ཟླ་བ9པའི་ཚེས19ཉིན་ནི་ཀྲུང་ཧྭ་མི་རིགས་ཀྱི་སྲོལ་རྒྱུན་གྱི་དུས་ཆེན་ལུགས་རྙིང་གི་ཟླ་བ་བརྒྱད་པའི་ཟླ་མཆོད་དུས་ཆེན་དང་ཏག་ཏག་འཁེལ་བ་རེད།ཁུལ་ཨུའི་ཧྲུའུ་ཅི་ཧུའུ་ཁྲང་ཧྲེང་དང་ཁོང་གི་བཟའ་ཟླ་དགེ་རྒན་ཏེང་ལགས་རྣམ་གཉིས་ཁུལ་བྱིས་པའི་ཕན་བདེ་ཁང་དུ་ཕེབས་ནས་བུ་མོ་སྒྲོལ་མ་ཆེ་ཆུང་གཉིས་ལ་བདེ་འདྲི་གནང་བ་དང་བུ་མོ་གཉིས་དང་མཉམ་དུ་སྤྲོ་སྐྱིད་ལྡན་པའི་ཟླ་མཆོད་དུས་ཆེན་ཞིག་བཏང་བ་རེད།
    ཧུའུ་ཧྲུའུ་ཅི་ལགས་ཀྱིས་དཀར་མཛེས་ཁུལ་དུ་ཕྱག་ལས་མཛད་སར་ཡོང་རྗེས་དང་།ཁྱད་པར་དུ་ཁུལ་ཕན་བདེ་ཁང་གི་སྒྲོལ་མ་ཆེ་ཆུང་གཉིས་རང་གི་བུ་མོའི་གྲས་སུ་བཞག་རྗེས་དུས་ཚོད་ཁོམ་པ་ཡོད་པ་དང་སྲོལ་རྒྱུན་གྱི་དུས་ཆེན་ནང་ཁྱིམ་མི་ཚང་མ་ཁྲིད་ནས་བུ་མོ་ཆེ་ཆུང་གཉིས་ལ་བདེ་འདྲི་གནང་སར་ཕེབས་པ་རེད།ད་ལོར་ཧུའུ་ཧྲུའུ་ཅི་ལགས་ཀྱིས་ཁྱིམ་མི་ཚང་མ་ཁྲིད་ནས་བུ་མོ་གཉིས་ལ་ལྟ་ས་ཐེངས་མ་གསུམ་ཕེབས་ཡོད་པ་རེད།ཧུའུ་ཧྲུའུ་ཅི་ལགས་བྱིས་པའི་ཕན་བདེ་ཁང་དུ་འབྱོར་མ་ཐག་བུ་མོ་ཆེ་ཆུང་གཉིས་རྒྱུག་ཡོང་ནས་ཨ་མའི་ལག་ལ་འཇུས་ཏེ་ཉེ་དུས་ཀྱི་གནས་ཚུལ་བཤད།ཧུའུ་ཧྲུའུ་ཅི་ལགས་ཀྱིས་སྒྲོལ་མ་ཆེ་བའི་སློབ་སྦྱོང་གནས་ཚུལ་ཞིབ་མོ་དྲིས།ཧུའུ་ཁྲང་ཧྲེང་གིས་མོ་ལ་སང་ལོར་སློབ་ཆུང་ནས་སློབ་མཐར་ཕྱིན་རན་རྒྱུ་རེད།ངེས་པར་དུ་དགེ་རྒན་གྱི་ཁ་ལ་ཉན་ནས་སློབ་སྦྱོང་ཡག་པོ་བྱས་ཏེ་དར་མདོ་སློབ་འབྲིང་ལ་རྒྱུགས་ཨེ་འཕྲོད་མི་འཕྲོད་གྱིས་ཞེས་བཀའ་སློབ་ཡང་ཡང་གནང་།
