དེ་ཡང《གླིང་སྒྲུང》ལས། མདུན་སྤང་དཀར་ཉི་ཟླ་ཐོག་བརྩེགས་ལ། །ཁྱུང་དཀར་མོས་གཤོག་རྩེད་བྱེད་ས་ཡོད། །ཅེས་པ་ལྟར་ས་འབུར་འབུར་ཉི་མའི་དབྱིབས་ཐོག་ལ་ཟླ་བའི་དབྱིབས་བརྩེགས་པ་ལྟ་བུའི་སྟེང་དུ། གསར་དུ་བཞེངས་པའི་ཕོ་བྲང་སེང་འབྲུག་སྟག་རྩེ་དེ་ལྷང་ངེར་ཆགས་འདུག  སྒོ་ཆེན་གྱི་མདུན་ལ་ཕོ་བྲང་སེང་འབྲུག་སྟག་རྩེ་ཞེས་བརྐོས་ཡོད་པའི་རྡོ་རིང་ཞིག་བཞེངས་ཤིང་། དེའི་འགྲམ་ལ་གླིང་གེ་སར་དང་རྒྱ་ཚ་ཞལ་དཀར། འདན་མ་བྱང་ཁྲ་གསུམ་གྱི་འདྲ་སྐུ་བཞེངས་འདུག  ས་དེའི་ཁོར་ཡུག་གི་ཆགས་ཚུལ་ནི་གནམ་ལ་འཁོར་ལོ་རྩིབས་བརྒྱད། ས་ལ་པདྨ་འདབ་སྟོང་། ལོགས་ལ་བཀྲ་ཤིས་རྟགས་བརྒྱད། རྒྱབ་རི་ཁྱུང་ཆེན་ལྡིང་འདྲ། མདུན་རི་གླང་ཆེན་འགྱིང་འདྲ། ཕྱོགས་བཞིའི་སྲུང་ཆེན་སྡེ་བཞི། ཞེས་པ་ལྟར་དང་། ཕོ་བྲང་གི་གཡས་ཕྱོགས་སུ་གླིང་ཆུང་རྒྱུད་ཀྱི་བླ་རི་རྨ་ཆེན་སྦོམ་ར་ལ་ལྷ་བསང་གཏོང་སའི་གནས་རི་དར་གྱི་ས་ནག་རི་རྒན་ཆགས་འདུག  ས་ནག་རི་རྒན་ཞེས་པ་ནི་ས་ནག་པོ་ཡི་གེ་འབྲི་ཆོག་ས་ཞིག་ཡོད་པས་མིང་དེ་ལྟར་ཐོགས་ལ། དེ་ན་ནས་ཨ་མྱེས་རྨ་ཆེན་མཇལ་ཐུབ་པར་གྲགས། 

