གངས་དང་ལྷུན་པོའི་ཏོག་རྒྱན་གྱི། །

ཨུཏྤལ་མདོག་འཛིན་བྱ་ལམ་ནས། །

ཉི་ཟླ་ཤིང་རྟས་སྐད་ཅིག་ཏུ། །

ཟློས་ཕྱོད་དྲག་པོས་ཟློ་བ་ཡི། །

དྲན་འཛིན་ངོས་ཀྱི་རྟ་ཕོ་ཁྱོད། །

དབང་པོའི་ལྕག་གིས་གཞུས་པ་བཞིན། །

སྲེག་ཟས་འཇིལ་བར་བྱོལ་བ་དང་། །

བསིལ་བའི་ཚང་ཟླ་མ་ནུས་པར། །

གོམ་འགྲོས་སྐྱེན་པོས་འཇིག་རྟེན་གྲོང་། །

གློག་འོད་འཁྱུག་པའི་ངང་ཚུལ་གྱིས། །

ས་གཞིའི་འདོམ་འཇལ་རྒྱ་མཚོའི་ཁྱོན། །

བཅད་དེ་བཙལ་ཀྱང་ཆ་མེད་ཡལ། །

གང་གི་དཔུང་པ་གཏུམ་པོ་དེས། །

འཇིགས་ཏེ་སྟོན་ཁའི་སྤྲིན་ལྟར་ཡལ། །

ལྟ་བྱེད་ཟུང་གིས་གཟུགས་མ་ཐུབ། །

ཉན་བྱེད་འདབ་མས་སྒྲ་མ་བསྙལ། །

སྣ་ཚོགས་དོན་གྱི་འདབ་ཚལ་ནས། །

ཁྱོད་ནི་སྟོང་པའི་ངང་དུ་བྲོས། །

ནམ་མཁའ་འགོངས་པའི་བྱེད་པོའམ། །

ས་ཡི་བདག་པོར་བློ་དྲིས་ཀྱང་། །

རྣམ་དཔྱོད་རྩལ་གྱིས་དཔག་མ་ཆོད། །

བསམ་གཞིག་ཁྲོ་ཆུས་མ་ཐུབ་རྒྱལ། །

ཚིག་གི་ཟིལ་མས་སྦངས་མཐའ་དབེན། །

ཨཱ་དིའི་བུ་ཡི་ཟླ་རུ་རྟོགས། །

འཛིན་མས་སྤྲས་སོགས་དུས་ཚིགས་བཞི། །

སྙིམ་གཅུས་དག་བྱེད་རྣམ་པ་ཀུན། །

ཁྱོད་བྱིན་དགའ་བས་སྣ་ཚོགས་སོན། །

རྫིང་སྐྱེས་གྲོལ་བའི་མེ་ལོང་ངོགས། །

དུས་ཀྱི་རྗེས་ཆགས་གཉེར་མས་བཅོམ། །

ཁྱོད་ལ་འགྲོ་བྱེད་སྟོང་དང་ལྡན། །

ཟིང་ཟིང་ཁྲོད་ན་སྟོང་བར་སྣང་། །

ཞི་འཇམ་གསེང་ནས་སངས་བར་མངོན། །

འགྲོ་ཀུན་དངོས་ཡོངས་ཐུན་མོང་ལ། །

ལྡན་ཀྱང་ཟོལ་བའི་ཅོ་འདྲི་སློང་། །

རྣམ་ཀུན་གནས་པ་ཁྱོད་ལས་སུ། །

ཁྱོད་ཀྱི་རྗེས་སུ་ཀུན་ཐོགས་སམ། །