རང་ཁུལ་གྱིས་འཐབ་ཇུས་ཆེན་པོ་དྲུག་དང་གྲོང་སྡེ་དར་རྒྱས་ཀྱི་ཡུལ་དངོས་སྐུལ་འདེད་ཚོགས་འདུ་དང་ཁུལ་ཨུའི་རིགས་པའི་གཞུང་ལུགས་སློབ་སྦྱོང་ལྟེ་གནས་ཚོ་ཆུང་གི་སློབ་སྦྱོང(རྒྱས་འཛོམས)གྲོས་ཚོགས་འཚོགས།

ལྷ་འཛོམས་ཀྱིས་བསྒྱུར།        2020-06-03

རང་ཁུལ་གྱིས་འཐབ་ཇུས་ཆེན་པོ་དྲུག་དང་གྲོང་སྡེ་དར་རྒྱས་ཀྱི་ཡུལ་དངོས་སྐུལ་འདེད་ཚོགས་འདུ་དང་ཁུལ་ཨུའི་རིགས་པའི་གཞུང་ལུགས་སློབ་སྦྱོང་ལྟེ་གནས་ཚོ་ཆུང་གི་སློབ་སྦྱོང(རྒྱས་

ལིའུ་ཁྲེང་མིང་དང་བཅས་པས་དཀར་མཛེས་རྫོང་གི་ནས་ཀྱི་རིག་གནས་ཐོན་ལས་གླིང་ཁུལ་དུ་རྟོག་ཞིབ་གནང་བཞིན་པའི་ཚུལ།

    སྤྱི་ཟླ5པའི་ཚེས24ཉིན་ནས28ཉིན་བར་ཁུལ་ཡོངས་ཀྱི་འཐབ་ཇུས་ཆེན་པོ་དྲུག་དང་གྲོང་སྡེ་དར་རྒྱས་ཀྱི་ཡུལ་དངོས་སྐུལ་འདེད་ཚོགས་འདུ་དང་ཁུལ་ཨུའི་རིགས་པའི་གཞུང་ལུགས་སློབ་སྦྱོང་ལྟེ་གནས་ཚོ་ཆུང་གི་སློབ་སྦྱོང(རྒྱས་འཛོམས)གྲོས་ཚོགས་འཚོགས་པ་རེད། གྲོས་ཚོགས་དེ་ལས་ཡུལ་དངོས་སུ་རྟོག་ཞིབ་དང་ལྟ་སྦྱོང་བྱས་པ་དང་ཕྱོགས་བསྡོམས་ཚོགས་འདུ་འཚོགས་པའི་རྣམ་པའི་ཐོག་ནས་སྤེལ་བ་རེད།

    ཚོགས་ཞུགས་མི་སྣས་འབྲི་ཆུ་བབ་རྒྱུད་ཀྱི་བྱང་ནས་ལྷོ་བར་སྔ་ཕྱིར་སེར་ཤུལ་དང་སྡེ་དགེ། དཔལ་ཡུལ། དཀར་མཛེས། འབའ་ཐང་། སྡེ་རོང་། ཕྱག་ཕྲེང་བཅས་རྫོང་བདུན་གྱི་ས་ཚུགས14ལ་རྟོག་ཞིབ་དང་ལྟ་སྦྱོང་བྱས་པར་མ་ཟད། ད་དུང་ཕྱག་ཕྲེང་རྫོང་དུ་ཕྱོགས་བསྡོམས་ཚོགས་ཆེན་འཚོགས་ནས་འཐབ་ཇུས་ཆེན་པོ་དྲུག་དང་གྲོང་གསེབ་དར་རྒྱས་ཀྱི་ཉམས་མྱོང་དང་བྱེད་ཐབས་ཕྱོགས་བསྡོམས་དང་སྤེལ་རེས་བྱས་ནས་སླད་ཕྱིན་གྱི་ལས་ཀར་བཀོད་སྒྲིག་བྱས་པ་རེད།

ཁུལ་ཨུའི་ཧྲུའུ་ཅི་ལིའུ་ཁྲེང་མིང་ཚོགས་འདུར་ཕེབས་ནས་གསུང་བཤད་གནང་བ་རེད། ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ལི་ཁང་དང་ཁུལ་སྲིད་གྲོས་ཀྱི་ཀྲུའུ་ཞི་བྱང་ཆུབ། ཁུལ་ཨུའི་ཧྲུའུ་ཅི་གཞོན་པ།ཁུལ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཧྥུང་ཧྥ་ཀུའེ་བཅས་ཚོགས་འདུར་ཕེབས་ཡོད་པ་རེད། ཁུལ་ཨུའི་ཧྲུའུ་ཅི་གཞོན་པ་ཧྲི་ཀང་གིས་ཚོགས་འདུ་གཙོ་སྐྱོང་གནང་བ་རེད། 

