ལི་ཐང་གི་དམངས་ཁྲོད་མཛའ་གཞས་ཕྱོགས་བསྡུས།
ས་ཀ་ལས་འཚོལ་བསྡུ་བྱས། 2021-10-14
ཁྱོད་ནི་ཉི་མའི་ངང་ཚུལ།།
ང་ནི་ཟླ་བའི་ངང་ཚུལ།།
ཉི་མ་ཟླ་བ་གཉིས་ནི།།
འཛམ་གླིང་ལྟད་མོར་ཆས་འགྲོ།།
སྟར་ག་སྡོང་པོའི་འོག་ལ།།
གནས་ཚང་ཞག་གཅིག་གཡར་རོགས།།
སྟར་ག་འཕྲོ་བརླག་མི་འགྲོ།།
ཁས་ལེན་ང་ཡིས་བྱེད་ཆོག།
ཆུང་འདྲིས་ཆུང་བའི་དུས་སུ།།
གཅིག་ངོ་གཅིག་གིས་མི་ཤེས།།
ད་ནི་ཆུང་འདྲིས་ངེད་གཉིས།།
སྟར་ག་གཅིག་གི་ནང་རེད།།
ཆུང་འདྲིས་ཁྱེད་ལ་ཅི་དགོས།།
ང་ལ་འདི་དགོས་ཟེར་རོགས།།
གནམ་གྱི་སྐར་མ་དགོས་ན།།
སྐས་བརྒྱ་བཙུགས་ནས་ལེན་ཆོག།
ལས་དང་བསྐལ་བ་ཡོད་ན།།
དཀར་ཡོལ་འབྲུག་ཁྲའི་ནང་ལ།།
ཇ་ཚྭ་འཛོམས་པའི་འོ་ཇ།།
མཉམ་དུ་འཐུང་ན་ཞིམ་པ།།
ཆུ་ཆེན་ཆེ་ནའང་ཆེ་བཅུག།
ཟམ་ཆུང་ཁུར་ནའང་ཁུར་བཅུག།
རྟ་ཕོ་ཅང་ཕྲུག་ངེད་གཉིས།།
ཆུ་མགོ་བསྐོར་ནས་ཕེབས་འགྲོ།
ཆུ་ཆེན་མར་འགྲོ་ཤིག་ལ།།
བྲིས་པའི་ཡིག་ཆུང་བསྐུར་ཡོད།།
ཉ་མོ་ཡར་འོངས་ཤིག་ལ།།
ཡིག་ལན་མགྱོགས་སུ་བསྐུར་རོགས།།
རི་འགོ་མཐོན་པོ་བྱ་རེད།།
གསེར་གྱི་ལོ་མ་སྒྲོ་རེད།།
སྒྲོ་དངུལ་གཉིས་ཀྱི་མཚམས་སུ།།
ཅང་ཞིག་རྒྱུག་ན་ཨ་ཆོག།
རི་འདི་གསེར་གྱི་རི་རེད།།
ཆུ་འདི་དངུལ་གྱི་ཆུ་རེད།།
གསེར་དངུལ་གཉིས་ཀའི་མཚམས་སུ།།
བྱུ་རུའི་ཕྲ་རྒྱན་བཏབ་ཆོག།
ཡར་སྟེང་སྤང་ཀའི་སྒང་ལ།།
སེར་ཆེན་མེ་ཏོག་སྟོང་ལྡན།།
གསེར་སྦྲང་གཡུ་སྦྲང་མཐུན་ན།།
རྩི་བཅུད་མཉམ་འཐུང་བྱེད་ཆོག།
ཕྱི་ཡི་དཀར་ཡོལ་དཀར་དཀར།།
ནང་གི་འོ་མ་དཀར་དཀར།།
བར་གྱི་རང་སེམས་དཀར་དཀར།།
དཀར་པོ་གསུམ་གྱི་གྲལ་འགྲིག།
ལྕང་མ་ང་ཡིས་བཙུགས་ཡོད།།
ལྕང་ཆུ་ང་ཡིས་བླུགས་ཡོད།།
ལྕང་མའི་ལོ་ཕྱུག་རྒྱས་དུས།།
བདག་པོ་གཞན་གྱིས་བརྒྱབ་སོང་།།
ཆུང་འདྲིས་ལ་མོའི་ཕར་རྒྱབ།།
ང་རང་ལ་མོའི་ཚུར་རྒྱབ།།
ལྟ་རེས་མཐོང་རེས་མེད་ཀྱང་།།
ཡིག་ཆུང་སྐུར་རེས་བྱེད་ཆོག།
སྤང་ཀ་བཀྲ་ཤིས་གདོང་བརྒྱད་ལ།།
གཡོན་ཕྱོགས་བྱ་འབྲུག་ཁ་སྤྲོད་རེད།།
གཡས་ཕྱོགས་ལི་ཆུ་སྔོན་མོ་རེད།།
ཁོག་པོ་གཡའ་ཡིས་གང་ཉིན་ལ།།
ཞེ་ཆགས་ཞེ་མཐུན་དགའ་ལེ་མིན།།
སྟར་གའི་སྡོང་བོར་རྡོ་ཞིག་རྒྱབ།།
