སྟག་རིག་འབྲུག་ཐར། 2023-04-14
ཁྲི་གདུགས་ཉི་མའི་ཟེར་དང་གཅིག །
དུང་ཟླ་དཀར་པོའི་འོད་དང་གཉིས། །
སྐར་ཚོགས་ཕྲ་མོའི་འཛུམ་དང་གསུམ། །
ཨ་སྔོན་དགུང་གི་རྒྱན་དུ་འཛོམས། །
གསེར་ལྡན་རི་བོ་བརྗིད་དང་གཅིག།
དལ་འབབ་ཆུ་མོ་གཙང་དང་གཉིས། །
སྤོས་ལྡན་ནགས་ཀླུང་ཕྱུག་དང་གསུམ། །
སྣོད་བཅུད་གཡང་གི་རྒྱན་དུ་འཛོམས། །
གཡུ་འབྲུག་སྔོན་མོའི་གསུང་དང་གཅིག །
སྦྲང་ཆར་བསིལ་མའི་དངོས་གྲུབ་གཉིས།།
ས་གཞིར་དྲོད་གཤེར་འཛོམས་དང་གསུམ། །
རྩི་བཅུད་སྨིན་པའི་རྒྱན་དུ་འཛོམས། །
ཟབ་ཡངས་རྒྱ་མཚོ་འཁྱིལ་དང་གཅིག།
ལྟོ་དཀར་ཉ་མོ་འཁྱུག་དང་གཉིས། །
ནོར་བུ་དཔུང་འཇོམས་འཕེལ་དང་གསུམ། །
འོག་ཕྱོགས་ཀླུ་ཡི་རྒྱན་དུ་འཛོམས། །
ཁུ་བྱུག་གསུང་སྐད་སྙན་དང་གཅིག།
སྔོ་ལྗང་གཡུ་ལོ་ལྡེམ་དང་གཉིས། །
དངོས་གྲུབ་སྦྲང་ཆར་འཇོ་དང་གསུམ། །
དཔྱིད་དཔལ་བསུ་བའི་རྒྱན་དུ་འཛོམས། །
རྩི་ཏོག་སྣ་ལྔ་འཁྲུངས་དང་གཅིག །
དཀར་ནག་ཕྱུགས་རིགས་བཀྲམ་དང་གཉིས།།
རྫི་བོའི་དྲུག་འགྱུར་སྙན་དང་གསུམ། །
རྩྭ་ཐང་ཡངས་པོའི་རྒྱན་དུ་འཛོམས། །
ཡངས་ཤིང་རྒྱ་ཆེའི་མཁའ་ལམ་གཅིག།
སྐྱི་བསེར་རླུང་གི་དཔུང་ཡ་གཉིས། །
གཤོག་དྲུག་རྒོད་པོ་མཐུར་མེད་གསུམ། །
ནམ་འཕང་གཅོད་པའི་རྒྱན་དུ་འཛོམས། །
བྱམས་ལྡན་དྲིན་ཆེན་ཕ་མ་གཅིག།
མཛའ་གཅུགས་རྡོ་རྗེ་ཕུ་ནུ་གཉིས། །
ཆེ་བཀུར་ཆུང་བྱམས་འཆམ་དང་གསུམ།།
གཡང་ཁྱིམ་སྐྱིད་པའི་རྒྱན་དུ་འཛོམས།།
མཁྱེན་དཔྱོད་ཡངས་པའི་བཤེས་གཉེན་གཅིག།
བློ་རིག་གྲིམ་པའི་སློབ་བུ་གཉིས། །
ཤེས་ཡོན་བཀྲ་བའི་དཔེ་དེབ་གསུམ། །
སློབ་རའི་གླིང་གི་རྒྱན་དུ་འཛོམས། །
སྙན་འགྱུར་ཁུ་བྱུག་གདངས་དང་གཅིག།
སྟངས་སྟབས་རྨ་བྱའི་ལྡེམ་འགྲོས་གཉིས། །
འཛུམ་དཀར་པད་མོ་དགོད་དང་གསུམ།།
གར་སྟེགས་སྡིངས་ཆའི་རྒྱན་དུ་འཛོམས། །
ཞིམ་མངར་ཐུད་ཀྱི་སྡེར་ཁ་གཅིག།
ཤིང་འབྲས་མངར་ཆའི་རི་རབ་གཉིས། །
ཇ་ཆང་མཚོ་མོའི་སྐྱེམས་བཟང་གསུམ། །
རྟགས་དང་སྟོན་མོའི་རྒྱན་དུ་འཛོམས། །
གནམ་ལ་རྒྱུ་སྐར་འཕྲོད་དང་གཅིག།
བར་ན་རྟེན་འབྲེལ་འགྲིག་དང་གཉིས། །
ས་ལ་སྲིད་པའི་དུས་བཟང་གསུམ། །
བཀྲ་ཤིས་ཉི་མའི་རྒྱན་དུ་འཛོམས། །
རབ་དཀར་འོ་མའི་ཤོག་བུ་གཅིག།
སྨྱུག་ཆུང་ཕྲ་མོའི་གར་སྟབས་གཉིས། །
ཚོར་རྟོག་རྣོན་པོའི་འགྱུ་བག་གསུམ། །
སྙན་ངག་མཆོད་པའི་རྒྱན་དུ་འཛོམས། །
རྩོམ་གསར། 10