འགོག་བཟའ་མ་བུ་གཉིས་ཀྱི་ཐོག་མར་གནས་བཅས་ས།

  《འཁྲུངས་གླིང》ནང་། ས་དེ་ལ་རྨ་ས་བཟུང་དར་གྱི་མདུད་པ་དང་། རྨ་སྨད་ས་ནག་ལུང་མདོ་དང་། རྨ་སྨད་གཡུ་ལུང་གསུམ་མདོ་ཞེས་མིང་གི་རྣམ་གྲངས་འགའ་ཡོད་པ་ལས། དར་གྱི་མདུད་པ་ཞེས་པ་ནི་གཡོན་ནས་དར་ཆུ་འབབ་པ་དང་། གཡས་ནས་ས་ནག་གི་ཆུ་འབབ་པ་གཉིས་ལྷན་དུ་འཛོམས་པ་ནི། དར་དཀར་གྱི་མདུད་པ་བསྣོལ་བ་དང་འདྲ་བས་མིང་དེ་ལྟར་ཐོགས་ལ། སྒྲུང་པ་གྲགས་པས་བཤད་པའི《འཁྲུངས་གླིང》ལས། སྔར་སྔ་མོ་འདྲེ་ལུང་སུམ་མདོ་ཟེར། །དུས་ད་ལྟར་རྨ་སྨད་གཡུ་ལུང་ཟེར། །སྔར་རྨ་སྨད་འདྲེ་ཡི་ཕ་ཡུལ་རེད། །ད་གཡུ་ལུང་ལྷ་ཡི་ཞིང་ཁམས་རེད། །ཅེས་པ་ལ་བརྟགས་ན། ཨ་ཁུ་ཁྲོ་ཐུང་གིས་འགོག་བཟའ་མ་བུ་གཉིས་ས་དེ་ལ་འཕུད་དུས་འདྲེ་ཡི་ལུང་པ་ཞེས་ངན་སྨྲས་བྱས་ཀྱང་། བུ་ཇོ་རུས་གེ་སར་སར་སྡང་བའི་དགྲ་ལ་སར། དོན་འགྲུབ་འགྲུབ་ཁྲ་མོ་གླིང་ལ་གྲུབ་རྗེས། རྨ་སྨད་གཡུ་ཡི་ལུང་པ་ཞེས་ཆེ་བསྟོད་ཀྱི་མིང་ཞིག་ཆགས་པ་མིན་ནམ་སྙམ། ས་ཆ་འདི་ནི་འགོག་བཟའ་མ་བུ་གཉིས་ཀྱི་གནས་བཅས་ས་ཡིན་པ་དང་། དེ་ན་ཕོ་བྲང་སེང་འབྲུག་སྟག་རྩེ་ཡོད་ཚུལ་ནི་གླིང་སྒྲུང་ལས་མང་པོ་འདུག་སྟེ། དཔེར་ན། 《མོན་གླིང་གཡུལ་འགྱེད》ལས། ཆུ་མར་འབབ་བཅུད་ལྡན་བདུད་རྩིའི་མཚོ། །ཆབ་གཡས་འཁྱིལ་རི་མོ་བྲིས་འདྲ་བོ། །རྨ་གཡང་ཆགས་ཆུ་ཀླུང་དལ་མོ་རེད། །མཁར་མ་བརྩིགས་ས་ནས་སྐྱེས་འདྲ་བོ། །འདི་སྐུ་མཁར་སེང་འབྲུག་སྟག་རྩེ་རེད། །ཅེས་པ་དང་། རྨ་སྨད་ས་ནག་ལུང་མདོ་ན། །ཨ་བྲ་ཤིག་ལས་མང་ས་ཡིན། །གྲོ་མ་གཞན་ལས་ཞིམ་ས་ཡིན། །སྒུག་ན་དགེ་ཆེན་འོང་ས་ཡིན། །མི་སྤྲང་པོ་འདུག་པའི་ས་ཆ་ཡིན། །ངེད་འགོག་མོ་མ་བུའི་ས་ཆ་ཡིན། །ཞེས་པ་དང་། དགོན་པ་འདི་ཡང་ཁྲ་མོ་གླིང་གི་དགོན་པ་རེད། སྟོད་ན་སེང་འབྲུག་སྟག་རྩེ་ཡོད། །བར་ན་རྒོད་ཚང་ཁ་གཡེལ་ཡོད། །སྨད་ན་ཇ་མཁར་རིང་མོ་ཡོད། །ལ་སོགས་པ་མང་པོ་ཡོད་པས་བླ་རབས་མཁན་སྤྲུལ་མང་པོས་ས་ཆ་འདི་ནི་ཕོ་བྲང་སེང་འབྲུག་སྟག་རྩེ་ཡོད་ས་དང་། འགོག་བཟའ་མ་བུ་གཉིས་ཀྱི་གནས་བཅས་ས་ཡིན་པ་གཏན་དུ་ཁེལ་བ་རེད། 

