འབྲི་ཆུའི་གྲོག་རོང་ས་རྒྱུད་དུ་ཆགས་པའི་ལོ་ཕྱུག་གྲོང་རྡལ་ནི་སེར་ཤུལ་རྫོང་གྲོང་ཁུལ་དང་སྤྱི་ལེ70ལྷག་ཙམ་རྒྱང་བའི་ས་ཁད་མཐོ་ཚད་རྒྱ་མཚོའི་ངོས་ལས་སྨི3200ལྷག་ཡོད་པའི་ཡུལ་གྲུ་ཞིག་རེད།ཞིང་ལས་འཕེལ་རྒྱས་གཏོང་སའི་རང་བྱུང་ཆ་རྐྱེན་བཟང་བས་མི་ཚོས་སེར་ཤུལ་བྱང་བརྒྱུད་ཀྱི་སྐྱིད་ལྗོངས་ཞེས་པ་འབོད་ཀྱིན་ཡོད་པ་རེད།ཉེ་ཆར།གསར་འགོད་པ་ལོ་ཕྱུག་གྲོང་རྡལ་དུ་སླེབས་སྐབས།ལོ་ཕྱུག་གྲོང་རྡལ་གྱི་ཏང་ཨུའི་ཧྲུའུ་ཅི་ཁོ་ཧྲེང་གིས་རྣམ་པ་གསར་པའི་གྲོང་རྡལ་ཅན་གྱི་འཛུགས་སྐྲུན་ལས་ཀར་སྐུལ་སྤེལ་བཏང་རིང་དུ་འདི་ན་ཡངས་པའི་ཁྲོམ་ལམ་དང་སྡོད་ཁང་གསར་པ་བསྐྲུན་ནས་གྲོང་རྡལ་གྱི་ཁོར་ཡུག་དེ་བས་ཡག་པོར་གྱུར་ཡོད།སྦུག་ཆུའི་བཟོ་གྲྭ་དང་གློག་མེད་ས་ཁུལ་གྱི་གློག་ནུས་འཛུགས་སྐྲུན་བྱ་རྒྱུ་ལེགས་འགྲུབ་བྱུང་རྗེས།ཡུལ་འདིའི་མི་སེར་གྱི་འཚོ་བ་ད་དུང་སྐས་རིམ་གསར་པའི་ཐོག་སླེབས་ཐུབ་རྒྱུ་རེད་ཅེས་ངོ་སྤྲོད་བྱས་བྱུང་།
    ལོ་ཕྱུག་གྲོང་རྡལ་གྱི་འཐུང་ཆུ་དེས་སྔོན་མར་ལོ་ཕྱུག་གྲོང་རྡལ་གྱི་ཡུལ་མི་སུམ་ཆ་གཅིག་ལ་མ་གཏོགས་མཁོ་སྤྲོད་བྱེད་མི་ཐུབ།དགུན་ཁར་སླེབས་དུས་ཆུ་སྤྱོད་རྒྱུ་དེ་བས་རག་དཀའ་བ་རེད།ལོ་ཆུང་གྲོང་རྡལ་གྱི་ཉེན་མེད་འཐུང་ཆུའི་གནད་དོན་ཐག་གཅོད་བྱེད་ཐུབ་པའི་ཆེད་དུ་ད་ལོའི་ཟླ་བ4པར་མ་དངུལ་སྒོར་ཁྲི2300ལྷག་གཏོང་འཇོག་བྱས་ནས་ལོ་ཕྱུག་གི་ཆུ་འདོན་ཨར་ལས་འཛུགས་སྐྲུན་བྱེད་འགོ་ཚུགས་པ་དང་།མི་སེར་ཚོར་ཉེན་སྐྱོན་མེད་པའི་སྦུག་ཆུ་འཐུང་ཐུབ་པའི་ཆེད་དུ་རི་འགོར་ཆུ་ཁུངས་ཞིག་འཚོལ་ཉུལ་བྱེད་ཐུབ་པ་བྱུང་རྗེས།སྦུག་ཆུ་གསར་འཛུགས་བྱས་ནས་གྲོང་རྡལ་ཡོངས་ཀྱི་རྒྱུན་སྡོད་ཡུལ་མི7000ལྷག་ལ་རྒྱུན་མཁོའི་སྤྱོད་ཆུ་མཁོ་སྤྲོད་བྱེད་ཐུབ་པ་རེད།
