འདི་ནི་གེ་སར་གྱི་རིག་གནས་རྒྱུན་འཛིན་བྱེད་སྟངས་ཡག་ཤོས་ཤིག་རེད།

གངས་དབང་། 2021-07-26

སྡེ་དགེ་རྫོང་ཨུ་དང་རྫོང་སྲིད་གཞུང་། རྫོང་འཐབ་ཕྱོགས་གཅིག་གྱུར་པུའུ། རྫོང་དྲིལ་བསྒྲགས་པུའུ་བཅས་ཀྱིས་ཐུགས་ཁུར་གནང་བ་དང་། རྫོགས་ཆེན་གྲོང་རྡལ་གྱི་ཏང་ཨུ་དང་སྲིད་གཞུང་། རྫོགས་ཆེན་དགོན་དོ་དམ་ཨུ་ཡོན་ལྷན་ཁང་བཅས་ཀྱིས་རྒྱབ་སྐྱོར་གནང་བར་བརྟེན་ནས། སྡེ་དགེ་རྫོགས་ཆེན་གླིང་གེ་སར་ཟློས་གར་མཐུན་ཚོགས་ཀྱིས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་བརྒྱ་འཁོར་བར་དགའ་སྟོན་རྟེན་འབྲེལ་ཞུ་བ་དང་གླིང་གེ་སར་གྱི་རིག་གནས་རྒྱུན་འཛིན་དང་དར་སྤེལ་གཏང་བའི་ཆེད་དུ། ཟླ་བ7ཚེས25ཉིན་རྫོགས་ཆེན་ལ་གླིང་གེ་སར་གྱི་ཟློས་གར་འཁྲབ་སྟོན་རྩ་འཛུགས་བྱས་ཤིང་། འཁྲབ་སྟོན་བྱེད་པའི་རིང་ལ་ཟི་ལིང་དང་ཁྲེང་ཏུའུ། དར་རྩེ་མདོ་ནས་གདན་དུ་དྲངས་པའི་གསར་འགོད་པ་དང་རྫོགས་ཆེན་གྲོང་རྡལ་གྱི་ཡུལ་མི་རྣམས་ལྟད་མོར་ཞུགས་པ་རེད།

