1967ལོར་བོད་གཙང་རྒྱལ་རྩེའི་མཁར་ཁ་སྟོད་དུ་སྐྱེས།  1977ལོ་ནས1982ལོ་བར་མཁར་སྟོད་སློབ་ཆུང་འགྲིམས།  1982ལོ་ནས1987ལོ་བར་རྒྱལ་རྩེ་སློབ་འབྲིང་ལ་ཞུགས། 1987ལོ་ནས1991ལོ་བར་པེ་ཅིང་ཀྲུང་དབྱང་མི་རིགས་སློབ་གླིང་དུ་སློབ་གཉེར་བྱས།  1991ལོ་ནས1992ལོ་བར་པེ་ཅིང་རྒྱང་བསྒྲགས་སློབ་གླིང་དུ་བསྐྱོད།  1992ལོ་ནས་ད་བར་བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་སུ་གསར་འགྱུར་བསྒྱུར་ཞུས་དང་།   རིག་རྩལ་གསར་རྩོམ།   འཁྲབ་འཁྲིད།   ལེ་ཚན་གཙོ་སྐྱོང་།   ཡིག་བསྒྱུར་སོགས་ཀྱི་ལས་ལ་གཞོལ།   2005ལོ་ནས་སྐབས་བཞི་པའི་བོད་ལྗོངས་རླུང་འཕྲིན་བརྙན་འཕྲིན་མཐུན་ཚོགས་ཀྱི་ལས་འཛིན་དང་།   2006ལོ་ནས་སྐབས་བཞི་པའི་བོད་ལྗོངས་ལོ་ཙཱ་བའི་མཐུན་ཚོགས་ཀྱི་ལས་འཛིན་ལ་བདམས།   2010ལོར་ཞུས་ཆེན་ལོ་ཙཱ་བའི་མཚན་གནས་འཐོབ།   2004ལོ་ནས་ད་ལྟའི་བར་རྒྱལ་ཁབ་རླུང་འཕྲིན་སྤྱི་ཁྱབ་ཅུད་ཀྱིས་གཉེར་བའི་ཞིང་ལྗོངས་ལྔའི་རླུང་འཕྲིན་བརྙན་འཕྲིན་ལེ་ཚན་བསྒྱུར་བཟོ་སྦྱོང་བརྡར་འཛིན་གྲྭའི་གཙོ་ཁྲིད་དགེ་རྒན་གྱི་འགན་འཁུར།  ལོ་མང་རིང་ལས་ཞོར་ལ་སྙན་རྩོམ་དང་།   བརྩམས་སྒྲུང་།   དཔྱད་རྩོམ།   རླུང་འཕྲིན་བརྙན་འཕྲིན་ཟློས་གར་གྱི་འཁྲབ་གཞུང་སོགས་རྩོམ་སྣ་མི་གཅིག་པ་ལྔ་བརྒྱ་ལྷག་ཙམ་གསར་རྩོམ་དང་འགྲེམས་སྤེལ་བྱས།   ཐེ་ཀོར་གྱི་《གྷི་ཐན་ཀ་ལི》དང་།   ཀེ་ཐེའི《གཞོན་ནུ་འོད་ཐར་གྱི་སེམས་གཅོང》《གྷྭ་རིམ་གྱི་བྱིས་སྒྲུང》ལ་སོགས་པའི་རྒྱལ་ཁབ་ཕྱི་ནང་གི་གྲགས་ཅན་གསུང་རྩོམ་ཁག་ཅིག་བོད་ཡིག་ཏུ་བསྒྱུར་བ་མ་ཟད།   དེབ་དགུ་ཙམ་པར་བསྐྲུན་བྱས།   དེ་མིན་ནམ་ཞག་རྒྱུན་དུ་ཚད་ལྡན་གྱི་སློབ་མ་བརྒྱ་ཕྲག་མང་པོར་ཡིག་བསྒྱུར་དང་།   དེང་རབས་སྐད་བརྡ་རིག་པ།   རྩོམ་རིག   གོ་འབྱེད་བསམ་བློ་ལ་སོགས་པའི་རིག་ལམ་སྣ་ཚོགས་འཆད་འཁྲིད་བྱེད་མུས་ལགས།