དཀར་མཛེས་ཁུལ་སྐབས་བཅུ་གསུམ་པའི་མི་དམངས་འཐུས་ཚོགས་ཀྱི་གྲོས་ཚོགས་ཐེངས་བཞི་པ་འཚོག་འགོ་འཛུགས།

ཧྲེང་དབྱང་གྲོས་ཚོགས་སུ་ཞུགས། ཧྥུང་ཧྥ་ཀུའེ་ཡིས་སྲིད་གཞུང་ལས་དོན་སྙན་སེང་ཞུས།

ཧྲུའུ་ཏ་ཁྲུན་གྱིས་གཙོ་སྐྱོང་གནང་།  ཀྲང་ཐུང་རུང་གདན་ཞུས་ལྟར་གྲོས་ཚོགས་སུ་ཞུགས།

     སྤྱི་ཟླ་དང་པོའི་ཚེས4ཉིན་གྱི་སྔ་དྲོར། དཀར་མཛེས་བོད་རིགས་རང་སྐྱོང་ཁུལ་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་བཞི་པ་ལྕགས་ཟམ་རྫོང་དུ་འཚོག་འགོ་འཛུགས་པ་རེད། དཀར་མཛེས་ཁུལ་མི་དམངས་ས་ཡ་གཅིག་དང་འབུམ་གཉིས་ལྷག་གི་མངའ་བཅོལ་ཟབ་མོ་ཕྲག་ཏུ་ཁུར་བའི་ཁུལ་ཡོངས་ཀྱི་འཐབ་ཕྱོགས་ཁག་ནས་ཡོང་བའི་ཁུལ་མི་དམངས་འཐུས་ཚོགས་ཀྱི་འཐུས་མི་ཚོ་མཉམ་དུ་འཛོམས་ནས། ཆབ་སྲིད་ཀྱི་དགའ་ཞེན་ཆེན་པོས་འགན་ནུས་ཁྲིམས་ལྟར་ལག་ལེན་བསྟར་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་དཀར་མཛེས་ཁུལ་གྱི་ལེའུ་གསར་པ་བྲི་བར་བློ་རིག་དང་སྟོབས་ཤུགས་འབུལ་བ་རེད།

    ཚོགས་ཆེན་དུ་འབྱོར་དགོས་པའི་འཐུས་མི277ཡིན་ཞིང་། འཐུས་མི253དངོས་སུ་འབྱོར་ཡོད་པས་ཁྲིམས་འབེབས་མི་གྲངས་དང་མཐུན་པ་རེད།

    ཧྲུའུ་ཏ་ཁྲུན་གྱིས་འགོ་འཛུགས་ཚོགས་ཆེན་གཙོ་སྐྱོང་གནང་། ཚོགས་ཆེན་གྱི་ལག་བསྟར་ཀྲུའུ་ཞི་ཧྲེན་དབྱང་དང་། ཧྲུའུ་ཏ་ཁྲུན། ཀའོ་ཀྲན། ཡིའུ་ཞང་ཧྥེ། ཡོན་མིང་ཀོང་། ཧོ་ཞན་ཅིང་། ཧོང་ཅིང་། ཚེ་དབང་འཇིགས་མེད། ཀྲེན་ཞན་ཧྥུང་། ལིན་ཏུང་ཧྲན། བཀྲ་རྡོར། བློ་བཟང་ལྷ་སྒྲོན། སྐལ་བཟང་འགྱུར་མེད་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་ཡོད།

    ཁུལ་དཔོན་ཧྥུང་ཧྥུ་ཀུའེ་ཡིས་ཁུལ་མི་དམངས་སྲིད་གཞུང་གི་ཚབ་མཛད་དེ་སྲིད་གཞུང་ལས་དོན་སྙན་སེང་ཞུས་པ་རེད། ཀྲང་ཐུང་རུང་ཚོགས་ཆེན་དུ་ཞུགས་ཤིང་ཀྲུའུ་ཞི་སྟེགས་བུར་བཞུགས་ཡོད།

    སྔ་དྲོའི་ཆུ་ཚོད10པར། ཧྲུའུ་ཏ་ཁྲུན་གྱིས་ཁུལ་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་བཞི་པ་འགོ་འཛུགས་པའི་ཁྱབ་བསྒྲགས་གནང་ཞིང་། ཚང་མ་ཡར་ལངས་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་ལེན་པ་རེད།