    ཁུལ་ཡོངས་ཀྱི་འཐབ་ཇུས་ཆེན་པོ་དྲུག་དང་གྲོང་སྡེ་དར་རྒྱས་ཀྱི་ཡུལ་དངོས་སྐུལ་འདེད་ཚོགས་འདུ་དང་ཁུལ་ཨུའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་སློབ་སྦྱོང(རྒྱས་འཛོམས)ཚོགས་འདུར་ཞུགས་མཁན་མི་སྣ་ཚོ་སྤྱི་ལེ2000ལྷག་ཙམ་བསྐྱོད་དེ་ལྷོ་བྱང་རྒྱུད་ཀྱི་ཡུག་སྦྲེལ་ས་ཁུལ་གཉིས་བརྒལ་ནས་སྔོན་རྗེས་སུ་སེར་ཤུལ་འདན་མར་ཡུལ་སྐོར་ཚན་རྩལ་དཔེ་སྟོན་གླིང་ཁུལ་དང་སྡེ་དགེའི་ཁམས་པའི་རིག་གནས་དངོས་མང་སྟོན་ཚོགས་གླིང་ཁུལ་དང་གཡུ་ཐོག་གྲོང་སྡེའི་ཏང་འཛུགས་སྐྱོང་ལ་བརྟེན་ནས་དབུལ་ཐར་ལ་སྐུལ་འདེད་བཏང་ཚུལ། དཔལ་ཡུལ་གྱི་འབྲི་ཆུའི་པད་དགེ་ཆུ་འཁྱིལ་མཚོའི་གནོད་སྐྱོན་ཐེབས་རྗེས་སླར་གསོ་བསྐྱར་སྐྲུན་བྱས་ཚུལ། ནགས་བཟོ་ཅུས་ཀྱི་ཤིང་ཕྲུག་རྟེན་གཞི། ཡ་ཆེན་དགོན་པ། དཀར་མཛེས་ཀྱི་ནས་ཀྱི་རིག་གནས་ཐོན་ལས་གླིང་ཁུལ་དང་གེ་སར་རྒྱལ་པོ་མཁར་གྲོང་། འབའ་ཐང་གི་རྫོང་གྲོང་ཁུལ་འཛུགས་སྐྲུན་དང་རྫོང་རྩའི་གྲོང་རྡལ་གྱི་མུའུ་སྟོང་གི་ཁམ་བུ་རྟེན་གཞི། སྡེ་རོང་སྤུན་གསུམ་གྲོང་རྡལ་གྱི་ལི་མེན་འབྲུའི་ཐོན་ལས། ཕྱག་ཕྲེང་རྫོང་གི་ཕྲེང་སྟོད་གྲོང་རྡལ་གྱི་མུའུ་ཁྲི་ཡི་ཤིང་འབྲས་ར་བ་འཛུགས་སྐྲུན་དང་ཀུའེ་ཡོན་གནས་ཚང་སོགས་རྫོང་བདུན་གྱི་ས་གནས14ལ་ཕྱིན་ནས་ཡུལ་དངོས་སུ་འཐབ་ཇུས་ཆེན་པོ་དྲུག་དང་གྲོང་སྡེ་དར་རྒྱས་ལ་སྐུལ་འདེད་གཏོང་བའི་གནས་ཚུལ་ལ་རྟོག་ཞིབ་བྱས་པ་རེད། ཚང་མས་ནན་ཏན་གྱིས་ལྟ་སྐོར་དང་ཁེངས་སྐྱུང་གིས་སློབ་སྦྱོང་། ཕན་ཚུན་སྤེལ་རེས་བཅས་བྱས་པར་མ་ཟད། ཁྲོ་ལའི་ཕུག་ལམ་ནུབ་ངོས་སུ“ལམ་གཉིས”ཀྱི་ལོ་རྒྱུས་བསྐྱར་དྲན་བྱས་ཤིང་།གསར་བརྗེའི་སྔོན་གཤེགས་དཔའ་བོར་དྲན་གསོ་ཞུས་པ་རེད། ཚང་མས་ཐེངས་འདིའི་སློབ་སྦྱོང་དང་རྟོག་ཞིབ་ནི་བསམ་བློ་བཅིངས་འགྲོལ་གཏོང་བ་དང་མཐོང་རྒྱ་ཇེ་ཆེར་གཏོང་བའི་སློབ་སྦྱོང་གི་བྱ་སྤྱོད་ཅིག་ཡིན་ལ། སྔོན་ཐོན་དང་བསྡུར་ནས་ཧེ་བག་འཚོལ་བའི་བྱ་སྤྱོད་ཅིག་ཀྱང་ཡིན། ཡིད་ཆེས་བརྟན་པོ་དང་ངར་ཤུགས་གཅིག་སྒྲིམ་གྱིས་ངར་ཤུགས་སློང་བའི་བྱ་སྤྱོད་ཅིག་ནི་དེ་བས་ཀྱང་རེད་ཅེས་ངོས་འཛིན་བྱས་པ་རེད།

