གཞི་རིམ་དུ་ཁྲིམས་ལུགས་སློབ་གསོའི་བྱེད་སྒོ་སྤེལ་རྒྱུ་དེ་ངེས་པར་དུ་རྒྱུན་རྣམ་ཅན་དུ་གྱུར་ཐུབ་པ་དང་།མང་ཚོགས་ཀྱི་ཁྲིམས་སྐྱོང་འདུ་ཤེས་ཇེ་དྲག་ཏུ་གཏོང་གང་ཐུབ་བྱས་ཏེ།མང་ཚོགས་ཀྱིས་ཁྲིམས་སྐྱོང་གི་བསམ་ཚུལ་སྤྱད་ནས་གནད་དོན་ཐག་གཅོད་བྱེད་ཐུབ་པ་བྱ་ཆེད། ཉེ་ཆར། ཁུལ་ཡོངས་ཀྱི་ཁྲིམས་སྐྱོང་གི་བོད་ཁུལ་དུ་མཉམ་དུ་སྐྱོད་ཅེས་པའི་ཤེས་བྱ་འགྲན་བསྡུར་བྱེད་པའི་ཁྲོད།ཉག་ཆུ་རྫོང་གི་ཞིང་འབྲོག་མི་དམངས་ཀྱི་འཐུས་ཚབ་བདེ་གསལ་དབང་མོས་གཟབ་བརླིང་ངང་ཉིན་གཉིས་རིང་ལ་འགྲན་བརྩོད་དྲག་པོ་བྱས་པར་བརྒྱུད། འཐུས་ཚབ་རུ་ཁག་དེའི་ཞིང་འབྲོག་མི་དམངས་ཀྱི་བདམས་ཐོན་པ་མི3གྱིས་ཉག་ཆུ་རྫོང་ལ་ཁུལ་ཡོངས་ཀྱི་ཁྲིམས་སྐྱོང་གི་བོད་ཁུལ་དུ་མཉམ་དུ་སྐྱོད་ཅེས་པའི་ཤེས་བྱའི་འགྲན་བསྡུར་བྱེད་པའི་ཞིང་འབྲོག་པའི་ཚོ་ཆུང་ནང་བྱ་དགའ་ཨང་དང་པོ་ཐོབ་པ་དང་། རྗེས་སུ་དཀར་མཛེས་ཁུལ་ཞིང་འབྲོག་མི་དམངས་ཀྱི་ཚབ་བྱས་ཏེ་སི་ཁྲོན་ཞིང་ཆེན་བོད་ཁུལ་གྱི་ཁྲིམས་ལུགས་ཤེས་བྱའི་འགྲན་བསྡུར་ནང་ཞུགས་རྒྱུ་རེད།ཕུལ་བྱུང་གི་གྲུབ་འབྲས་ཐོབ་པའི་བདེ་གསལ་དབང་མོས་སྔོན་མ་ཡིན་ན་ང་རང་ཁྲིམས་ལུགས་ཡེ་ནས་མི་ཤེས་པའི་མི་ཞིག་དང་འདྲ། ད་ལྟ་ངས་ཁྲིམས་ལུགས་ཤེས་བྱ་ཕྲན་བུ་ཤེས་པའི་འདི་ནི་ཐེངས་འདིར་རྫོང་གིས་ཁྲིམས་ལུགས་གྲོང་སྡེར་སྐྱེལ་བའི་བྱེད་སྒོ་སྤེལ་བའི་བཀའ་དྲིན་ཡིན། དོན་དངོས་སུ་ཉག་ཆུ་རྫོང་དུ་བདེ་གསལ་དབང་མོ་དང་འདྲ་བའི་ཞིང་འབྲོག་མི་དམངས་ད་དུང་མང་པོ་ཡོད། ཁོ་ཚོས་སློབ་སྦྱོང་བྱས་པར་བརྒྱུད་ནས་ཁྲིམས་ལུགས་ཤེས་བྱ་ངེས་ཅན་ཞིག་ཁོང་དུ་ཆུད་ནས་ཁྲིམས་སྐྱོང་གི་འདུ་ཤེས་ཡག་ཙམ་ཕྱིན་པ་རེད།ཉེ་བའི་ལོ་ཤས