ཉི་ཤུ་ཐམ་པ་ས་ལ་ལྷུང་།།
བཅུ་དགུ་ལྷ་ལ་ཕུལ་བཞག་ཡོད།།
གཅིག་དེ་རང་གིས་ཟ་བཞག་ཡོད།།
དཀར་དཀར་ཁུར་ཤོག་དམར་དམར་བཙོ།།
དམར་དམར་བཙོ་བའི་ལས་ཤིག་སྣང་།།
རྒྱ་དངུལ་ཁུར་ཤོག་ཨ་ལོང་རྡུང་།།
ཁྲ་རྒྱན་གཙུགས་པའི་ལས་སྣང་ལགས།།
སྒེ་འུ་ཆུང་ཆུང་རྒྱབ་ལ་ཁུར།།
རིན་ཆེན་རིལ་བུ་ནང་ལ་བཅུག།
རྩ་བའི་བླ་མས་མ་རིག་སར།།
རེ་རེ་ཟ་ན་ཨ་སྐྱོན་ནམ།།
སྟག་སེར་གདོང་དང་ཝ་སེར་གདོང་།།
སྟག་དམར་གདོང་དང་ཝ་དམར་གདོང་།།
སེར་དམར་འདྲེས་ནས་འགྲོ་ཉིན་ལ།།
རི་སྤྱང་མིག་ལོག་མ་སྡང་རོགས།།
ཨ་མཐུན་ངེད་གཉིས་མ་མཐུན་གོང་།།
མཐུན་རེད་ཟེར་མཁན་སུ་རེད་གོ།
མཐུན་རེད་ཟེར་མཁན་རྒྱ་གྲོང་རེད།།
ཨ་མཐུན་ངེད་གཉིས་མཐུན་པའི་རྟགས།།
དྭངས་མོ་མ་དང་དྭངས་མོ་མ།།
རི་སྐེད་ཆུ་མིག་དྭངས་མོ་མ།།
མི་དྭངས་དགུ་དྭངས་མ་བཟོ་རོགས།།
མཛོ་རྒན་བརྒྱ་ཡིས་འཐུང་འཕྲོ་རེད།།
མཛེས་པོ་མ་དང་མཛེས་པོ་མ།།
ཇ་མདོང་སྦ་ཁྲ་མཛེས་པོ་མ།།
མི་མཛེས་དགུ་མཛེས་མ་བཟོ་རོགས།།
བསོ་ལོ་བརྒྱ་ཡིས་སྲུབ་འཕྲོ་རེད།།
རི་ཆེན་རི་ཆུང་འཛོམས་ས་ལ།།
ཡུ་མོ་སྐྱིད་པོ་མེད་ན་ཡང་།།
མི་སྐྱིད་སྐྱིད་མདོག་མ་བཟོ་ན།།
གསེར་རི་འདྲེན་སྟབས་མི་བདེ་དོ།།
ཆུ་སྐྱེས་ཨུཏྤལ་གུར་གུམ་གསུམ།།
སྐྱེ་ས་མི་གཅིག་ཁ་ཁ་རེད།།
འཛོམས་ས་ཆོས་ཁང་ཁྲ་མོ་ནང་།།
ད་ལོ་འཛོམས་པའི་སྨོན་ལམ་ཤོག།
མཚོ་ཆེན་ནང་ན་རྡོ་ཞིག་འཕེན།།
གསེར་མིག་ཉ་མོ་མ་དགའ་ཐལ།།
མ་དགའ་ན་ཡང་མ་དགའ་བཅུག།
ཉིན་རེར་རྡོ་རེ་ཆད་ལེ་མིན།།
རྫ་རི་སྔོན་པོའི་ཁ་མཚམས་ལ།།
གངས་རི་ཨ་ཆགས་མི་ཆགས་རེད།།
གངས་རི་མི་ཆགས་འགྲོ་ཉིན་ལ།།
གངས་ཆུ་འུ་གཉིས་མཉམ་འགྲོ་བཟོ།།
རྐྱང་བརྒྱ་ཅང་སྟོང་མིག་གིས་འཚོ།།
རག་ཕྲུག་ཁ་དཀར་སེམས་ཀྱིས་འཚོ།།
རྐྱང་བརྒྱ་འཚོ་མདོག་མ་བྱེད་ན།།
རག་ཕྲུག་འཚོ་ཁས་མི་བདེ་དོ།།
ཨ་མ་མ་ལོ་སྐུ་ཚེ་རིང་།།
མཐུན་པའི་རོགས་ལ་མངགས་རོགས་གྱིས།།
མཐུན་པའི་རོགས་ལ་མངགས་བཞག་ན།།
ཤྭ་ཕོ་བསད་པའི་དགའ་སྤྲོ་སྣང་།།
ཁྱོད་རྒོད་མའི་རྗེས་ཀྱི་རྟེའུ་དེ།།
སྐྱིད་མ་ཞོ་ནུ་བཞིན་སྤང་ལ་འགྲོ།
དགའ་དེ་དུས་ཨེ་སྐྱིད་མ་ཤེས་ན།།
