རྒྱང་རིང་གི་མི། ལོ་ཟླ་འདིར་བདེ་བར་བཞུགས་སམ། དོ་ནུབ་ཁེར་རྐྱང་གི་

ན་ཟུག་ལྕི་བས།

ངས་ཁྱེད་རང་དྲན་པའི་དོ་ཞག་གི་འཚོ་བའི་ཁ་དོག་དག།

ཡི་གར་འོང་བའི་ཁྱེད་ཀྱི་འདྲ་གཟུགས་ལ་ལྟ་བཞིན།

ཤོག་ཐོག་ཏུ་ཕབ་སྙིང་འདོད།

ཁ་དོག་འདིས་ཁྱོད་ཀྱི་ནང་སེམས་སུ་སྐྱོ་སྣང་ཞིག་སྟེར་ངེས་ལ།

སྤྲོ་སྣང་ཞིག་ཀྱང་སྟེར་ངེས།

གང་ལྟར་སེམས་ཀྱི་ཕྱི་ནང་དུ། དྲན་གདུང་གི་ན་བུན་སྟུག་པས།

ཁྱོད་རང་དྲན་པའི་ཚོར་བའི་འཕྲིན་པ་ཞིག། རྒྱང་རིང་རྒྱང་རིང་ཞིག་ནས་བྲིས་ན་

འདོད་ཅིང་།

ཁྱོད་རང་དྲན་པའི་སྐྱོ་སྣང་གི་གླུ་གཞས་ཤིག། ཐག་རིང་ཐག་རིང་ཞིག་

ནས་ལེན་ན་འདོད།

དོ་ཞག། ཁྱོད་མེད་པས་ཉི་འོད་ལ་དྲོད་ཐིག་མི་འདུག་ལ་ཟླ་གཟུགས་ལ་མཛེས་

སྡུག་མི་འདུག།

ལྷག་དོན་ཁེར་རྐྱང་གི་ནམ་ཟླ་འདི་ནི་ཅི་འདྲའི་རིང་ཨང་།

ང་ཉིད་ཁྱོད་དང་ཞལ་གྱེས་རྗེས།

ཉིན་གྱི་ཟས་བརྗེད་ཅིང་། མཚན་མོའི་གཉིད་བཅག།

གཟུགས་ཀྱི་སྟོབས་ཞན་ཞིང་།

ལུས་ཀྱི་ཤ་ཞན། མགོ་བོའི་སྐྲ་དཀར་ཏེ། གདོང་གི་ངོ་སྐམ་ཚར། ཁྱོད་རང་དྲན་པའི་ང་།

ད་ནི་མི་ཡི་ཕྱེད་དུ་ཆགས་ཟིན། སྙིང་ཉེ།

ངས་འུ་གཉིས་ཀྱི་མ་འོངས་པའི་འཚོ་བ་ལ་བཟོ་བཀོད་བྱས་མེད་ཅིང་།

བྱེད་ཀྱང་མི་འདོད། ངས་འདས་སོང་གི་ལོ་ཟླ་ལ་ཕྱིར་དྲན་བྱེད་ཀྱིན།

འུ་གཉིས་ཀྱི་འདུ་འཛོམ་དང་གྱེས་བྲལ་གྱི་གཏམ་རྒྱུད་ཅིག་བྲིས་ན་འདོད།

ངས་འུ་གཉིས་ཀྱི་མ་འོངས་འདུ་འཛོམ་ལ་རེ་ཞིང་སྒུག་བཞིན།

ཡིད་དུ་འོང་བའི་གཏམ་རྒྱུད་ཅིག་མི་ཡུལ་དུ་བཀྲམ་པའི་རེ་བ་བྱས་ཡོད།

སྙིང་ཉེ་བའི་མི།