ལོ་ཟླ་ཡུན་གྱིས་འདས་ཀྱང་།།

བརྩེ་འདང་མཚོ་མོ་ཟབ་པས།།

ང་དང་མོ་ཡི་བར་གྱི།།

གཏམ་རྒྱུད་ཞེ་ལ་འཁོར་བྱུང་།།

དང་པོ་མ་མཐུན་ལོ་ཟླར།།

སྙིང་ལ་སྡུག་པ་མིན་རུང་།།

སེམས་པ་སོང་བའི་དུས་ལ།།

ཞེ་ནས་འདོར་ཐབས་མི་འདུག།

ཞལ་རས་དུང་ཟླ་དཀར་པོ།།

སེམས་པའི་དཀྱིལ་ནས་འཚེར་བྱུང་།།

གཤིས་བཟང་མཛངས་མ་ཁྱོད་ཉིད།།

ཞེ་ལ་གཏན་དུ་ཐོགས་འདུག།

ཕར་བསམ་ཕར་ལ་བརྩེ་ཞིང་།།

ཚུར་བསམ་ཚུར་ལ་དུང་ཡང་།།

ལྷན་དུ་འཛོམས་ཡུན་ཐུང་བས།།

སྙིང་གཏམ་བཤད་འཕྲོ་ལུས་ཡོད།།

ཨེ་འཕྲད་རེ་བ་ཆེ་ཡང་།།

འདི་ན་འཕྲད་བསམ་ངར་མེད།།

སྟེས་དབང་ཞིག་གིས་འཕྲད་དུས།།

ངག་འདར་སྙིང་རྩ་འགུལ་བྱུང་།།

ཚིག་གསུམ་བཤད་པ་དྲན་བྱུང་།།

ཞག་གསུམ་རུམ་པའང་དྲན་བྱུང་།།

སྙིང་གི་འཕར་ལྡིང་ཁྲོད་ནས།།

འོ་ཞིག་བྱས་པའང་དྲན་བྱུང་།།

ལྷན་དུ་འཛོམས་ན་བསམ་མྱོང་།།

འགྲོགས་འདྲིས་ཨེ་ཡོང་བསམ་མྱོང་།།

གཏན་གྲོགས་ཚེ་ཡི་སྐྱ་ཡ།།

ཁྱོད་ཉིད་ཡིན་ན་བསམ་མྱོང་།།

མི་ཚོགས་འདུས་པའི་དབུས་ནས།།

ཟུར་མིག་འཕེན་ས་ཁྱོད་ཡིན།།

ཁེར་རྐྱང་མུན་པའི་ཀློང་ནས།།

སེམས་ཀྱི་དྲན་ཤིང་ཁྱོད་ཡིན།།

སྙིང་གྲོགས་དུང་སེམས་ཅན་མ།།

རྨི་ལམ་ན་ཡང་འཁོར་མྱོང་།།

ལས་དབང་བསམ་ནག་མིན་ན།།

མི་ཚེ་མཉམ་དུ་རོལ་འགྲོ།།

དཔོན་པོའི་བཀའ་བཀོད་མ་རེད།།

ཕ་མའི་བཀོད་སྒྲིག་མ་རེད།།

གཅིག་སེམས་གཅིག་ལ་དུང་ཡང་།།

ལས་ཀྱི་ལམ་ཁ་མ་གཅིག།

སེམས་དང་བསམ་པའི་བར་གྱི།།

ཁ་ཐག་རིང་སོང་མ་རེད།།

བརྩེ་དུང་དར་གྱི་མདུད་པ།།

སུས་ཀྱང་བཀྲོལ་སོང་མ་རེད།།

སྨན་ཆུང་ཁྱོད་ལ་དུང་དུང་།།

སུ་ལ་དུང་མྱོང་མེད་ཀྱང་།།

ལས་ཀྱི་རླུང་ནག་འཚུབ་པས།།

སོ་སོའི་ལམ་ཁར་གྱེས་སོང་།།

ཆ་མེད་བུ་མོ་ཞིག་དང་།།

འཚོ་བ་རོལ་བསམ་མེད་ཀྱང་།།

ལས་ཀྱིས་བསྐོས་སྟངས་ཡིན་པས།།

ཁོ་བོར་ལན་ཁག་མི་འདུག།

རྒྱུས་མེད་གསར་བུ་ཞིག་ལ།།

ཁྱོད་རང་སྤྲོད་བསམ་མེད་ཀྱང་།།

ལས་དབང་བསམ་ནག་ཡིན་པས།།

ང་ལ་བཀོད་པ་མེད་ཀི།

བུ་མོར་ལེ་བདའ་མེད་ཅིང་།།

བུ་ཆུང་འཁང་ར་མ་གནང་།།

ཚེ་རབས་ཕྱི་མ་ཞིག་ལ།།

མཉམ་འཛོམས་ཨེ་ཡོང་ལྟ་ཆོག།