་རིང་། ཉག་ཆུ་རྫོང་གིས་བཅའ་ཁྲིམས་ལྟར་རྫོང་སྐྱོང་བ་དང་ཁྲིམས་སྐྱོང་ལྡན་པའི་ཉག་ཆུ་རྫོང་འཛུགས་སྐྱོང་བྱེད་པར་དམིགས་པ་དང་། སྒྲོག་འགྲེལ་ཚོ་ཆུང་སྒྲིག་འཛུགས་བྱེད་པ་དང་། སྒྲོག་འགྲེལ་སྦྱོང་བརྡར་ཡག་པོ་བྱེད་པ། ཁྲིམས་ལུགས་སྒྲོག་འགྲེལ་དང་སློབ་གསོའི་ར་བ་འཛུགས་སྐྲུན་བྱེད་ཤུགས་ཆེ་རུ་གཏོང་བ་སོགས་ཀྱི་བྱེད་ཐབས་བརྒྱུད་ནས། ནུས་ཤུགས་གང་ཡོད་ཀྱིས་མང་ཚོགས་ཀྱི་ཁྲིམས་ལུགས་ཁྱབ་གདལ་གཏོང་བའི་ལས་ཀར་སྐུལ་འདེད་བཏང་བ་དང་། ཁྱད་པར་དུ་རྫོང་དེས་ཁྲིམས་ལུགས་གྲོང་སྡེར་སྐྱེལ་བའི་བྱེད་སྒོ་ཁྱབ་སྤེལ་གཏོང་བ་དང་། སྒྲོག་འགྲེལ་ཚོ་ཆུང་ཁག་གིས་ས་ཁུལ་བགོས་ནས་ཞིང་འབྲོག་ས་ཁུལ་དུ་ཕྱིན་ཏེ་ཞིང་འབྲོག་མི་དམངས་ལ་ཁྲིམས་ལུགས་ཤེས་བྱ་ཁྱབ་གདལ་བཏང་བ་རེད། ཁྲིམས་ལུགས་གྲོང་སྡེར་སྐྱེལ་བའི་བྱེད་སྒོ་ཆུང་ངུ་ཡིན་ནའང་མ་ལུས་ཀུན་འཛོམས་ཡིན་པ་སྟེ། 《ཁྱིམ་ཚང་གི་རྒྱུན་སྤྱོད་ཤེས་བྱའི་དྲིས་ལན》དང་《ཞིང་སྡེའི་སྡོད་ཁང་འཛུགས་སྐྲུན་གྱི་བཅའ་ཁྲིམས་ཤེས་བྱ》།《བཅའ་ཁྲིམས་ཤེས་བྱའི་རོགས་སྐྱོར་རེ་ཞུའི་ཕྱོགས་སྟོན》སོགས་བཅའ་ཁྲིམས་ཀྱི་སྟབས་བདེའི་ཀློག་དེབ་གང་དགོས་ཅི་དགོས་ཡོད་པ་རེད། ཀློག་དེབ་འདི་དག་དབང་གྲགས་རང་བཞིན་ལྡན་པའི་བཅའ་ཁྲིམས་ཀྱི་ཤེས་བྱ་ཡོད་ལ། དཔེ་མཚོན་རང་བཞིན་གྱི་བཅའ་ཁྲིམས་ཀྱི་དངོས་དཔེ་ཡང་ཡོད། གསོན་ཉམས་ལྡན་ཞིང་དངོས་སུ་མཚོན་ཐུབ་པ་དང་ཁ་གསལ་གོ་བདེ་ཡིན་པས། ཞིང་པ་ཚོས་མགྱོགས་མྱུར་ངང་འབྲེལ་ཡོད་བཅའ་ཁྲིམས་ཤེས་བྱ་རྟོགས་ཐུབ་པ་བྱས་ནས། དགའ་སྤྲོའི་ངང་བཅའ་ཁྲིམས་སློབ་སྦྱོང་བྱེད་པ་དང་བཅའ་ཁྲིམས་ལྟར་གནད་དོན་ཐག་གཅོད་བྱེད་པའི་རྣམ་པ་བཟང་པོ་ཞིག་ཆགས་པ་རེད།།