«སྨན་དཔྱད་ཟླ་བའི་རྒྱལ་པོའི་གཞུང་དོན་ལ་དཔྱད་པ»དང«བོད་ལུགས་གསོ་རིག་གི་གཉེན་པོ་དཔྱད་ཀྱི་ཆ་བྱད་ཞིབ་འཇུག »
པར་དུ་བསྐྲུན་པ།
 

བོད་ཀྱི་སྲོལ་རྒྱུན་རིག་གནས་འཛིན་སྐྱོང་སྤེལ་གསུམ་དང་དེང་རབས་རིག་གནས་གསར་འདོན་དར་སྤེལ་གཏོང་ཕྱིར། མཚོ་སྔོན་མི་རིགས་དཔེ་སྐྲུན་ཁང་གིས་ཉེ་ཆར་སློབ་ཐོན་བྱུང་བའི་འབུམ་རམས་པ་སྐོར་ཞིག་གི་མཐར་ཕྱིན་དཔྱད་རྩོམ་བདམས་ཏེ«བོད་ཀྱི་འབུམ་རམས་པའི་དཔྱད་རྩོམ་དཔེ་ཚོགས»ཞེས་ནས་དཔེ་སྐྲུན་བྱེད་བཞིན་ཡོད།
　　ད་རེས་བོད་ཀྱི་གསོ་རིག་པའི་འབུམ་རམས་པ་ཐོག་མ་སྟེ་རིན་ཆེན་རྒྱལ་གྱི«སྨན་དཔྱད་ཟླ་བའི་རྒྱལ་པོའི་གཞུང་དོན་ལ་དཔྱད་པ»དང་གཡང་མེར་གྱི«བོད་ལུགས་གསོ་རིག་གི་གཉེན་པོ་དཔྱད་ཀྱི་ཆ་བྱད་ཞིབ་འཇུག »པར་དུ་བསྐྲུན་པ་ལགས།
　　«སྨན་དཔྱད་ཟླ་བའི་རྒྱལ་པོའི་གཞུང་དོན་ལ་དཔྱད་པ»ཞེས་པ་ནི་གསོ་རིག་གཞུང་ལུགས་གྲགས་ཅན«སྨན་དཔྱད་ཟླ་བའི་རྒྱལ་པོ»ཞིབ་འཇུག་བྱས་པའི་གྲུབ་འབྲས་ཡིན་ལ། དེབ་ཧྲིལ་བོར་ལེའུ་གསུམ་དུ་བགོས་ཡོད་དེ། ལེའུ་དང་པོར་སྨན་དཔྱད་ཟླ་བའི་རྒྱལ་པོ་ཞེས་པའི་གཞུང་གི་བྱུང་འཕེལ་བརྗོད་པ་དང་། ལེའུ་གཉིས་པར་སྨན་དཔྱད་ཟླ་བའི་རྒྱལ་པོའི་རིག་གཞུང་གི་མ་ལག་བརྗོད་པ། ལེའུ་གསུམ་པར་སྨན་དཔྱད་ཟླ་བའི་རྒྱལ་པོ་དང་ཕྱི་ཕྱོགས་གསོ་རིག་གི་ལྟ་བ་འགའི་དཔྱད་གླེང་བཅས་སོ།།
　　«བོད་ལུགས་གསོ་རིག་གི་གཉེན་པོ་དཔྱད་ཀྱི་ཆ་བྱད་ཞིབ་འཇུག»ཅེས་པའི་དཔྱད་རྩོམ་འདི་གསོ་རིག་གཞུང་ཆེན་དཔལ་ལྡན་རྒྱུད་བཞི་གཞིར་བཟུང་ནས། བོད་སྔ་རབས་པའི་གསོ་དཔྱད་གཞུང་ལུགས་དག་དང་མཁས་དབང་མང་པོའི་འགྲེལ་བ། ཉམས་ཡིག བརྒྱུད་པའི་ལག་ཆའམ་ཆ་བྱད་སོགས་ཀྱང་དཔྱད་གཞིར་བཟུང་བ་དང་དེང་དུས་གཞན་རིགས་ཀྱི་གསོ་རིག་གཞུང་ལུགས་གྲགས་ཅན་ལའང་ཟུར་ལྟ་དང་དཔྱད་གཞི་བྱས་ཡོད། ལེའུ་བཅུའི་བདག་ཉིད་ཅན་གྱི་དཔྱད་རྩོམ་འདིས་བོད་ཀྱི་དཔྱད་ཀྱི་ཆ་བྱད་ཀྱི་རིག་གཞུང་རྨང་གཞི་སྲ་བརྟན་འཛུགས་པ་དང་དེ་རིག་ཚན་ཅན་དུ་གཏོང་བར་རྨང་གཞིའི་མཐུན་རྐྱེན་བསྐྲུན་ཡོད།
　　མཚོ་སྔོན་མི་རིགས་དཔེ་སྐྲུན་ཁང་གིས«བོད་ཀྱི་འབུམ་རམས་པའི་དཔྱད་རྩོམ་དཔེ་ཚོགས»མུ་མཐུད་དུ་དཔེ་སྐྲུན་བྱ་འཆར་ཡོད་ཕྱིར། འབྲེལ་ཡོད་སྒེར་གཞུང་ཀུན་གྱིས་རྒྱབ་སྐྱོར་དང་ཐུགས་ཁུར་བྱེད་པར་འཚལ།