ད་ལོར་ལི་ཐང་རྫོང་གིས་ཞིང་འབྲོག་ཁུལ་གྱི་ཚན་རྩལ་ཁྱབ་གདལ་དང་བེད་སྤྱོད་བྱེད་ཤུགས་ཆེ་རུ་བཏང་ནས་ཧུར་ཐག་གིས་ཞིང་འབྲོག་ལས་སྒོ་ཐོན་ལས་ཅན་འཕེལ་རྒྱས་ཡོང་བའི་ལམ་བུ་འཚོལ་བ་དང་སྲོལ་རྒྱུན་གྱི་ཞིང་འབྲོག་ལས་ནས་དེང་རབས་ཅན་གྱི་ཞིང་འབྲོག་ལས་སུ་རིམ་བཞིན་དུ་བསྒྱུར་ནས།ཞིང་འབྲོག་ཁུལ་ལ་ཁེ་ཕན་ཐོབ་པ་དང་ཞིང་འབྲོག་ལས་ཐོན་འཕར་ཡོང་བ།ཞིང་འབྲོག་དམངས་ཀྱི་ཡོང་འབབ་འཕར་སྣོན་གཏོང་རྒྱུ་བཅས་ལ་རྨང་གཞི་བཏིང་ཡོད།
རྫོང་དེས་ཁྱད་ཆོས་ལྡན་པའི་ཞིང་འབྲོག་ལས་སྒོའི་ཐོན་སྐྱེད་རྟེན་གཞི་འཛུགས་སྐྲུན་ལ་སྐུལ་སྤེལ་གཏོང་རྒྱུ་འགོ་བཙུགས་ཏེ་ནས་དང་ཞོག་ཁོག་འདེབས་རྒྱ་ཆེ་རུ་བཏང་ཞིང་།སྔོ་ཚལ་དང་པད་ཁ་སོགས་ཐོན་སྐྱེད་འཕེལ་རྒྱས་ཤུགས་ཆེན་གཏོང་བ་རེད།ད་ལོར་རྫོང་ཡོངས་སུ་འབྲུ་རིགས་ཐོན་རྫས་འདེབས་རྒྱ་མུའུ58600ཐོག་སླེབས་གང་ཐུབ་བྱ་རྒྱུ་དང་འབྲུ་རིགས་ཐོན་ཚད་ཏུན10615འགན་སྲུང་བྱེད་གང་ཐུབ་བྱ་རྒྱུ།སྔོ་ཚལ་ཐོན་ཚད་ཏུན525ཐོག་སླེབས་པ་བྱ་རྒྱུ།དཔྱིད་འདེབས་ལོ་ཏོག་དང་པད་ཁའི་དཔེ་སྟོན་འདེབས་རྒྱ་ཆེ་རུ་བཏང་ནས་ཏུན230ཐོག་སླེབས་གང་ཐུབ་བྱ་རྒྱུ།ཐོན་ཚད་མཐོ་བའི་ནས་ཀྱི་དཔེ་སྟོན་རྟེན་གཞི་མུའུ15000དང་ཞོག་ཁོག་ཐོན་སྐྱེད་རྟེན་གཞི་མུའུ4000།ཚད་ལྡན་གྱི་ཞིང་མུའུ9000འཛུགས་གང་ཐུབ་བྱ་རྒྱུ་རེད།ཐོན་སྐྱེད་རྟེན་གཞི་དང་ཁྱད་རྟགས་སྐྲུན་རྒྱུ་དམ་པོར་འཛིན་ནས་ས་ཁམས་ཁོར་ཡུག་གི་ཆ་རྐྱེན་བེད་སྤྱོད་གང་ལེགས་བྱས་ནས་གཙོ་གནད་དུ་རྫོང་དེའི་རྩམ་པ་དང་ཟོག་ཤ་གཉིས་ཀྱི་བཅུད་ལྡན་ཟས་རིགས་ཀྱི་ཁྱད་རྟགས་བསྐྲུན་ནས་ཞིང་ལས་ཐོན་རྫས་ཀྱི་ཚོང་རའི་འགྲན་རྩོད་རང་བཞིན་ཆེ་རུ་གཏོང་བ་དང་ཞིང་འབྲོག་མང་ཚོགས་ལ་ཡོང་འཕར་ཡོང་བའི་ཐབས་ལམ་རྒྱ་ཆེ་རུ་གཏོང་རྒྱུ་རེད།
