སྤྱི་ཟླ10པའི་ཚེས10ནས་ཚེས11ཉིན་བར། ཞིང་ཆེན་ཏང་ཨུའི་རྒྱུན་ཨུ། ཁྲེང་ཏུའུ་གྲོང་ཁྱེར་ཏང་ཨུའི་ཧྲུའུ་ཅི་ཚའོ་ལི་ཅུན་རང་ཁུལ་གྱི་དཀར་མཛེས་རྫོང་དུ་ཁ་གཏད་རོགས་སྐྱོར་ལས་དོན་ལ་བརྟག་ཞིབ་གནང་བར་ཕེབས་ཤིང། ས་གནས་དེ་གའི་འགན་འཁུར་བློ་མཐུན་དང་མཉམ་དུ་མཐུན་སྦྱོར་འཕེལ་རྒྱས་དང་ཁ་གཏད་རོགས་སྐྱོར།སྤེལ་རེས་མཉམ་ལས་བཅས་ནས་གྲོས་བསྡུར་གནང་བ་རེད།

ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཧྥུང་ཧྥ་ཀུའེ་འབྲེལ་ཡོད་བྱེད་སྒོའི་ནང་ཞུགས་པ་རེད།

ཁྲེང་ཏུའུ་གྲོང་ཁྱེར་དང་དཀར་མཛེས་ཁུལ་གྱི་ཁ་གཏད་རོགས་སྐྱོར་ལས་དོན་གྱི་བཞུགས་མོལ་ཚོགས་འདུ་དང་། དཀར་མཛེས་རྫོང་གི་ཡུལ་སྡེ་དར་རྒྱས་གཏོང་བའི་ལས་ཀའི་སྐུལ་འདེད་ཚོགས་འདུའི་ཐོག། ཚའོ་ལི་ཅུན་གྱིས་ཁྲེང་ཏུའུ་གྲོང་ཁྱེར་ཏང་ཨུ་དང་གྲོང་ཁྱེར་སྲིད་གཞུང་གི་ཚབ་ཞུས་ཏེ་དཀར་མཛེས་ཁུལ་གྱི་བྱ་གཞག་ཁག་གི་འཕེལ་རྒྱས་གྲུབ་འབྲས་ལ་རྟེན་འབྲེལ་ཞུས་པ་དང་དཀར་མཛེས་ཁུལ་གྱིས་དུས་ཡུན་རིང་པོའི་ནང་ཁྲེང་ཏུའུ་གྲོང་ཁྱེར་གྱི་འཕེལ་རྒྱས་ལ་རྒྱབ་སྐྱོར་ཤུགས་ཆེན་བྱས་པར་ཐུགས་རྗེ་ཆེ་ཞུས་པ་རེད། ཚའོ་ལི་ཅུན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ས་ཁོངས་མཐུན་སྦྱོར་གོང་འཕེལ་དང་མཉམ་དུ་ཕྱུག་འགྱུར་ཡོང་བར་བསྐུལ་བར་མཐོང་ཆེན་གནང་ཞིང་། བོད་སྐྱོང་དང་བོད་བརྟན། བོད་དར་བཅས་ལ་དམིགས་ནས་བསམ་བློ་གསར་པ་དང་།འཐབ་ཇུས་གསར་པ། བླང་བྱ་གསར་པ་བཅས་རབ་དང་རིམ་པ་བཏོན་གནང་བ་དང་། ལྷག་པར་དུ་ཤར་རྒྱུད་དང་ནུབ་རྒྱུད་ཀྱི་རོགས་ལས་དང་ཁ་གཏད་རོགས་སྐྱོར་ལས་དོན་གཏིང་ཟབ་སྤེལ་བར་དམིགས་ནས་མཛུབ་སྟོན་གལ་ཆེན་གནང་བས། ང་ཚོས་ཁ་གཏད་རོགས་སྐྱོར་གྱི་ལས་དོན་ཡག་པོ་བསྒྲུབ་རྒྱུར་རྩ་བའི་བརྩི་སྲུང་མཁོ་འདོན་གནང་ཡོད།ཞིང་ཆེན་ཏང་ཨུས“ཁུལ་ལྔ་མཉམ་དར”ལ་སྐུལ་འདེད་གཏོང་བར་དམིགས་ནས། སྔོན་རྗེས་སུ་ཁ་གཏད་རོགས་སྐྱོར་དང་མཐིལ་སྐྱོར་རང་བཞིན་གྱི་རོགས་སྐྱོར་སོགས་རབ་དང་རིམ་པ་བཀོད་སྒྲིག་བྱས་པ་རེད། ཁྲེང་ཏུའུ་གྲོང་ཁྱེར་གྱིས་བོད་འབྲེལ་ཁུལ་དང་རྫོང་གི་འཕེལ་རྒྱས་ལ་ཁ་གཏད་རོགས་སྐྱོར་བྱ་རྒྱུ་དེ་ཐོག་མཐའ་བར་གསུམ་དུ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས། ཀྲུང་དབྱང་དང་ཞིང་ཆེན་གྱི་བསྟན་དོན་དང་དཀར་མཛེས་ཁུལ་གྱི་དགོས་མཁོ། ཁྲེང་ཏུའུ་ཡི་ནུས་པ་བཅས་ལ་དམ་པོར་དམིགས་ཏེ། ཆོད་སེམས་སྔར་བས་ཆེ་བ་དང་བྱ་ཐབས་སྔར་བས་ཏན་ཏིག། ཚད་གཞི་སྔར་བས་མཐོ་བ་བཅས་ཀྱི་ཐོག་ནས་ཁ་གཏད་རོགས་སྐྱོར་གྱི་ལས་དོན་སྤུས་ཚད་མཐོན་པོ་དང་ཡག་པོ་བསྒྲུབས་ཏེ། ས་ཁུལ་གཉིས་ཀྱི་མཐུན་སྦྱོར་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་གཏང་རྒྱུ་ཡིན་ཞེས་གསུངས།