    ལིའུ་ཁྲེང་མིང་གིས་འཐབ་ཇུས་ཆེན་པོ་དྲུག་དང་གྲོང་སྡེ་དར་རྒྱས་ཡོང་བར་སྐུལ་འདེད་གཏོང་བའི་ལག་ལེན་ཁྲོད་ས་གནས་ཁག་དང་སྡེ་ཁག་ཁག་གིས་དོན་དངོས་དང་ཟུང་འབྲེལ་དང་ཆོས་ཉིད་ཁོང་དུ་ཆུད་པ། ལག་ལེན་དངོས་ཀྱི་ཐོག་ནས་སྤྱོད་གོ་ཆོད་པ་ར་འཕྲོད་ཡང་ཡང་བྱུང་བའི་བྱེད་སྟངས་ཡག་པོ་དང་། བསམ་ཕྱོགས་ཡག་པོ། ཉམས་མྱོང་ཡག་པོ་བཅས་འཚོལ་ཞིབ་དང་གསོག་འཇོག་བྱས་ཡོད། འཐབ་ཇུས་ཆེན་པོ་དྲུག་ནི་ཀྲུང་དབྱང་དང་ཞིང་ཆེན་ཏང་ཨུའི་དགོངས་དོན་དང་མཐུན་པ་དང་། དཀར་མཛེས་ཁུལ་གྱི་དོན་དངོས་དང་མཐུན་ཞིང་། ཁུལ་ཡོངས་ཀྱི་ལས་བྱེད་པ་དང་མང་ཚོགས་ཀྱིས་ལས་དོན་ལ་སྐུལ་འདེད་གཏོང་བའི་ཐུན་མོང་གི་ངོས་འཛིན་དང་གཅིག་གྱུར་གྱི་བྱ་སྤྱོད་ཅིག་ཏུ་གྱུར་ཡོད། དཀར་མཛེས་ཀྱིས་སྤུས་ཚད་མཐོ་བའི་འཕེལ་རྒྱས་མངོན་འགྱུར་དང་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་ཡོང་ཆེད་ངེས་པར་དུ་ལེགས་སྐྱེས་དེ་བས་མང་པོ་དང་དེ་བས་ཆེན་པོ་འབུལ་དགོས་ཞེས་གསུངས་པ་རེད།