ལ་མཐོན་པོ་བརྒལ་དུས་སྐྱིད་རྒྱུ་མེད།།
རྟ་རྐྱང་དཀར་འགྲོས་ཡག་ཁ་དཀར་མ།།
རྟ་ཁྱེད་ལ་རྟ་བདག་ཨེ་ཡོད་དམ།།
རྟ་ཁྱེད་ལ་རྟ་བདག་མེད་བཞག་ན།།
ཚེ་གཅིག་ལ་གསེར་སྒ་ང་ཡིས་རྒྱབ།།
ང་རྫ་ཆུ་འཐུང་ཞོར་ཡར་ཡར་འོང་།།
ཁྱེད་རྫ་རྩྭ་ཟ་ཞོར་མར་མར་ཤོག།
གཡང་སྤང་ཀ་སྟེང་ལ་འཛོམས་རྒྱུ་བཟོ།།
གཏམ་སྙན་མོ་འདྲ་ལེ་དེ་དུས་བཤད།།
ང་ཡོད་ས་རྫ་རིའི་རྫ་སྟོད་རེད།།
ཁྱེད་ཡོད་ས་རྫ་རིའི་རྫ་སྨད་རེད།།
རྫ་སྟོད་སྨད་རྒྱང་སོང་མ་བསམ་རོགས།།
སེམས་བསམ་པ་མཉམ་འགྲོ་མཉམ་འདུག་རེད།།
ཁྱོས་ཨ་ཕའི་མེ་མདའ་ཁུར་ནས་ཤོག།
ངས་ཨ་མའི་མགོ་ཆ་བཏགས་ནས་འོང་།།
ལམ་ཀྱོག་གུག་མཚམས་ནས་འཛོམས་རྒྱུ་བཟོ།།
ལམ་དེ་ལ་ར་འདའ་སླེབ་ཡོང་ན།།
ཁྱོས་ཁྲ་ཁྱིལ་ལེ་བཏགས་ནས་བསྡད་ཁག་བྱོས།།
ངས་སྔོ་ཆེད་སེ་བོག་ཅིག་འཕེན་ཁག་བྱེད།།
ཁྱོད་འགྲོས་ཡག་མ་དང་འགྲོས་ཡག་མ།།
ཁྱོད་རྐྱང་གི་རྟེའུ་ཆུང་འགྲོས་ཡག་མ།།
བདག་བཟང་པོས་གསེར་སྒ་མ་རྒྱབ་གོང་།།
འགྲོས་གོམ་པས་རྗེས་ཤིག་ཨེ་བཞག་གོ།
དགའི་རོགས་བརྒྱ་རོགས་སྟོང་ང་ལ་མེད།།
གཅིག་ཡོད་དེ་ནམ་མཁའི་ལྷ་དང་འདྲ།།
ལྷ་འདྲ་བའི་མངོན་ཤེས་མེད་ན་ཡང་།།
རོགས་མང་པོའི་དབུས་ན་ལྷ་དང་འདྲ།།
ས་ཨ་ཆེན་བཀྲ་ཤིས་ཐང་མགོ་ལ།།
རྩྭ་ཉི་ལི་ཡར་འདབ་མར་འདབ་རེད།།
ཟ་བསམ་ན་སུ་རིའི་གསེབ་ནས་ཤོག།
ཟ་མ་བསམ་རྩྭ་མགོ་སྣོག་དགོས་མེད།།
རྟ་དཀར་དཀར་དུང་དཀར་འདྲ་ལེ་དེ།།
དགའ་ཡར་སྟེང་སྦུག་ན་ལོ་གསུམ་བསྡད།།
སྒ་གསེར་སྒ་མེད་པས་མ་རེད་དེ།།
དཀར་ཏིང་ཏིང་ལོ་གསུམ་བསྡད་ན་བསམ།།
ལམ་སྐྱ་མོ་རི་ཡི་སྐེ་རགས་བཟོ།།
རྩྭ་ཉག་མ་རི་ཡི་ཚ་ལོ་བཟོ།།
དམར་སིལ་སིལ་ཚ་ལོ་འཕེན་ཉིན་ལ།།
ལ་ཕར་རྒྱབ་བླ་མས་ཅི་བསམ་མོ།།
མཛོ་ཁྱུང་དཀར་ཤོ་མིག་གདོང་ཁྲ་ཅན།།
ཁྱོས་སྒང་རྩྭ་མ་གཏོགས་མི་ཟ་ཟེར།།
དགུན་ཁ་མིན་ཆར་ཞིག་འབབ་དུས་སུ།།
ཁྱོས་སྒང་རྩྭ་ཨ་ཟ་ང་ཡིས་བལྟ།།
རི་གསེར་རི་སེར་པོའི་ལ་ཁ་ལ།།
གསེར་སེར་པོའི་བྱེའུ་ཕྲུག་ལྡིང་ལ་ཁད།།
འཇུ་བསམ་པའི་རེ་བ་མ་རྒྱག་རོགས།།
ལྟ་བསམ་ན་ལྟད་མོ་རྒྱང་ནས་ལྟོས།།
ཁྱོད་འབྲི་རྒན་རྭ་ཁྲ་ཐིལ་ནག་མ།།
ཁྱོད་འབྲོང་ལ་ཨ་ཐེ་འབྲི་ལ་ཐེ།།
