2012ལོའི་མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱའི་རིག་གཞུང་གླེང་སྟེགས་ཟླ9པའི་ཚེས17དང་ཚེས18ཉིན་བར་ཟི་ལིང་དུ་བསྡུས། རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་དང་རྒྱལ་ཁབ་མི་རིགས་སྐད་ཡིག་ལོ་ཙཱ་ཁང་།ཀྲུང་གོའི་བོད་རིག་པ་ཞིབ་འཇུག་ལྟེ་གནས་བཅས་ཀྱི་འབྲེལ་ཡོད་མགོ་ཁྲིད་པ་གྲོས་ཚོགས་སུ་ཞུགས་ཤིང་།ཞིང་ཆེན་ལྟེ་གནས་ཀྱི་མི་རིགས་སློབ་གྲྭ་ཆེན་མོ་སོ་སོ་ནས་ཡོང་བའི་ཆེད་མཁས་པ་དང་མི་རིགས་སྐད་ཡིག་ལོ་ཙཱའི་བྱ་བ་སྒྲུབ་མཁན།ཁུལ་དྲུག་ནས་ཡོང་བའི་མི་རིགས་སྐད་ཡིག་ལོ་ཙཱ་བྱེད་མཁན་མང་པོ་གནའ་མཁར་ཟི་ལིང་དུ་འཛོམས་ནས་བོད་ཀྱི་ལོ་ཙཱའི་ཕྱོགས་ཀྱི་གནས་བབ་དང་མ་འོངས་འཕེལ་རྒྱས་ཐད་བསམ་བློ་བརྗེ་རེས་བྱས།

གྲོས་ཚོགས་སྟེང་ཞིང་ཆེན་སྲིད་གཞུང་གཞུང་ལས་ཁང་གི་དྲུང་ཡིག་ཆེན་མོ་གཞོན་པ་ཝང་ཏེན་པང་དང་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་ཕུར་བ།མཚོ་སྔོན་ཉེན་རེའི་ཚགས་པར་ཁང་གི་ཧྲེ་ཀྲང་གཞོན་པ་དགེ་གཉེན་བཅས་ཀྱིས་གཏམ་བཤད་གནང་བ་དང་།མཚོ་སྔོན་བོད་རིགས་ཞིབ་འཇུག་ཚོགས་པའི་ཚོགས་གཙོ་གཞོན་པ་རིན་ཆེན་ཟླ་བས་གྲོས་ཚོགས་ལ་ཤིས་ཚིག་ཕུལ།

ལོ་རེར་ཐེངས་རེ་ཚོགས་བཞིན་པའི་གླེང་སྟེགས་འདི་ནི་ལོ་ཙཱའི་བྱ་བ་བསྒྲུབ་མཁན་རྣམས་ལ་མཚོན་ན་གོ་སྐབས་ལེགས་པོ་ཞིག་ཡིན་ཏེ།ད་ལྟའི་བར་དུ་ཐེངས་བདུན་ལ་ཚོགས་པའི་རིང་རང་ཞིང་གི་མི་རིགས་སྐད་ཡིག་ལོ་ཙཱའི་བྱ་གཞག་གོང་ནས་གོང་དུ་འཕེལ་བར་ཡར་སྐུལ་དང་དགེ་མཚན་ལྡན་པའི་ནུས་པ་གལ་ཆེན་ཐོན་ཡོད།ཐེངས་འདིར་མཚོ་སྔོན་བོད་རིག་ཞིབ་འཇུག་ཚོགས་པས་སྒྲུབ་འགན་འཁུར་ཅིང་།གླེང་སྟེགས་ལ་སྔར་དང་མི་མཐུན་པའི་ཁྱད་ཆོས་ཤིག་ཡོད་པ་ནི། ཨ་མེ་རི་ཁའི་སྔོན་ཐོན་གྱི་བགྲོ་གླེང་བྱེད་སྟངས“ཀུན་རུང་གུ་ཡངས”ཞེས་པ་ནང་འདྲེན་བྱས་ཏེ།ཚོགས་ཞུགས་མི་སྣ་ཡོངས་ལ་རང་ཉིད་ཀྱི་ལྟ་བ་གང་འདོད་དུ་བརྗོད་པའི་གར་སྟེགས་ཤིག་བསྐྲུན་ནས་ཚོགས་འདུའི་རྣམ་པ་གུ་ཡངས་པོར་བྱས་ལ། བགྲོ་གླེང་གི་ཚུལ་གྱིས་མི་རང་ཉིད་ཀྱི་མཐོང་ཐོས་མྱོང་གསུམ་དང་ལྟ་བ་གསར་བ།བསམ་ཚུལ་གསར་བ།གཞན་ད་རུང་རེ་བ་དང་གྲོས་གཞི་ཡོད་ཚད་གང་འདོད་དུ་ལྷུག་པོར་བརྗོད་དུ་བཅུག་པས།ཚོགས་ཞུགས་པ་རྣམས་ཀྱི་སྤྲོ་བ་ཆེས་ཆེར་བསླངས་ཤིང་།ལོ་ཙཱའི་མི་སྣ་སྐྱེད་སྲིང་བྱེད་པ་དང་ཚིག་མཛོད་གསར་བ་ཞིག་བསྒྲིག་དགོས་ཚུལ།བརྡ་ཁྱབ་གཅིག་གྱུར་བྱེད་ཚུལ།རྒྱ་བོད་སྒྲ་སྒྱུར་གྱི་ཚད་གཞི། ཚན་རྩལ་ཐད་ཀྱི་ཉེར་སྤྱོད་ཐ་སྙད་ཇི་ལྟར་བསྒྱུར་ཚུལ་དང་དེ་ཁྱབ་གདལ་དུ་གཏོང་ཚུལ།རང་མི་རིགས་ཀྱི་སྲོལ་རྒྱུན་མིང་ཚིག་མང་དུ་བཀོལ་སྤྱོད་བྱེད་དགོས་ཚུལ་སོགས་ཕྱོགས་ཀྱི་གནད་དོན་མང་པོ་གླེང་བས།སྔོན་ཆད་ནང་བཞིན་ཆེད་མཁས་པ་རེ་འགའ་དང་ཚོགས་ཞུགས་མི་སྣ་རེ་གཉིས་ཀྱིས་གཏམ་བཤད་གནང་བ་དང་ཚོགས་ཞུགས་པ་མང་པོས་མཉན་ནས་འདུག་པའི་རྣམ་པ་ལས་བརྒལ་ཞིང་། མི་རིགས་སྐད་ཡིག་གི་ལོ་ཙཱའི་བྱ་བ་གོང་དུ་སྤེལ་བར་གུ་ཡངས་བའི་བགྲོ་གླེང་གི་ཁོར་ཡུག་བཟང་པོ་ཞིག་བསྐྲུན། །