དཔལ་ཡུལ་རྫོང་གིས་འཕྲལ་སྡོམ་གསོ་སྦྱོང་བྱེད་ཤུགས་ཆེ་རུ་བཏང་ནས་གྲོང་མིའི་མེ་གསོད་འདུ་ཤེས་ཇེ་དྲག་ཏུ་བཏང་།

རྟ་མགྲིན་རྡོ་རྗེས་བསྒྱུར།        2022-01-17

དཔལ་ཡུལ་རྫོང་གིས་འཕྲལ་སྡོམ་གསོ་སྦྱོང་བྱེད་ཤུགས་ཆེ་རུ་བཏང་ནས་གྲོང་མིའི་མེ་གསོད་འདུ་ཤེས་ཇེ་དྲག་ཏུ་བཏང་།

དཔལ་ཡུལ་རྫོང་རག་ཁྱབ་ཡུལ་ཤོག་སྲིད་འཛིན་གྲོང་སྡེ་སོ་སོའི་འཕྲལ་སྡོམ་མེ་གསོད་རུ་མི་དང་གྲོང་སྡེའི་ལས་བྱེད་པ་དང་ལས་བཟོའི་མེ་ཟོན་ཉེན་མེད་འདུ་ཤེས་ཇེ་དྲག་ཏུ་གཏོང་བ་དང་། ཐོལ་བྱུང་དོན་རྐྱེན་གྱི་སྟབས་བསྟུན་ནུས་པ་ཆེ་རུ་གཏོང་བ། མེ་ཟོན་མེ་གསོད་ཡོ་བྱད་བེད་སྤྱོད་བྱེད་སྟངས་འཕྱུགས་མེད་ཁོང་དུ་ཆུད་པར་བྱ་ཆེད། ཉེ་ཆར། དཔལ་ཡུལ་རྫོང་རག་ཁྱབ་ཡུལ་ཤོག་གིས་ནགས་ཚལ་དང་རྩྭ་སའི་མེ་ཟོན་མེ་གསོད་སྒྲིག་ཆས་བཀོལ་སྤྱོད་བྱེད་པའི་གསོ་སྦྱོང་སྤེལ་བ་རེད།

གསོ་སྦྱོང་ནང་དུ་ཆེད་དུ་དཀར་མཛེས་ཁུལ་ནགས་ཚལ་དང་རྩྭ་སའི་ཆེད་ལས་མེ་གསོད་མེ་ཟོན་རུ་ཆེན་ལྔ་པའི་ལས་དོན་མི་སྣ་གདན་དྲངས་ནས། ཡུལ་ཤོག་དེའི་དོན་དངོས་དང་ཟུང་དུ་འབྲེལ་ནས་མེ་གསོད་བདེ་སྲུང་ལས་དོན་ལ་དམིགས་ནས་གསོ་སྦྱོང་ནང་ཞུགས་མཁན་ལ་ནགས་ཚལ་དང་རྩྭ་སའི་མེ་གསོད་མེ་ཟོན་བཅའ་ཁྲིམས་ཁྲིམས་སྲོལ་དང་། འཕྲལ་སྡོམ་ཉེན་གཡོལ་བྱེད་ཐབས། མེ་ཟོན་ཤེས་བྱ་སོགས་ཀྱི་ནང་དོན་གསོན་ཉམས་དོད་ལ་ཞིབ་ཚགས་ཀྱི་སྒོ་ནས་འགྲེལ་བཤད་བྱས་པ་རེད། ད་དུང་ཡུལ་དངོས་ནས་རླུང་ཤུགས་མེ་གསོད་ཡོ་བྱད་དང་མེ་ཟོན་ཆུ་འཐེན་འཕྲུལ་འཁོར་སོགས་ཉམས་གསོ་བདག་སྐྱོང་དང་བེད་སྤྱོད་བྱེད་སྟངས་ཐད་མཛུབ་ཁྲིད་སློབ་ཁྲིད་བྱས་ནས་གསོ་སྦྱོང་ནང་ཞུགས་མཁན་གྱིས་མེ་གསོད་ཡོ་བྱད་བཀོལ་སྤྱོད་ཀྱི་རྩལ་ནུས་ཁོང་དུ་ཆུད་པར་འགན་ལེན་བྱས་པ་རེད།

ཐེངས་འདིའི་གསོ་སྦྱོང་ནང་ཞུགས་མཁན་གྱི་མེ་གསོད་ཤེས་བྱ་དང་མེ་གསོད་རྩལ་ནུས་སྔར་བས་ཆེ་རུ་བཏང་བ་དང་། རག་ཁྱབ་ཡུལ་ཤོག་གི་འཕྲལ་སྡོམ་མེ་གསོད་རུ་ཁག་གི་སྔོན་འགོག་དང་རང་འགོག། རང་སྐྱོབ་བཅས་ཀྱི་ནུས་པ་ཇེ་དྲག་ཏུ་བཏང་ནས་ནགས་རྩྭའི་མེ་ཟོན་མེ་གསོད་ལས་དོན་ཡག་པོ་བསྒྲུབ་རྒྱུར་རྨང་གཞི་བརྟན་པོ་བཏིང་ཡོད་པ་རེད།

“གསོ་སྦྱོང་བྱས་པར་བརྒྱུད་མེ་ཟོན་ཡོ་བྱད་དང་ལྷག་པར་དུ་མེ་ཟོན་ཆུ་འཐེན་འཕྲུལ་འཁོར་བེད་སྤྱོད་བྱས་ཚུལ་ལ་ངས་སྔར་བས་ཤེས་རྟོགས་བྱུང་། གྲོང་སྡེར་ཕྱིར་ལོག་བྱས་རྗེས་ངས་ཉམས་མྱོང་དང་ལག་རྩལ་དེ་དག་གྲོང་སྡེའི་མི་སེར་ལ་བསླབ་ནས་ཐོལ་བྱུང་དོན་རྐྱེན་འཕྲད་སྐབས་ཚང་མའི་ཚེ་སྲོག་དང་རྒྱུ་ནོར་གྱི་ཉེན་མེད་ཡོང་བར་འགན་ལེན་བྱ་རྒྱུ་ཡིན”ཞེས་ཁ་ལུང་གྲོང་སྡེའི་ཏང་ཀྲི་པུའི་ཧྲུའུ་ཅི་གཡང་བསྟན་གྱིས་མྱོང་ཚོར་ཟབ་མོའི་སྒོ་ནས་དེ་ལྟར་བཤད་པ་རེད།།


  • ལེ་ཚན་སྔོན་མ།:རོང་བྲག་རྫོང་གིས་ནགས་ཚལ་དང་རྩྭ་སའི་མེ་འགོག་སྲ་བརྟན་བཏང་།
  • ལེ་ཚན་རྗེས་མ།:གནས་སྐབས་མེད།
  • དོ་སྣང་ཆེ་བའི་རྩོམ།