ཁྱོད་འབྲི་ལ་ཐེ་ན་གདང་ལ་ཤོག།
དགའ་གསེར་ཟམ་ང་ཡིས་གཙུགས་སྟངས་བཟོ།།
རི་གསེར་རི་སེར་པོའི་མདའ་སྟོང་ཁར།།
ཤྭ་ཕོ་ཆེན་ཨ་འོང་སྒུག་སྒུག་བཟོ།།
ཤྭ་ཕོ་ཆེན་མི་འོང་ཐག་གིས་ཆོད།།
མགོ་དུང་རྭ་ཡིད་ལ་ཝ་ལེ་ཤར།།
ཁྱོད་ན་ནིང་སྤང་དེ་སྤྱང་ཀི་འདྲ།།
ལ་རེ་རེ་བརྒལ་དུས་ཕྱི་བལྟས་མེད།།
ང་ན་གཞོན་བུ་དེ་ཁུ་བྱུག་འདྲ།།
དགའ་ན་ནིང་གྲགས་སར་ད་ལོ་གྲག།
ངའི་དགའ་བའི་རོགས་དང་དགའ་བའི་རོགས།།
རྡོ་གྲུ་བཞི་ཁུར་ཤོག་དགའ་བའི་རོགས།།
གཏམ་ཅི་བཤད་རྡོ་ལ་རི་མོ་འབྲི།།
རྡོ་ཆག་ཀྱང་རི་མོ་ཡལ་རྒྱུ་མེད།།
ང་གདོང་རིའི་གདོང་ལ་ཡར་ཡར་འགྲོ།
ངས་ལབ་རྩེ་ལྟག་མར་ལབ་དར་བཏགས།།
འོག་ལབ་རྩེ་བར་མ་མ་དགའ་ཐལ།།
ཁོ་མ་དགའ་ན་ཡང་མ་དགའ་བཅུག།
ཁྱོད་རྫ་རིའི་རྫ་སྟོད་བདེ་མོ་བཞུགས།།
ང་རྫ་ཆུ་བསིལ་མ་འགྲོ་མི་རེད།།
ང་འགྲོ་མི་རེད་ཐལ་མ་བསམ་རོགས།།
སླར་རྫ་རིའི་ཕྱོགས་སུ་འཁོར་ནས་ཡོང་།།
ང་ནགས་ལ་སྡོད་པའི་རྒོད་ཕྲུག་བྱ།།
ང་མ་གཞི་ས་ལ་བབ་ལེ་མིན།།
འབབ་དགོས་པའི་དུས་ཤིག་སླེབ་ཡོང་ན།།
བྲག་གང་མཐོར་བལྟས་ནས་བབ་ཆོག་གོ།
ཤིང་རྒྱ་ལྕང་མགོ་ཡི་ཁུ་བྱུག་ང་།།
ཚེ་སྐྱིད་རེས་སྡུག་རེས་གཉིས་ཡོད་ཟི།།
ཚེ་སྐྱིད་དུས་རྒྱ་ལྕང་མགོ་ལ་ཡོད།།
གླུ་སྙན་པོ་ལེན་ཞིང་སྦྲང་ཆུ་འཐུང་།།
ཚེ་སྡུག་དུས་རྒྱ་ལྕང་འོག་ན་ཡོད།།
མགོ་སྒུར་ཞིང་སྒུར་ཞིང་རྒུམ་འབུ་འཐུ།།
སྟོད་གསེར་རི་སེར་པོ་ལ་ཁ་ལ།།
བྱ་གསེར་བྱ་གསུམ་གྱིས་ལྡིང་སྐོར་རྒྱབ།།
དགའ་ད་ལྟར་གསེར་བྱ་མཉམ་བབས་རེད།།
བྱང་ཕ་ཕྱོགས་འགྲོ་ལམ་ཁ་ཁ་རེད།
སང་ཁ་ཁ་རེད་ཐལ་མ་བསམ་རོགས།།
ལས་རྒུམ་འབུ་ཕྱོགས་གཅིག་འཚོལ་རེས་བཟོ།།
ཁྱོད་མ་འགྲོ་ང་ལ་གཏམ་ཞིག་ཞོག།
གཏམ་ཆ་རུ་འདྲ་ལེའི་གཏམ་ཞིག་ཞོག།
ངས་ཆ་རུ་བེའུ་ཆུང་སྐེ་ལ་བཏགས།།
བེའུ་བཏགས་རེས་བཏང་རེས་དྲན་རེས་བཟོ།།
ཁྱོད་ངང་བ་སེར་པོ་མཚོ་ཁའི་བྱ།།
མཚོ་སྔོན་མོ་མི་མཇལ་ལོ་གསུམ་རེད།།
བྱ་ང་ལ་མནའ་མེད་མ་ཟེར་རོགས།།
ས་ཁ་ཐག་རྒྱང་བས་མ་སླེབས་ཐལ།།
བྱ་ཁུ་བྱུག་ཐག་རིང་མགྲོན་པོ་རེད།།
ཤིང་རྒྱ་ལྕང་ཡོད་ས་རྒྱ་རྫོང་རེད།།
ཁྱོད་ཐག་རིང་མགྲོན་པོ་མ་འགྱུར་ན།།
