དང་པོ་ཙ་ན།གྲང་རླུང་འུར་འུར་ལྡང་བའི་མཚན་མོ་ཞིག་ལ་ཚོང་བ་ཞིག་གིས་བོང་བུ་དྲེའུ་འདྲ་བ་ཞིག་ཁྲིད་ནས་རང་ཡུལ་དུ་ལོག་བཞིན་འདུག སྐབས་དེར།རྐུན་མ་མིང་གྲགས་ཅན་གཉིས་ཡོད་པ་དེ་གཉིས་ཀྱིས་བོང་བུ་དྲེའུ་འདྲ་བ་དེ་གཉིས་ཀྱིས་བོང་བུ་དྲེའུ་འདྲ་བ་དེ་མཐོང་འཕྲལ།བརྐུ་འདོད་པའི་སྤུ་ལོང་གཡོས་ནས་དལ་བུར་ཚོང་བའི་རྗེས་ནས་འཇབ་སྟེ་བོང་བུའི་མགོ་ཡི་མཐུར་ཕུད་རྗེས་རྐུན་མ་གཅིག་གིས་མཐུར་རང་གི་སྐེར་གོན་མུ་མཐུད་དུ་ཚོང་བའི་རྗེས་བསྙེགས།རྐུན་མ་གཅིག་གིས་བོང་བུ་དེད་ནས་ཕྱིར་ཡོང་། ཚོང་བ་རང་ཁྱིམ་ལ་སླེབས་ལ་ཁད་དུ་ཁ་ཕྱིར་འཁོར་ཙ་ན།ཨ་ལྟས་ངན།མི་ཞིག་གི་མགོར་མཐུར་བསྐོན་ནས་ཁྲིད་ཡོང་གི་འདུག་པ་མཐོང་བས་རེ་ཞིག་ཧད་དེ་ལུས།
 མཚམས་དེར་རྐུན་མས་དལ་དལ་ལྷོད་ལྷོད་ཀྱི་ངང་ནས་“བདག་པོ་ལགས།ཁྱོད་ཡ་མཚར་དགོས་དོན་མེད།དང་བོ་ང་རང་ལྷའི་ཡུལ་ནས་སྐྱོན་ལ་ཐོག་རྗེས།ལྷའི་དབང་བོ་བརྒྱ་བྱིན་གྱིས་ང་རང་ལྷ་ཁྲིམས་ལྟར་མི་ཡུལ་འདིར་མངགས་ནས་བོང་བུ་ཞིག་གི་སྐྱེ་བ་ལེན་དུ་བཅུག ཡིན་ནའང་ད་ལྟ་ཉེས་དམིགས་དག་ཟིན་པས།མི་ལུས་འདིའི་བསྐལ་བ་ཐོབ་པ་ཡིན”ཞེས་བཤད།
ཚོང་བས་རྐུན་མའི་སྐད་ཆར་ཉན་རྗེས་གནས་ལུགས་ཆེན་པོ་འདུག་སྙམ་ནས།“དེ་ལྟར་ཡིན་ན།ཁྱོད་ཀྱིས་ད་རེག་བར་ངེད་ཚང་གི་དོན་དུ་དཀའ་ལས་མང་བོ་ཞིག་མྱངས་སོང་བས།ངས་འདི་ནས་དངུལ་ལྔ་བཅུ་མ་གསུམ་ཁྱོད་ལ་འོ་རྒྱལ་དུ་སྟེར།ད་སོང་ནས་མི་ལུས་རང་དབང་གི་འཚོ་བ་སྐྱིད་པོ་ཞིག་རོལ་བར་གྱིས།རྗེས་ཕྱོགས་སུ་བྱ་ངན་འདྲ་ལས་ནས་ཕྱིར་བོང་བུར་འགྱུར་དུ་མ་མཇུག”ཅེས་ཁ་བརྡ་མང་བོ་བྱས་རྗེས་འགྲོ་རུ་བཅུག
ཟླ་འགའི་རྗེས་སུ་ཚོང་བས་གྲོང་ཁྱེར་ཆེན་པོ་ཞིག་ཏུ་རང་གི་བོང་བུ་མཐོང་བས།སེམས་སྐྱོ་བའི་ངང“ཨ་ལས་ངན་པོ།ཡང་ཁྱོད་ཕྱིར་བོང་བུ་ཞིག་ཏུ་གྱུར་སོང་ངམ།བྱ་ངན་ཅི་ཞིག་ལས་པ་ཡིན།ད་ནི་ང་ལའང་བྱ་ཐབས་མེད་པས་དཀོན་མཆོག་གསུམ་པོས་མཁྱེན།”ཞེས་སྐྱབས་འཇུག་ཞུ་བཞིན་བོང་བུ་དང་ཁ་གྱེས་ནས་སོང་།