ཁུལ་ཨུའི་ཧྲུའུ་ཅི་ཧྲེན་དབྱང་གི་མངགས་བཅོལ་ལྟར་ཧྥུང་ཧྥ་ཀུའེ་ཡིས་ཁུལ་ཨུ་དང་ཁུལ་སྲིད་གཞུང་གི་ཚབ་ཞུས་ནས་ཁྲེང་ཏུའུ་གྲོང་ཁྱེར་གྱིས་དུས་ཡུན་རིང་པོར་དཀར་མཛེས་ཁུལ་ལ་རྒྱབ་སྐྱོར་དང་རོགས་རམ་བྱས་པར་ཐུགས་རྗེ་ཆེ་ཞུས་པ་རེད། ཁོང་གིས2012ལོ་ནས་བཟུང་། ཁྲེང་ཏུའུ་གྲོང་ཁྱེར་གྱིས་ཐོག་མཐའ་བར་གསུམ་དུ་དཀར་མཛེས་ཁུལ་ལ་བརྩེ་སེམས་དང་གཅེས་སྐྱོང་བྱས་པ་དང་།ཁ་གཏད་རོགས་སྐྱོར་དང་མཐིལ་སྐྱོར་རང་བཞིན་གྱི་རོགས་སྐྱོར་བྱས་པ་བརྒྱུད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མི་རིགས་ས་ཁུལ་གྱི་མི་དམངས་མང་ཚོགས་ལ་ཐུགས་ཁུར་ཟབ་མོ་གནང་བ་དང་། སྤྱི་ཚོགས་རིང་ལུགས་ཀྱི་ཁྱིམ་ཚང་ཆེན་པོའི་དྲོ་སྐྱིད་དང་སྤྱི་ཚོགས་རིང་ལུགས་ཀྱི་ལམ་ལུགས་ཡག་པོ། ཁྲེང་ཏུའུ་གྲོང་ཁྱེར་དང་རོགས་སྐྱོར་སྡེ་ཚན་ཁག་གི་བརྩེ་སེམས་དང་ཐུགས་ཁུར་བཅས་ང་ཚོར་མྱོང་ཚོར་ཟབ་མོ་ཐེབས་བྱུང་ལ། ཁྲེང་ཏུའུ་གྲོང་ཁྱེར་ཏང་ཨུ་དང་གྲོང་ཁྱེར་སྲིད་གཞུང་། རོགས་སྐྱོར་སྡེ་ཚན་ཁག་གིས་སྔར་བཞིན་དཀར་མཛེས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་དོ་ཁུར་དང་རྒྱབ་སྐྱོར་བྱས་ཏེ་སྲིད་ཇུས་དང་ཐོན་ལས། རྣམ་གྲངས། ཤེས་ལྡན་མི་སྣ་སོགས་ཀྱི་ཐད་ནས་མཛུབ་སྟོན་དང་རོགས་རམ་བྱ་རྒྱུའི་རེ་བ་ཡོད་ཅེས་གསུངས་པ་རེད།།