ང་རྒྱ་ལྕང་མི་འགྱུར་ཁོ་ཐག་ཡིན།།
ཁྱོད་མཚོ་ཆེན་ཁ་ཡི་མེ་ཏོག་དེ།།
ངས་འཐུ་འདོད་སེམས་ནང་བཞག་ཡོད་ཀྱང་།།
མཚོ་སྔོན་མོ་ཀྱག་གེ་ཀྱོག་གེ་རེད།།
ངས་ཤིང་གྲུ་བཏང་ཁ་མི་བདེ་དོ།།
ངའི་ཕ་ཡུལ་མཚོ་ཆེན་ལུང་པ་རེད།།
ངའི་ཆུས་འདྲིས་ངང་བ་སེར་པོ་རེད།།
མཚོ་སྔོན་པོ་དར་གྱིས་མ་གཡོག་བར།།
ཁྱོད་འུ་གཉིས་འགྲོ་ལམ་མ་ཆད་སྨོན།
ངའི་བྱམས་པ་ཡོད་ས་ལ་མང་རྒྱབ།།
ངས་ཨ་སྐྱིད་ཨ་སྡུག་མི་རིག་དོ།།
ངས་ཨ་སྐྱིད་ཨ་སྡུག་སྤྲིན་མགོ་འཚོ།།
སྤྲིན་དཀར་པོ་ཡོང་དུས་སྐྱིད་པའི་རྟགས།།
སྤྲིན་ནག་པོ་ཡོང་དུས་སྡུག་པའི་རྟགས།།
སྤྲིན་ནག་པོ་མི་འོང་སྨོན་ལམ་འདེབས།།
སྤྲིན་དཀར་པོ་ཡོང་བའི་སྨོན་ལམ་འདེབས།།
ཚེ་གཅིག་ལ་སྐྱིད་པའི་སྨོན་ལམ་འདེབས།།
རྟ་རྐྱང་དཀར་འགྲོས་ཡག་ཁ་དཀར་མ།།
རྟ་ཁྱེད་ལ་རྟ་བདག་ཨེ་ཡོད་དམ།།
རྟ་ཁྱེད་ལ་རྟ་བདག་མེད་བཞག་ན།།
ཚེ་གཅིག་ལ་གསེར་སྒ་ང་ཡིས་བརྒྱག།
ཐང་ཆེན་པོ་མཎྜལ་ཕུལ་འདྲ་ལ།།
ཐང་ཁྱེད་ལ་རྩྭ་བདག་ཨ་ཡོད་གོ།
ཐང་ཁྱེད་ལ་རྩྭ་བདག་མེད་བཞག་ན།།
ཚེ་གཅིག་ལ་མེ་ཏོག་ང་ཡིས་གདབ།།
རི་ཆུང་ཆུང་མཆོད་པ་ཕུལ་འདྲ་ལ།།
རི་ཁྱེད་ལ་བདག་པོ་ཨ་ཡོད་གོ།
རི་ཁྱེད་ལ་བདག་པོ་མེད་བཞག་ན།།
ཚེ་གཅིག་ལ་ལྷ་བསང་ང་ཡིས་གཏང་།།
ཆུ་དྭངས་མོ་ཡོན་ཏན་བརྒྱད་ལྡན་ལ།།
ཆུ་ཁྱེད་ལ་བདག་པོ་ཨ་ཡོད་གོ།
ཆུ་ཁྱེད་ལ་བདག་མེད་བཞག་ན།།
ཚེ་གཅིག་གི་ཚེ་ཆུ་ང་ཡིས་འཐུང་།།
ཞལ་དཀྱིལ་འཁོར་བཅོ་ལྔའི་ཟླ་བ་རེད།།
མིག་ཕྲ་ཆུང་ཐོ་རངས་སྐར་ཆེན་རེད།།
ཚེམས་སོ་དྲུག་མུ་ཏིག་དཀར་པོ་རེད།།
ཁྱེད་མཛེས་མ་སྟོང་གི་སྟོང་ཕོད་རེད།།
སྐུ་བྱད་བཞིན་དཔྱིད་མགོའི་མེ་ཏོག་རེད།།
སྐྱེས་ཡག་པ་ནམ་མཁའི་ལྷ་མོ་རེད།།
སེམས་བཟང་པོ་རྗེ་བཙུན་སྒྲོལ་མ་རེད།།
ཁྱེད་སྨིན་ལེགས་འབུམ་གྱི་འབུམ་ཕོད་རེད།།
དགུན་ཟླ་གསུམ་མཚོ་མོ་དར་གྱིས་ཁེབས།།
ངའི་བསམ་པ་བརྩེ་བ་དྭངས་མས་ཁེངས།།
མཚོ་ཆེན་པོའི་དར་ཁ་ཞུ་ན་ཡང་།།
ངའི་བརྩེ་བ་འགྱུར་མེད་རྒྱ་མཚོ་ཡིན།།
དགུན་ལོ་ཟླའི་གྲང་རང་ཆེ་ན་ཡང་།།
སེམས་བསམ་པའི་བརྩེ་བ་མེ་བཞིན་དྲོ།།
དགུན་རྡུལ་རླུང་ཇི་ལྟར་འཚུབ་ན་ཡང་།།
