དེ་ཡང་དངུལ་ཟླ་ཟལ་མོའི་སྒང་རྒྱུད་ཟལ་མོ་རི་ཡི་གཡས་ཕྱོགས་ཞེ་དམར་ཞེས་པའི་འབྲོག་སྡེ་འཁོར་ཡུག་ཧ་ཅང་གཙང་ཞིང་ཉམས་དགའ་བའི་ཡུལ་ལུང་ཞིག་ཡོད།  དེ་ན་མི་རབས་ནས་མི་རབས་ལ་བརྒྱུད་པའི་ས་མིང་དང་།  ངག་རྒྱུན་གྱི་གཏམ་རྒྱུད་ངོ་མཚར་ཅན་དུ་མ་ཡོད་དེ།འབྲུག་མོའི་རྟ་རྒྱུག་པའི་ཤུལ་དང་།འབྲུག་མོའི་སྐུ་གདུང་བཞུས་ས།འབྲུག་མོ་ཐང་།ཞེས་པ་སོགས་འབྲུག་མོ་དང་འབྲེལ་བའི་ས་མིང་མང་པོ་ཞིག་ད་ལྟ་འང་རྒན་རབས་དང་གཞོན་པ་ཀུན་ཀྱིས་ངག་ནས་བརྗོད་བཞིན་འདུག།རྒན་རབས་དག་ལ་ས་མིང་དེ་ལྟར་ཐོགས་དོན་དྲིས་པས་ཁོང་ཚོས་།ཁྲ་མོ་གླིང་ནས་གེ་སར་ནོར་བུ་དགྲ་འདུལ་གཙོས་པའི་གླིང་གི་སྐུ་འཁོར་རྣམས་རེ་ཞིག་འགྲོ་བའི་དོན་རྫོགས་ནས་སྔ་ཕྱི་ཅུང་ཟད་ཙམ་ལས་ཞིང་གཞན་དུ་གཤེགས།  འོན་ཀྱང་རྒ་སྐྱ་ལོ་སེང་ལྕམ་འབྲུག་མོ་དེ་ལས་ཀྱི་འཕྲོ་དང་།གདུལ་བྱའི་འཕྲོ།   ཁྱད་པར་གུར་དཀར་དང་བག་ཆགས་ཀྱི་འཕྲོ་མ་རྫོགས་པར།ཚེ་སྨད་ཧ་ཅང་རྒས་པའི་དུས་ལ་ཡུལ་འདིར་བྱོན་ནས་ཧོར་གུར་དཀར་རྒྱལ་པོའི་སྐྱེ་བ་སྡིག་ཕྲུག་གུ་ལུ་ཞེས་པའི་ཤན་པ་ཁེར་ཀྱང་ཞིག་ཡོད་པ་དེའི་མཉམ་ཏུ་བཟའ་ཚང་གི་འཚོ་བ་སྐྱེལ་ནས་བསྡད།   ཤན་པ་དེ་ཕྱོགས་ཀུན་ཏུ་བཤས་ལ་འགྲོ་ཞིང་དེའི་སྡིག་གླ་ལ་འཚོ་བ་རྟེན་ནས་སྡོད་ཀྱི་ཡོད་པ་དང་ཏོ་ལེ་གསོད་ནས་ཏོའི་མགོ་སྡིག་གླ་རུ་ཁུར་ནས་ཡོངས་ཀྱི་ཡོད།  ཉིན་ཞིག་སྡིག་ཕྲུག་གུ་ལུ་ཡུལ་སྡེ་གཞན་ལ་ཏོ་ལེ་གསོད་དུ་སོང་སྐབས།  ཁྱིམ་དུ་སྤྲང་པོ་ཞིག་སླེབས་པས་དེ་ལ་འབྲུག་མོས་ཏོའི་མགོ་བྱིན་པས།དགོང་མོ་སྡིག་ཕྲུག་གུ་ལུ་ནང་ལ་ལོག་སྐབས་ཏོའི་མགོ་སྤྲང་པོ་ལ་བྱིན་པ་ཤེས་ནས་ཏོའི་མགོ་རྡུང་བྱེད་ཀྱི་དབྱུག་པ་འབྲུག་མོའི་མགོ་ལ་བསྣུན་པས་སྟབས་མ་ལེགས་པ་འབྲུག་མོ་ཚེ་ལས་འདས་སོ།།
འདིར་འབྲུག་མོ་སྡོད་སའི་བྲག་གཡབ་དང་།འབྲུག་མོ་རྟ་རྒྱུག་པའི་ཤུལ་ཞེས་རྒྱུན་པར་མི་འགྲོ་འདུག་མེད་པའི་རི་མགོ་ཞིག་ཏུ་ལམ་དང་།  འབྲུག་མོའི་སྐེ་རྒྱན་འཐོར་བའི་ཤུལ་ཞེས་ས་བསྐོས་ན་མཆོང་དོན་རྒྱུ་ཡོད་པ་དང་མཆོང་ཁ་ཤས་མིས་བཅོས་དགོས་ལ་ཁ་ཤས་བཅོས་མི་དགོས་པར་དབྱིབས་དང་ཁུང་བུ་སོགས་རང་བྱུང་གི་ཡོད་པ་འཚོལ་རྒྱུ་ཡོད།  འབྲུག་མོའི་སྐུ་གདུང་བཞུས་པའི་ཤུལ་ཞེས་ཕྱོགས་གཅིག་ལ་ས་རྡོ་མེས་ཚིག་པ་ལྟ་བུ་མདོག་སྔོན་པོ་དང་ནག་པོ་དམར་པོ་སོགས་ཡོད།  དེ་དང་ཉེ་བའི་ས་ན་ས་མིང་ལ་དམ་པ་རིགས་བརྒྱ་ཞེས་འབྲུག་མོ་འདས་སྐབས་རྒྱལ་བ་ཞི་ཁྲོའི་ལྷ་ཚོགས་ཀྱིས་ཞལ་གཟིགས་པར་མཐོང་བའི་བྲག་ཐོ་འདྲ་མིན་མགོ་སྙན་སྣ་ཚོགས་པ་ལྟ་བུ་ཡོད་དོ།།   དེ་ལྟ་བུའི་གཏམ་རྒྱུད་དེ་སྒྲོ་བཏགས་དང་དངོས་པོའི་ཆ་གང་ཡིན་རྟོགས་དཀའ་ཡང་འདི་ནས་ལེ་བར་དྲུག་ཅུ་ཙམ་ན་རི་བོ་ཆེ་ལྷ་ཁང་ཁྲ་འཁྱིལ་མ་ཡོད་ལ་དེ་དང་པོ་བཞེངས་སྐབས་འབྲུག་མོ་ཡང་འབྲེལ་འཇོག་ལ་ས་འཐུ་བ་གང་ཁུར་ནས་ཡོང་བས་རྒས་ཆེ་བས་ལྷ་ཁང་གི་ཐོག་ལ་མ་སླེབས་པར་ལྷ་ཁང་གི་འགྲམ་དུ་ས་ལུས་པ་ཡིན་ཞེས་པའི་ས་ཕུང་ཆེན་པོ་ཞིག་ཡོད་པ་སོགས་འབྲུག་མོ་ཚེ་སྨད་ལ་འདི་ཕྱོགས་སུ་བྱོན་པའི་གཏམ་རྒྱུད་གཞན་ན་ཡང་ཡོད་དོ།།