    ལོ་རྒྱུས་ཞིབ་འཇུག་པ་རྣམས་ཀྱིས་ཕོ་བྲང་སེང་འབྲུག་སྟག་རྩེ་ནི་སྤྱི་ལོ༡༠༤༤ལོར་བཞེངས་པར་དགོངས་ཤིང་། ཇོ་རུས་རྫུ་འཕྲུལ་གྱིས་ལྷ་ཀླུ་གཉན་གསུམ་གྲོགས་སུ་བཀུག་སྟེ་སེང་གེའི་ཕྲུ་གུ་མང་པོ་ལ་རྡོ་བཀལ་ནས་བརྩིགས། གཉན་ཆེན་སྟག་ལྷས་ཁང་ཐོག་བཀབ་པས་སེང་ཕྲུག་སྟག་རྩེ་ཞེས་བཏགས་ཀྱང་། རྗེས་སུ་ཟུར་ཆག་སྟེ་སེང་འབྲུག་སྟག་རྩེ་འབོད་པ་རེད་ཅེས་གཏམ་རྒྱུད་ཡིད་ལས་འགོངས་པ་ཞིག་འདུག་མོད། སེང་གེ་དང་འབྲུག  སྟག་ཅེས་པ་ནི་མི་རྣམས་འཇིགས་ས་དང་སྐྲག་ས་ཡིན་པས། ཕོ་བྲང་གཟི་བརྗིད་ཅན་ལ་དཔེ་ཡི་སྒོ་ནས་མིང་གསོན་ཉམས་དོད་པ་ཞིག་བཏགས་པ་ནི་དོན་དང་མཐུན་པ་ཞིག་རེད། ལར་ངས་བསམས་ན་ཕོ་བྲང་སེང་འབྲུག་སྟག་རྩེ་ནི་ཇོ་རུ་རྟ་རྒྱུག་འགྲན་སྡུར་ལས་རྒྱལ་ཁ་ཐོབ་སྟེ་གེ་སར་རྗེས་བཞེངས་པ་སྟེ། སེང་ཆེན་ནོར་བུ་དགྲ་འདུལ་དང་ལྕམ་འབྲུག་མོ་གཉིས་ཀྱི་ཕོ་བྲང་ཡིན་པས་ཕོ་བྲང་སེང་འབྲུག་སྟག་རྩེ་ཞེས་བཏགས་པ་འདྲ། རྒྱུ་མཚན་ནི་ཇོ་རུ་མ་བུ་གཉིས་ཐོག་མར་བཞུགས་ས་ནི་དེང་སང་གི་ཕོ་བྲང་གི་གཡོན་ཕྱོགས་ཀྱི་སྤང་ཁུད་དེ་ན་ཡིན་པར་གྲགས། སྒྲུང་པ་གྲགས་པས་བཤད་པའི《འཁྲུངས་གླིང》ལས། ས་འདི་ས་ངོ་མ་ཤེས་ན། །རྨ་སྨད་འདྲེ་ལུང་གསུམ་མདོ་རེད། །སྦྲེ་བ་ཐང་གི་ཐང་སྟོད་རེད། །སྦྲེ་ཨབ་ར་གཉིས་ཀྱི་ཕ་ཚང་རེད། །ཕོ་ང་འདྲ་ང་ངོ་མ་ཤེས་ན། །སྨྱུག་ཁང་ཕྲ་མོའི་ནང་རྒྱུད་ལ། །མ་ངན་པང་ལ་བུ་ངན་འཁྲུངས། །བུ་སྡུག་ཇོ་རུ་འགོག་ཚ་ཡིན། །ཞེས་པ་དང་། ཡང་དེ་ལས། རྨ་སྨད་ཡུལ་ལ་སྐྱེས་པའི་རྗེས། །མ་ཡིས་གྲོ་མ་བཀོག་ནས་གསོས། །གྲོ་མ་ལོན་ན་ལྟོ་ཡོད་ཡིན། །གྲོ་མ་མ་ལོན་ལྟོ་མེད་ཡིན། །མ་ཡིས་ཨབ་ར་བསད་ནས་གསོས། །ཨབ་ར་བསད་ན་ལྟོ་ཡོད་ཡིན། །ཨབ་ར་མ་བསད་ལྟོ་མེད་ཡིན། །ཞེས་པ་ལྟར་ན། ལྟོ་གོས་ལ་དཀའ་ངལ་ཆེ་བའི་མི་ཞིག་ལ་ཕོ་བྲང་བཞེངས་པའི་ཕྱི་ནང་གཉིས་ཀྱི་ཆ་རྐྱེན་མི་འཛོམས་པ་དང་། རྟ་རྒྱུག་ལས་གེ་སར་རྗེས་གླིང་ཁྲ་མོའི་ཁྲི་ཐོག་ལ་བཞུགས་པས། གཞི་ནས་བརྗིད་ཆགས་ལྷུན་ཞིང་བརྗིད་པའི་ཕོ་བྲང་ཞིག་བཞེངས་སྲིད་པ་ཞིག་རེད།  

    མཁན་སྤྲུལ་མང་པོས་སྒྲུང་ཡིག་ནང་དུ་བཀོད་པ་ལྟར། རྨ་སྨད་གཡུ་ལུང་ནི་ཕོ་བྲང་སེང་འབྲུག་སྟག་རྩེའི་ཆགས་ཤུལ་ཡིན་པར་གཏན་དུ་ཁེལ་རྗེས། གོང་རིམ་ལ་རེ་ཞུ་ཕུལ་ཏེ་སྤྱི་ལོ༡༩༩༡ལོར་སྔོན་མའི་ཤུལ་ན་གསར་དུ་བཞེངས་པ་རེད་འདུག་སྟེ། དཀྱིལ་ལ་ཕོ་བྲང་སེང་འབྲུག་སྟག་རྩེ་དང་ཤར་མཁར་རིང་མོ། ལྷོ་མཁར་དགུ་སྒྲིལ། ནུབ་མཁར་ཕྱུག་མོ། བྱང་མཁར་སྨུག་པོ་ཞེས་ཕྱོགས་རེ་ལ་མཁར་མཐོན་པོ་རེད་བཞེངས་འདུག  ཕོ་བྲང་གི་རྩེག་དང་པོའི་ནང་དཔའ་ཐུལ་བརྒྱད་ཅུའི་སྐུ་འདྲ་སོགས་བཞེངས་ཡོད་པ་ནི། དཔེ་ཆ་གཞན་ནང་ཞིབ་ཕྲ་ཡོད་པས་བསྐྱར་འབྲི་མི་བྱེད། ཕོ་བྲང་གི་རྒྱབ་ཀྱི་བཤམས་སྟོན་ཁང་ཞིག་གི་ནང་ལ། ས་དེ་གའི་འོག་ནས་བུད་པའི་མདུང་རྩེ་དང་གནམ་ལྕགས་སོགས་མང་པོ་སྣང་ལ། གླིང་གི་དཔེ་ཆ་རྙིང་པ་དང་། སྒྲུང་པའི་སྒྲུང་ཆས། འབྲོང་རྭ་ཆེན་མོ། སྔོན་བྱོན་མཁས་པ་རྣམས་ཀྱི་སྤྱོད་ཆས། གླིང་གི་མཚོན་ཆ་སོགས་མང་པོ་མཇལ་རྒྱུ་འདུག་མོད། པར་དུ་ལེན་མི་ཆོག་པས་རེ་རེ་བཞིན་གྲོགས་པོ་ཚོ་ལ་སྟོན་ཐབས་མི་འདུག