    སྦུག་ཆུའི་བཟོ་གྲྭ་དང་རྒྱང་ཐག་མི་རིང་བའི་ཡུལ་དུ་འཛུགས་སྐྲུན་བྱེད་བཞིན་པའི་ལོ་ཕྱུག་གི་སྟོང་ཧྥུ་110ཅན་གྱི་གློག་སྒྱུར་ས་ཚུགས་དེ་རེད།གློག་ཤུགས་མཁའ་ལམ་དང་གློག་མེད་ས་ཁུལ་གྱི་གློག་ཤུགས་འཛུགས་སྐྲུན་ཨར་ལས་དེ་སེར་ཤུལ་རྫོང་ལ་ཡོངས་ཁྱབ་ཏུ་ལས་བཞིན་པ་དང་།ཨར་ལས་དེ་འཛུགས་སྐྲུན་གྲུབ་ནས་སེར་ཤུལ་རྫོང་གི་ཞིང་འབྲོག་མི་དམངས་ཀྱི་གློག་སྤྱོད་རྒྱུའི་གནད་དོན་ཐག་གཅོད་བྱེད་ཐུབ་ལ།ཡུན་རིང་པོར་གློག་སྤྱོད་རྒྱུ་དཀོན་པའི་ལོ་ཕྱུག་ལ་ཆ་བཞག་ནས་བཤད་ན་དམངས་འཚོའི་ཨར་ལས་ཆེས་ཆེ་ཤོས་ཞིག་ཀྱང་ཡིན།ཨར་ལས་འགན་ཁུར་མི་སྣས་ངོ་སྤྲོད་བྱས་པར་ལྟར་ན་ད་ལོའི་ལོ་མཇུག་ཏུ་ཨར་ལས་འཛུགས་སྐྲུན་བྱེད་ཐུབ་ནས་ལོ་ཕྱུག་གི་གློག་སྤྱོད་རྒྱུ་འགན་ལེན་བྱེད་ཐུབ་པ་དང་མི་སེར་ཚོས་དྲོ་སྐྱིད་ལྡན་པའི་དགུན་ཁ་ཞིག་རོལ་ཐུབ་ངེས་རེད།
    ལོ་ཕྱུག་གྲོང་རྡལ་དུ་ད་དུང་གཞི་ཁྱོན་ལྡན་པའི་ཨར་ལས་བྱེད་ཡུལ་ཁག་གཅིག་ཡོད་པ་ནི་ལོ་ཕྱུག་གྲོང་རྡལ་གྱི་གླང་ཐང་དབུལ་སྐྱོར་གཅིག་བསྡུས་འབྲེལ་མཐུད་བྱེད་པའི་གསར་སྦོལ་རྣམ་གྲངས（གློག་རྒོད་བོད་གྲོང）དེ་ཡིན།འབྲི་ཆུ་དང་ཐག་ཉེ་བའི་ཐང་ཆེན་དུ་གྲ་སྟར་འགྲིག་པའི་ཁང་བརྩེགས་ཆུང་ཆུང་གྲལ་གཉིས་པོ་དེ་འཛུགས་སྐྲུན་བྱེད་བཞིན་པའི་སྒང་རེད།ཤེས་རྟོགས་བྱུང་བར་གཞིགས་ན་དུད་ཚང་རེར་སྨི་གྲུ་བཞི་མ200ལྷག་གི་སྡོད་ཁང་གསར་དུ་བསྐྲུན་ནས་ལྷ་ཁང་ནང་གྲོང་སྡེ་དང་ལོ་ཕྱུག་གྲོང་སྡེའི་དུད་ཚང་30གི་སྡོད་ཁང་གི་གནད་དོན་ཐག་གཅོད་བྱེད་ཐུབ་རྒྱུ་རེད།ཡུལ་དེར་སྒྲིག་ཆས་ཆ་ཚང་ཡོད་ཅིང་ཆུ་གཏོང་སའི་མ་ལག་དང་།ལྗང་འགྱུར་ས་ཁྱོན།སྤྱི་པའི་གསང་སྤྱོད་ཁང་།གྲོང་མིའི་བྱེད་སྒོ་སྤེལ་ཁང་།རིག་གནས་ཐང་ཆེན་སོགས་སྒྲིག་ཆས་ཆ་ཚང་ཡོད་པ་རེད།
