ཟླ་བ7པའི་ཚེ31ཉིན་རང་ཁུལ་གྱིས་བཅིངས་འགྲོལ་དམག་བཙུགས་ནས་ལོ87འཁོར་བར་དགའ་སྟོན་རྟེན་འབྲེལ་ཞུ་བའི་གཉིས་བཀུར་བཞུགས་མོལ་ཚོགས་འདུ་འཚོགས་ནས་དམག་འཛུགས་དུས་ཆེན་མཉམ་དུ་རོལ་ཞིང་།དམག་སྲིད་དང་དམག་དམངས་བར་གྱི་ཉ་ཆུ་ལྟ་བུའི་བརྩེ་དུང་དང་།དམག་དཔུང་དང་ས་གནས་བར་མཐུན་སྒྲིལ་ལེའུ་གསར་པ་ལྷུག་བརྗོད་བྱས་པ་རེད།
ཁུལ་ཨུའི་ཧྲུའུ་ཅི།ཁུལ་གཉིས་བཀུར་ལས་ཀའི་འགོ་ཁྲིད་ཚོ་ཆུང་གི་ཚོ་དཔོན།དཀར་མཛེས་ཡན་ལག་དམག་ཁུལ་གྱི་ཏང་ཨུའི་ཧྲུའུ་ཅི་དང་པོ་ཧུའུ་ཁྲང་ཧྲེང་གྲོས་ཚོགས་ནང་བཞུགས་ནས་གསུང་བཤད་གལ་ཆེན་གནང་བ་དང་།ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་པེ་སུའུ་དབྱིན་དང་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་དབྱང་ཞུའེ་ཁང་།སི་ཁྲོན་ཞིང་ཆེན་དམག་ཁུལ་གྱི་ཆབ་སྲིད་པུའུའི་ཀྲུའུ་རེན་གཞོན་པ།དཀར་མཛེས་ཡན་ལག་དམག་ཁུལ་གྱི་ཆབ་སྲིད་ཨུ་ཡོན་ཝང་ཝེ་ཧུང་བཅས་བཞུགས་མོལ་ཚོགས་འདུའི་ནང་ཞུགས་ཡོད།ཁུལ་སྲིད་གཞུང་གི་ཁུལ་དཔོན་གཞོན་པ་ཧྲུའུ་ཏ་ཁྲུན་གྱིས་བཞུགས་མོལ་ཚོགས་འདུའི་གཙོ་འགན་བཞེས།
ཚོགས་ཐོག་ཧུའུ་ཁྲང་ཧྲེང་གིས་ཁུལ་གྱི་ཚན་ཁག་ཆེན་པོ་བཞིའི་ཚབ་ཞུས་ནས་དཀར་མཛེས་ཁུལ་དུ་བཅའ་སྡོད་བྱེད་མཁན་མི་དམངས་བཅིངས་བགྲོལ་དམག་དང་དྲག་ཆས་ཉེན་རྟོག་དམག་དཔུང་།གྲ་སྒྲིག་དམག་ཞབས་བཅས་ཀྱི་དཔོན་དམག་རྣམས་ལ་དུས་ཆེན་གྱི་བཀྲ་ཤིས་སྨོན་འདུན་ཞུ་བ་རེད།ཁུལ་ཡོངས་ཀྱི་དམག་དཔུང་ནས་ལས་འཁྱུར་ངལ་གསོ་དང་ལས་བྲལ་ངལ་གསོ་བྱས་པའི་ལས་བྱེད་པ་དང་ལས་སྒྱུར་བྱས་ཏེ་དམག་ཁོངས་ནས་ཕྱིར་ལོག་པའི་དམག་མི།གསར་བརྗེ་ལས་དོན་སྒྲུབ་དུས་རྨས་སྐྱོན་ཐེབས་པའི་དམག་མི།སྔོན་གཤེགས་དཔའ་བོའི་ཁྱིམ་མི་སོགས་ལ་ལྷག་བསམ་ཟོལ་མེད་ཀྱིས་འཚམས་འདྲི་གནང་བ་དང་།ཡུན་རིང་པོར་དམག་དང་ས་གནས་གྱི་འཛུགས་སྐྲུན་དང་གཉིས་བཀུར་ལས་ཀར་ཐུགས་ཁུར་གནང་མཁན་གྱི་བློ་མཐུན་རྣམས་ལ་སྙིང་ཐག་པ་ནས་བཀའ་དྲིན་ཆེ་ཞུས་པ་རེད།
ཧུའུ་ཁྲང་ཧྲེང་གིས་བསྟན་དོན།འདས་ཟིན་པའི་ལོ་གཅིག་ནང་དཀར་མཛེས་ཁུལ་དུ་བཅའ་སྡོད་དམག་དཔུང་གིས་བརྟན་བརླིང་འཚོ་སྲུང་དང་གནོད་སྐྱོབ་གནོད་སེལ་སོགས་ཀྱི་ལས་ཀའི་མདུན་གྲས་སུ་བསྐྱོད་དེ་ལས་ཀ་བསྒྲུབས་ནས་དཀར་མཛེས་ཁུལ་གྱི་བརྟན་བརླིང་དང་འཕེལ་རྒྱས་ལ་ནུས་པ་གལ་ཆེན་ཐོན་ཡོད།སྤྱི་ཚོགས་འཆམ་མཐུན་བརྟན་བརླིང་འཚོ་སྲུང་བྱས་པར་སྲ་བརྟན་གྱི་རྐ་རྡོ་ཡིན་རྒྱུར་ངོ་གནོང་མི་དགོས་པ་རེད།
ཧུའུ་ཁྲང་ཧྲེང་གིས་ཁུལ་ཨུ་དང་ཁུལ་སྲིད་གཞུང་གིས་སྔ་མ་ནང་བཞིན་དམག་དཔུང་གི་དེང་རབས་ཅན་འཛུགས་སྐྲུན་ལ་རྒྱབ་སྐྱོབ་བྱས་ཏེ་ཁྱོན་ཡོངས་ནས་དམག་བཀུར་ཁྱིམ་སྐྱོང་གི་སྲིད་ཇུས་ཁག་དོན་འཁྱོལ་བྱེད་པ་དང་ཁུལ་དུ་བཅའ་སྡོད་དཔོན་དམག་ལ་ཁྱིམ་དོན་ཐད་སེམས་ཁྲལ་མེད་པ་བཟོ་དགོས།རིམ་པ་ཁག་གི་ཏང་ཨུ་དང་སྲིད་གཞུང་གིས་རྒྱལ་སྲུང་དེང་རབས་ཅན་གྱི་འཛུགས་སྐྲུན་ལ་སྐུལ་འདེད་གཏོང་རྒྱུ་དེ་ཆབ་སྲིད་ལས་འགན་ཞིག་ཏུ་བརྩིས་ནས་བཅའ་སྡོད་དམག་དཔུང་འཛུགས་སྐྲུན་ལ་ཆ་རྐྱེན་བཟང་པོ་འདོན་སྤྲོད་དང་འགན་སྲུང་བྱ་དགོས་ཞེས་ཐུགས་རེ་གནང་བ་རེད།
ཚོགས་ཐོག་ཁུལ་གྱི་ཚན་ཁག་ཆེན་པོ་བཞིའི་འགོ་ཁྲིད་ཀྱིས་དམག་དཔུང་ཁག་ལ་འཚམས་འདྲི་ཞུ་དངུལ་ཕུལ་བ་རེད།