གླིང་གི་མོ་སྨན་བདུན།

འདི་ནི་གེ་སར་གྱི་རིག་གནས་རྒྱུན་འཛིན་བྱེད་སྟངས་ཡག་ཤོས་ཤིག་རེད།

དགྲ་ལྷ་ཝེར་མ་བཅུ་གསུམ།

གླིང་གེ་སར་འཁོར་དཔའ་རྟུལ་དང་བཅས་པའི་མི་སྣའི་སྣང་བརྙན་མིག་ལམ་དུ་མངོན་ཐབས་ཟློས་གར་འཁྲབ་སྟོན་གྱི་བྱུང་བ་ལ། སྔ་འགྱུར་རྙིང་མའི་གདན་ས་ཆེན་མོ་གྲུབ་དབང་རྫོགས་ཆེན་དགོན་ནི་གླིང་རྗེ་གེ་སར་རྒྱལ་པོ་དམངས་ཁྲོད་ཀྱི་རིག་གནས་ནས་དགོན་པའི་རིག་གནས་སུ་བཅུག་པའི་དགོན་སྡེ་ཐོག་མ་དེ་ཡིན་ཞིང་དགོན་པ་འདིའི་སྐྱེས་ཆེན་རིམ་བྱོན་དུ་མས་བཞག་པའི་མཛད་རྗེས་ཀྱིས་གླིང་གེ་སར་གྱི་རིག་གནས་འདི་ཉིད་ལོ་རྒྱུས་འཕེལ་རྒྱས་ཀྱི་དཀྱོག་མཚམས་གསར་པ་ཞིག་ཏུ་བསྐྱལ་ཡོད་པ་སྟེ། རྫོགས་ཆེན་པདྨ་རིག་འཛིན་གྱི་དགོང་གཏེར་བབ་སྒྲུང་།རྫོགས་ཆེན་གྲུབ་དབང་སྐུ་འཕྲེང་དང་པོ་པདྨ་རིག་འཛིན་ལ་དག་སྣང་དགོངས་གཏེར་དུ་བྱོན་པའི 《སྟག་གཟིག་ནོར་འབྱེད》ནི་བོད་ཡུལ་དུ་ཆེས་གྲགས་པ་ཆེ་བའི་སྒྲུང་ཡིག་ཙམ་དུ་མ་ཟད་དད་རྟེན་གཡང་སྐྱབས་སུ་བཟུང་ནས་བོད་ཀྱི་ས་ཁུལ་མང་པོར་ཁྱིམ་གྱི་ཕུག་རྟེན་དུ《སྟག་གཟིག་ནོར་འབྱེད》ཀྱི་དཔེ་ཆ་རེ་མེད་ཐབས་མེད་པ་དང་ལོ་རེ་བཞིན་རིམ་གྲོར་བཀླགས་སྲོལ་ཆགས་ཡོད། མཁན་ཆེན་པདྨ་བཛྲ་ལ་དགོངས་གཏེར་དུ་བབ་པའི《གངས་དཀར་ཤེལ་རྫོང》ཞེས་མངའ་རིས་གངས་དཀར་ཤེལ་རྫོང་དེ་ཉིད་གླིང་རྗེ་གེ་སར་རྒྱལ་པོས་ཇི་ལྟར་རྫོང་སྒོ་ཕབ་ཅིང་མངའ་འོག་ཏུ་བླངས་པའི་ཚུལ་དཔའ་བོ་གཡུལ་འགྱེད་ཀྱི་སྒྲུང་གཏམ་སྙན་འཇེབས་གསོན་ཉམས་ལྡན་པས་ཡིད་དབང་འཕྲོག་པ་ཞིག་ཡོད་པ་དང་། རྡོ་རྗེ་རྐྱང་རྒོད་ཀྱི་རྔོག་དར་ལས་བཤུས་པ་བཅས་དགོངས་གཏེར་བབ་སྒྲུང་གི་ཚུལ་དུ་ཡོད།