སེམས་བསམ་པ་དཀར་པོ་དཀར་རྐྱང་ཡིན།།
19. ཡུལ་གེ་མང་གི་དམངས་ཁྲོད་བྲོ་ཚིག་སྙན་པའི་གསོལ་དབྱངས།
བཙན་བདག་གིས་འཚོལ་བསྡུ་བྱས།
（ ཨ་སྔོན། ）
༡
དགུང་ཨ་སྔོན་སྐྱིད་པའི་ལྷ་ཁང་རེད།།
གསེར་ཉི་ལ་བྱམས་པའི་ཕ་མ་རེད།།
སྐར་ཚོགས་དྲུག་འཛོམས་དགའ་འཛོམས་སྐྱིད་རེད།།
༢
དགུང་ཨ་སྔོན་སྐྱིད་པའི་མཚོ་མོ་འཁྱིལ།།
གསེར་ཉི་འཇམ་པའི་དར་དཀར་ཆགས།།
སྐར་ཚོགས་དྲུག་དར་དཀར་རྒྱན་ཆ་རེད།།
༣
དགུང་ཨ་སྔོན་ཟུར་ལིང་ཐགས་ཀྱིས་འདྲེན།།
གསེར་ཉི་འཇམ་པའི་སྤུན་གྱིས་བཅུག།
རོགས་སྐར་བརྒྱ་ཁོག་འཇམ་སྤུན་འཇམ་རེད།།
༤
དགུང་ཨ་སྔོན་སྐྱིད་པའི་ཕ་ཡུལ་རེད།།
གསེར་ཉི་ལ་བརྩེ་བའི་མིང་སྲིང་རེད།།
སྐར་ཚོགས་དྲུག་འཛོམས་དགའ་འཛོམས་སྐྱིད་རེད།།
༥
དགུང་ཨ་སྔོན་གཡང་གི་གཡང་ཁང་རེད།།
གསེར་ཉི་ལ་གཡང་གི་ནོར་བུ་རེད།།
སྐར་ཚོགས་དྲུག་ནོར་བུ་རྒྱན་དྲུག་རེད།
༦
དགུང་ཨ་སྔོན་སྟེང་ལ་འཛོམས་གསུམ་སྣང་།།
གསེར་ཉི་མ་ཟླ་བ་སྐར་མ་གསུམ།།
ནམ་ཉིན་མཚན་མི་གཅིག་ཁ་ཁ་རེད།།
དགུང་ཨ་སྔོན་སྟེང་ལ་མཉམ་འཛོམས་རེད།།
༧
དགུང་གི་ཨ་སྔོན་སྟེང་ལ།།
གསལ་མོ་གསུམ་གྱི་གྲལ་སྡེབ།།
གཅིག་ནི་ཁྲི་གདུགས་ཉི་མ།།
གཉིས་ནི་དུང་ཆུང་ཟླ་བ། །
གསུམ་ནི་སྐར་མ་སྨིན་དྲུག།
༨
ཨ་སྔོན་རྩེ་ཡི་རྩེ་མོ་གཡང་གི་ས།།
ཁ་ཐག་རིང་པོ་ཉི་ཟླ་འཁོར་ས་རེད།།
ལས་དབང་ཅན་གྱི་སྐར་ཚོགས་བཀྲ་ས་རེད།།
༩
དགུང་སྔོན་མཐོན་པོ་ཕྱི་ལ་ཡོད་པའི་ཕྱི་ཡི་ལྕགས་རི་དེ་དང་གཅིག།
གསེར་ཅན་ཉི་ལ་ནང་ལ་ཡོད་པའི་ནང་གི་ནོར་བུ་དེ་དང་གཉིས།།
སྐར་སྤྲིན་ལོ་མ་ཟུར་ལ་ཡོད་པའི་ཟུར་གྱི་རྒྱན་ཆ་དེ་དང་གསུམ།།
བསོད་ནམས་ཡག་མོ་དགུང་སྔོན་མཐོན་པོའི་སྟེང་དུ་འཛོམས།།
༡༠
ཨ་སྔོན་རི་རྒྱལ་ལྷུན་པོ།།
རི་ལ་ཉི་མ་ཤར་བྱུང་།།
ཉི་མ་ཤར་ན་དགའ་བ།།
ཉི་འོད་ཕོག་ན་སྐྱིད་པ།།
༡༡
ས་བསོད་ནམས་ཆེ་ས་ཨ་སྔོན་རེད།།
གསེར་ཉི་མ་ཟླ་བ་འཛོམས་ས་རེད།།
སྐྱིད་སྐར་སྤྲིན་འཛོམས་པའི་སྨོན་ལམ་ཤོག།
༡༢
གསེར་ཉི་མ་ཟླ་བ་སྐར་མ་གསུམ།།
ངས་ཉི་མ་གཅིག་ལ་ཨེ་འཛོམས་བསམ།།
ཉིན་ཉི་མ་གཅིག་ལ་མ་འཛོམས་ཐལ།།
དུས་སྐལ་བ་བཟང་དུས་མཚམས་རེར་འཛོམས།།
