སྤྱི་ཟླ10པའི་ཚེས19ནས་ཚེས24ཉིན་གྱི་བར། དཀར་མཛེས་ཁུལ་རིག་གནས་ཁང་གི་ཐོག་རྩེག་གཉིས་པའི་ནུས་མང་འགྲེམས་ཁང་དུ་སི་ཁྲོན་ཞིང་ཆེན་བོད་ཡིག་སློབ་གྲྭའི་སློབ་མ་འཆི་མེད་ཚེ་བརྟན་གྱིས་སྒྱུ་རྩལ་གྱི་གཟི་མདངས་དར་སྤེལ་དང་ཡིག་གཟུགས་ཀྱི་ཁྱད་ཆོས་རྒྱུན་འཛིན་བྱེད་དགོས་ཞེས་པའི་བརྗོད་གཞིར་གཞིགས་ནས་རང་གིས་བྲིས་པའི་བོད་ཀྱི་ཡིག་གཟུགས་འགྲེམས་སྟོན་བྱ་རྒྱུ་ཡིན་པ་རེད།

   ཐེངས་འདིའི་ཡིག་གཟུགས་འགྲེམས་སྟོན་ལས་དབུ་ཅན་དང་དབུ་མེད། དེ་བཞིན་འདྲ་གཟུགས་ཡི་གེ་སོགས་ཡིག་གཟུགས་བྲིས་ཐང་བརྒྱ་ལྷག་འགྲེམ་སྟོན་བྱ་རྒྱུ་ཡིན་ལ། དེ་ནི་ཀྲུང་གོ་གུང་ཁྲན་ཏང་བཙུགས་ནས་ལོ་བརྒྱ་འཁོར་བར་ལེགས་སྐྱེས་སུ་འབུལ་བ་དང་། དཀར་མཛེས་ཁུལ་ཨུ་དྲིལ་བསྒྲགས་པུའུ་དང་དཀར་མཛེས་ཁུལ་རིག་གནས་རྒྱང་སྒྲོག་བརྙན་འཕྲིན་ཡུལ་སྐོར་ཅུས་ཀྱིས་གཙོ་གཉེར་བྱས་པ་དང་། སི་ཁྲོན་ཞིང་ཆེན་བོད་ཡིག་སློབ་གྲྭ་དང་དཀར་མཛེས་ཁུལ་རིག་གནས་ཁང་གིས་སྒྲུབ་འགན་ཁུར་བ་རེད།