རྫོགས་ཆེན་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་ནི་གླིང་གེ་སར་ལ་ཐུན་མོང་མ་ཡིན་པའི་དུང་བ་དང་དག་སྣང་ལྡན་པ་ཞིག་ཡིན་ལ། རིང་མོ་ཉིད་ནས་གླིང་རྗེ་གེ་སར་རྒྱལ་པོ་འཁོར་ཚོགས་དཔའ་རྟུལ་བརྒྱད་ཅུ་དང་བཅས་པའི་སྣང་བརྙན་དེ་ཇི་ལྟར་ཞིག་གམ་དགོངས་པའི་དོ་སྣང་ཆེན་པོ་ཡོད་པར། ནུབ་གཅིག་ཁོང་གི་གཟིམས་ལམ་དུ་གླིང་རྗེ་གེ་སར་རྒྱལ་པོ་སེང་ཆེན་ནོར་བུ་དགྲ་འདུལ་སྐུ་གཟི་བརྗིད་ལྟ་བས་ཆོག་མི་ཤེས་པ། འཁོར་གསུམ་དགྲ་དར་འཚུབས་སེ། འདོ་རྗེ་རྐྱང་རྒོད་འཕེལ་པོ་ལ་ཆིབས་པ། འཁོར་དུ་ཡབ་རྗེ་སེང་བློན་རྒྱལ་པོ།སྤྱི་དཔོན་རོང་ཚ་ཁྲ་རྒན་སོགས་ཕ་ཁུ་རྒན་པོའི་ཚོགས་དང་། འབུམ་པའི་རྒྱ་ཚ་ཞལ་དཀར། ཚ་ཞང་འདན་མ་བྱང་ཁྲ་སོགས་དཔའ་རྒོད་ཕུ་ནུའི་ཚོགས།གསེར་པའི་ཉི་འབུམ་དར་ཡག འོམ་བུ་ཨ་ནུ་དཔའ་སེང་སོགས་གླིང་དཀར་དཔོན་པོའི་ཚོགས།སྣང་ཆུང་གཡུ་ཡི་མེ་ཏོག བཅོ་ལྔའི་དཔའ་གསལ་ཟླ་བ་སོགས་གཅེས་ཕྲུག་ཨ་ནུའི་ཚོགས། སྡིག་གཅོད་ཤན་པ་དམར་པོ། འཇང་ཕྲུག་གཡུ་ལྷ་ཐོག་འཇུ་སོགས་ཕྱི་གླིང་དཔའ་བོའི་ཚོགས། སྐྱ་ལོའི་སེང་ལྕམ་འབྲུག་མོ། མ་ཡུམ་འགོག་བཟའ་ལྷ་མོ་སོགས་མ་སྲུ་མོ་སྨན་ཚོགས། ཕུ་བོ་དུང་ཁྱུང་དཀར་པོ། ནུ་བོ་ཀླུ་སྦྲུལ་འོད་ཆུང་སོགས་གླིང་གི་ལྷ་སྲུང་སོགས་འཁོར་ཚོགས་དཔའ་རྟུལ་བརྒྱད་ཅུ་དང་དགྲ་བླའི་ཝེར་མ་བཅུ་གསུམ་བཅས་པས་རང་རང་གི་སྐུ་མདོག་རྣམ་འགྱུར།ཆ་བྱད་རྒྱན་ཆས། ལག་ཏུ་ཐོགས་པའི་མཚོན་ཆ། འོག་ཏུ་ཞོན་པའི་འདོ་བ་སོགས་རེ་རེ་བཞིན་མ་འདྲེས་པ་ཤིན་ཏུ་གསལ་པོའི་གཟུགས་སྣང་བསྟན་པས་ཁོང་ཉིད་ཐུགས་ཤིན་ཏུ་དགྱེས་ནས་ཕྱི་ཉིན་ནས་བཟུང་བཅའ་བཟོ་མཁས་པ་དྲུང་དུ་བཀུག་སྟེ་ཁོང་གི་གཟིགས་སྣང་ཇི་ལྟ་བུ་བཅའ་བཟོ་བ་ལ་དཔའ་རྟུལ་རེ་རེ་བཞིན་གདོང་གི་བྱད་དབྱིབས། ཉམས་དང་འགྱུར་བག་འདི་འདྲ་ཡོད་ཅེས་གསུངས་ནས་ཁོང་ཉིད་ཀྱིས་ཡི་རང་གི་དབུག་དབྱུང་མ་གནང་བར་ཡང་ཡང་བཅའ་བཟོ་བྱས་ནས་དཔའ་རྟུལ།ཕ་ཁུ། མ་སྲུ། གླིང་ལྷ་ཝེར་མ་བཅས་པའི་ཞལ་འབག་དང་། ཆས་གོས། ལག་ཆ། ཡོ་བྱད་རྣམས་ལེགས་པར་གྲུབ་པར་མཛད་ནས་ཁྲོ་བོའི་རྩ་འཆམ་གྱིས་འགབས་པའི་གར་འཆམ་གྱིས་སྔ་འགྱུར་གྲུབ་དབང་རྫོགས་ཆེན་དགོན་ཨོ་རྒྱན་བསམ་གཏན་ཆོས་གླིང་གི་མདུན་ཐང་དོ་ར་ཆེན་མོར་འཁྲབ་སྟོན་ཐེངས་དང་པོ་བྱས། ཡང་དེའི་དགོང་མོའི་གཟིམས་ལམ་དུ་མི་ཕོ་སྐུ་མདོག་སེར་པོ། ཤིན་ཏུ་སྟོབས་དང་ལྡན་པ། སོག་པོའི་ཆ་ལུགས་ཅན་གྱི་དཔའ་བོ་ཞིག་ཁོང་གི་དྲུང་དུ་སླེབས་ནས་མི་དགའ་བའི་རྣམ་འགྱུར་ཅི་རིགས་བསྟན་པས། ཁོང་གིས་ཁྱོད་སུ་ཡིན་ནམ་གསུངས་པས། ཁོ་ན་རེ། སྔོན་ཆད་གླིང་རྗེ་སེང་ཆེན་རྒྱལ་པོས་མཐའ་བཞིའི་རྒྱལ་ཁམས་དབང་དུ་བསྡུས། རྫོང་ཆེན་བཅོ་བརྒྱད་ཆམ་ལ་ཕབ། དཀར་པོ་ཆོས་ཀྱི་དབུ་འཕང་བསྟོད། ནག་པོ་བདུད་ཀྱི་བསྟན་པ་བསྣུབས། ཁྲ་མོ་གླིང་གི་རྒྱལ་ཁབ་དབུ་འཕང་དགུང་ལས་མཐོ་དུས།ངའི་མིང་ལ་སོག་གི་རྟ་དམར་སྟོབས་ཆེན་ཟེར་ཞིང་། གླིང་རྗེ་སེང་ཆེན་སྐྱེས་བུ་དང་། ཁྲ་མོ་གླིང་གི་རྒྱལ་ཁབ་ལ། ངས་དཔའ་རྒོད་སྟངས་མ་ཇི་ཙམ་བླངས། ཕྱོགས་ཀྱི་དགྲ་བོ་དེ་ཙམ་བཏུལ་ཡང་དེ་རིང་ཁྱེད་གླིང་ཕུ་ནུ་བརྒྱད་ཅུ་རྗེས་སུ་དྲན་པའི་འདུ་ར་ཁྲ་མོར་ང་རང་མ་བོས་པ་ཅི་ཡིན།སེམས་ཤིན་ཏུ་སྐྱོ་ཟེར་བས། གྲུབ་དབང་མཆོག་གིས་སང་ཉིན་ནས་ཁྱེད་ཀྱི་སྐུ་འབག་བཅའ་བཟོ་བྱེད་ནས་གླིང་དཀར་ཕུ་ནུའི་སྐུ་གྲལ་དུ་འཇོག་ངེས་ཡིན་གསུངས་པས་མི་སྣང་བར་གྱུར། ཕྱི་ཉིན་ལག་རྩལ་བ་བོས་ནས་སོག་གི་རྟ་དམར་སྟོབས་ཆེན་ལུས་འདུག སྐུ་མདོག་ཕྱག་མཚན་འདི་འདྲ་གདའ་གསུང་བ་ཇི་བཞིན་བཅའ་བཞེངས་བྱས་པ་བཅས་ཀྱི་གཏམ་རྒྱུད་ཡོད། གང་ལྟར་འདི་ཡན་དུ་གེ་སར་གྱི་ཟློས་གར་མ་བྱུང་བ་མངོན་ལ་རྫོགས་ཆེན་དགོན་དུ་གླིང་གེ་སར་གྱི་གར་འཆམ་གསར་གཏོད་གནང་བ་དེ་གེ་སར་ཟློས་གར་གྱི་ཐོག་མར་གྱུར། དེ་སྐབས་ནས་བཟུང་དགོན་པ་མང་པོར་རྫོགས་ཆེན་དགོན་པའི་གེ་སར་གྱི་འབག་འཆམ་དར་བར་གྱུར་པ་དང་། ཕྱིས་སུ་གསེར་རྟ་ཟློས་གར་ཚོགས་པས་རྟ་རྒྱུགས་རྒྱལ་འཇོག་སོགས་ཟློས་གར་འཁྲབ་སྟོན་དང་། གཞན་ཡང་གེ་སར་གློག་བརྙན་ཟློས་གར་ཀྱང་འཁྲབ་དང་འཁྲབ་མུས་ཅི་རིགས་དར་རྒྱས་ཆེན་པོ་འབྱུང་བཞིན་པའོ།། རྫོགས་ཆེན་དྲ་བ་ལས་བཏུས།

གེ་སར་རྒྱལ་པོ།