༡༣
མི་འགྲོ་མི་འདུག་བསམ་ནས་ཨ་སྔོན་སྟེང་དུ་སླེབས་སོང་།།
མི་འཆམ་མི་རྩེད་བསམ་ནས་ཉི་ལ་ཁྱོད་དང་ཐུག་སོང་།།
བཀའ་དྲིན་མཐའ་ནས་རྒྱས་དུས་ཐུགས་ལ་དགོངས་པ་མ་ཚོམ།།
༡༤
དགུང་ཨ་སྔོན་ཟེར་ན་ས་སྐྱིད་རེད།།
གསེར་ཉི་ལ་ཟེར་ན་སེམས་སྐྱིད་རེད།།
ས་སྐྱིད་སེམས་སྐྱིད་ཟེར་ན་མཉམ་འཛོམས་རེད།།
སྐྱིད་བཀའ་དྲིན་འཛོམས་པའི་སྨོན་ལམ་ཤོག།
༡༥
གཡུ་འབྲུག་སྔོན་མོ་ཨ་སྔོན་དབྱིངས་སུ་གྲགས།།
སྦྲང་ཆར་ཟིལ་མ་བར་སྣང་ཁམས་ནས་ཟིལ།།
སྨོན་ལམ་ཡག་མོ་ཨ་འབྲུ་ནས་ལ་ཕོག།
༡༦
གནའ་ནས་ཆགས་པའི་ཨ་སྔོན་དེ་དང་གཅིག།
ཚེ་གཅིག་འགྲིམས་པའི་ཉི་ཟླ་དེ་དང་གཉིས།།
ད་ནངས་ཡོང་པའི་ལྷོ་སྤྲིན་དེ་དང་གསུམ།།
འཛོམས་ས་ཡག་མོ་ཨ་སྔོན་སྟེང་ལ་རེད།།
༡༧
ཨ་སྔོན་གཡང་གི་རི་ལ།།
རྟེན་འབྲེལ་ཡག་མོ་འགྲིག་བྱུང་།
གསལ་མོ་ཉི་ཟླ་འདྲ་ལེ།།
གཡང་གི་རི་ལ་འཛོམས་བྱུང་།།
བཀའ་དྲིན་པདྨ་འདབ་བརྒྱད།།
འཛོམས་པའི་སྨོན་ལམ་བཏབ་ཆོག།
༡༨
གཞལ་ཡས་དགུང་སྔོན་མཐོན་པོ།།
ཨ་མ་འབྲུག་མོའི་ས་ཆ།།
གསལ་མོ་ཉི་ཟླ་འདྲ་ལེ།།
རིགས་བཟང་མཁའ་འགྲོའི་གདུང་རྒྱུད།།
བཀའ་དྲིན་པདྨ་འདབ་བརྒྱད།།
དཔའ་བོ་དཔལ་མོའི་བྲོ་ར།།
༡༩
གཞལ་ཡས་དགུང་སྔོན་མཐོན་པོ།།
ལ་ཡི་སྒང་གི་ལ་ཁ།།
གསལ་མོ་ཉི་ཟླ་འདྲ་ལེ།།
ལ་ཡི་སྒང་གི་ལ་རྩེ།།
བཀའ་དྲིན་པདྨ་འདབ་བརྒྱད།།
ལ་རྩེ་དགུང་གི་ལ་དར།།
༢༠
གཞལ་ཡས་དགུང་སྔོན་མཐོན་པོ།།
རྒྱ་མཚོ་ཆགས་པའི་ཕོ་བྲང་།།
མགྲོན་པོ་གསེར་གྱི་ཉི་མ།།
རྒྱ་མཚོ་ནང་གི་ནོར་བུ།།
བཀའ་དྲིན་པདྨ་འདབ་བརྒྱད།།
ནོར་བུ་བསུ་བའི་རྒྱན་ཆ།
༢༡
ཤར་ནས་ཡོང་བའི་ཤར་སྤྲིན་དེ་དང་གཅིག།
ནུབ་ནས་ཡོང་བའི་ནུབ་སྤྲིན་དེ་དང་གཉིས།།
ད་ནངས་ཡོང་པའི་ཨ་སྔོན་དེ་དང་གསུམ།།
འཛོམས་མ་མྱོང་ཨ་སྔོན་སྟེང་དུ་འཛོམས།།
༢༢
ཤར་ཕྱོགས་ཤར་ནས་ཡོང་བའི་ཤར་གྱི་ཁྲི་གདུགས་ཉི་མ།།
ནུབ་ཀྱི་ཕྱོགས་ལ་མ་ཕེབས་ཨ་སྔོན་དཀྱིལ་ལ་བཞུགས་རོགས།།
འདི་ཕྱོགས་རྒྱལ་ཁམས་དྲོས་པའི་ཉི་ལ་ཁྱེད་འདྲ་མི་འདུག།
བཀའ་དྲིན་མཐའ་ནས་རྒྱས་དུས་སྨོན་ལམ་ཁྱེད་ལ་བཏབ་ཆོག།
༢༣
ཨ་སྔོན་ལ་རེ་ལུང་རེ།།
ལོ་ཆུང་འུ་ཚོའི་ཕ་ཡུལ།།