    ཐལ་སྒྲ་སྤྲོ་སེམས་འཕེལ་བའི་ཁྲོད་དུ་ཧྥུང་ཧྥ་ཀུའེ་ཡིས་སྲིད་གཞུང་ལས་དོན་སྙན་སེང་ཞུས་པ་དང་། སྙན་སེང་ཁག་གསུམ་དུ་བགོས་ཡོད་པ་སྟེ། གཅིག། 2024ལོའི་ལས་དོན་ལ་ཕྱི་མིག་བལྟས་པ། གཉིས། 2025ལོའི་དམིགས་འབེན་དང་ལས་འགན་གཙོ་བོ། གསུམ། 2025ལོའི་གཙོ་གནད་ལས་དོན་བཅས་སོ།།

    ཧྥུང་ཧྥ་ཀུའེ་ཡིས་ཤུགས་ཡོད་རྒུས་དཔལ་འབྱོར་འགྲན་གཉེར་བྱས་ཏེ། ཐོན་ལས་འཕེལ་ཤུགས་སྔར་བས་ཆེ་རུ་སོང་ཡོད་པ་དང་གཅིག། ཐོག་མཐའ་བར་གསུམ་དུ་བདེ་འཇགས་ལ་འགན་ལེན་བྱས་ཏེ། སྤྱི་ཚོགས་ཀྱི་སྤྱི་ཡོངས་སྔར་བས་འཆམ་མཐུན་ཡོང་བར་བྱས་ཡོད་པ་གཉིས། རྒྱུད་རིམ་ལྡན་པའི་སྒོ་ནས་སྐྱེ་ཁམས་ལེགས་པོ་བཅོས་སྐྱོང་བྱས་པ་དང་། ལྗང་མདོག་སྲུང་ཡོལ་སྔར་བས་སྲ་བརྟན་དུ་བཏང་ཡོད་པ་གསུམ། བློ་གཅིག་སེམས་གཅིག་དང་བརྩེ་སེམས་ཆེན་པོས་དམངས་འཚོ་ལ་ཕན་པ་བསྐྲུན་ཏེ་མི་དམངས་ཀྱི་འཚོ་བ་སྔར་ལས་སྐྱིད་དུ་བཏང་ཡོད་པ་དང་བཞི། རྒྱུན་འཁྱོངས་ལྷོད་མེད་ངང་ཏང་ལེགས་སྐྱོང་དམ་དུ་བཟུང་ནས་བཅོས་སྐྱོང་ཕན་ནུས་སྔར་བས་མངོན་གསལ་དོད་དུ་ཕྱིན་ཡོད་པ་དང་ལྔ་ཡི་ལས་དོན་གཙོ་བོར་དམིགས་ནས2024ལོའི་ལས་དོན་ལ་ཕྱིར་མིག་བལྟས་པ་རེད། ཁོང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་བྱེད་པ་དང་། ཞིང་ཆེན་ཏང་ཨུ་དང་། ཞིང་ཆེན་སྲིད་གཞུང་། ཁུལ་ཨུ་བཅས་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག་དང་། ཁུལ་མི་དམངས་འཐུས་ཚོགས་དང་ཁུལ་གྱི་སྲིད་གྲོས་ཀྱི་ལྟ་སྐུལ་དང་རྒྱབ་སྐྱོར་འོག། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྙིང་དོན་ཁྱོན་ཡོངས་ནས་ལག་ལེན་བསྟར་བ་དང་། དུས་རབས་གསར་པའི་ཏང་གི་བོད་སྐྱོང་མཛད་ཇུས་དང་ཞིང་ཆེན་ཏང་ཨུའི་བོད་འབྲེལ་ལས་དོན་བཀོད་སྒྲིག་དོན་ལ་ནན་ཏན་འཁྱོལ་བ་དང་། ཁུལ་ཨུའི“གཅིག་གཉིས་གསུམ་བཞི་ལྔའི”སྤྱིའི་ལས་དོན་བཀོད་སྒྲིག་ལ་དམ་པོར་དམིགས་ཤིང་།“དཔལ་འབྱོར་འགྲན་གཉེར་དང་སྔོན་འགོག་གཉིས། འགན་སྲུང་གསུམ་”གྱི་རྒྱུན་ལྡན་ལས་དོན་གཙོ་བོར་གཅིག་གྱུར་འཆར་འགོད་བྱས་ཏེ། སྐབས་བཅུ་གསུམ་པའི་ཁུལ་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་གསུམ་པར་གཏན་ལ་ཕབ་པའི་དམིགས་འབེན་ལས་འགན་ཅུང་ལེགས་པའི་སྒོ་ནས་བསྒྲུབས་ཐུབ་ཡོད་ལ། ཀྲུང་གོའི་ལུགས་ཀྱི་དེང་རབས་ཅན་གྱི་དཀར་མཛེས་ཁུལ་འཛུགས་པར་གོམ་སྟབས་གསར་པ་སྤོས་ཐུབ་ཡོད་ཅེས་གསུངས་པ་རེད།

   སྙན་སེང་ནང་བསྟན་དོན། ད་ལོའི་སྲིད་གཞུང་གི་ལས་དོན་ཡག་པོར་བསྒྲུབ་པར་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཁྲིད་སྟོན་དུ་བཟུང་བ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་སྙིང་ཁྱོན་ཡོངས་ནས་ལག་ལེན་མཐར་ཕྱིན་བསྟར་བ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སི་ཁྲོན་ལས་དོན་ལ་གནང་བའི་མཛུབ་སྟོན་གལ་ཆེན་རབ་དང་རིམ་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བ། ཀྲུང་དབྱང་དང་ཞིང་ཆེན་ཏང་ཨུའི་དཔལ་འབྱོར་ལས་དོན་གྲོས་ཚོགས་ཀྱི་བླང་བྱ་བཀོད་སྒྲིག་ལག་ལེན་ནན་ཏན་བསྟར་བ་དང་།བརྟན་ཐོག་ཡར་འཕེལ་གྱི་ལས་དོན་སྤྱིའི་བསམ་གཞི་རྒྱུན་འཁྱོངས་ཤིང་། འཕེལ་རྒྱས་ཀྱི་འདུ་ཤེས་གསར་པ་ཁྱོན་ཡོངས་དང་གནད་སྨིན། ཆ་ཚང་བ་བཅས་ཀྱི་སྒོ་ནས་་ལག་ལེན་བསྟར་བ་དང་། འཕེལ་རྒྱས་ཀྱི་གནས་བབ་གསར་པར་ཧུར་ཐག་ཞུགས་ཤིང་ཞབས་འདེགས་ཞུ་བ། ཁུལ་ཨུའི་གཅིག་གཉིས་གསུམ་བཞི་ལྔའི་སྤྱིའི་ལས་དོན་གྱི་བཀོད་སྒྲིག་ལྟར། མེས་རྒྱལ་གཅིག་གྱུར་ཡོང་བར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་པ་ལས་དོན་མཐའ་དག་གི་དམིགས་ས་དང་ཤུགས་རྒྱག་སར་བྱེད་པ། དམངས་འཚོ་ལེགས་སུ་གཏོང་བ་དང་མི་སེམས་གཅིག་ཏུ་སྒྲིལ་བ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགོ་རྩོམ་ས་དང་དོན་ལ་བབ་སར་བྱེད་པ།“འགན་འཁྲི་གསུམ”ལག་ལེན་ནན་ཏིག་བསྟར་བ།“དོན་ཆེན་གསུམ”ཇེ་ཆེར་ཇེ་རྒྱས་སུ་གཏོང་བ། ནུས་ཡོད་རྒུས་དཔལ་འབྱོར་འགྲན་གཉེར་དང་འཛུགས་སྐྲུན་བྱེད་ཅིང་། ཡུལ་བབ་དང་བསྟུན་ནས་ཐོན་སྐྱེད་སྟོབས་ཤུགས་སྤུས་གསར་འཕེལ་རྒྱས་གཏོང་བ་དང་། བློ་བརྟན་འགྱུར་མེད་ངང་འཕེལ་རྒྱས་སྤུས་ཚད་མཐོན་པོར་ཡོང་བར་སྐུལ་བ། ནང་མཁོ་རྒྱ་སྐྱེད་ལ་དེ་བས་མཐོང་ཆེན་དང་ཐོན་ལས་འདེགས་སྐྱོར་ལ་དེབས་མཐོང་ཆེན། བསྒྱུར་བཅོད་སྒོ་འབྱེད་ལ་དེ་བས་མཐོང་ཆེན། མཐུན་སྦྱོར་འཕེལ་རྒྱས་ལ་དེ་བས་མཐོང་ཆེན། དམངས་འཚོ་ལེགས་བཅོས་ལ་དེ་བས་མཐོང་ཆེན། འཕེལ་རྒྱས་དང་བདེ་འཇགས་ལ་དེ་བས་གཅིག་གྱུར་འཆར་འགོད་བཅས་བྱས་ཏེ། དཔལ་འབྱོར་རྒྱུན་མཐུད་ཡར་འཕར་བཟང་ཕྱོགས་སུ་སྐུལ་བ་དང་། ལོ་ལྔའི་འཆར་འགོད་བཅུ་བཞི་པའི་དམིགས་འབེན་ལས་འགན་སྤུས་ཧུར་ཐག་ངང་སྒྲུབ་པ་བཅས་ཀྱི་སྒོ་ནས་ལོ་ལྔའི་འཆར་འགོད་བཅོ་ལྔ་པའི་འགོ་ཡག་པོ་འཛུགས་པར་རྨང་གཞི་བརྟན་པོར་འདིང་བ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་དཀར་མཛེས་ཁུལ་གྱི་ལེའུ་གསར་པ་བརྩམ་དགོས།

    སྙན་སེང་དུ་བསྟན་དོན། ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་བརྒྱ་ཆ6.0འཕར་བ་དང་། བཟོ་ལས་ཀྱི་འཕར་ཐང་བརྒྱ་ཆ7.5འཕར་བ། གཏན་འཇགས་རྒྱུ་ནོར་ལ་མ་དངུལ་འཇོག་ཚད་བརྒྱ་ཆ6.0འཕར་བ་དང་། ས་གནས་ཀྱི་སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་བརྒྱ་ཆ7.0འཕར་བ། སྤྱི་ཚོགས་འཛད་སྤྱོད་ཐོན་རྫས་སིལ་འཚོང་སྤྱི་འབོར་བརྒྱ་ཆ6.0འཕར་བ། གྲོང་ཡུལ་གཞིས་མིའི་མི་རེས་བཀོལ་སྤྱོད་ཆོག་པའི་ཡོང་འབབ་བརྒྱ་ཆ4.5དང་བརྒྱ་ཆ6.0སོ་སོར་འཕར་བ། གྲོང་རྡལ་གྱི་ལས་ཀ་ཤོར་ཚད་བརྟག་ཞིབ་བརྒྱ་ཆ5.5ནང་ཚུན་དུ་ཚོད་འཛིན་བྱ་རྒྱུ།

