བྲག་འགོ་རྫོང་ནགས་ལས་ཅུས་ཀྱི་འུ་རི་ཤིང་ཕྲུག་ལྡུམ་རའི་གནས་གཞི་རུ་དུས་རྒྱུན་པར་བྲེལ་བྲེལ་འཚུབ་འཚུབ་ཀྱིས་སྐབས་རེར་སྡོང་ཕྲུག་ལ་ཆུ་འདྲེན་པ་དང་མཚམས་རེར་སྡོང་ཕྲུག་ལ་ལུད་རྒྱག་པའི་རྣམ་པ་ཞིག་མི་ཚང་མའི་མིག་ལམ་དུ་མཐོང་རྒྱུ་ཡོད་པ་རེད།
    ཁོ་མོ་ནི་སྒྱུག་མོའི་སེམས་སུ་སྤྱོད་ཚུལ་བཟང་ལ་གུས་བཀུར་ལྡན་པའི་མནའ་མ་ཞིག
    དུས་རྒྱུན་གྱི་འཚོ་བའི་ཁྲོད་དུ་ཝང་གོ་ལེན་ནི་རང་གི་ཕ་མར་གུས་བཀུར་དང་རོགས་རམ་བྱེད་མཁན་ཞིག་ཡིན་པས་མ་ཚད།སྒྱུག་མོ་ལའང་ཕ་མ་ལྟར་གུས་བཀུར་ཞབས་ཞུ་བྱས་པའི་བུད་མེད་མཆོག་ཏུ་གྱུར་པ་ཞིག་ཡིན་པ་རེད། མ་རྩར་ཁ་སང་དེ་རིང་གི་སྤྱི་ཚོགས་འཚོ་བའི་ཁྲོད་དུ་སྒྱུག་མོ་དང་མནའ་མའི་བར་མི་མཐུན་འགལ་ཟླ་བྱུང་བ་དང་ཁ་རྩོད་ཚིག་རྩོད་བྱུང་བའི་གནས་ཚུལ་སྐྱུར་བྲོ་བ་མང་པོ་ཞིག་མིག་མཐོང་ལག་ཟིན་ཡིན་མོད། འོན་ཀྱང་ཁོང་མོ་ནི་འདི་ལྟ་བུ་ཞིག་མིན་པར་རང་གི་ཁྱོ་ག་དང་གཉེན་སྟོན་བྱས་ནས་མི་ལོ་བཅུ་བདུན་གྱི་རིང་ལ་སྒྱུག་མོ་དང་ཁ་རྩོད་ཚིག་རྩོད་གཏན་ནས་བྱས་མྱོང་མེད་ལ། ཐ་ན་ངོ་ནག་པ་དང་མ་དགའི་རྣམ་འགྱུར་ཞིག་ཀྱང་ངོམ་མྱོང་བ་མ་རེད། 2012ལོར་སྒྱུག་མོའི་མིག་ནང་དུ་ལིང་ཏོག་བྱུང་བ་དང་ཁྲག་ཤེད་དམའ་བ་བཅས་ཀྱི་ནད་ཕོག་ནས་སྔ་ཕྱིར་སྨན་ཁང་དུ་ཐེངས་འགའ་སྡོད་དགོས་བྱུང་བ་རེད། སྐབས་དེར་ཝང་གོ་ལེན་གྱིས་སྒྱུག་མོར་གོས་འཁྲུད་པ་དང་རྐང་པ་འཁྲུད་པས་མ་ཚད།དུས་ཐོག་ཏུ་གང་འདོད་ཀྱི་ཟ་མ་དང་སིལ་ཏོག་སོགས་ཉོས་ནས་སྨན་ཁང་དུ་འཁུར་འོང་བ་རེད། སྒྱུག་མོའི་ནད་སྨན་བཅོས་བྱེད་པའི་སྐབས་སུ་ཁོ་ཁྱོ་ཤུག་གཉིས་ཀས་ལོ་ཟླ་རིང་མོར་བསགས་པའི་དངུལ་ཚང་མ་སྤྱད་ཟིན་པ་ཡིན་ན་ཡང་ཁོང་མོས་བློ་མ་ཕམ་པ། སྤྲོ་མ་ལངས་བར་སྒྱུག་མོར་བློ་བདེ་སེམས་འགུལ་ཐུབ་པའི་ནད་གཡོག་ཡག་པོ་བྱས་ནས་གཉེན་ཉེ་ཁྱིམ་མཚེས་ཀུན་གྱིས་བསྟོད་ར་བྱེད་ཡུལ་དུ་གྱུར་་པ་རེད།
    ཁོ་མོ་ནི་བུ་ཕྲུག་གི་སེམས་སུ་ལས་ལ་བརྩོན་ཞིང་དཔའ་ངར་ལྡན་པའི་མ་ལོ་ཞིག
    2012ལོར་ཁོ་མོས་ཁྱོ་གའི་ཚ་བོ་ཆུང་ཆུང་གཉིས་རྫོང་གི་གྲོང་ཁུལ་དུ་ཁྲིད་དེ་སློབ་གྲྭར་བཏང་བས། མུ་གེའི་སྟེང་ལ་ཟླ་ལྷག་ཞེས་པ་ལྟར། མ་རྩ་འདི་འདྲའི་དཀའ་ཁག་ཆེ་བའི་གནས་ཚུལ་ཐོག་ཏུ་ཡང་དཀའ་ཁག་ཆེ་བའི་གནས་ཚུལ་ཞིག་སྣོན་པ་ཡིན་ཏེ་ཁོང་མོས་ཉིན་མོར་ལས་དོན་ལ་ཞུགས་པ་དང་མཚན་མོར་སྒྱུག་མོ་ལ་ལྟ་སྐྱོང་དང་བུ་གསུམ་ལ་ཞབས་ཞུ་བྱས་ཏེ་ངལ་བས་ཤིན་ཏུ་དུབ་ནའང་ཡིད་ཆད་དང་དཀའ་སྣང་གཏན་ནས་མེད་པར་དགའ་སྤྲོ་སྤྲོ་དང་སེམས་བདེ་བདེའི་ངང་ནས་ལས་ལ་བརྩོན་ཏེ་ཁྱིམ་ཚང་གང་བོར་དྲོ་བདེ་བདེའི་སྐྱིད་སྣང་དང་བདེ་སྐྱིད་ཞིག་སྟེར་བ་རེད། 2013ལོར་ཝང་གོ་ལེན་གྱི་བུས་ཕུལ་བྱུང་གི་སྦྱངས་འབྲས་བླངས་ནས་དར་མདོ་སློབ་འབྲིང་དུ་རྒྱུགས་འཕྲོད་པ་རེད།སྐབས་དེར་མ་བུ་གཉིས་བྲལ་མི་འདོད་པར་མིག་ཟུང་མཆི་མས་ཁེངས་ཀྱང་འཛོམས་མཐར་བྲལ་བ་ནི་འཇིག་རྟེན་གྱི་ཆོས་ཉིད་ཡིན་ཏེ་མཐར་དགའ་སྐྱོན་འདྲེན་མའི་མཆི་མ་ཞིག་དང་རྫོགས་རྒྱུ་མེད་པའི་བསླབ་བྱ་ཞིག་གི་ཁྲོད་དུ་རང་ཉིད་བུ་དར་མདོའི་ཕྱོགས་སུ་སྐྱེལ་བའི་གོམ་ཁ་བསྒྱུར། གནའ་མིའི་གཏམ་དཔེ་ལ་རྒྱུ་བཟང་པོར་འབྲས་བུ་བཟང་པོ་སྨིན་པ་ཞེས་པ་ལྟར། བུ་ཉིད་སློབ་འབྲིང་དུ་སླེབས་རྗེས་ཨ་མའི་ཁ་ཏ་བསླབ་བྱ་དེ་རྣ་རྒྱབ་ཀྱི་རླུང་བུར་མ་བཏང་བར་རིག་གནས་ལ་སྦྱངས་བརྩོན་དང་དགེ་རྒན་ལ་བརྩི་བཀུར།སློབ་གྲོགས་བར་མཐུན་སྒྲིལ་བྱས་པས་མ་ཚད་ཉིན་ལྟར་ཁོམ་པ་ཡོད་དུས་ཁྱིམ་དུ་ཁ་པར་བཏང་ནས་ཨ་མའི་བདེ་སྡུག་དང་ཁྱིམ་གྱི་བདེ་སྡུག་སོགས་འདྲི་བ་རེད།
    ཁོ་མོ་ནི་ཁྱིམ་མཚེས་ཀྱི་སེམས་སུ་རྒྱུན་འཇམ་གཤིས་བཟང་གི་བུད་མེད་ཅིག
    དུས་རྒྱུན་གྱི་འཚོ་བའི་ཁྲོད་དུ་ཝང་གོ་ལེན་གྱིས་བསམ་ཚུལ་ནི་ཐག་རིང་གི་གཉེན་ཉེ་ལས་ཐག་ཉེའི་ཁྱིམ་མཚེས་དགའ་ཞེས་པ་ནང་བཞིན། དུས་རྒྱུན་དུ་ཉིན་གཅིག་ལྟར་བྱས་ནས་ཁྱིམ་མཚེས་དུད་ཚང་ཀུན་དང་ཧ་ཅང་མཐུན་སྒྲིལ་བྱས་པ་ལས་འགའ་ཟླའི་གཏོང་རྒྱུའི་བསམ་བློ་རྩ་བ་ནས་ཡོད་བ་མ་རེད། དུས་རྒྱུན་ཁོ་མོས་བཤད་རྒྱུར། མི་གང་ཞིག་ཡིན་རུང་དུས་རྒྱུན་འཚོ་བའི་ཁྲོད་དུ་དཀའ་ངལ་དང་བར་ཆད་ཡོང་བ་ནི་གཏན་འཁེལ་ཡིན་ཏེ། གལ་སྲིད་ཁྱིམ་མཚེས་དུད་ཚང་ལ་དཀའ་ངལ་དང་བར་ཆད་འདྲ་བྱུང་དུས་ང་ཚོས་མགྱོ གས་མྱུར་དུ་རང་ཉིད་ཀྱི་དོན་དག་ལྟ་བུར་བརྩིས་ནས་ནུས་ཤུགས་ཡོད་དགུས་རོགས་རམ་བྱེད་དགོས། ཁ་ཐོག་ཚིག་གནས་ཞེས་པར་ལྟར། ཁ་ནས་སྟོང་བཤད་དང་གང་མོས་ཀྱལ་གཏམ་བྱས་པ་ཞིག་མ་ཡིན་པར་དུས་རྒྱུན་ཁྱིམ་མཚེས་དུད་ཚང་སྐྱིད་སྡུག་གི་གནས་ཚུལ་གང་ཞིག་བྱུང་དུས་ཁོ་མོས་ཐོས་མ་ཐག་ནས་དབུལ་ཕྱུག་དབྱེ་བ་མེད་པར་རོགས་རམ་བྱེད་དུ་འགྲོ་ངེས་རེད། འདི་ལྟར་དུས་ཡུན་རིང་པོའི་འབྲེལ་བ་དང་འགྲོ་འོང་ལས་ཁྱིམ་མཚེས་དུད་ཚང་ཀུན་གྱིས་ཁོ་མོར་བློ་རྒྱ་ཆེ་ལ་གཤིས་ཀ་བཟང་བ་དང་། ངག་རྒྱུན་འཇམ་ལ་གཏོང་ཕོད་ཆེ་བ་ཞེས་བསྟོད་ར་དང་བསྔགས་བརྗོད་ཚད་མེད་བྱེད་བཞིན་ཡོད་པ་རེད།