རྒྱུ་ལའི་དར་མདོ་གནམ་གྲུ་ཐང་བརྒྱུད་ནས་དར་མདོ་རྫོང་ལྷ་སྒང་གྲོང་རྡལ་གྱི་ལྕམ་པ་གྲོང་སྡེ་རུ་སྐྱོད་པའི་ལམ་བར་དུ་གསར་དུ་སྒྲིག་སྦྱོར་བྱས་པའི་ལྕགས་ཐག་སྒྲོམ་སྐྱོར་དེ་དག་ཉི་འོད་འོག་ཏུ་དངུལ་ཐག་བཞིན་དུ་འོད་ཆེམ་ཆེམ་དུ་འཕྲོ་བཞིན་འདུག    ཨར་ལས་བྱེད་བཞིན་ཡོད་པའི་རུ་ཁག་ཅིག་གི་ཁྲོད་དུ་བོད་པའི་བཟོ་པ10ཡིས་ནང་ལོགས་ས་ཁུལ་གྱི་ལག་རྩལ་མི་སྣའི་ཁྲིད་སྟོན་འོག་ལྕགས་རིགས་སྒྲོམ་སྐྱོར་འཛུགས་བཞིན་མཆིས།
ལོ་ན21ལ་སོན་པའི་ལྕམ་པ་གྲོང་སྡེའི་གྲོང་མི་རྡོ་རྗེ་ནི་ཨར་ལས་རུ་ཁག་དེའི་ཁོངས་མི་ཡིན་ཞིང་། ཁོའི་ཁྱིམ་ནང་གི་ཡོང་འབབ་གཙོ་བོ་ནི་དབྱར་རྩྭ་དགུན་འབུ་བརྐོ་རྒྱུ་ལ་བརྟེན་དགོས་མོད། ཡིན་ནའང་ད་ལོའི་དབྱར་རྩྭ་དགུན་འབུའི་ཚོང་མི་ཡག་པའི་ཐོག  ཉེ་ཆར་ཡང་ས་འགུལ་བྱུང་ནས་ཁོའི་སྡོད་ཁང་གི་གྱང་ངོས་གས་པ་རེད། ཕྱིན་ཆད་སྡོད་ཁང་ཡང་བཀབ་བྱེད་སྐབས་མ་དངུལ་སྤྱོད་རྒྱུ་ཡོད་དགོས་ཀྱིན་རེད། གལ་སྲིད་ཉིན་རྟག་པར་ཁྱིམ་དུ་ཉི་མ་ལྡེ་ནས་བསྡད་ན་དེ་ནི་ཐབས་ཞིག་མ་རེད་ཅེས་རྡོ་རྗེས་དེ་ལྟར་བཤད། ས་འགུལ་བྱུང་བའི་ཕྱི་ཉིན་ནས་རྡོ་རྗེས་རྫོང་འགྲིམ་འགྲུལ་ཅུས་ཀྱིས་ད་ལྟ་འཛུགས་སྐྲུན་བྱེད་བཞིན་པའི་གཞུང་ལམ་སྒྲོམ་སྐྱོར་གྱི་རྣམ་གྲངས་དེ་དྲན་ནས་རང་གིས་རང་ཉིད་འོས་སྦྱོར་བྱས་ནས་ཨར་ལས་རུ་ཁག་དེ་ནང་གི་ལས་བཟོ་པ་ཞིག་བྱས་ཡོད། མི་རེར་ཉིན་རེའི་གླ་ཆ་སྒོར100དེ་དུས་ཐོག་ཏུ་ལག་ཐོག་ཏུ་སྤྲོད་ཐུབ་པ་རེད།  ཟླ་བ11པའི་ཚེས26ཉིན་ཨར་ལས་རུ་ཁག་གི་ལག་རྩལ་མི་སྣ་དབྱང་ཧྲི་པིང་གིས་གསར་འགོད་པ་ལ་ཡུལ་འདི་གའི་ངལ་རྩོལ་མི་ལག་འདི་ཚོ་ལས་ལ་བརྩོན་ཞིང་དོ་དོ་དན་དན་རེད། དགོས་པ་ཡོད་ན་ལས་ཀ་དེ་བས་མང་པོ་བསྒྲུབ་རྒྱུའི་གོ་སྐབས་སྤྲད་ཆོག་ཅེས་བཤད་པ་རེད།
