དང་པོ་ཁྱོད་རང་མཐོང་དུས།།

སྤྱན་ཟུང་རི་དྭགས་འདྲོག་འདྲ།།

བར་དུ་ཐུག་འཕྲད་གནང་དུས།།

སྙིང་གཏམ་ཆར་པ་ཤག་ཤག།

མཐའ་མར་གྱེས་ཕྱག་ཕུལ་དུས།།

ཟུར་མིག་མདའ་མོ་འཕང་འཕང་།།

གོམ་ཁ་ཕྱི་ལ་ལོག་ཀྱང་།།

སེམས་པ་ཁྱོད་རྩར་ལྡོམ་སོང་།།

སྣང་བའི་ཆུ་འཛིན་དཀར་པོ།།

ཁྱོད་ལ་བཙན་གྱིས་གཅར་ཡང་།།

ལས་དང་བསམ་པའི་ཁ་ཕྱོགས།།

རྒྱང་ནས་རྒྱང་ལ་ཆས་སོང།།

མིག་ལ་འཆར་བའི་བྱད་གཟུགས།།

ཡིད་ནས་བསུབ་ཐབས་མ་བྱུང་།།

ཁྱོད་ལ་ཆགས་པའི་སེམས་པ།།

ཚེ་འདིའི་ལན་ཆགས་འདྲ་ལེ།།

ཤི་ནས་མི་ལུས་བླངས་ཀྱང་།།

ཁྱོད་ཀྱིས་ཐུགས་ལ་མེད་ན།།

ཕྱི་མའི་སྐྱེ་ལུས་ཞིག་ལ།།

འཕྲད་ཡོངས་བསམ་བསམ་མི་འདུག།

ལང་ཚོའི་མེ་ཏོག་མཛེས་པ།།

ཚིག་འཇམ་སྙིང་གཏམ་བྱོ་བ།།

ཡིད་ཀྱི་དབང་པོ་རྐུ་བའི།།

ཁྱོད་ནི་སྒྱུ་འཕྲུལ་ལྷ་མོ།།