     ལིའུ་ཁྲེང་མིང་གིས་ནན་གསུང་གནང་དོན། ད་ལོ་ནི་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཐུབ་རྒྱུར་རྒྱལ་ཁ་ཕུ་ཐག་ཆོད་པའི་ལོ་དང་ལོ་ལྔའི་འཆར་གཞི་བཅུ་གསུམ་པ་མཇུག་བསྡུ་བའི་ལོ་ཡིན་ལ། རིམས་ནད་འགོག་བཅོས་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་གཅིག་གྱུར་འཆར་འགོད་བྱེད་པར་སྐུལ་འདེད་གཏོང་བའི་དམིགས་བསལ་གྱི་ལོ་ཡང་རེད། རང་ཁུལ་འདི་ཞིང་ཆེན་བཞིའི་བོད་རིགས་ས་ཁུལ་དང་། ཀྲུང་ཧྭའི་ཆུ་གསོག་མཐོ་ལྕོག ས་ཁུལ་གསུམ་དང་རང་སྐྱོང་ཁུལ་གསུམ་གྱི་གྲུབ་ཆ་གལ་ཆེན་ཞིག་ཡིན་པའི་ཆ་ནས་བཤད་ན། རང་ངོས་ཀྱི་དོན་དངོས་ལ་གཞི་བཙུགས་ནས་འཕེལ་རྒྱས་ཀྱི་གོ་སྐབས་དམ་འཛིན་བྱེད་པ་དང་འཕེལ་རྒྱས་ཀྱི་རང་དབང་བརྩོན་ལེན་བྱེད་པ། འཕེལ་རྒྱས་ཀྱི་ལེགས་ཆ་གསར་གཏོད་བྱས་ཏེ་འཕེལ་རྒྱས་ཀྱི་སྤུས་ཀ་ཇེ་ཡག་གཏང་དགོས། རིམ་པ་ཁག་དང་སྡེ་ཚན་ཁག་གིས་རྒྱུན་མཐུད་དུ་ཤུགས་སྣོན་རྒྱག་པ་དང་སྙིང་རུས་གཏན་འཁྱོངས་བྱས་ཏེ་ཀྲུང་དབྱང་དང་ཞིང་ཆེན། ཁུལ་ཨུ་བཅས་ཀྱི་བཀོད་སྒྲིག་གལ་ཆེན་དང་གཙོ་གནད་ལས་འགན་དོན་ཐོག་ཏུ་འཁྱོལ་རྒྱུར་སྐུལ་འདེད་ཏན་ཏིག་གཏང་དགོས། གཅིག་ནས་འགན་འཁྲི་ནན་དུ་གཏང་དགོས། “ཁུལ་གྱིས་སྤྱི་ཡོངས་སུ་འགན་འཁུར་བ་དང་། རྫོང་དང་གྲོང་ཁྱེར་གྱིས་དོན་འཁྱོལ་ལ་དམ་འཛིན་བྱེད་པའི”འགན་འཁྲིའི་ལམ་སྲོལ་དོན་འཁྱོལ་ནན་པོ་བྱེད་པ་དང་། ཁུལ་རིམ་པའི་མགོ་ཁྲིད་ཀྱིས་སྣེ་ཁྲིད་དེ་མིག་དཔེ་སྟོན་དགོས། “འགན་འཁྲི་དང་པོ”འཁུར་ཏེ་སྣེ་ཁྲིད་ཚན་པ་ཁག་གིས་སྣེ་ཁྲིད་དང་སྤྱི་ཡོངས་དམ་འཛིན་གྱི་ནུས་པ་འདོན་སྤེལ་ཡག་པོ་བྱེད་པ་དང་། རྫོང(གྲོང་ཁྱེར)ཁག་གིས་བྱེད་པོའི་འགན་འཁྲི་ཏན་ཏིག་འཁུར་ནས་བཀོད་སྒྲིག་ཁག་དོན་ཐོག་ཏུ་འཁྱོལ་རྒྱུའི་འགན་ལེན་བྱ་དགོས། གཉིས་ནས་འཇོན་ནུས་ཀྱི་བྱང་ཚད་མཐོ་རུ་གཏང་དགོས། ཆེད་ལས་ཀྱི་ནུས་པ་ཆེ་རུ་གཏོང་བར་དམིགས་ནས་དཀའ་སྤྱད་འབད་བརྩོན་དང་བསམ་བློ་མང་པོ་གཏོང་བ་དང་གོ་བ་ཡག་པོ་ལེན་པའི་ཁྲོད་བྱང་ཆ་ཡོད་མཁན་ཞིག་ཏུ་གང་མགྱོགས་སུ་འགྱུར་བ་བྱས་ནས་མགོ་ཁྲིད་ལས་ཀའི་རང་འགུལ་དབང་ཆའི་སྟངས་འཛིན་ཁོང་དུ་ཆུད་པ་བྱ་དགོས། རང་ཉིད་ནུས་པ་ཆེ་རུ་གཏང་རྒྱུར་དམིགས་ཏེ་དུས་བབ་ལ་ཚོད་དཔག་བྱས་ན་ཅུང་རྙོག་འཛིང་ཆེ་བ་དང་། ཉེན་ཁ་དང་འགྲན་སློང་ལ་མཐོང་ཆེན་ཙམ་བྱེད་པ་དང་། ཁ་གཏད་འཇལ་བའི་ལས་ཀར་གྲ་སྒྲིག་འཐུས་ཚང་ཙམ་བྱེད་པ། རྙོག་འཛིང་ཆེ་བའི་གནད་བབ་ལ་ཁོང་དུ་ཆུད་པ་དང་རྙོག་འཛིང་ཆེ་བའི་གནད་དོན་ཐག་གཅོད་བྱེད་པའི་འཇོན་ནུས་སྦྱོང་དགོས། བཅོས་སྐྱོང་བྱེད་ནུས་ཆེ་རུ་གཏོང་བར་དམིགས་ཏེ། མ་ལག་བཅོས་སྐྱོང་དང་ཁྲིམས་ལྟར་བཅོས་སྐྱོང་། ཕྱོགས་བསྡུས་བཅོས་སྐྱོང་། འབྱུང་རྩ་ནས་བཅོས་སྐྱོང་བཅས་བྱེད་ནུས་ཟམ་མི་ཆད་པར་ཆེ་རུ་གཏང་དགོས། གསུམ་ནས་ལྟ་སྐུལ་ཞིབ་བཤེར་དང་དཔྱད་ཞིབ་ནན་པོ་བྱ་དགོས། ལྟ་སྐུལ་ཞིབ་བཤེར་བྱེད་ཐབས་སྣ་མང་ལ་ཕྱོགས་བསྡུས་བེད་སྤྱད་བྱེད་པ་དང་། འགན་འཁྲི་དོན་འཁྱོལ་ལྡོག་སྐུལ་བྱས་ཏེ་ལས་སྒྲུབ་ལས་གཏོད་ཀྱི་སྙིང་སྟོབས་འཕེལ་བ་བྱ་དགོས། བཞི་ནས་རྣམ་པ་བཟང་པོ་གཏོད་དགོས། ལས་སྟེགས་མང་པོ་དང་མཐོང་རྒྱ་ཕྱོགས་མང་པོ། གཏིང་ཟབ་བཅས་ཀྱི་སྒོ་ནས་འཐབ་ཇུས་ཆེན་པོ་དྲུག་གི་དོན་སྙིང་གལ་ཆེན་དྲིལ་བསྒྲགས་དང་ལག་བསྟར་བྱས་ནས་ཏང་ཡོངས་སྐུལ་སློང་དང་དམངས་ཡོངས་ཞུགས་པ། སྤྱི་ཚོགས་ཡོངས་ཀྱིས་རྒྱབ་སྐྱོར་བྱེད་པ་བཅས་ཀྱི་འགྲིལ་ཤུགས་ཆེན་པོ་རྒྱུན་མཐུད་ངང་གོང་བུར་འགྲིལ་བར་བྱ་དགོས།

