ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་11ཉིན་གློག་འཕྲིན་འབྱོར་གསལ། ཉེ་ཆར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པར་ཙིར་གྱི་ལས་རིགས་ཁག་གི་མཛའ་གྲོགས་མི་སྣར་འཕྲིན་ལན་སྤྲིངས་ནས་ཁོང་ཚོས་ཀྲུང་གོ་དང་པར་ཙིར་དབར་གྱི་མཛའ་གྲོཌ་བྱ་གཞག་ལ་མུ་མཐུད་ལེགས་སྐྱེས་འབུལ་བར་སྐུལ་ལྕག་གནང་ཡོད།

    ཞི་ཅིན་ཕིང་གིས་ཀྲུང་གོ་དང་པར་ཙིར་རྒྱལ་ཁབ་གཉིས་པོའི་མཛའ་གྲོགས་བྱ་གཞག་རྒྱུན་འཛིན་བྱེད་མཁན་ཡོད་པ་མཐོང་སྐབས་ཧ་ཅང་དགའ་པོ་བྱུང་། ཕྱི་འབྲེལ་བཙུགས་ནས་ལོ་50སོང་རིང་། ཀྲུང་གོ་དང་པར་ཙིར་རྒྱལ་ཁབ་གཉིས་ཀྱིས་ལག་གདང་སྦྲེལ་ནས་མདུན་སྐྱོད་དང་སྐྱིད་སྡུག་མཉམ་མྱོང་བྱས་ཏེ་རི་མཚོ་བརྒལ་བའི་གྲོགས་པོ་བཟང་པོ་ཞིག་ཏུ་གྱུར་ཡོད། ཀྲུང་གོ་ཕྱོགས་ཀྱིས་པར་ཙིར་ཕྱོགས་དང་མཉམ་དུ་རྒྱལ་ཁབ་གཉིས་པོའི་མཛའ་གྲོགས་ཀྱི་དུས་རབས་ཀྱི་ནང་དོན་ཕུན་སུམ་ཇེ་ཚོགས་སུ་བཏང་ནས་ཀྲུང་གོ་དང་པར་ཙིར་དབར་གྱི་འབྲེལ་བ་དེ་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོའི་མཐུན་སྒྲིལ་མཉམ་ལས་དང་། ཐུན་མོང་འཕེལ་རྒྱས། (པར་ངོས་གཉིས་པར་གཟིགས)(པར་ངོས་དང་པོར་མཐུད) གཉིས་ཕན་གཉིས་ཁེ་བཅས་ཡོང་བའི་དཔེ་མཚོན་དུ་བསྒྱུར་ནས་མིའི་རིགས་ཞི་མཐུན་ཡར་ཐོན་གྱི་བྱ་གཞག་ལ་ལེགས་སྐྱེས་དེ་བས་ཆེ་བ་འབུལ་འདོད་ཡོད། པར་ཙིར་གྱི་གྲོགས་པོ་ཀྲུང་གོར་མང་ཙམ་ལྟ་བར་ཡོང་ནས་ཀྲུང་གོའི་ལུགས་ཀྱི་དེང་རབས་ཅན་གྱི་འཕེལ་ཚུལ་བཟང་པོ་རང་ངོ་མས་ཚོར་ཐུབ་པ་བྱ་རྒྱུར་དགའ་བསུ་ཞུ་རྒྱུ་ཡིན། རྒྱལ་ཁབ་གཉིས་པོའི་ལས་རིགས་ཁག་གི་མི་སྣས་ཀྲུང་གོ་དང་པར་ཙིར་དབར་གྱི་འབྲེལ་བ་འཕེལ་རྒྱས་ཟམ་མི་ཆད་པར་འགྲོ་བར་དགེ་མཚན་ལྡན་པའི་ནུས་པ་འདོན་རྒྱུར་སྐུལ་འདེད་བཏང་སྟེ་ཀྲུང་གོ་དང་པར་ཙིར་དབར་གྱི་མཛའ་གྲོགས་འབྲི་ཆུ་དང་ཡ་མ་སུན་ཆུ་བོ་བཞིན་རྒྱུན་མི་ཆད་པའི་རེ་བ་ཡོད་ཅེས་གསུངས།

    ཉེ་ཆར། པར་ཙིར་གྱི་ཧྲེང་པའོ་ལོ་ཀྲོའུ་ཁེན་ཕི་ནེ་སི་གྲོང་ཁྱེར་གྱི་ཧྲི་ཀྲང་ཟུར་པ་ཨེན་ལི་ཁེ·ཐེ་ཞེ་ལ་ཡིས། པར་ཙིར་དང་ཀྲུང་གོའི་མཛའ་གྲོགས་མཐུན་ཚོགས་དང་། པར་ཙིར་གྱི་ཧྲེང་པའོ་ལོ་སློབ་ཆེན། ཧྲེང་པའོ་ལོ་ཀྲོའུ་བཙུགས་སློབ་ཆེན་བཅས་ནས་ཡོང་བའི་དགེ་སློབ་དང་། ལི་གཡོད་ཁོ་ཕ་ཁཱ་པ་ནེ་མཁར་རྫོང་གི་རོལ་དབྱངས་ཚོགས་པ་སོགས་ཀྱི་པར་ཙིར་གྱི་མཛའ་གྲོགས་མི་སྣ་བརྒྱ་ལྷག་ཙམ་ཁག་སོ་སོས་ཀྲུའུ་ཞི་ཞི་ཅིན་ཕིང་ལ་འཕྲིན་ཡིག་སྤྲིངས་ནས་ཀྲུང་གོ་སྲིད་གཞུང་དང་། ཁེ་ལས། མཐོ་སློབ་བཅས་ཀྱིས་པར་ཙིར་དང་ཀྲུང་གོའི་དབར་གྱི་མཛའ་གྲོགས་སྤེལ་རེས་དང་ས་གནས་དེ་གའི་དམངས་འཚོ་ལེགས་སུ་གཏོང་བར་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་ཡོད།