དགེ་འདུན་པ་ཚོས་གོས་ཕུ་ཐུང་ཅན་བསྣབས་མི་ཆོག་པའི་ཁར་རྩོད་པ་བྱེད་རིང་གཟན་སྐེ་པར་དཀྲིས་དགོས་སྟབས་དཔུང་པ་མན་དམར་བརྗེན་དུ་སྟོན་ཏེ་ཐལ་མོ་འདེབས་པ་སོགས་གཞུང་དོན་འཆད་རྩོད་ལ་བརྩོད་པ་དྲག་པོས་གཡེང་ནས་གྲང་རེག་གི་སྣང་བ་མ་ཚོར་བར་དུས་འདས་མཐར་དགུན་གྱི་གྲང་ལྷག་གིས་རྩེད་པའི་དབང་གིས་ཕྱག་ཞབས་ལ་སེར་ཁ་བྱུང་ནས་ཁྲག་ཙིམ་ཙིམ་བྱེད་ཀྱང་ཐོས་བསམ་སློབ་གཉེར་ལ་བརྩོན་པ་ཆུ་བོའི་རྒྱུན་བཞིན་བརྟེན་མཁན་རྣམས་ནི་ལུས་ཀྱི་དཀའ་དུབ་ལ་ཇི་མི་སྙམ་པར་གཞུང་དོན་ཁོང་དུ་ཆུད་ཕྱིར་འབད་པ་དོན་ལྡན་དུ་བྱེད་པ་ཡིན། དེ་ཡང་རྗེ་གུང་ཐང་པས། ཀུན་བྱང་འཇུག་ལྡོག་ཚུལ་ལ་མི་རྨོངས་ཤིང་། །ཚོགས་ཀྱི་དབུས་སུ་སྨྲ་མཁས་དཔལ་འདོད་ན། །ད་ལྟ་བཟའ་འཐུང་གཉིད་ཀྱི་བདེ་བ་ལ། །ཆགས་པའི་སྐྱིད་ཆོས་འདི་ཡིས་མི་འགྲུབ་པས། །དཀའ་དཔྱད་སྡུག་རུས་བཟོད་པར་གྱིས་ཤིག་ཨང་། །ཞེས་གསུངས་པ་ཉམས་སུ་ལེན་མཁན་ཞེ་ཅིག་སྣང་། དེ་ལྟར་ཉིན་རེའི་ཚོགས་དང་ཆོས་ར་འགྲིམ་པ་ཕུད། མཚན་མོ་ཕྱེ་པོའི་བར་རྡོ་གཅལ་གྱི་དཀྱིལ་དུ་ས་ངེས་མེད་ལ་ཕྱག་འཚལ་གྱི་ཡོད་པ་ནི་རྡོ་གཅལ་གྱི་འོག་ཏུ་འཇམ་དབྱངས་ཀྱི་བླ་རྡོ་ཞིག་རྒྱུག་འགྲོ་བཞིན་ཡོད་པས་ཕྱག་འཚམ་མཁན་གྱི་བྲང་ཁ་དང་རྡོ་དེ་རྒྱུག་པ་ཐུགས་ན་ཤེས་རབ་འཕེལ་གྱི་ཡོད་པར་གྲགས། །
           བོད་ཟླ་བཅུ་གཉིས་ཚེས་ཤར་གྱི་ཉིན་གཅིག་གྲྭ་པ་ཕལ་ཆེར་ཤིང་སློང་ཞེས་འཇང་དགོན་གྱི་ནུབ་ངོས་དགའ་འཛོམས་ལ་ཞེས་པ་བརྒྱབ་ནས་གྱེ་རེ་ལྷ་པའི་?ད་ལྟ་ཚལ་པ་ནང་ཤང་གི་ཁོངས་?ཕོ་བྲང་དུ་ཞག་གཅིག་བཞུགས་ཏེ། དེ་གར་དམ་བཅའ་ཞིག་ཚོགས། དེ་ནུབ་གྱེར་ལྷ་པ་ཁྱིམ་ཚང་ནས་བསྙེན་བཀུར་ཞུས་ཤིང་། དམ་བཅའ་ཁྲི་ནི་རྒྱ་ལྕོག་འདྲ་བའི་ཤིང་ཁྲི་རྙིང་སོང་རྒྱུན་བུས་བཅིངས་པ་ཞིག་ཡོད་པ་དེ་རྗེ་ཙོང་པའི་དམ་བཅའི་བཞུགས་ཁྲི་ཡིན་ཟེར། ཕྱི་ཉིན་གྱེ་རེ་ལྷ་པའི་མདའ་ནས་རི་གཤམས་བསྐོར་ཏེ་འཇང་དགོན་པའི་རི་གཤམ་དུ་འབྱོར་སྐབས་ཆུ་སྤགས་ཞིག་གསོལ་རྗེས་ཤིང་འཁུར་བུ་རེ་བསྣམས་ནས་གྲལ་བསྟར་བསྒྲིགས་ཏེ་འཇང་དགོན་པར་ཕེབས་སྲོལ་ཡོད། དགོན་པ་དེར་རྟེན་གཙོ་ཇོ་བོ་སྲིད་ཞིའི་རྒྱན་གཅིག་ཅེས་སྐུ་རྒྱུ་ལི་མ་ལས་གྲུབ་པའི་ཐུབ་དབང་གི་སྐུ་བརྙན་མི་ཚད་མ་སེང་ཁྲི་རྒྱབ་ཡོལ་གསེར་ཟངས་ལས་གྲུབ་པ་དང་། འཇམ་དབྱངས་མངོན་མཁྱེན་པ། བསྟན་སྲུང་མགོན་པོ་ཕྱག་དྲུག་སོགས་ཀྱི་སྐུ་བརྙན་དང་། བཀའ་འགྱུར་སོགས་གསུང་རྟེན་གླེགས་བམ། ཐུགས་རྟེན་མཆོད་རྟེན་མང་པོ་སོགས་སྐུ་གསུང་ཐུགས་རྟེན་དུ་མ་བཞུགས། ད་ལྟ་ཡང་ཕྱིའི་འདུ་ཁང་སོགས་ལ་ཉམས་གསོ་དང་། ནང་གི་རྟེན་གསུམ་གསར་བཞེངས་ཀྱི་ར་སྟོད་དགོན་ནས་དོ་དམ་ཐོག འཇང་དགུན་ཆོས་ཀྱི་ཆོས་ཐོག་ཀྱང་ཉིན་ཉེར་གཅིག་ཙམ་ཚུགས་པ་བཅས་ལགས་སོ། ། ། །