    ཧྥུང་ཧྥ་ཀུའེ་ཡིས་ཕྱོགས་དྲུག་གི་ཐད་ནས2025ལོའི་ལས་དོན་བཀོད་སྒྲིག་གི་གྲོས་འགོ་བཏོན་པ་སྟེ། གཅིག་ནི་ཤུགས་ཡོད་རྒུས་བསྡུར་ལྡན་དགེ་མཚན་ཤུགས་ཆེན་སྤེལ་ནས་ཞིང་ཆེན་ཡོངས་ཀྱི་དཔལ་འབྱོར་དང་རིག་གནས་ཀྱི་མ་ལག་ཏུ་མཉམ་འདྲེས་བྱ་དགོས་པ་སྟེ།བསྒྱུར་བཅོས་སྒོ་འབྱེད་ཁྱོན་ཡོངས་ནས་ཟབ་ཏུ་སྤེལ་དགོས་པ་དང་། ནང་མཁོའི་མི་མངོན་པའི་གཏིང་ཤུགས་བསྔོགས་ནས་གཏང་དགོས། རིག་གནས་ཡུལ་སྐོར་གྱི་སྤུས་རིམ་སྤར་དགོས། ནུས་རྒྱུ་གཙང་མ་རྒྱ་སྐྱེད་འབོར་འཕར་ཡོང་བར་བྱ་དགོས། ཞིང་ལས་ཁྱད་ཆོས་ཐོན་ལས་ཀྱི་རྨང་གཞི་སྲ་བརྟན་དང་སྤུས་ཚད་སྤར་བ་བཅས་བྱ་དགོས། གཉིས་ནི་རིག་གནས་འཛུགས་སྤེལ་ལ་དམིགས་ནས་དམངས་ཡོངས་ཀྱིས་མཉམ་དུ་བསམ་པའི་ཁྱིམ་གཞིས་འཛུགས་པར་བསྐུལ་དགོས་པ་སྟེ། ཏང་གི་གསར་གཏོད་རིགས་པའི་གཞུང་ལུགས་ཀྱིས་རིག་གནས་ཀྱི་གདེང་ཚོད་བརྟན་དུ་གཏང་དགོས་པ་དང་། རྒྱུན་ཆད་མེད་པར་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་འདུ་ཤེས་དམ་པོར་བཅང་དགོས། རིག་གནས་མཁོ་སྤྲོད་མ་ལག་སྤུས་ཚད་མཐོན་པོར་མགྱོགས་མྱུར་བསྐྲུན་དགོས། གསུམ་ནི་སྤྱི་ཚོགས་འཛུགས་སྐྱོང་ལ་དམིགས་ནས་དམངས་ཡོངས་ཀྱིས་མཉམ་དུ་བདེ་སྐྱིད་ཀྱི་འཚོ་བ་བསྐྲུན་པར་བསྐུལ་དགོས་པ་སྟེ། རོགས་སྐྱོར་ཁྲིད་ཕྱོགས་སུ་བྱས་ཏེ་འཚོ་སྐྱོང་དམའ་སྐྱོར་ལས་ཐར་བར་བྱ་དགོས་པ་དང་། གནས་སྡོད་འཕྲོད་པ་གཙོ་བོར་བྱས་ནས་གྲོང་ཡུལ་འཛུགས་སྐྲུན་བྱ་དགོས། ཞན་ཆ་ཁ་གསབ་བྱ་རྒྱུ་རྨང་གཞིར་བྱས་ཏེ་སྒྲིག་བཀོད་འཐུས་ཚང་དུ་གཏང་དགོས། ཡོང་འབབ་འཕར་གཙོ་གནད་དུ་བཟུང་ནས་གྲུབ་འབྲས་སྲ་བརྟན་དུ་གཏང་དགོས། འགན་སྲུང་འགན་འཁྲིར་བརྩིས་ནས་མཐིལ་ཚད་བརྟན་པོར་བསྲུང་དགོས། སློབ་གསོ་སྔོན་ལ་བཞག་ནས་ཀུན་སྤྱོད་ཀྱིས་མི་བསྐྱང་དགོས། བདེ་ཐང་དགོས་མཁོར་བྱས་ནས་སྨན་བཅོས་བྱེད་ཤུགས་ཆེ་རུ་གཏང་དགོས། བཞི་ནི་སྐྱེ་ཁམས་འཛུགས་སྐྱོང་ལ་དམིགས་ནས་དམངས་ཡོངས་ཀྱིས་རི་སྔོ་ཆུ་དྭངས་སྲུང་བར་བསྐུལ་དགོས་པ་སྟེ། སྦགས་བཙོག་འགོག་བཅོས་ཀྱི་རང་སྐུལ་དམག་འཐབ་ཡག་པོ་བརྒྱག་དགོས་པ་དང་། སྐྱེ་ཁམས་མ་ལག་སྲུང་སྐྱོང་གི་དམག་འཐབ་ཡག་པོ་བརྒྱག་དགོས། ཐཱན་ཉུང་རིགས་བསྒྱུར་གྱི་སྤྱི་ཡོངས་དམག་འཐབ་ཡག་པོ་བརྒྱག་དགོས། ལྔ་ནི་བདེ་འཇགས་འཛུགས་སྐྱོང་ལ་དམིགས་ནས་དམངས་ཡོངས་ཀྱིས་ཡུན་རིང་བདེ་འཁོད་ཡོང་བར་བསྐུལ་དགོས་པ་སྟེ། དུས་བདེའི་དཀར་མཛེས་ཁུལ་ཤུགས་ཡོད་རྒུས་བསྐྲུན་དགོས་པ་དང་། ཁྲིམས་ལྟར་ཆོས་ལུགས་ལས་དོན་ལ་དོ་དམ་བྱ་དགོས། སྤྱི་བའི་བདེ་འཇགས་དམ་འཛིན་ནན་ཞིབ་བྱ་དགོས། དྲུག་ནི་རང་ངོས་འཛུགས་སྐྱོང་ལ་དམིགས་ནས་དམངས་ཡོངས་ཀྱིས་ཡི་རང་བའི་སྲིད་གཞུང་འཛུགས་པར་བསྐུལ་དགོས་པ་སྟེ། ཏང་ལ་བློ་སེམས་མཐའ་གཅིག་ཏུ་དཀར་དགོས་པ་དང་། ཁྲིམས་ལྟར་སྲིད་འཛིན་མཐའ་གཅིག་ཏུ་བྱ་དགོས། སྲིད་བརྩོན་དམངས་ལ་ཕན་པ་མཐའ་གཅིག་ཏུ་བྱ་དགོས། སྤྱོད་གཙང་ལུགས་དྲང་མཐའ་གཅིག་ཏུ་བྱ་དགོས།

