

འཇིགས་མེད་དང་ལེན་དམག་དཔོན་ཡིན།། 

ཡང་ཡང་བསྐོར་བའི་འཁོར་ལོ་ཡིན།། 

བཀྲ་ཤིས་རྟགས་བརྒྱད་ཚང་ཚུལ་ཡང་།། 

བསིལ་རླུང་སྦྱིན་པས་གདུགས་ཀྱི་ལས།། 

ངང་ཚུལ་མི་འགྱུར་དཔལ་བེའུ་ཡིན།། 

རེ་བ་བསྐངས་བས་བུམ་པ་བཟང་།། 

གཞན་གྱིས་མི་ཐུབ་རྒྱལ་མཚན་ཡིན།། 

པདྨའི་མེ་ཏོག་སྐྱེད་བྱེད་ཡིན།། 

གཤོག་དྲུག་ཉ་མོའི་རང་ཁྱིམ་དང་།། 

དབྱིབས་མཛེས་དུང་དཀར་རང་འགྲུབ་ཡིན།། 

ཐོགས་མེད་རྒྱུ་བའི་འཁོར་ལོ་བཅས།། 

ལྕེ་བརྒྱ་སྤྲུལ་ནས་ཡོན་ཏན་རྣམས།། 

བརྗོད་ཀྱང་ངལ་བའི་རྒྱུ་ཙམ་ལས།། 

ཇི་བཞིན་གཞལ་བ་མི་ནུས་སྙམ།། 

ཚེ་ཐག་སྲིང་བྱེད་བདུད་རྩི་མཆོག། 

ནད་ལས་གྲོལ་བྱེད་སྨན་གྱི་མཆོག།། 

འདོད་དགུ་འབྱུང་བའི་གཡང་གི་མཆོག། 

དབུ་འཕང་མཐོ་བྱེད་རླུང་རྟ་མཆོག། 

དགུན་ཆུ་གོས་དཀར་ལྷ་མོ་ཡིན།། 

དབྱར་ཆུ་གཤིན་རྗེ་གཤེད་མ་ཡིན།། 

སྟོན་ཆུ་དྭངས་གཙང་མེ་ལོང་ཡིན།། 

སྣ་ཚོགས་ཉམས་ཀྱིས་ཕྱུག་པར་གྱུར།། 

ཉེར་བཞིའི་དྲུག་པའི་ཚེས་པ་ནི།། 

བཅུ་གཉིས་ཕྱི་དྲོའི་དུས་བཟང་ལ།། 

ཆུ་བོ་རྒྱལ་མོ་རྔུལ་ཆུའི་འགྲམ།། 

མགྲོན་དུ་ཆས་པའི་རྒན་བུ་དེས།། 

ལྟ་བས་མི་ངོམ་རླབས་ལ་བལྟས།། 

དཔྱད་པས་མི་ངོམ་རྟོག་རླབས་འཕྱུར།།

བསྒོམས་པས་མི་ངོམ་བརྗོད་པ་སྒྲས།། 

ཕངས་སེམས་མེད་པར་གཟུགས་སུ་ཕབ།། དགེའོ།། །།

རྩོམ་པ་པོ། ལྕང་ཞབས་པ་འགྱུར་མེད་ཚེ་དབང་།

རྩོམ་སྒྲིག་པ། མགར་རྒྱལ་སྲས།