མགྲོན་པོ་གསེར་གྱི་ཉི་ལ།།
ལོ་ཆུང་ང་ཚོའི་ཕ་མ།།
བཀའ་དྲིན་མཐའ་ནས་རྒྱས་དུས།།
སྨོན་ལམ་རིམ་བཞིན་བཏབ་ཆོག།
༢༤
དགུང་ཨ་སྔོན་ཟེར་ན་རྒྱང་སྐྱིད་མ།།
རྒྱང་ཡག་པའི་ཐོག་ལ་ཉི་མ་ཤར།།
རྒྱང་སྐྱིད་པའི་ཐོག་ལ་དུང་ཟླ་གསལ།།
རྒྱང་དགའ་སྐྱིད་བར་ན་སྐར་ཚོགས་བཀྲ།།
ཚེ་སྐྱིད་སྐྱིད་འདི་འདྲ་སྐྱིད་པར་སྨོན།།
༢༥
ཕུགས་ལ་ཆགས་སྐྱིད་ཡག་མོ།།
གཞལ་ཡས་དགུང་སྔོན་མཐོན་པོ།།
འདི་ལ་མགྲོན་སྐྱིད་ཡག་མོ།།
མགྲོན་ཆུང་གསལ་མོ་ཉི་ལ།།
བཀའ་དྲིན་མཐའ་ནས་རྒྱས་དུས།།
དགའ་དང་སྐྱིད་ནས་འཛོམས་ཆོག།
༢༦
དགུང་ཨ་སྔོན་ཕ་རིའི་རི་ལ་ལ་བཙས་བརྩིགས།།
གསེར་ཉི་ལ་ཚུར་རིའི་རི་ལ་ལྷ་བསང་བཏང་།།
སྐྱིད་བཀའ་དྲིན་རི་འདབས་གསུམ་ལ་འཁྱིལ།།
བཀྲ་ཤིས་པའི་སྨོན་ལམ་ཕྱོགས་བཏབ་བཟོ།།
༢༧
དགུང་ཨ་སྔོན་གླིང་དེ་ནོར་བུ་གླིང་།།
གླིང་ནོར་བུ་ཁ་ལ་འཛོམས་གསུམ་སྣང་།།
ཤར་ཁྲི་གདུགས་འཁོར་ས་ཕ་ཡུལ་རེད།།
སྐྱིད་བཀའ་དྲིན་འཛོམས་པའི་སྨོན་ལམ་ཞུ།།
༢༨
དགུང་ཨ་སྔོན་ཕ་རིའི་ལ་དང་གཅིག།
གསེར་ཉི་ལ་ཚུར་རིའི་ཐང་དང་གཉིས།།
རོགས་སྐར་བརྒྱ་ལ་ཐང་བར་ན་འཛོམས།།
བཀྲ་ཤིས་པའི་སྨོན་ལན་ཕྱོགས་བཏབ་བཟོ།།
༢༩
དགུང་ཨ་སྔོན་མ་བཀོད་ལྷ་ཁང་རེད།།
གསེར་ཉི་ལ་མ་བོས་ལྷ་མགྲོན་རེད།།
རོགས་སྐར་བརྒྱ་འཛོམས་དགའ་འཛོམས་སྐྱིད་རེད།།
༣༠
དགུང་ཨ་སྔོན་ལྷ་ལུང་དར་དཀར་རེད།།
གསེར་ཉི་ལ་ལྷ་སྤྲུལ་རང་བྱོན་རེད།།
སྐར་ཚོགས་དྲུག་འཛོམས་དགའ་འཛོམས་སྐྱིད་རེད།།
བཀྲ་ཤིས་པའི་སྨོན་ལམ་རིམ་བཞིན་བཏབ།།
དོ་སྣང་ཆེ་བའི་རྩོམ།
རྩོམ་གསར། 10
དཔལ་སྤུངས་ནས་བྲག་རིས་ཤིག་གསར་དུ་རྙེད།- ལི་ཐང་གི་དམངས་ཁྲོད་མཛའ་གཞས་ཕྱོགས་བསྡུས།
- ལི་ཐང་རྫོང་བོད་སྨན་ཁང་གིས་ཀྲུང་བོད་གསོ་རིག་རིག་གནས
- སྤྱི་ཕན་རོགས་སྐྱོར་བྱ་སྤྱོད་འདི།། བྱིས་པ་མཆུ་ཤོ་ཅན་
- ང་ལ་རྩེད་ར་ཆུང་ཆུང་ཞིག་གནོངས་དང་།
- ང་ཡི་མི་ཚེའི་དཔུང་རོགས་ལགས།
- སེམས་མཐའ་རླུང་ལ་བཏགས་ཚུལ།
- ཀུན་དགའ་སྙིང་པོ།
- ཉག་རོང་རྫོང་ཁྲིམས་ཁང་ལ་དྲོད་སྐྱིད་ལྡན་པའི་རྒྱབ་སྐྱ
- དཔལ་ཡུལ་རྫོང་གིས་གསར་བརྗེའི་རིག་གནས་སློབ་རར་སྤེལ་བ