    གྲོས་ཚོགས་ཀྱི་གྲོས་རིམ་ལྟར། འགོ་འཛུགས་ཚོགས་ཆེན་དུ་ད་དུང་དཀར་མཛེས་ཁུལ2024ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞི་ལག་ལེན་བསྟར་ཚུལ་དང2025ལོའི་འཆར་གཞིའི་འཆར་ཟིན་གྱི་སྙན་སེང་དང་། དཀར་མཛེས་ཁུལ2024ལོའི་ནོར་སྲིད་སྔོན་རྩིས་ལག་ལེན་བསྟར་ཚུལ་དང2025ལོའི་ནོར་སྲིད་སྔོན་རྩིས་འཆར་ཟིན་གྱི་སྙན་སེང་། དཀར་མཛེས་ཁུལ2024ལོའི་ཁུལ་ཡོངས་ཀྱི་ཡུལ་སྡེ་དར་རྒྱས་གཏོང་བའི་གནས་ཚུལ་གྱི་སྙན་སེང་།  《དཀར་མཛེས་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ལྷན་གྱི་ཁྲིམས་འཛུགས་སྲོལ་ཡིག འཆར་ཟིན》ཀྱི་གྲོས་གཞིའི་གསལ་བཤད། 《དཀར་མཛེས་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་གྱི་〈དཀར་མཛེས་བོད་རིགས་རང་སྐྱོང་ཁུལ་གྱིས《སི་ཁྲོན་ཞིང་ཆེན་གྱི〈ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆུའི་བཅའ་ཁྲིམས〉ལག་ལེན་བྱེད་ཐབས》ཀྱི་བབ་བསྟུན་གཏན་འབེབས་〉རྩིས་མེད་དུ་གཏོང་བའི་སྐོར་གྱི་གཏན་འབེབས（འཆར་ཟིན）》ཀྱི་གྲོས་གཞིའི་གསལ་བཤད།《དཀར་མཛེས་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་གྱི་〈དཀར་མཛེས་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་གྱི་དོན་གྲོས་སྒྲིག་སྲོལ〉དག་བཅོས་བྱ་རྒྱུའི་སྐོར་གྱི་གཏན་འབེབས（འཆར་ཟིན）》ཀྱི་གྲོས་གཞིའི་གསལ་བཤད་བཅས་ལ་ཡིག་ཐོག་ནས་ཞིབ་བཤེར་བྱ་རྒྱུ་སྤྲད་པ་རེད།

ཀྲུང་གུང་དཀར་མཛེས་ཁུལ་ཨུ་དང་ཁུལ་མི་དམངས་སྲིད་གཞུང་། སྲིད་གྲོས་དཀར་མཛེས་ཁུལ་ཨུ་ལྷན། དཀར་མཛེས་ལས་རིགས་སློབ་གླིང་བཅས་ཀྱི་མགོ་ཁྲིད་དང་། ཀྲེ་ཅང་རོགས་སྐྱོར་ལས་དོན་རུ་ཁག་གི་རུ་དཔོན།ཁྲེང་ཏུའུ་རོགས་སྐྱོར་ལས་དོན་རུ་ཁག་གི་སྣེ་ཁྲིད་པ་བཅས་གདན་ཞུས་ལྟར་ཀྲུའུ་ཞི་སྟེགས་བུར་བཞུགས་ཡོད། གཞན་འབྲེལ་ཡོད་མི་སྣ་གྲོས་ཚོགས་སུ་ཟུར་དུ་ཞུགས་ཡོད།