    ཕྱུགས་ཟོག་དང་བྱ་རིགས་གསོ་ཚགས་ར་བ་ཚད་ལྡན་ཅན་དུ་བཟོ་རྒྱུ་དེ་ཞིང་སྡེ་གསར་པ་སྐྲུན་རྒྱུའི་ནང་དོན་གལ་ཆེན་ཞིག་ཏུ་བརྩིས་ནས་འཛིན་དགོས་པ་དང་མིས་རྩྭ་འདེབས་པ་དང་རྩྭ་ཐང་ལེགས་བཅོས་གཏོང་ཤུགས་ཆེ་རུ་བཏང་ནས་རྩྭ་ཡི་ཐོན་ཚད་དང་རྩྭ་གསོག་ཚད་ཆེ་རུ་བཏང་ནས་རིམ་བཞིན་རྩྭ་ཕྱུགས་དོ་མཉམ་མངོན་འགྱུར་ཡོང་བ་བྱེད་པ་དང་།ཕྱུགས་འབྲོག་ལས་ཀྱི་སྤྱོད་གོ་ཆོག་པའི་ལག་རྩལ་གསོ་སྦྱོང་བྱེད་ཤུགས་ཆེ་རུ་བཏང་ནས་ཚན་རྩལ་གྲོང་གསེབ་ཏུ་སྐྱེལ་བའི་བྱེད་སྒོ་སྤེལ་བ།ཚོང་རའི་ཁྲིད་སྟོན་བྱེད་ཤུགས་ཆེ་རུ་བཏང་ནས་ཕྱུགས་འབྲོག་དང་ཕྱུགས་འབྲོག་ཐོན་རྫས་ཀྱི་ཚོང་ལམ་འཚོལ་བ།གཙོ་གནད་རྣམ་གྲངས་འཛུགས་སྐྲུན་ལ་ཤུགས་སྣོན་བརྒྱབ་ནས་རྩྭ་ཐང་གི་སྐྱེ་ཁམས་ཁ་གསབ་རོགས་སྐྱོར་དང་བྱ་དགའ་གནང་རྒྱུའི་ནང་རྐྱེན་གོ་རིམ་ཡོད་པའི་སྒོ་ནས་སྤེལ་བ།ཁྱོན་ཡོངས་སུ2010ལོའི་འབྲོག་བསྐྱུར་རྩྭ་འདེབས་ཀྱི་རྣམ་གྲངས་མུའུ་ཁྲི70དང་རྩྭ་རའི་ནང་རྩྭ་མུའུ་ཁྲི21གསབ་འདེབས་བྱ་རྒྱུའི་འཛུགས་སྐྲུན་ལས་འགན་འགྲུབ་པ་བྱ་རྒྱུ་དང་།རྩྭ་རའི་རྩྭ་སོན་འདེབས་འཛུགས་རྟེན་གཞི་རྣམ་གྲངས་འཛུགས་སྐྲུན་བྱེད་པ།མུ་མཐུད་ནས་རྩྭ་སོན་བཟང་པོའི་དཔེ་སྟོན་འདེབས་འཛུགས་ཁྱབ་གདལ་ཤུགས་ཆེ་གཏོང་བ། བོད་ཕག་དང་བོད་བྱ་རིགས་ཀྱི་གསར་སྦོལ་དང་སྲུང་སྐྱོང་།བེད་སྤྱོད་བཅས་བྱ་རྒྱུས་གཙོ་བོ་བྱེད་པའི་ཁྱད་ཆོས་ལྡན་པའི་ཕྱུགས་འབྲོག་ལས་སྒོའི་ཐོན་ལས་འཕེལ་རྒྱས་གཏོང་བ་དང་།ཞིང་འབྲོག་ལས་སྒོའི་ཐོན་སྐྱེད་དེ་གཞི་ཁྱོན་ཅན་དང་ཁེ་ཕན་ཅན་མངོན་འགྱུར་ཡོང་བར་བྱས་ནས་རིམ་བཞིན་དུ་ཐོན་ལས་ཅན་གྱི་འཕེལ་རྒྱས་ལམ་བུའི་ཐོག་སྐྱོད་ཐུབ་པ་བྱ་རྒྱུ་རེད།