གླིང་དགོན་རྟ་རྣ་རུ་ཉར་ཡོད་པའི་གླིང་གི་གནའ་རྫས།

གླིང་གེ་སར་རིག་གནས་དྲ་བ། 2012-01-03

གླིང་གེ་སར་གྱི་དགོན་པ་ཡིན་པར་གྲགས་པའི་རྟ་རྣ་དགོན་ནང་ཉར་ཚགས་བྱས་ཡོད་པ་ཤན་པའི་རྨོག གླིང་དཔའ་རྟུལ་རྣམས་ཀྱི་ཁྲབ་ཀྱི་མེ་ལོང་། གེ་སར་གྱི་ཁྲབ་མིག་བཅུ་གསུམ། འདན་མའི་རྨོག གེ་སར་གྱི་ཕུབ་མོ་སྦ་དམར་ལེབ། གླིང་གེ་སར་གྱི་གནས་རྟེན་བཅུ་དྲུག་གི་གསེར་ཆོས་གླེགས་ཤིང་། སྟག་རོང་ཁྲོ་རྒྱལ་གྱི་གླེགས་ཤིང་། གཞན་ལོ་སྟོང་སོང་བའི་གླིང་ཆུང་རྒྱུད་འབྲིང་བརྒྱུད་ཆེ་རྒྱུད་ཀྱི་གདུང་འབུམ་མཆོད་རྟེན་དང་ཁྲོ་ཐུང་གི་གདུང་རྟེན་མཆོད་རྟེན་གྱི་འདྲ་པར། མཁར་ནང་དགོན་དུ་ཉར་ཚགས་བྱས་པའི་བརྒྱད་སྟོང་གསེར་བྲིས་མ་དང་དངུལ་བྲིས་མ་སྟེ་（དགོན་པ་དེའི་སློབ་གཉེར་བ་ཐུབ་བསྟན་བསམ་གྲུབ་དང་བཀྲ་ཤིས་ཀྱིས་བཤད་པ་ལྟར་ན། ས་དེར་སྤྱི་དཔོན་གྱི་མི་རྒྱུད་ཀྱི་གཟིམ་ཁང་དང་སྣང་ངུའི་གཡང་སྒམ་ནང་ཡོད་པ་བཅིངས་འགྲོལ་སྐབས་སུ་འཕྲོ་བརླག་བཏང་ཚར་སྐད།）ད་ལྟ་མཐོང་རྒྱུ་ཡོད་པའི་བརྒྱད་སྟོང་གསེར་བྲིས་མ་དང་དངུལ་བྲིས་མ་ནི་ཤོག་ནག་མཐུག་པོའི་སྟེང་གསེར་དངུལ་གྱི་ཡི་གེ་ཕྲེང་བར་བྲིས་ཡོད་པ་ཞིག་སྟེ། གླིང་སྤྱི་དཔོན་རྒྱལ་པོའི་སྐབས་ཀྱི་གླེགས་བམ་ཡིན་པའི་དབང་དུ་བཏང་ན་བགྲང་བྱ་སྟོང་གཅིག་ཡས་མས་སོང་བ་གདོན་མི་ཟའོ། དེ་ལ་དགོན་པས་མཚན་བྱང་འདི་ལྟར་བྲིས་ཡོད་པ་སྟེ། “བརྒྱད་སྟོང་གསེར་བྲིས་མ་དང་དངུལ་བྲིས་མ་འདི་གཉིས་ཁྲ་བོ་སྤྱི་དཔོན་རྒྱལ་པོའི་ལྷ་ཁང་དུ་བཞུགས་པའི་རྟེན་གྱི་གྲས་ཡིན་ཞེས་རྒན་པོ་རྣམས་ཀྱི་ངག་རྒྱུན་དུ་ཡོད་ལ། སྔར་གྱི་སྤྱི་དཔོན་སྣང་ངུ་གཡུ་སྟག་གི་བརླ་རྐང་མཁར་ནང་བླ་བྲང་གི་གཡང་སྒམ་དུ་ཡོད་པ་དང་། སྡེ་བ་འདིའི་ནང་སྤྱི་དཔོན་གྱི་མི་རྒྱུད་ཟམ་མ་ཆད་པར་ད་ལྟ་ཡང་ཁྲ་རྒྱུད་ཞེས་པའི་རུས་དེ་ཡོད་”ཅེས་བཀོད་འདུག ད་དུང་ཁྲི་འདུ་ཆོས་མཛོད་དགོན་གྱིས་ཉར་ཚགས་བྱས་པའི་གེ་སར་རྒྱལ་པོའི་བྲང་ཁེབ་དང་སྟོད་གོས་ཡིན་ཟེར་བའི་རྒྱུ་གོས་ཆེན་འབྲུག་རིས་མས་བྱས་པའི་སྟོད་གོས་སེར་པོ་ཞིག་ཀྱང་མཇལ་རྒྱུ་ཡོད་དོ།

གླིང་དགོན་རྟ་རྣ་རུ་ཉར་ཡོད་པའི་གླིང་གི་གནའ་རྫས།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10