      དེ་ཡང་། བུ་ཇོ་རུ་འཁྲུངས་སའི་ཐད་ལ་འགའ་ཞིག་གིས་སྡེ་དགེའི་ཨ་ཕྱུག་རེད་ཅེས་པ་དང་། ལ་ལ་ཡིས་དར་ལག་རྫོང་གི་རྨ་སྨད་གཡུ་ལུང་མདོ་ན་རེད་ཅེས་རྩོད་པ་མང་པོ་བྱས་མྱོང་བ་ནི། 《འཁྲུངས་གླིང》ལས། ཆུ་གཉིས་འབབ་སྒྲ་ལྷུང་ལྷུང་གྲགས། །བྲག་གཉིས་འདབ་སྒྲོ་གཤིས་འདྲ་ཡོད། །ཅེས་པ་ལ་བརྟེན་ཏེ། ཨ་ཕྱུག་ལ་སྒྲུང་ནང་བཤད་པ་ལྟ་བུའི་ཆུ་དང་བྲག་ཡོད་ལ། འདི་ནའང་དར་ཆུ་དང་རྨ་ཆུ་གཉིས་འཛོམས་སའི་བྲག་རིའི་ངོས་ལ། མདའ་སྒོ་གཤིབས་པ་འདྲ་བོ་ཡོད་པས་སོ་སོའི་མཐོང་སྣང་ལྟར་ལྟ་བ་མ་མཐུན་པ་ཡིན་སྲིད་མོད། མི་ཞིག་ལ་ཆུང་དུས་ལྟེ་ཁྲག་འཕོ་སའི་ཡུལ་ཞིག་དང་། ཆེན་པོར་ཆགས་རྗེས་འཕྲིན་ལས་དར་སའི་ཡུལ་ཞིག་ཡོད་པ་ནི། གནའ་དེང་གང་ལ་བལྟས་ཀྱང་ལུགས་དང་མཐུན་པ་ཞིག་རེད། ལར་དམིགས་བསལ་གྱི་དགོས་པ་མེད་ན་སྐྱེས་ཆེན་ཞིག་གི་འཁྲུངས་ས་རྩོད་པ་ལས། གང་གི་མཛད་རྗེས་དང་སྙིང་སྟོབས། རྗེས་ཤུལ་རྣམས་ལག་ནས་མ་ཤོར་བར་དམ་དུ་འཛིན་ན་ཅིས་མི་དགའ། 

རྨ་ཆུ།

   གདུགས་ཕུབ་པ་ལྟ་བུའི་གནམ་སྔོན་པོའི་འོག་དང་། གདན་བཏིང་པ་ནང་བཞིན་གྱི་ས་གཞིའི་ཐོག་ལ་ཆགས་པའི་རྨ་སྨད་གཡུ་ཡི་ལུང་པ་རུ། ཕོ་བྲང་སེང་འབྲུག་སྟག་རྩེ་ལས་སླར་ཡང་ཁྲ་མོ་གླིང་གི་དབུ་འཕང་དགུང་ལས་མཐོ་ཚུལ་ཚོར་ཐུབ་ལ། ལྷུང་ལྷུང་དར་གྱིས་འབབ་པའི་རྨ་ཀླུང་རིང་མོ་ལས། འགོ་ནས་འཛད་རྒྱུ་མེད་ལ་མཇུག་ནས་རྫོགས་མཐའ་མེད་པའི་གླིང་སྒྲུང་ནི། རྒྱུན་ཆད་མེད་པར་ཕྱི་རོལ་ཡུལ་དུ་ཁྱབ་ཚུལ་ཤེས།།