ལྕམ་པ་གྲོང་སྡེ་རུ་རྡོ་རྗེ་དང་འདྲ་བའི་སྒུག་རྒྱུ་དང་བརྟེན་རྒྱུ་མི་བསམ་ནས་ཐོན་སྐྱེད་རང་སྐྱོབ་བྱེད་མཁན་གྱི་གྲོང་མི་ག་ས་གར་མཐོང་རྒྱུ་འདུག
ཟླ་བ11པའི་ཚེས25གྱི་དགོང་མོའི་ས་འགུལ་ཁྲོད་འབྲོག་པ་བསྟན་འཛིན་ཚང་ཕྱུགས་ཟོག་འཛུད་སའི་སྤྱིལ་ཁང་ཉིན་ཁ་ཆེ་བའི་སྡོད་ཁང་དུ་གྱུར།གནོད་སྐྱོན་ཐེབས་རུང་མུ་མཐུད་ནས་འཚོ་བ་རོལ་དགོས་ཤིང་།བསྟན་འཛིན་ཁོ་རང་གི་བུ་མོ་དང་མཉམ་དུ་རྩྭ་ཐང་ཐོག་ལྕི་བ་སྒྲུག་བཞིན་པ་རེད།
ས་འགུལ་ཁྲོད་དུ་ཚེ་དབང་བཀྲ་ཤིས་ཀྱི་སྐལ་བཟང་རྩྭ་ཐང་ཞེས་པའི་ལྗོངས་རྒྱུའི་སྣེ་ལེན་ས་ཚུགས་ཀྱི་ཤེལ་ཁྲ་ཅན་གྱི་ཁང་བརྩེགས་ཆུང་ཆུང་དེ་ཉེན་ཁ་ཆེ་བའི་སྡོད་ཁང་དུ་གྱུར་ཡོད།  ཚེ་དབང་བཀྲ་ཤིས་ཀྱིས་གསར་འགོད་པ་ལ་ས་འགུལ་བྱུང་རྗེས་ཁོས་སྦྲ་གུར་ཕུབ་རྒྱུ་དང་ཁྱིམ་ཆས་སྐྱེལ་འདྲེན་བྱས་པར་ཕུད། ཉིན་རེར་མལ་ལས་ལངས་མ་ཐག་ཏུ་འོ་མ་བཞོས་རྗེས་ཞོ་བཟོས་ནས་འགྲོ་འོང་བྱེད་མཁན་གྱི་མགྲོན་པ་ལ་འཚོང་བཞིན་ཡོད་ཅེས་བཤད།
ལྕམ་པ་གྲོང་སྡེའི་ཏང་ཀྲི་པུའུ་ཧྲུའུ་ཅི་སྐལ་བཟང་སྐྱབས་ཀྱིས་གསར་འགོད་པ་ལ་ས་འགུལ་ཁྲོད་དུ་གྱོ ང་གུན་ཆེན་པོ་ཐེབས་ཡོད་མོད། ཡིན་ནའང་གལ་སྲིད་གནོད་ཐེབས་མང་ཚོགས་སྦྲ་གུར་ནང་སྡོད་དེ་རོགས་སྐྱོར་བྱ་རྒྱུར་སྒུག་ནས་བསྡད་ན་གྱོ ང་གུན་དེ་བས་ཆེ་བ་རེད། ང་ཚོ་ཏང་ཡོན་ལས་བྱེད་པས་ཚང་མ་སྣེ་ཁྲིད་ནས་ཐོན་སྐྱེད་རང་སྐྱོབ་བྱེད་པ་དང་ཕྱིན་ཆད་ཀྱི་བསྐྱར་སྐྲུན་ལས་ཀ་སྒྲུབ་རྒྱུར་རྨང་གཞི་ཡག་པོ་བཏིང་བའི་འགན་འཁྲི་ཡོད་ཅེས་བཤད།།