    ཚོགས་འདུའི་ཐོག་ཁུལ་ཨུའི་ཧྲུའུ་ཅི་དང་རྫོང(གྲོང་ཁྱེར)ཏང་ཨུའི་ཧྲུའུ་ཅི་དང2020ལོའི་འཐབ་ཇུས་ཆེན་པོ་དྲུག་གི་དམིགས་ཡུལ་འགན་འཁྲིའི་ཡི་གེར་མིང་རྟགས་བཀོད་པ་རེད། ཚོགས་འདུའི་ཐོག་ནས་ཁུལ་ཡོངས་ཀྱི2019ལོའི་དབུལ་ཐར་འགག་སྒྲོལ་གྱི་གྲུབ་འབྲས་དཔྱད་ཞིབ་གནས་ཚུལ་བརྡ་ཁྱབ་བཏང་བ་རེད། ཚོགས་ཐོག་རྟའུ་དང་དཔལ་ཡུལ་། སྡེ་དགེ གསེར་ཐར། འབའ་ཐང་། རོང་བྲག་བཅས་རྫོང་སོ་སོས་དབུལ་ཐར་འགག་སྒྲོལ་འཐབ་ཇུས་དང་ཁྲིམས་ལྟར་ཁུལ་སྐྱོང་བའི་འཐབ་ཇུས། ཐོན་ལས་དམངས་ཕྱུག་འཐབ་ཇུས། འགྲིམ་འགྲུལ་སྔོན་སྐྱོད་འཐབ་ཇུས། གྲོང་ཡུལ་རིམ་སྤར་གྱི་འཐབ་ཇུས། སྐྱེ་ཁམས་དཔལ་ཡོན་འཛུགས་སྐྱོང་གི་འཐབ་ཇུས་བཅས་ལ་དམིགས་ནས་སྤེལ་རེས་གཏམ་བཤད་བྱས་པ་རེད།།


  • ལེ་ཚན་སྔོན་མ།:སེར་ཤུལ་རྫོང་ན་ཁྱད་མཚར་བའི་རྗེས་ཤུལ་ཞིག་རྙེད།
  • ལེ་ཚན་རྗེས་མ།:ལིའུ་ཁྲེང་མིང་གིས་དར་མདོའི་མི་ཉག་ལྟག་སྒོའི་སློབ་ཆུང་དུ་བྱིས་པ་ཚོ་དང་མཉམ་དུ“དྲུག་གཅིག”དུས་ཆེན་ལ་རྟེན་འབྲེལ་ཞུས།
  • དོ་སྣང་ཆེ་བའི་རྩོམ།