ཉེ་ཆར།2014ལོའི་རྒྱལ་ཁབ་མི་རིགས་དོན་གཅོད་ཨུ་ཡོན་ལྷན་ཁང་གི་འཇོན་མི་སྐྱེད་སྲིང་ལས་གཞིར་ཚུད་པའི་མིང་ཐོ་ཁྱབ་བསྒྲགས་བྱས་ཤིང་།བོད་ཀྱི་ཁྲིམས་ལུགས་རིག་པའི་འབུམ་རམས་པ་ལུང་པ་དོན་འགྲུབ་ལགས་རྒྱལ་ཁབ་མི་རིགས་དོན་གཅོད་ཨུ་ཡོན་ལྷན་ཁང་གི་འཇོན་མི་ན་གཞོན་དང་དར་མ་སྐྱེད་སྲིང་བྱེད་པའི་འཆར་གཞིའི་ཁྲོད་བདམས་པ་རེད།རྒྱལ་ཁབ་མི་རིགས་དོན་གཅོད་ཨུ་ཡོན་ལྷན་ཁང་གི་འཇོན་མི་གཞོན་དར་སྐྱེད་སྲིང་འཆར་གཞིའི་ལས་གཞི་ནི《རྒྱལ་ཁབ་མི་རིགས་དོན་གཅོད་ཨུ་ཡོན་ལྷན་ཁང་གི་འཇོན་མི་གོང་སྤེལ་འཆར་བཀོད(2011ལོ་ནས2020ལོའི་བར)》ཁྲོད་གཙོ་བོར་ལག་བསྟར་བྱེད་པའི་འཇོན་མིའི་ལས་གཞི་ཞིག་ཡིན་ལ།འཇོན་མི་གཞོན་དར་སྐྱེད་སྲིང་བྱེད་པའི་འཆར་གཞིའི་དམིགས་འབེན་གཙོ་བོ་ནི2020ལོའི་བར་དུ་རིག་ཚན་སོ་སོའི་ཁྱབ་ཁོངས་ཁྲོད་གྲུབ་འབྲས་མངོན་གསལ་ཡིན་པ་དང་།རྐང་འཛིན་གྱི་ནུས་པ་ཐོན་པ།གོང་སྤེལ་གྱི་རྟིང་ཤུགས་ཡོད་པའི་རྩེ་གྲས་ཀྱི་འཇོན་མི་ན་གཞོན་དང་དར་མ་སྐྱེད་སྲིང་བྱ་རྒྱུ་དེ་ཡིན་པར་མ་ཟད།སྣེ་ཁྲིད་འཇོན་མིའི་དཔུང་སྡེ་གཉིས་པ་རུ་བཟུང་ནས་རོགས་སྐྱོར་དང་སྐྱེད་སྲིང་བྱ་རྒྱུ་རེད།
ཞར་བཀོད།ལུང་པ་དོན་འགྲུབ་ནི1978ལོར་མཚོ་སྔོན་ཞིང་ཆེན་འབའ་རྫོང་དུ་སྐྱེས་ཤིང་།   2002ལོར་ནུབ་བྱང་མི་རིགས་སློབ་ཆེན་བོད་སྐད་ཡིག་སྡེ་ཁག་ནས་མཐར་ཕྱིན་པ་དང་།2004ལོར་ཀྲུང་གོ་སྲིད་ཁྲིམས་སློབ་ཆེན་གྱི་ཁྲིམས་ལུགས་གླིང་དུ་མཐར་ཕྱིན་པ་དང་གཙོ་ཆེར་ཀྲུང་གོ་ཁྲིམས་ལུགས་ལོ་རྒྱུས་དང་།  ཉེས་དོན་གཏུག་བཤེར་རིག་པ།  བོད་རིགས་གོམས་སྲོལ་སྒྲིག་ཁྲིམས།  མི་རིགས་ཁྲིམས་ལུགས།གྲངས་ཉུང་མི་རིགས་ས་ཁུལ་གྱི་ཁྲིམས་ལུགས་འཛུགས་སྐྲུན་གནས་བབ་སོགས་ཀྱི་ཁྱབ་ཁོངས་ནང་ཞིབ་འཇུག་བྱེད་ཀྱི་ཡོད་པ་རེད།  ཉེ་བའི་ལོ་འགའི་ནང་།  《སྲིད་ཁྲིམས་གླེང་སྟེགས》དང་།  《དེང་རབས་ཁྲིམས་ལུགས》།  《མཚོ་སྔོན་སྤྱི་ཚོགས་ཚན་རིག》།  《ཀྲུང་ནན་མི་རིགས་སློབ་ཆེན་གྱི་སློབ་རའི་ཚགས་པར》།  《ནུབ་བྱང་མི་རིགས་སློབ་ཆེན་གྱི་སློབ་རའི་ཚགས་པར》(བོད་རྒྱ་སྐད་གཉིས)སོགས་ཁྲིམས་ལུགས་དམིགས་སུ་བཟུང་བའི་དུས་དེབ་དང་ཞིང་ཆེན་རིམ་པའི་དུས་དེབ་སྟེང་བོད་རྒྱ་སྐད་གཉིས་ལམ་ནས་ཁྲིམས་ལུགས་ཆེད་ལས་དཔྱད་རྩོམ30ལྷག་སྤེལ་པ་དང་།  དུས་རྒྱུན་གྲངས་ཉུང་མི་རིགས་ཁྲིམས་ལུགས་དང་སྤྱི་ཚོགས་རིང་ལུགས་ཁྲིམས་ལུགས་འཛུགས་སྐྲུན་གྱི་ཞིབ་འཇུག་བྱ་བར་བརྩོན་གྱིན་འདུག2004ལོའི་ཟླ7པར་བོད་རྒྱ་སྐད་གཉིས་ཀྱི་ཁྲིམས་ལུགས་འཆད་ཁྲིད་དང་ཚན་ཞིབ་བྱ་བ་གཉེར་བ་ནས་བཟུང་གྲུབ་འབྲས་གང་མང་བླངས་ཤིང་དགའ་རྟགས་ཀྱང་མང་པོ་ཐོབ་མྱོང་།  2011ལོར《སྤྱི་ཚོགས་རིང་ལུགས་ཀྱི་ཁྲིམས་སྐྱོང་འཛུགས་སྐྲུན་དང་བོད་ཀྱི་ཁྲིམས་ལུགས་རིག་གནས་བར་གྱི་འབྲེལ་བ་ཞིབ་འཇུག》ཅེས་པའི་ཆེད་དེབ་པར་བསྐྲུན་འགྲེམ་སྤེལ་བྱས་པར་མ་ཟད།རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་ན་གཞོན་ལས་གཞིའི་ཕུལ་བྱུང་བརྩམས་ཆོས་སུ་བདམས་པ་རེད།