    དགེ་རྒན་ཏེང་ལགས་ཀྱིས་སྒྲོལ་མ་ཆུང་བ་ཡར་པང་ནས་སེམས་ཁུར་ཆེན་པོས་བུ་མོ་ཁྱོད་གཟུགས་སྐྱེ་ཡོད་པས་མ་ཚད་ཤ་རྒྱག་ཡོད་དོ་ཟེར།ཧུའུ་ཧྲུའུ་ཅི་ལགས་དང་དགེ་རྒན་ཏེང་ལགས་རྣམ་གཉིས་སྒྲོལ་མ་ཆེ་ཆུང་གཉིས་ཀྱི་སྡོད་ཁང་ནང་ཕེབས་དུས་སྡོད་ཁང་ནང་གཙང་ཞིང་གྲ་སྒྲིག་པོ་ཡིན་ལ།གྱང་ཐོག་སློབ་སྦྱོང་གི་བྱ་དགའ་སྣ་མང་འགེལ་ཡོད་པ་མཐོང་དུས་སྒྲོལ་མ་ཆེ་ཆུང་གཉིས་ཀྱི་སློབ་སྦྱོང་དགེ་རྒན་དང་འཚོ་བའི་དགེ་རྒན་ལ་ཐུགས་རྗེ་ཆེ་ཞུས་པ་དང་དུས་ཆེན་གྱི་འཚམས་འདྲི་གནང་བ་རེད།
    ཧུའུ་ཧྲུའུ་ཅི་ལགས་ཀྱིས་སྒྲོལ་མ་ཆེ་ཆུང་གཉིས་ཀྱི་སྡོད་ཁང་ནང་དུ་ཟླ་མཆོད་བག་ལེབ་ཡར་བླངས་ནས་བྱིས་པ་ཚོར་བགོས་ནས་བྱིས་པ་ཚོ་དང་མཉམ་དུ་ཟླ་མཆོད་དུས་ཆེན་གཏོང་བ་རེད།ཟླ་མཆོད་བག་ལེབ་ཟོས་རྗེས་ཧུའུ་ཧྲུའུ་ཅི་ལགས་ཀྱིས་སྐུལ་སློང་གནང་འོག་བུ་མོ་གཉིས་ཀྱིས་གླུ་ལེན་གར་འཁྲབ་བྱས་ནས་དུས་ཆེན་དགའ་སྟོན་བྱས།
    ཧུའུ་ཧྲུའུ་ཅི་ལགས་ཀྱིས་གསུངས་རྒྱུར།ང་ཚོ་ཆུང་དུས་སུ་ཆེས་སྐྱིད་སྣང་བ་ཤར་བ་ནི་དུས་ཆེན་རོལ་སྐབས་ཡིན་པས།དེང་སང་བུ་མོ་ཚོ་དང་ཁྱད་པར་དུ་ཕན་བདེ་ཁང་གི་བྱིས་པ་ཚོ་དང་མཉམ་དུ་སྲོལ་རྒྱུན་གྱི་དུས་ཆེན་མཉམ་རོལ་བྱས་པར་བརྒྱུད་བྱིས་པ་ཚོར་སྲོལ་རྒྱུན་གྱི་དུས་ཆེན་ནང་བདེ་སྐྱིད་འཚོ་ཉམས་སུ་མྱོང་དུ་འཇུག་རྒྱུ་དང་ཁོ་ཚོའི་འཚོ་བར་སྤྲོ་སྐྱིད་ཁེངས་སུ་འཇུག་རྒྱུ་ཡིན་པ་རེད།སྲོལ་རྒྱུན་དུས་ཆེན་དེ་ཀྲུང་ཧྭ་མི་རིགས་རིག་གནས་ཀྱི་གྲུབ་ཆ་གཙོ་བོ་ཡིན་པས།བྱིས་པ་ཚོར་བདེ་སྐྱིད་ཀྱི་སྲོལ་རྒྱུན་དུས་ཆེན་གཏོང་བཅུག་ནས་ཀྲུང་ཧྭ་མི་རིགས་རིག་གནས་ཀྱི་མཁྱེན་རྒྱ་ཟབ་ཅིང་ཡངས་པའི་ཚོར་སྣང་ཤར་བཅུག་ནས་གཉེན་ཉེ་དང་ཁྱིམ་མིའི་དོན་སྙིང་གོ་བ་འཇུག་པ་དང་།འཚོ་བའི་ཉམས་མྱོང་དང་འཚོ་བ་རོལ་སྟངས་མང་པོ་ཤེས་སུ་འཇུག་པར་བརྟེན།འཚོ་བར་དགའ་ཞེན་དང་མི་རིགས་རིག་གནས་ལ་དགའ་ཞེན།གཉེན་ཉེ་དང་མཐུན་ལམ་ལ་གཅེས་འཛིན་བྱེད་ཤེས་མཁན་གྱི་གོམས་གཤིས་ཤིག་ཆགས་འཇུག་དགོས།