    ལོ་ཕྱུག་གྲོང་རྡལ་གྱི་རྣམ་པ་ཡོངས་ལ་བལྟས་རྗེས་ཁོ་ཧྲེང་གིས་ལོ་ཕྱུག་གྲོང་རྡལ་དེ་སྔོན་མ་དང་བསྡུར་ན་འཕོ་འགྱུར་ཆེན་པོ་བྱུང་ཡོད།རྒྱལ་ཁབ་དང་ཞིང་ཆེན།ཁུལ་བཅས་ཀྱིས་ལོ་ཕྱུག་འཕེལ་རྒྱས་དང་འཛུགས་སྐྲུན་བྱ་རྒྱུའི་ཐད་རྒྱབ་སྐྱོར་ཆེན་པོ་གནང་ཡོད།གད་སྙིགས་དང་བཙོག་ཆུ་གཙང་སེལ་བྱ་རྒྱུ་སོགས་གྲོང་རྡལ་གྱི་སྒྲིག་ཆས་ཆ་ཚང་རབ་དང་རིམ་པ་འཛུགས་སྐྲུན་གྲུབ་རྗེས་འདི་ན་དེ་བས་མཛེས་སྡུག་བདེ་སྐྱིད་ཀྱི་གྲོང་རྡལ་གསར་པ་ཞིག་ཏུ་འགྱུར་ཐུབ་ངེས་རེད་ཅེས་བཤད།
    ཉེ་བའི་ལོ་ཤས་རིང་སེར་ཤུལ་རྫོང་གིས་རྣམ་པ་གསར་པའི་གྲོང་རྡལ་ཅན་གྱི་འཛུགས་སྐྲུན་ཨར་ལས་ཁྲོད་ལོ་ཕྱུག་དང་།སེར་ཤུལ།ཕྱག་ཚ།དབོན་པོ་གྲོང་རྡལ་བཅས་ལ་སྒྲིག་ཆས་འཐུས་སྒོ་ཚང་དུ་གཏོང་བ་དང་རྣམ་པ་བཟོ་བཀོད་བྱས་ནས་ཐོན་ལས་འཕེལ་རྒྱས་ཡོང་བར་སྐུལ་འདེད་གཏོང་རྒྱུས་གཙོ་བོ་བྱས་པ་དང་།དེ་མིན་ཤང་19དང་གཙོ་གནད་གྲོང་སྡེས་ཞིང་སྡེ་གསར་པ་འཛུགས་སྐྲུན་བྱ་རྒྱུ་དང་གྲོང་སྡེ་ཡོངས་སུ་སྐུལ་འདེད་གཏོང་རྒྱུའི་གོ་སྐབས་དམ་འཛིན་བྱས་ཏེ་གྲོང་ཁྱེར་དང་གྲོང་གསེབ་གཅིག་གྱུར་འཕེལ་རྒྱས་བཏང་ནས།2015ལོར་སླེབས་དུས་རྫོང་ཡོངས་སུ་གྲོང་རྡལ་ཅན་འགྱུར་ཚད་བརྒྱ་ཆ20ཡན་ལ་སླེབས་ཐུབ་པའི་སྤྱི་ཁོག་དམིགས་ཡུལ་འགྲུབ་ཐུབ་པར་བརྩོན་ལེན་བྱ་རྒྱུ་ཡིན་པ་རེད།མིག་སྔར།རྫོང་ཡོངས་ཀྱི་རྣམ་པ་གསར་པའི་གྲོང་རྡལ་ཅན་འཛུགས་སྐྲུན་བྱ་རྒྱུ་དེ་གོ་རིམ་ལྡན་པའི་སྒོས་སྤེལ་བཞིན་པ་དང་།རྣམ་པ་གསར་པའི་གྲོང་རྡལ་ཅན་འཛུགས་སྐྲུན་བྱས་པར་བརྒྱུད་ནས་སེར་ཤུལ་རྫོང་གི་གྲོང་ཁྱེར་དང་གྲོང་གསེབ་ཀྱི་རྣམ་པ་གསར་རྐྱང་ཞིག་ངོམས་ཐུབ་རྒྱུ་རེད།